Read Loma MAFIYU 14 Bible Online

MAFIYU 14 - Loma bible

MAFIYU 14

¹Nà maziɛ su masa‐zee‐wu masagi Yɛloo é faa mɛnini é vile Ziizɛ lɔwɔi va.

²É ɣɛni sa ná tii‐ɣɛɛ veaitiɛ ma, “Bataize‐ɣɛɛ Jɔ̃ ɣa na. É wu ziɣia saa ya. Nà ɣa é gaa‐ƃaa ɣɛɛ zéea ga yíɛ tii niitiɛ ɣɛ.”

³Ƃɔvɛlaale Jɔ̃ zogɛi sa ɣɛ Yɛloo vɛ é pili kpidi vɛlɛ wu Yɛloodia mazaƃu ma. Na ɣa ga Yɛloo ƃɔɔ deɣei Fele ŋazai.

⁴Su‐wulo‐zu ɣa ga Jɔ̃ ɣɛni má, “Ɛ́ lɛ tɔ su ga ŋaza nui nii ɣɛ è ya.”

⁵Tɔwɔ velei ƃalaa é ɣɛni wõi ɣɛɛzu é Jɔ̃ vaa la, é ɣɛni luozu numaitiɛ va. Toku ge zei ga natiɛ te Jɔ̃ ziɣini ga tɔ ga Gala daa woo‐wo nu.

⁶Kɛ̀ foloi te Yɛloo ɣaani ma, tei nà maʋoloi ziitini, Yɛloodia duu ŋaza nui ɣaani nu ƃulugi laa wu, ná Yɛloo yii zo.

⁷Na ma é kí toni ga woto‐levea ga zɔi nɛpɛ yá ʋa ma towaa fe zéea.

⁸Ŋaza nu lomai dee lɔɔ vele ma wũ su é ɣɛni Yɛloo ma, “Gè wõini ga Bataize‐ɣɛɛ Jɔ̃ mawũgi vɛ pelete wala zu.”

⁹Ɣalasogi maa wõini. Kɛ̀ koto‐levei é boni maa wɛ̃ɛtiɛ ɣaazu nà mazaƃu ma é deʋeni é da numaitiɛ ya ga te Jɔ̃ mawũgi ʋe lopoi ya.

¹⁰É keela leveni sa te Jɔ̃ wũ teve kpidi vɛlɛi wu.

¹¹Te vaani ga mawũgi peletei zu te fe ŋaza nu lomai ya, tɔ wɔ é lii la dée wɔ.

¹²Jɔ̃ wulu veaitiɛ te vaani sa te mawomai ziɣi te doowu. Te li sa te bo Ziizɛ ma.

¹³Tei Ziizɛ wɔ ge nii mɛnini, te vilini ziɛ‐ɣa‐ŋee su te wulo ná va te li ŋada ta ná ƃu ta letele. Kɛ̀ tei kpɔgi mɛnini, te wuloni taitiɛ zu te vile púlu tiɛ ziɛ wɔwaa.

¹⁴Kɛ́i ma sa liizu kake ma, é wɛlɛni kpɔ kpakpa va. Te ɣaazu‐maa‐wõi soni é zɛba sa é seeƃɛ veaitiɛ valo.

¹⁵Tei sa é ɣɛni ga kpɔkɔ, kala dopoitiɛ te vaani pɔ́ te ɣɛ má, “Vɛ ɣa ga ŋadɛi nu lɛ na. Tɔwɔ foloi liai sa. Kpɔgi leve te li kpaƃaitiɛ zu te daa‐mii ŋɛni ɣeea ƃɔɔ ʋaa ma.”

¹⁶Ziizɛ ɣɛni te ma, “Ɛ́ lɛ dɛ ga kɛni ta ziɣi vɛ te li. A ŋɛni ʋe te ya te mi.”

¹⁷Kala dopoitiɛ te ɣɛ ma, “Kpoolo‐ʋɔɔ looluo nɔ ɣa é gé ya vɛ é vɛɛ feza felegɔ va.”

¹⁸Ziizɛ ɣɛ tea, “A va ga tiɛ vɛ pɔ̀.”

