Read Loma MAFIYU 17 Bible Online

MAFIYU 17 - Loma bible

MAFIYU 17

¹Tei sa folo lɔzita wuloni su, Ziizɛ Pite ziɣini ta Jĩi é vɛɛ Jĩi deɣei Jɔ̃ va é lɛ ga tiɛ ta letele gizi gwala ta ma gwala logɛi.

²Na ɣa ɣɛɛ na Ziizɛ maa ʋelini te ɣaazu. Gáazuvɛ ɣɛni ʋolozu è ɣɛ folo, ná seɣei yìɛ wele è ɣɛ ŋɛni maʋolo.

³Na ɣɛɛzu Mooze vɛɛ Yiilaija va te wulo te ɣaazu tiɛ yɛpɛ Ziizɛ wɔ.

⁴Pite ɣɛ sa Ziizɛ ma, “Màliɣii, de ɣɛɛ ʋai vɛ gáa nɛɛvɛ. Ani yà wõi na, gà kwɔta saagɔ lo vɛ, gila ge ɣɛ è ʋaa ma, gila ge Mooze ʋaa ma, gila ge Yiilaija ʋaa ma.”

⁵É ɣɛni dɛ nɔ ƃɔɛzu, na ɣɛɛzu tine ƃili folo‐ʋolo ge yii é te maa ƃoale. Woo ta lɛ sa tine ƃiligi zu yíɛ ɣɛ tea, “Nii ɣa é ga ẁõila lui, nii zìi wala lai máʋai vɛ. A wui to góo ma.”

⁶Tei kala dopoitiɛ te nii mɛnini, te vɛɛni ga duo ƃakpa.

⁷Kɛ̀ Ziizɛ vaani é ʋowũ te va yíɛ ɣɛ tea, “A wu ziɣi. A mɛ lɛ luo.”

⁸Tɔwɔ tei te wũ bu ziɣini, tɛ lɛ wɛlɛni nu ta nɛpɛ ba é wulo Ziizɛ wulu.

⁹Tei sa te ɣɛni gizigi yiizu, Ziizɛ te lɛnɛni yíɛ ɣɛ te ma, “Vɛ ná wua wo ɣaazu, a mɛ lɛ ta wo nu ma é yɛsu Gala ge nu ƃuse lui wu ziɣi saa ya.”

¹⁰Kala dopoitiɛ te gáa zaɣa kɛɛni sa te ɣɛ ma, “Zɛƃɛ mu ka sa é kɛɛ tɔ‐dɛɛ ɣala‐mɔitiɛ te bo ga kɛni dɛ Yiilaija ɣa va ɣaʋu pa?”

¹¹É gaa woteni é ɣɛ te ma, “Yiilaija ɣa vaazu. Towa yá fai pɛ da daa‐zu.

¹²Kɛ̀ gè bo wiɛ, Yiilaija vaa sa ʋɔlɔ, tɔwɔ tɛ lɛ kwɛ̃ɛni. Kɛ̀ nii nɛpɛgi é laani te yii ma towaa te kɛɛni la. Vele nɔ na nu ƃuse lui ɣa laa nɔwɔ wo da te ya.”

¹³Kala dopoitiɛ te kwɛ̃ɛni sa ga é ɣɛni ƃɔɛzu te wɔ é vile Bataize‐ɣɛɛ Jɔ̃ va.

¹⁴Tei te vaani kpɔgitiɛ wɔ vɛ, zunu ta vaani Ziizɛ wɔ é vile ŋibia dáa wu. É ɣɛni ma,

¹⁵“Kèea, dùu zunui ɣaazu‐maa‐wõi ɣa. Ƃɔvɛlaale ʋeli‐ʋeli ka bá, na ɣa ɣɛɛ na tɔ laa nɔwɔ wosu ga ná maa‐yiki pele. Towaa loo ŋabu ɣa ti‐ti, yíɛ loo ziɛ wu ti‐ti.

