Read Loma MAFIYU 18 Bible Online

MAFIYU 18 - Loma bible

MAFIYU 18

¹Nà maziɛ su kala dopoitiɛ te vaani Ziizɛ wɔ te ɣɛ ma, “Ƃɛ ɣa tevegɛi nu pɛ ba Gala ta masadai zu?”

²Nà wɔ ge zɛba é lopo wolo lili é pile te zaama.

³É ɣɛni te ma, “Gè bo wiɛ ga gaama, kɛni wa wote wo ɣɛ ga lopaa ɣavele. Na laale wɛ lɛ wɔlɔ‐wɔlɔ lɛɛ Gala ta masadai zu.

⁴Nui nɛpɛ yá wolo è ɣɛ velei lopoi nii la, manui ɣa tevegɛi baa pɛ ba Gala ta masadai zu.

⁵Nui nɛpɛ yá yee zei nii ɣavele lopo woloi ta wu nà daa‐zeigi zu manui yee zeiya bù.”

⁶Ziizɛ ɣɛni tea, “Kɛ̀ lopa woloi niitiɛ te màʋaa ziɣia ga gaama, nui nɛpɛgi yá kɛ ta ziɣi pele va, ɔ́ ɣɛ ga faa vagɔ manui ʋaa ma ga é kwɔti vii‐vii gili wɔgi va é li é vili yuwu zuwu‐zuvɛ.

⁷Kpalo velivɛ zui ma tɛ‐gai ʋaa ma ga nu ziɣi pele va! Kɛni tɛ‐ga ʋai ɣa va, kɛ̀ kpalo velivɛ nui nii ma yá va ga maʋai!

⁸Tɔwɔ ani è yee ɔɔ è wɔwɔi ɣa ɣɛɛzu ga zaƃu ga è ziɣi pele va, teve va è pili ya. Tɔ ga faa vagɔ è ʋaa ma ga è ɣɛ ŋeteai zu é vaazu vaazu ga nui zée leveai kɔ́wɔ leve é leve è yee felegɔi ɣaa wooliga va ɔɔ è wɔwɔ felegɔi ɣaa wooliga te è vili ŋabui nii zu maʋaa wɛ̃ɛ gɛ lɛ ba.

⁹Ani wɔnɔ è ɣaazu ɣɛzɛgi ɣa ɣɛɛzu ga zaƃu ga è ziɣi pele va, kulo na è pili ya. Tɔ ga faa vagɔ ga è ɣɛ ŋeteai zu é vaazu vaazu ga ɣaazu ɣile é leve è ɣaazu ɣɛzɛ felegɔi pɛ zɛga va è wũ ba te è vili daa‐nɔwɔ‐wo ŋada laavɛ maŋabui zu.

¹⁰Ziizɛ ɣɛni tea, “A wɛlɛ ná va wo ɣaazu mɛ lɛ wudɛ lopa woloi niitiɛ te ta maazu. Gè bo wiɛ te maa‐ƃɛɛ Ɣala ta ɣeelaitiɛ ta wɛlɛzu wɔ kèea Gala gaazu va é gee wɔlɔgi zu. [

¹¹Ƃɔvɛlaale nu ƃuse lui vaani ga é niitiɛ valo te viligɛi.]

¹²Wa ɣi‐gaa‐ziɛi ɣa ga zeƃɛ? ?Ani baala wũ gila ka ɣɛ na nu ya gila ge ɣaka, ɛ́ lɛ ƃega zee taawuo kai taawuoi va gizigi ma, nii katagɛi ɔ̀ ɣɛ nà ʋo‐fo wulozu su?

¹³Gè bo wiɛ, ani yá pɛtɛ na, ƃɔɔƃɔɔ su towaa mawuu‐zu‐nɛɛ wulo é leve zee taawuo kai taawuoi niitiɛ va tɛ lɛ ɣakani.

¹⁴Na ma wo ɣeeai nii é gee wɔlɔgi zu ɛ́ lɛ ga zii‐ma ga lopa woloi niitiɛ te ta zu ƃɔnɔ wo.

¹⁵“Ani è wɔɔ nu ɣa faa yowũ ɣɛɛ na ga yìɛ, li è kɛɛ‐zɔgi zu wulo má wa tɔ wo felegɔ nɔ wo yɔɔzu. Ani yá wui to na è woo ma, a kɛ tii è è wɔi na maa zɔlɔ woga wulu.

¹⁶Ani ɛ́ lɛ ɣɛ wui toni è woi ma, nu ɣila ɔɔ felegɔ ziɣi te vɛɛ è va kɛɛ ʋaa ma woi nɛpɛgi yá wo púlu ƃaa seele felegɔ ɔɔ saagɔ woo ma.

