Read Loma MAFIYU 15 Bible Online

MAFIYU 15 - Loma bible

MAFIYU 15

¹Tei na ɣɛɛni, Favilesiitiɛ ƃɔga tɔ‐dɛɛ ɣala‐mɔitiɛ te wuloni Yɛlusulɛɛ te va Ziizɛ wɔ te ɣɛ ma,

²“Zɛƃɛ ɣa é kɛɛ yà ɣala dopoitiɛ tɛ lɛ ziɛzu ga nu wɔlɔ‐zaɣagitiɛ yaa ʋaitiɛ? Ƃɔvɛlaale ta ɣɛ na laa miizu tɛ lɛ yaa wua ga te maa mɛ lɛ woola.”

³Ziizɛ te woi ɣaa woteni é ɣɛ te ma, “Zɛƃɛi é kɛɛ wo Gala na tɔgi ŋala‐ŋalasu wo yaa ʋai mazaƃu ma?

⁴Ƃɔvɛ‐laale Gala ge boni é ɣɛ tea, ‘Wũfe è ɣeea ma ta è lee.’ Na ɣa ɣɛɛ na ‘Nui nɛpɛ yá faa yowũ wo ga kéea la ta dée, ƃe ba manui za ga gaama.’

⁵Kɛ̀ wa bosu ga ani nu ɣa bo na kéea ma ɔɔ é bo dée ma ga ‘Nii pagɛi ɣɛ è maa zɔlɔ wo zèea féevɛ Gala zèea,’

⁶ɛ́ lɛ sa ɣɛɛ ga manui maƃala ga é wũfe kéea ma. Na ma wo Gala daa woi ɣɛɛ ga faa yãka wo yaa ʋai mazaƃu ma.

⁷Wai ŋɛ ni wo ga daa‐nɛɛ‐wũ‐ba vea, Aizeea woi ɣɛni ƃɔ pa pele ma fai nii zu é zɛni na luo é bo ga wo la yíɛ bo ga Gala ka ɣɛɛzu tea,

⁸‘Numai niitiɛ ta wũfesu mà ga te laa vele‐zuvɛ, kɛ̀ te ɣigi maa woozavɛ bà.

⁹Ta nɔ fèlizu ƃɔɔvɛ tiɛ numaa ɣala bo ga nu ƃuse yaa lɔgi è ɣɛ yá ɣɛ ga deʋei kuloai zèea.’

¹⁰Ziizɛ numaitiɛ lilini te li pɔ́ vɛ é ɣɛ te ma, “A mɛni wo gaa ɣa.

¹¹Ɛ́ lɛ ga nii yá lɔ nu la, nà ɣa a nu maa woola. Kɛ̀ tɔ ga nii yá wulo nu la. Nà ɣa yá nu maa woola.”

¹²Kala dopoitiɛ te vaa vele ɣa na ɣɛ te ɣɛ ma,“? È ɣi ka su ga tei Favilesiitiɛ te nii mɛnini é wãlani te ma?”

¹³É te woi ɣaa woteni é ɣɛ tea, “Sii‐zii ŋɛnii nɛpɛ kèeai nii é gee‐zuvɛ ɛ́ lɛ seini, mazii‐zii ŋɛnii lɔɔ ɣa wulo.

¹⁴A ƃe te va. Ta ga gaazu‐wele vele‐wulo vea. Tɔwɔ ani gaazu‐wele nu ɣa ɣɛ na pele wulozu ga bɔɔ ɣaazu‐wele nu, te felegɔ pɛ ta loo zeɣe zu.”

¹⁵Kɛ̀ Pite ɣɛni Ziizɛ ma, “Sakpegi zu wulo gé ma.”

¹⁶Ziizɛ ɣɛni te ma,“? Wa ƃalaa pɛ wa dɛ ga faa‐ɣaa‐ɣaa lala vea?

¹⁷?Wɛ lɛ kwɛ̃ni ga nii yá lɔ nu la towaa leve é yii kúu zu é yɛ levesu é yɛsu é wulo?

¹⁸Kɛ̀ nii yá wulo nu la towaa yá wulo zíi zu. Nà wɔ ka yá nu maa woola.

¹⁹Ƃɔvɛlaale nu yii zu ɣa tuƃo‐vele‐yowũ‐wulo ɣi‐gaa‐ziɛ ɣa wulo na. Ná ɣa nu‐vaa ʋaa ɣa wulo na. Zini‐bɛ nu ɔɔ ŋaza keea nu, ná ɣa ta wɛ̃ɛ‐ziɛ‐bo fai ɣa wulo na. Ná ɣa kui‐yɔɔzu wɛ̃ɛ‐yeke‐kɛɛ ʋaa ɣa wulo na, wũmɔ‐wo faa yíɛ wulo na, zɛɛ ʋaa zeele woo‐ʋee ʋaa yíɛ wulo na, nu laa ŋala‐ŋala daa‐wo‐boga yíɛ wulo na.

²⁰Natiɛ ɣa ta nu maa woola. Kɛ̀ nu laa mia ga yaa nɔwɔ, nà lɛ nu maa woolaga.

