Read Loma MAFIYU 20 Bible Online

MAFIYU 20 - Loma bible

MAFIYU 20

¹Ziizɛ ɣɛni tea, “Gala ta masadai ʋaa wulovɛ ga pɛlɛ wũda nui é wuloni ga subu‐zubu é li ga é ʋɔɔnɛ‐ʋee lii‐ɣɛɛ vea ziɣi ná ŋasa ƃalagi ʋaa ma.

²Tei sa te woo daani ma ta tii‐ɣɛɛ veaitiɛ ga towaa sɛni gila fe nu gila zeea folo ma, é te leveni ná kpalagi zu.

³Kɛ́i ma liizu wɔnɔ folo wui su‐ƃaa ɣalama laa yɔɔzu, é wɛlɛni zɔitiɛ va loni dɔwɔ ƃalagi zu tii lɛ ŋɛni tiɛ.

⁴É ɣɛni te ma, ‘A li kpalagi zu wa ƃalaa. Nii é pele ma ga wo sɔlɔ wo ga fe wo ya.’

⁵Na ma te liini. É daamɔdai ɣɛɛni folo gaa‐lɔ‐ga laa yɔɔzu ta kpɔkɔ ʋolo laa yɔɔzu.

⁶Tei wɔnɔ folo ɣai ɣɛni vaazu toozu, é liini é wɛlɛ zɔitiɛ va loni é ɣɛ te ma, ‘Tɔ ɣɛ le wa luo loni vɛ tii lɛ ɣɛɛ wo ya?’

⁷Te ɣɛ ma, ‘Ƃɔvɛlaale nu lɛ dɛ gé liini tii ma ga é gé ʋɔɔnɛ ʋe.’ É ɣɛ te ma, ‘A li kpalagi zu wa ƃalaa.’

⁸Tei kpɔkɔ ziitini, kpala keea nui ɣɛni ná tii‐maazu nui ma, ‘Tii‐ɣɛɛ veaitiɛ lili è te ʋɔɔnɛ ʋe. Tɔɔ zei nu ɣaa‐ƃelagi va è lii la mamaa wũgi wɔ.’

⁹Zɔitiɛ é te ziɣini folo ɣai too‐zu laa yɔɔzu, te vaani te ɣile‐giledai te sɛni gile‐gile sɔlɔ wo.

¹⁰Tɔwɔ tei nu maa wũgitiɛ te vaani, é ɣɛni te wuu zu ga ta sɔlɔ wo ga tamaa. Kɛ̀ ta ƃalaa sɛni gile‐gile ka te sɔlɔ woni te ɣile‐giledai.

¹¹Te ɣɛi ma sosu te zili zaɣani pɛlɛ wũda nui ma

¹²tiɛ ɣɛ tea, ‘Gaa ƃelagi niitiɛ te tii ɣɛɛni nɔ ga ɣalava gila. Tɔwɔ è gá dɛitiɛ ɣɛɛ ga lii‐tii gá tiɛni gái zaa ʋolo yee viiya gé ma folo yìɛ gé lowa.’

¹³Kɛ̀ é te ɣila goi ɣaa woteni é ɣɛ ma, ‘Nà wɛ̃ɛ, gɛ̀ lɛ pele‐ma lala luo wosu ga yìɛ.? Ɛ̀ lɛ ʋaani bu zèea ga gè sɛni gila fe è ya?

¹⁴Nii é ga è wo siɣi è li. Gè deʋea ga nii gè feea è ya gè tiigoi ʋe nu ɣaa‐ƃelagitiɛ ya.

¹⁵?Nà lei kwèligi maleʋe ɔ́ ɣɛ dà? ?Ƃaa yà sili lɛɛzu mà gàazu‐wodo ʋai ma?’

¹⁶Na ma taitiɛ te ga nu maa wũ ta na wulu ɣaa ƃela. Na wulu ɣaa‐ƃela bea te ɣɛ ga nu maa wũ.”

¹⁷Tei sa Ziizɛ ɣɛni liizu Yɛlusulɛɛ, é kala dopo puugɔ kai felegɔitiɛ ziɣini ta letele. Te ɣɛi ma sa liizu, é ɣɛni te ma,

¹⁸“A wɛlɛ! A da liizu Yɛlusulɛɛ. Na ɣa ɣɛɛ na ta nu ƃuse lui yee la laa‐ʋaale gwalaitiɛ ya ta tɔ‐dɛɛ ɣala‐mɔitiɛ. Ta sa ta faa vɛɛ bá ga te páa.