¹⁶Tɔwɔ gè vaani la, yà ɣala dopoitiɛ tɛ lɛ zooni tɔ bálo.”

¹⁷Ziizɛ gaa woteni é ɣɛ tea, “Ee zei‐zaa vea. Zee‐la‐ma lɛ wo ya, wo wui zu ƃɔlɔgɛi. Debi tiigo zɛbɛ ɣa pagɛi gè bo wo woba? Debi tiigo zɛƃɛ ɣa pagɛi gè bo laa zeizu la faa wu wo ya? A va ga zunu lomai pɔ̀ vɛ.”

¹⁸Ziizɛ zɛba sa é yii ɣaa wãla gɔʋɛ yowũi ma, nà ziɣi zunu lomai wulu é valo sa ƃɔɔ nɔ.

¹⁹Kala dopoitiɛ te vaani Ziizɛ wɔ ta letele ŋada laa te ɣɛ ma, “Zɛƃɛi é kɛ gɛ́ lɛ zooni gɔ́ gɔʋɛ yowũi ƃɛ púlu?”

²⁰Ziizɛ ɣɛni te ma, “Ƃɔvɛlaale zee‐la‐mai é wo ya pɛ́nɛvɛ. È ɣɛ zee‐la‐ma wolo ɣa ƃalaa wo ya è ɣɛ velei ‘mɔsita’ wului maɣai liigoi la, wɔ zoo wo ɣɛ gizigi nii ma, ‘Wu ziɣi è li munu.’ Tɔwɔ ɔ́ nɔ ziɣi na. Nà wɔ ka ɣɛɛ na, faa nɛpɛ gɛ lɛ ƃaa wo yee wu. [

²¹Tɔwɔ nu lɛ wɔlɔ‐wɔlɔ nii ɣavɛlɛ wɔvɛi ƃɛɛ nu wulu, keni é kɛ́ Gala‐felia ƃɔga zi‐dɔɔ maazu.”]

²²Tei sa te ɣɛni ɣaa lɛɛzu ba Geealali, Ziizɛ ɣɛni te ma, “Ta vaazu bu ƃuse lui yee laazu nu ƃusea ya.

²³Na ɣa ɣɛɛ na ta páa. Tɔwɔ Gala ka bú ziɣi saa ya ga foloi sava kelei.” Ná kala dopoitiɛ maa wõini ga ʋikɛ.

²⁴Tei te vaani Kapɔɔnia, naʋolo‐wulo veaitiɛ te vaani te ɣɛ Pite ma,“? Wa ɣala‐mɔi lɛ naʋoloi ta ʋeea Gala‐feli wɔta walai ʋaa ma?”

²⁵Pite ɣɛni te ma, “Ƃa! Towaa fe.” Tɔwɔ tei sa é liini pɛlɛ wu, Ziizɛ ƃɔɛni pɔ́ ɣaʋu pa. É ɣeni ma, “Saimɔ, yà ɣi‐gaa‐ziɛi ɣa ga zɛƃɛ? Ƃɛni ka zui‐ɣa ɣalasoga ta gɔmɛti naʋolo wulo te ya ɔɔ yiiti‐wulo naʋolo? Ta ƃɔɔ numaitiɛ ve ƃaa nu ƃalaaga ve?”

²⁶Tei é ɣɛni tea, “Ta kulo nu ƃalaaga ya,” Ziizɛ ɣɛni ma, “Ka dɔ kɛ mu ta ʋee ʋaa lɛ te ƃɔɔ numaitiɛ va.

²⁷Na pɛ ge ɣɛɛvɛ nii yá kɛ te wãla‐ma ʋaa lɛ ɣɛɛ, li ziɛ walai ma è kala too bu. Feza maa wũgi yà kulo, siɣi è daa lao. Yà wɛlɛ naʋolo va dá. Naʋoloi ƃɔɔ ziɣi è lii la te wɔ da ya de ʋaa ma.”