Read Loma MAFIYU 19 Bible Online

MAFIYU 19 - Loma bible

MAFIYU 19

¹Tei Ziizɛ woloni ga fai niitiɛ wo, é ziɣini Geealali é li Yudiiya yui zu ligi zu ziɛ walai Jɔdɛ̃ wuluvɛ vele.

²Kpɔ kpakpa wala vileni púlu é te valo na.

³Favilesiitiɛ te vaani sa pɔ́ te su wɔ̃ɔ ga gaa‐zaɣa‐kɛɛ vele tiɛ ɣɛ ma,“? Ani nu ɣa ɣɛlɛ na ŋáza va zaƃu ta nɛpɛ ma ɛ́ lɛ ga tɔ kãla‐ŋalaga?”

⁴Ziizɛ te woi ɣaa woteni é ɣɛ te ma,“? Wɛ lɛ dɛ dodoni Gala kɔlɔi zu ga é ziɣi ƃɔɔ tɔɔ‐zei ʋolo ma, ŋɛni‐pɛ‐kpɛtɛ nui zunu ƃɛtɛni ta ŋaza nu?

⁵Na ɣa ɣɛɛ na é bo ga ‘Nii mazaƃu ma zunu ɣa ƃe kéea va ta dée é ɣata ŋázai va. Na ɣa ɣɛɛ na te felegɔ te ɣɛ ga ŋɛni ɣila.’

⁶Tɛ lɛ sa wɔlɔ‐wɔlɔ ga nu felegɔ, kɛ̀ ta ga nu ɣila nà mavelei ma. Na ma nii Gala ge pua kii ma máa lɛ nɛɛni nu nɛpɛ gɔ gaa wɛɛ.”

⁷Te ɣɛni sa Ziizɛ ma, “Zɛƃɛ mu ka é kɛɛni Mooze é deʋe é da de ya ga nu ɣa kɛlɛ‐ba wɔlɔ ʋe ŋazai ya, na ɣa ɣɛɛ na é ƃe sa bá?”

⁸Ziizɛ ɣɛni te ma, “Wa wui‐zu‐ƃɔlɔ fai ɣa é kɛɛni Mooze ʋa bu wo ya ga wiɛ ƃe wo ŋazaitiɛ va. Kɛ̀ é ziɣi ƃɔɔ ŋetea lɔɔ‐zei ʋolo ma ɛ́ lɛ ŋɛni ŋɛ na.

⁹Tɔwɔ gè bo wiɛ, nui nɛpɛ yá ŋaza loo ya é wulo wɛ̃ɛ‐ziɛ‐bo faa wulu ŋázai vɛ, na ɣa ɣɛɛ na manui zɛba é ŋaza nu ƃɔnɔ kulo, a kɛ tii manui wɛ̃ɛ‐zo tɔgi ŋala‐ŋalaga.”

¹⁰Ná kala dopoitiɛ te ɣɛni sa ma, “Ani vele ɣa na zunu ƃɔga ŋazai te yɔɔzuvɛ ʋai la, a kɛ tii ŋaza‐wulo ʋai mawulo‐nu‐ma lɛ zunu vɛ.”

¹¹Kɛ̀ é ɣɛni te ma, “Zunui pɛ ge lei yá yee zei kala‐bogi nii wu, kɛni nɔ niitiɛ mazobo feeai te vɛ.

¹²Ƃɔvɛlaale sɛɛɣɛ vea ta na te te ɣa nɔ te zɛɛɣɛi, sɛɛɣɛ vea te wɔnɔ na te zɛɛɣɛi nu ƃuse vɛ. Sɛɛɣɛ vea ta na te ga numai niitiɛ te ƃɔɔ ɣɛɛ ga sɛɛɣɛ vea Gala ta masadai mazaƃu ma. Nui nii zobo ge bɛ́ ga é yee zei nii wu, pagɛ é yee zei bu.”

¹³Te vaani sa ga lopaa Ziizɛ wɔ ga é yee vɛɛ te wũmɔ é Gala feli. Kala dopoitiɛ te yii ɣaa wãlani te ma.

¹⁴Kɛ̀ Ziizɛ ɣɛni te ma, “A ƃe lopaitiɛ va te va wo mɛ lɛ ƃesa te luo. Ƃɔvɛlaale te ɣavelei ɣa Gala ta masadai te ʋaa ma.”

¹⁵É yee vɛɛni sa lopaitiɛ wũmɔ é ziɣi na é li.

¹⁶Zunu ta vaani Ziizɛ wɔ vɛ é ɣɛ ma, “Kala‐mɔi, faa vagɔ zɛƃɛ ɣa pagɛi gè kɛ kɛɛ ʋaa ma gè zɛʋui nii zɔlɔ wo kwɛ̃ɛ gɛ lɛ ba?”