²¹Ziizɛ ziɣini na é li Taalɔ ligi zu ta Saidɔ̃.

²²Nà ɣɛɛzu Keena ŋaza nu ta ɣɛni ná kúloai ná ligi zu, é wuloni ŋetea yíɛ bo ga doba yíɛ ɣɛ tea, “Gàazu‐maa‐wõi ɣa, ee kèea, Deeve dui. Gɔʋɛ yowũ wala ɣatagɛ dùu ŋaza nui wulu.”

²³Kɛ̀ Ziizɛ lɛ gói ɣaa woteni ga woo ta nɛpɛ. Ná kala dopoitiɛ te va sa tiɛ pee ʋe bɛ́ tiɛ ɣɛ má, “Bo má é li, ƃɔvɛlaale tɔ de wulu yíɛ loba.”

²⁴É gaa woteni é ɣɛ tea, “Tèvegɛ nɔ niitiɛ wɔ te Yezɔi vɛlɛi wu te maʋaa wuloai ga baalagitiɛ te viligɛi.”

²⁵Kɛ̀ ŋaza nui vaani é vɛɛ Ziizɛ laa wu yíɛ ɣɛ tea, “Kèea, ƃɔ bà.”

²⁶Ziizɛ ɣɛ ma, “Ɛ́ lɛ ga gaama ga nu é lopaitiɛ ta laa‐mii ŋɛnii ziɣi é pili gilewua vɛ.”

²⁷Ŋaza nui ɣɛ ma, “Ooi, kèea, Na ƃalaa ɣɛɛvɛ daa‐mii ŋɛni vɛnɛitiɛ ta wulo gile keea nui na teevei ɣa te loo, gilewuitiɛ ta nà mi.”

²⁸Ziizɛ goi ɣaa woteni é ɣɛ ma, “Kwoo, ŋàza nu! Yà yee‐la‐mai wala wɔɔlɔvɛ! È ɣɛ velei è wõini la towaa ɣɛ ŋɛ na yìɛ.” Dúu ŋaza nui valo sa ga maa ʋilea.

²⁹Ziizɛ ziɣini na é leve ga Geealali yiɛi wukũigi va vele é lɛ gizigi ma é zei na.

³⁰Kpɔ kpakpa vileni púlu te va ga tɔbɔ‐zu‐ba vea, è ɣɛ velei mɛlɛ‐ŋɛlɛ bea te la, gaazu‐wuu vea, ta mumuga é vɛɛ zɔitiɛ lamaa va. Te te wuuni Ziizɛ wɔwɔ wu é te valo.

³¹Na ma tei kpɔgi wɛlɛni tɔbɔ‐zu‐ba veaitiɛ va faa lɛ ŋɛni sa te va, é wuloni ga tiɛ ga kpakpaa. Na ɣa ga è ɣɛ velei te wɛlɛ la mumuga va tiɛ yɛpɛ, mɛlɛ‐ŋɛlɛ bea tiɛ ziɛ, gaazu‐wuu vea tiɛ wɛlɛ. Te Yezɔitiɛ ta Ɣalagi laa maa lɛɛni.

³²Ziizɛ é ná kala dopoitiɛ lilini é ɣɛ te ma, “Kpɔgi ɣaazu‐maa‐wõi ɣa mà, ƃɔvɛlaale te kɛɛ sa bà ga folo saagɔ, ŋɛni nɛpɛ pɔ gɛ lɛ te ya tɔ mi. Tɔwɔ ɛ́ lɛ laani zìi ma ga gè te leve te li ga pulu, te mɛ lɛ va vatasu pelei ma.”

³³Kala dopoitiɛ te ɣɛni ma, “Minɛi da kpoolo‐ʋɔɔ zɔlɔ wo na zuu ʋɔi zu é kulo‐ɣɛɛ wo ga de nii ɣavele ƃɔ kpakpai wɔ̃nɔ kulo?”

³⁴Ziizɛ ɣɛni te ma, “Kpoolo‐ʋɔɔ ƃume liide ɣa é wo ya?” Te ɣɛ ma, “Dɔfela vɛɛ feza pɛlɛ‐vɛlɛ gile‐gilega va.”

³⁵Ziizɛ boni kpɔgitiɛ ma ga te zei zuwãvɛ.

³⁶É kpoolo‐ʋɔɔ lɔfelai ziɣini é vɛɛ fezagitiɛ va. Tei sa é mama feeni Gala bɛ, é te zu ɣale‐ɣaleni é te ʋe kala dopoitiɛ ya. Kala dopoitiɛ wɔ te te ʋe kpɔgi ya.

³⁷Te pɛ te miini te vile. Maƃulu‐kpulugi é wuloni na wulu, nà kpɔlɔ dɔfela laa ʋe.

³⁸Taitiɛ te miini te ɣɛni ga nu wulu naagɔ, ŋazaitiɛ ƃɔga lopaitiɛ te ziɣiai ba.

³⁹Tei é kpɔgitiɛ leveni ga te li, é vilini ziɛ‐ɣaa ŋee su é li Magadã ligi zu.