¹⁹É boni sa kpɔgi ma ga te zei gui zu. É zɛba do é kpoolo‐ʋɔɔ looluoi ziɣi ta feza felegɔi é ɣaazu lɛ gee zu é mama fe Gala bɛ é kpoolo‐ʋɔɔ ƃumei zu ɣale‐ɣale é fe kala dopoitiɛ ya. Kala dopoitiɛ wɔ te fe sa kpɔgi ya.

²⁰Te pɛ te miini te vile. Kpoolo‐ʋɔɔ vɛnɛi é wuloni na wulu te zɛvɛni é kpɔlɔ puugɔ kai felegɔ laa ʋe.

²¹Taitiɛ te miini tɔ zoo te ziiti nu wulu dooluo zu, ŋazaitiɛ ƃɔga lopaitiɛ te ziɣiai ba.

²²Ziizɛ kɛɛni sa ná kala dopoitiɛ te vili kẽe su te ziɛi leve te li túo ga zɔlaavɛ vele, tɔwɔ é kpɔgitiɛ leve sa wɔ taa zu.

²³Tei sa é kpɔgi leveni wɔ taa zu, é lɛɛni gizigi ma tɔ ɣilekpu ga é Gala feli. Tei kpɔkɔ ziitini, tɔ ɣilekpu ka é ɣɛni na.

²⁴Kɛ̀ nii maziɛ su kẽegi maa woozai sa ɣɛ é ziɛi zaama. Ziɛ ɣiligi ɣɛni dowa‐lowasu, toku ge zei ga fãgai ziɣini ga te luo vele yíɛ zei te va.

²⁵Tei sa é ɣɛni ga gusu laa yɔɔzu, Ziizɛ ɣɛni ziɛzu ziɛi ɣa yíɛ va te wɔ vɛ.

²⁶Kɛ̀ tei kala dopoitiɛ te wɛlɛni bá yíɛ ziɛ ziɛi ɣa, te zuwuni te va tiɛ ɣɛ tea, “Gɔʋɛ ve.” Te loba sa ga duo.

²⁷Kɛ̀ é ƃɔɛni te wɔ ga maa ʋilea yíɛ ɣɛ tea, “A mɛ lɛ yii wulo va. Nà vee de. A mɛ lɛ luo.”

²⁸Pite wɔ ge gói ɣaa woteni sa yíɛ ɣɛ ma, “Màliɣii, ani yà ve, bo mà gè va è wɔ vɛ ziɛi ɣa.”

²⁹Ziizɛ ɣɛ ma, “Va.” Na ma Pite wuloni kẽegi zu é vile ziɛi ɣa yíɛ li Ziizɛ wɔ vɛ.

³⁰Kɛ̀ tei é wɛlɛni fãgai vaa velei va, é ɣɛni luozu. Nà wɔ ge ɣɛɛni nɔ é vɛɛ sa ga lɔɔ ziɛi wu. É zɛba é loba yíɛ ɣɛ tea, “Va bɛ̀, màliɣii.”

³¹Ziizɛ zɛba sa é yee zakpa é so é ɣɛ ma, “Yài ŋɛ ni zee‐la‐ma vɛnɛi è ya, zɛƃɛi é kɛɛ zakpe gìɛ ɣɛ è yii zu?”

³²Tei sa te vilini kẽegi zu, fãgai ƃɔlɔni ga vaa.

³³Taitiɛ te ɣɛni kẽegi zu te vɛɛni kɔ́wɔ wu tiɛ ɣɛ ma, “Ƃɔɔƃɔɔ su yà ga Gala duu.”

³⁴Tei sa te ziɛi leveni, te lɛɛni kake ɣa Gɛnɛsɛlɛ yui zu.

³⁵Tei minɛ veaitiɛ te kwẽeni, te keela leveni ná ligi zu wɔlɔ‐kɔlɔ ma ɣaali te va ga seeƃɛ veaitiɛ ɣaazɔ.

³⁶Na ɣa ɣɛɛ na te Ziizɛ maa nɛɛnɛni ga te ʋowũ nɔ ná seɣei mayifegi va. Tɔwɔ nu liigoitiɛ nɛpɛ te ʋowũni ba te valoni.