¹⁷Ziizɛ ɣɛni ma, “Zɛƃɛi é kɛɛ yìɛ gàa zaɣa kɛ é vile fai nii va pagɛi? Nu ɣila ka é na é ga nu vagɔ. Ani è wõini è ɣɛ ŋeteai nii zu é vaazu vaazu, ziɛ ga Gala na tɔgitiɛ.”

¹⁸É ɣɛ Ziizɛ ma, “Tɔ sɛƃɛ?” Ziizɛ wɔ ge ɣɛ ma, “Mɛ lɛ nu vaa. Yài è ga ŋaza keea nu ɔɔ yài è ga zini‐bɛ nu, mɛ lɛ wɛ̃ɛ zo. Mɛ lɛ wũmɔ wo. Mɛ lɛ zɛɛ ʋaa zeele woo ʋe.

¹⁹Wũfe è ɣeea ma ta è lee. Na ɣa ɣɛɛ na è wõi ga è wɔɔ nu è ɣɛ velei è ƃɔɔ wõini la.”

²⁰Zolopoi ɣɛ ma, “Gè zia ga tɔgi niitiɛ ɣaazɔ. Zɛƃɛ ɣa é yɛga na wulu gè lɛ kɛɛni?”

²¹Ziizɛ ɣɛ ma, “Ani è wõini maa‐wulo‐zu mɛ lɛ ɣɛ è maʋai va, li niitiɛ te ga è weligi è te zɔ̃wɔ wulo è te mazɔ̃wɔi ʋe maa‐wõi vea ya è weli ka ɣɛ Gala ta. Yà na ɣɛɛ na, è va sa è vile pùlu.”

²²Tei zolopoi nii mɛnini, é liini ga maa‐wõi, toku ge zei ga kwéligitiɛ wala lamai ɣɛ.

²³Ziizɛ ɣɛni sa ná kala dopoitiɛ ma, “Gè bo wiɛ ga gaama, tɔ ga fai kpaanagɛi kpɛtɛ nu ʋaa ma ga é lɛ Gala ta masadai zu.

²⁴Gè bo kɔnɔ wiɛ, tɔ ga faa ʋii‐ƃɛɛ suo ƃakpai nii ʋaa ma daa ga “keeamɔ” ga é leve siɣile wũ su é leve kpɛtɛ nu lɛɛ ʋaa va Gala na masadai zu.”

²⁵Tei ná kala dopoitiɛ te nii mɛnini, gwala vilini te ma ga ki‐gaa‐ziɛ te ɣɛ tea, “Ƃɛi mu ka a wulo su?”

²⁶Kɛ̀ Ziizɛ wɛlɛni te va é ɣɛ te ma, “Nii ɣa ga fai ɛ́ lɛ zolowoga nu ƃuse ya. Kɛ̀ Gala na dɛi, fai pɛ ka zolowo zéea.”

²⁷Pite gaa woteni sa é ɣɛ ma, “Wɛlɛ, gé ƃega fai pɛ ba gé vile è wulu. Zɛƃɛ ɣa sa a ɣɛ gé ya?”

²⁸Ziizɛ ɣɛ te ma, “Gè bo wiɛ ga gaama, nài gè ga nu ƃuse lui gà zei na nà ƃaa‐la‐ma masa kpɔkpɔgi ɣa ŋetea niinɛi zu, waitiɛ wo vilega pùlu wa zei ƃalaa pɛ masa kpɔkpɔ puugɔ kai felegɔi ɣa wiɛ Yezɔi nu zuwu zei‐zu puugɔ kai felegɔi maʋaa‐wogi ɣaa leve.

²⁹Taitiɛ nɛpɛ te ƃega ta vɛlɛ va ɔɔ te leɣea vɛɛ te liɛni ba ɔɔ ta zeelaa ɔɔ te ɣeeani ɔɔ te leeni ɔɔ te lea ɔɔ te ƃe ta yuitiɛ va nà daa‐zeigi mazaƃu ma, ta te maa zɔlɔ wo ga sei‐zu wũ gile‐gile, na ɣa ɣɛɛ na te weli ge ɣɛ ga zɛʋui nii kwɛ̃ɛ gɛ lɛ ba.

³⁰Kɛ̀ nu lamaa ta ga nu maa wũ zai ŋɛ ni tiɛ va ɣɛɛzu ga maɣaa ƃela, te lamai kɔnɔ te ga nu ɣaa ƃela tiɛ va ɣɛɛzu ga nu maa wũ.”