¹⁹Na ɣa ɣɛɛ na ta sa ta zée la zii ƃalaagitiɛ ya ga te ŋɛɛ wulo sú te kpóoʋe te kpáko pɛɛ‐pulu wulu likpii ma. Tɔwɔ Gala ka bu ziɣi saa ya foloi sava kelei ma.”

²⁰Zɛbɛdi dea zinaitiɛ te lee vaani ga déaitiɛ Ziizɛ wɔ vɛ. É zɛba é vile ŋibia é bo má ga é faa ta ɣɛ bɛ́.

²¹Ziizɛ ɣɛni ma, “Zɛƃɛ ɣa è wõini?” Ŋaza nui ɣɛ ma, “Deʋe ga dèa zinaa felegɔitiɛ te gila zei ga è yee za‐su vele, gilagi wɔ ge zei ga è wɔwɔ yee‐su vele yà masadai zu.”

²²Kɛ̀ Ziizɛ gaa woteni é ɣɛ te ma, “Nii wo máa ʋelizu wɛ lɛ kwɛ̃ni.? Wa zoo wo ƃoale kɔpui nii zu gè vaazu ƃoalesu su?” Te ɣɛ ma, “Gà zoo.”

²³É ɣɛni te ma, “Wa ƃoale nà kɔpui zu. Kɛ̀ nu zei ʋai ga zèe za‐su vele ɔɔ kɔ̀wɔ yee‐su vele, minɛ lɛ ga pɔ̀ɔ laa ga gè ná ʋe nu ya. Kɛ̀ tɔ niitiɛ ʋaa ma kèea maʋaa ɣavele ƃɛtɛɛ te ʋaa ma.”

²⁴Tɔwɔ tei kala dopo puugɔi zɔitiɛ te nii mɛnini, te yii ɣaa wãlani te vaa felegɔi natiɛ ʋaa zu.

²⁵Kɛ̀ Ziizɛ te lilini pɔ́ vɛ é ɣɛ te ma, “Wo kwɛ̃ni ga gaa‐ƃaa ɣa zii ƃalaagitiɛ maazu‐ʋaa‐wo beaitiɛ ya te maazu, ta nu ƃaazagitiɛ ta gaa‐ƃaa wulo te maazu.

²⁶Ɛ́ lɛ ɣɛɛ ŋɛ na wa dɛi zu. Kɛ̀ nui nɛpɛ yá ɣɛ é ɣɛ ga nu wala wo zu, maa nɛɛvɛ manui ɣɛ ga wa lii‐ɣɛɛ nu.

²⁷Na ɣa ɣɛɛ na nui nɛpɛ é wõini é ɣɛ ga nu maa wũgi wo zu, maa nɛɛvɛ manui ɣɛ ga wa luo,

²⁸è ɣɛ velei nu ƃuse lui la. Ɛ́ lɛ vaani ga te mɔɔlɛ bɛ́, kɛ̀ to mu é mɔɔlɛ numaa vɛ é yɛʋui ʋe ga é ɣɛ ga nu lamaa wũ‐maa‐wo ŋɛni.”

²⁹Tei sa te wuloni Jɛlikoo lai va tiɛ li, kpɔ kpakpa vileni Ziizɛ wulu.

³⁰Na ɣa ɣɛɛ na gaazu wele vea felegɔ te ɣɛni zeini pelei woba. Tei te mɛnini ga Ziizɛ ɣa levesu, te lobani tiɛ ɣɛ tea, “Kèea, gé ɣaazu‐maa‐wõi ɣa, yài è ga Deeve dui.”

³¹Kpɔgi yii ɣaa wãlani te ma tiɛ bo te ma ga te na ɣɛ ƃu. Kɛ̀ te ɣɛni wala lobasu tiɛ ɣɛ tea, “Kèea, gé ɣaazu‐maa‐wõi ɣa, yài è ga Deeve dui.”

³²Ziizɛ loni sa é te lili yíɛ ɣɛ te ma, “Zɛbɛ ɣa wo wõini gè kɛ wo vɛ?”

³³Te ɣɛ ma, “Kèea, gé ɣaazuvɛ ziɣi ma.”

³⁴Te maa‐wõi‐loo vele ma sa Ziizɛ ma, é ʋowũni te ɣaazu ɣɛzɛgitiɛ va, natiɛ te valo sa ga maa ʋilea te vile púlu.