Read Loma MAFIYU 21 Bible Online

MAFIYU 21 - Loma bible

MAFIYU 21

¹Tei sa te lɔtɔni Yɛlusulɛɛ va te va Bɛfaji lai zu Aale ɣizii ma, Ziizɛ é kala dopo felegɔ leveni

²yíɛ ɣɛ te ma, “A li tai zu é wo ɣeeɣi daavɛ. Wa wɛlɛ soo ʋaale ba ga maa ʋilea dáa ƃulogɛi máyuwu vɛi bá. A te laa ʋũi wo va ga tiɛ pɔ̀.

³Ani nu ta nɛpɛ ka faa wo na wiɛ, wa ɣɛ tea, ‘Máƃala ɣa de maliɣii ma.’ Manui ɣa sa a te leve ga maa ʋilea.”

⁴Nii ɣɛɛni ga fai nii leve ma Gala daa woo‐wo nui boni yíɛ ɣɛ tea,

⁵“A bo Zaayã veaitiɛ ma wo ɣɛ te ma, ‘A wɛlɛ! Wa masagi ɣa vaazu kóloai é zeini soo‐ʋaale kɔma ta mayuwu.’ ”

⁶Kala dopoitiɛ te liini te kɛ ga velei nɔ Ziizɛ te leʋeni la.

⁷Te vaani ga soo‐ʋaalegi é vɛɛ mayuwui va te ta zeɣeitiɛ vɛɛ pulu Ziizɛ zei kɔma.

⁸Kpɔgi bɔɔlɔ‐zu ná seɣe vɛɛni pelei ma, zɔitiɛ te gulu yifega leve te pɛɛ pelei ma.

⁹Na ɣa ɣɛɛ na kpɔgi niitiɛ te ɣɛni ga túo vele ta niitiɛ te ɣɛni ga púlu vele te ɣɛni lobasu tiɛ ɣɛ tea, “Hosana, Deeve dui! Tuuyiɛ ɣa ɣɛ nui nii ma é vaazu de maliɣii Gala na daa‐zeigi zu! Ƃe ba daa‐maa‐lɛɛ wo ga Gala!”

¹⁰Tei Ziizɛ lɛɛni Yɛlusulɛɛ lai zu, ná vea ɣaazɔ yii wu ziɣini tiɛ ɣɛ tea, “Ƃɛ ɣa ga nii?”

¹¹Kpɔgitiɛ te ɣɛni tea, “Gala daa woo‐wo nui Ziizɛ ɣaa é wuloa Nazɔi lai zu Geealali yui zu.”

¹²Ziizɛ lɛɛni Gala‐feli wɔta walai wu é numaitiɛ ɣaazɔ ƃɛ na te ɣɛni ŋɛni zɔ̃wɔ wulozu na ta niitiɛ te ɣɛni ŋɛni ɣeeazu na. Na ɣa ɣɛɛ na é naʋolo‐maa‐ʋeli beaitiɛ ta leeveitiɛ lɔɔ vilini é vɛɛ wopo‐sɔ̃wɔ‐wulo veaitiɛ te zei‐ma ŋɛniitiɛ va.

¹³É ɣɛni te ma, “Ponɛvɛ Gala kɔlɔi zu Gala giɛ ɣɛ tea, ‘Nà pɛlɛi laa ɣa ɣɛ ga fèli vɛlɛ.’ Kɛ̀ wa pɛlɛi nii ɣɛɛzu ga wũmɔ vea zei‐zu.”

¹⁴Gaazu wele vea vɛɛ mɛlɛ‐ŋɛlɛ bea va te vaani pɔ́ Gala‐feli wɔta walai wu é zɛba é te valo.

¹⁵Kɛ̀ tei laa‐ʋaale gwalaitiɛ ƃɔga tɔ‐dɛɛ ɣala‐mɔitiɛ te wɛlɛni faa maa‐wɔlɔ‐wɔlɔ kpaazagitiɛ va é te ɣɛɛni, te wɛlɛ ná va wɔnɔ ga lopaitiɛ te ɣɛni lobasu tiɛ ɣɛ tea, “Hosana, Deeve dui!”, te yii ɣaa wãlani.

¹⁶Te ɣɛni ma, “Fai niitiɛ te bosu, yà mɛnisu?” Ziizɛ wɔ ge ɣɛ te ma, “Ooi.? Wɛ lɛ dɛ nii lodoni Gala kɔlɔi zu? Na ɣa ga nii mawoi ga ‘Ŋini‐ƃoalega laa vele zu ɣa Gala ge kɛɛ woo wulo ná ga dáa‐maa‐lɛɛ woo.’ ”

¹⁷Tei sa é ziɣini te woba, é wuloni tai va é li Bɛtani é ŋii na.