¹⁷Ani ɛ́ lɛ ɣɛ kɛɛni ɔ́ wui to te woo ma, bo Gala pɛlɛi ma. Ani wɔnɔ ɛ́ lɛ ɣɛni ƃalaa wui toni Gala pɛlɛi woo ma, pagɛ è siɣi ga zii ƃalaa è siɣi wɔnɔ ga gɔmɛti naʋolo‐wulo nu.

¹⁸“Gè bo wiɛ ga gaama, nii nɛpɛgi wa gili zui ɣa towaa ɣili Gala ta. Nii nɛpɛ wa fũi zui ɣa towaa ʋũi Gala ta.

¹⁹Gè bo wɔnɔ wo ma, ani nu felegɔ ɣa zei na ma wo zu zui ɣa te faa wo é vile faa ta va te Gala feli maʋaa ma, kèea Gala nii é gee wɔlɔgi zu towaa kɛ te vɛ.

²⁰Toku ge zei ga vɛ nɛpɛ nu felegɔ ɔɔ saagɔ ɣa ɣaa lɛɛ na ba nà daa‐zeigi zu, gà ɣɛ na te zaama.”

²¹Pite vaani é ɣɛ Ziizɛ ma, “Màliɣii, bɔ̀ɔ nu ɣa ɣɛ na faa yowũ ɣɛɛzu gàazu, gà su‐ʋaa‐yɛda ɣɛ liide? ?Gà ná zei‐zu ɣɛ lɔfela?”

²²Ziizɛ ɣɛ ma, “Gɛ̀ lɛ ŋɛni è ma ná zei‐zu ɣɛ lɔfela. Kɛ̀ ná zei‐zu ɣɛ ga zee lɔfela‐lɔfela sei‐zu lɔfela.

²³Na ma Gala ta masadai maʋaa wulovɛ ga masagi nii é ɣɛni wõizu ta ná tii‐ɣɛɛ veaitiɛ te kwéligitiɛ maʋaa ɣaa zei.

²⁴Tei sa é kweligitiɛ zu‐zeiya lɔɔ zeini, te vaani ga nu ta pɔ́ ná kui má ga naʋoloi máʋaa zu wɔɔlɔi ɣɛ ma é teve kɛɛ‐zu va.

²⁵Tei tɔwɔ ɛ́ lɛ ƃega zoo ɔ́ kui wulo, ná nu keea nu deʋeni ga te sɔ̃wɔ wulo é vɛɛ ŋázai va ta dea é vɛɛ nii ɣaazɔ va é ɣɛni zéea, kɛɛ ʋaa ma é kui wulo.

²⁶Na ma tii‐ɣɛɛ nui vileni ŋibia yíɛ máa nɛɛnɛ yíɛ ɣɛ ma, ‘Yii lɔ zèea. Gà vaazu kui ɣaazɔ wulozu.’

²⁷Tii‐ɣɛɛ nui nii ɣaazu‐maa‐wõi vele ma, ná nu keea nu ƃeni ba é kui zu ʋaa yɛ bɛ́.

²⁸Kɛ̀ tei tii‐ɣɛɛ nui na ɣɛni liizu, é wũ kuloni bɔi ta ma ná kui manui ma ga dala zee felegɔ. É kpaloni kɔ́ da é ɣɛ ma, ‘Nii é è ma ga kui, fe.’

²⁹Bɔ́i loo vele ɣa na ɣɛ kɔ́wɔ wu yíɛ pee ʋe bɛ́ yíɛ ɣɛ ma, ‘Yii lɔ zèea. Gà vaazu yà wui wulozu.’

³⁰É sakpeni. É liini é nà vili kpidi vɛlɛ wu ga é yɛ na é kui wulo.

³¹Tei báa lii‐ɣɛɛ veaitiɛ te wɛlɛni nii va é ɣɛɛni, é lɔɔni te va ga kpakpaa. Nii nɛpɛgi sa é ɣɛɛni, te li te su wulo ta nu keea nu ma.

³²Nà zɛba é tíli sa é ɣɛ ma, ‘Yài ŋɛ ni è wuu zu ƃɔlɔi, gè kui ɣaazɔ zu ʋaa yɛni è vɛ, ƃɔvɛlaale è pee ʋeeni bɛ̀.

³³?Ɛ̀ lɛ ƃega è wɔi ɣaazu‐maa‐wõi ɣa è ɣɛ velei gè è ɣaazu‐maa‐wõi ɣaani la?’

³⁴Zii‐ɣaa‐wãla maazu sa ná nu keea nu zée laani kpidi vɛlɛ la veaitiɛ ya ga é yɛ na é kui ɣaazɔ wulo.

³⁵Vele nɔ na kèea Gala é gee wɔlɔgi zu yá kɛɛ la ga waitiɛ nɛpɛ wɛ lɛ kuloa yii zu ga wo wo wɔɔ nu zu ʋaa yɛ.”