Read Loma MAFIYU 2 Bible Online

MAFIYU 2 - Loma bible

MAFIYU 2

¹Tei te Ziizɛ ɣaani Bɛfelehɛ̃ɛ lai zu Yudiiya yui zu, masagi Yɛloo na yɛmini su, kele‐ɣele bea te wuloni ga folo wulo‐zu vele te va Yɛlusulɛɛ lai zu

²tiɛ ɣɛ tea, “Minɛ ɣa te nui nii ɣaa na é ga Dusiitiɛ ta masagi? Ƃɔvɛlaale gé wɛlɛɛ ná sɔmɔ dekai va é wulo. Na ɣa ɣɛɛ na gé vaa ga gé loo kɔ́wɔ wu.”

³Tei masagi Yɛloo é nii mɛnini, é ɣɛni pɔ̃ɔ ta Yɛlusulɛɛ vea ɣaazɔ.

⁴Tei sa é numaitiɛ ta laa‐ʋaale gwalaitiɛ ɣaazɔ ɣaa kpɔni ba é vɛɛ tɔ‐dɛɛ ɣala‐mɔitiɛ va, é te ɣaa zaɣa kɛɛni vɛ ʋaa ma pagɛi ɣɛ te nui nii ɣa na Gala zee ƃakogɛi bá ga masagi, na ɣa ga Kolai.

⁵Te ɣɛni ma, “Bɛfelehɛ̃ɛ ve, Yudiiya yui zu. Ƃɔvɛlaale ponɛvɛ ŋɛ ni Gala daa woo‐wo nui vɛ yíɛ ɣɛ tea,

⁶‘Yài è ga Bɛfelehɛ̃ɛ è Judaitiɛ ta yui zu, è maʋaa lɛ vɛnɛni Judaitiɛ te maazu veaitiɛ zaama, ƃɔvɛlaale yà ɣa maazu‐ʋaa‐wo‐bo nu vaazu wulozu è ya, nii yá pele wulo ga nà numaitiɛ, na ɣa ga Yezɔitiɛ.’ ”

⁷Yɛloo é kele‐ɣele beaitiɛ lili sa doowu zu, siɛgi sɔmɔ dekai wuloni la é su ɣala‐ga wɛ̃ɛ te ya.

⁸É te leve Bɛfelehɛ̃ɛ yíɛ ɣɛ te ma, “A li wo lopoi maʋaa wɔwɔ wo kulo su ƃɔɔ sɛ‐sɛ. Wa wɛlɛ na bá a va wo bo mà, kɛɛ ʋaa ma nà ƃalaa gè li gè loo kɔ́wɔ wu.”

⁹Tei sa te masagi woo mɛnini, te ta lii woni. Na ɣɛɛzu nɔ sɔmɔ dekai nii é wuloni te ɣaazu, é vileni te luo é yɛsu é va é lo vɛ maazu lopoi ɣɛni na.

¹⁰Tei te wɛlɛni sɔmɔ dekai va, te wuu zu nɛɛni ƃɔɔ ga kpakpaa.

¹¹Tei sa te liini pɛlɛi wu, te wɛlɛni lopoi va dée Meele ya te loo kɔ́wɔ wu. Te ta ŋala‐ŋalagitiɛ laa laoni te máa wu ga zɛni é vɛɛ gulu mala kũ‐nɛɛ‐nɛɛ sei‐zu felegɔ va.

¹²Te lɛnɛ pele ma ga te ze‐su vele ga te mɛ lɛ leve ga Yɛloo wɔ vele, te leveni ga pele ta ƃɔnɔ te li wɔ taa zu.

¹³Tei sa kele‐ɣele beaitiɛ te ziɣini na te li, de maliɣii Gala na keelai wuloni Zoosɛ ɣaazu se‐suvɛ é ɣɛ ma, “Wu ziɣi è lopoi ziɣi ta dée è vela ga tiɛ è li ga tiɛ Iije yui zu. Yà yɛ na é yɛsu gè bo yìɛ ga è ziɣi na. Toku ge zei ga Yɛloo ɣa vaazu kɔ́wɔ wo kulozu su ga é paa.”

¹⁴Na ma Zoosɛ wu ziɣini é lopoi ziɣi é vɛɛ dée va é wulo ga tiɛ ná va ga kpidi ga é li Iije yui zu.

¹⁵É yɛni na é yɛsu Yɛloo za. Nii ɣɛɛni kɛɛ ʋaa ma fai de maliɣii Gala ge puuni dáa woo‐wo nui la é bo máʋai leve ma. Woi na ɣa ga, “Gè dùi liliga ga é wulo Iije yui zu.”

¹⁶Tei Yɛloo looni ga ná laa ga kele‐ɣele beaitiɛ te gbana wuloa la, é woei leveni ga kavele teegɔ. É deʋeni é da numaitiɛ ya ga te lopaitiɛ vaa te ɣɛni ga zinaa lea Bɛfelehɛ̃ɛ lai zu é vɛɛ kobavɛ laitiɛ va é ziɣi ƃɔɔ kwena felegɔ luu ma é yii ga duuyɛ̃ tɛɣɛ‐lɛɣɛga wɔ vele. É nii ɣɛɛni ga velei kí daa wodoni la maziɛgi ʋaa zu kele‐ɣele beaitiɛ ya.

¹⁷Nii mavelei ma fai Gala daa woo‐wo nui Jɛlɛmaiya boni é leveni ma.

¹⁸É ɣɛni tea, “Laama lai zu woo lɛɛvɛ. Kpee ɣaa‐wãlaa woo ve ta gwɔlɔ woo. Dee nui Lɔisɛ ɣa wɔlɔzu déaitiɛ ʋaa ma. Tɔ wɔlɔzu gáa wɔ gɛ lɛ nɛkpɛga, ƃɔvɛlaale te pɛ te zaavɛ.”

¹⁹Tei sa Yɛloo zaani, de maliɣii Gala na keelai ta wuloni Zoosɛ ɣaazu Iije yui zu se‐suvɛ é ɣɛ ma,

²⁰“Wu ziɣi. Lopoi ziɣi ta dée wo li wulu Yezɔi yui zu. Ƃɔvɛlaale taitiɛ te pele ɣaa ziɛzu ga te lopoi vaa te zaavɛ sa.”

²¹Lopoi ziɣi vele ɣa na ɣɛ Zoose vɛ ta dée te li wulu Yezɔi yui zu.

²²Tei Zoosɛ mɛnini ga Akeleea ɣa é kéea Yɛloo wo‐ga ziɣia ga Yudiiya yui maɣalaso gwalai, é ɣɛni luozu ga é zei na. Tɛnɛ ge woni da segi zu. Na ma é liini Geealali yui zu.

²³É liini é zei tai nii zu daa ga Nazɔi. É nii ɣɛɛni ga fai Gala daa woo‐wo beaitiɛ te boni é leve ma. Na ɣa ga, “Ta tíli ga Nazɔi nu.”