¹⁸Tei sa é ɣɛni liizu wulu tai zu ga subu, pulu ɣɛni má.

¹⁹É wɛlɛni “fi” wului va pelei woba é li bu. Tɔwɔ ɛ́ lɛ wɛlɛni ŋɛni ta nɛpɛ ba gá, kɛni nɔ malaitiɛ. Ziizɛ ɣɛ sa gului ma, “È mavaa nɛpɛ gɛ lɛ sa zɔlɔ woga è ɣa fãa!” Gului na woto‐woto ƃɔɔ sa nɔ gaama.

²⁰Tei ná kala dopoitiɛ te wɛlɛni ba, é wuloni ga tiɛ ga kpakpaa tiɛ ɣɛ tea, “Gului leveni ɣɛ le yíɛ za ƃɔɔ nɔ gaama?”

²¹Ziizɛ te woi ɣaa woteni é ɣɛ te ma, “Gè bo wiɛ ga gaama, ani zee‐la‐ma ɣa ɣɛ na wo ya sakpe gɛ lɛ wɔlɔ‐wɔlɔ wo yii zu, nii é ɣɛɛ ga gului nii wɛ lɛ nɔ na ɣɛɛ ɔ́ wɛ̃ɛ na va. Kɛ̀ wa zoo ƃalaa wo bo gizi gwalai nii ma ga ‘Ƃekpe è vili yuwu wu,’ tɔwɔ é ɣɛ ŋɛ na.

²²Na ɣa ɣɛɛ na ŋɛnii nɛpɛ wa maa ʋeli Gala‐felia zu, ani zee‐la‐ma ɣa wo ya, wa sɔlɔ wo.”

²³Tei Ziizɛ lɛɛni Gala‐feli wɔta walai wu, laa‐ʋaale gwalaitiɛ ƃɔga zuu wũgitiɛ te vaani pɔ́ nà ɣɛi ma kala‐bogi wosu. Te ɣɛni ma, “Gaa‐ƃaa zɛƃɛ ɣa è fai niitiɛ ɣɛɛzu la? Na ɣa ɣɛɛ na ƃɛ ɣa é gaa‐ƃai nii ʋeea è ya?”

²⁴Ziizɛ wɔ ge te woi ɣaa woteni é ɣɛ te ma, “Nà ƃalaa gà gaa‐zaɣa‐kɛɛ wosu ga wiɛ. Ani wa gaa wote na, gaa‐ƃai gè fai niitiɛ ɣɛɛzu la gà sa gà daa wo wiɛ.

²⁵Minɛ ɣa Jɔ̃ na bataize‐ɣɛɛ ʋai wuloni na? ?É wuloni Gala ta ƃaa é wuloni nu ƃuse ya?” Te vɛɛni sa ga daaza lɔɔ ɣiini da tiɛ tea, “A da bo na má ga kulovɛ Gala ta, towaa ɣɛ tea, ‘Zeƃɛi é kɛ wɛ lɛ máʋai ziɣini ga gaama?’

²⁶Kɛ̀ ani da bo na ga kúlovɛ nu ƃuse ya, da luozu kpɔgi va. Toku ge zei ga te pɛ te laavɛ la ga Jɔ̃ ɣɛni ga Gala daa woo‐wo nu.”

²⁷Na ma te Ziizɛ woi ɣaa woteni te ɣɛ ma, “Gɛ́ lɛ kwɛ̃ni.” Nà wɔ ge ɣɛ te ma, “Nà ƃalaa gaa‐ƃai gè fai niitiɛ ɣɛɛzu la gɛ̀ lɛ daa woga wo ma.”

²⁸Ziizɛ ɣɛni tea, “Wa ɣi‐gaa‐ziɛi ɣa ga zɛƃɛ é vile fai nii va? Zunu ta ɣɛni na déa zinaa te fele. É liini mamaa wũgi wɔ é ɣɛ má, ‘Dùu, li è tii ɣɛ ŋasa ƃalagi zu za.’

²⁹Nà gói ɣaa wote é ɣɛ má, ‘Gɛ̀ lɛ kɛɛ!’ Kɛ̀ ná ta wolo kɛɛni é ɣigi maa ʋeli é li.

³⁰É li kɔnɔ dúi zɔi wɔ vɛ é faa zii ɣilagi nɔ wo má. Nà ɣɛ má, ‘Kèea, gà li.’ Tɔwɔ ɛ́ lɛ liini.”

³¹Ziizɛ ɣɛni sa te ma, “Te felegɔitiɛ zu, ƃɛ ɣa é kéea yii‐mai ɣɛɛni?” Te ɣɛ ma, “Mamaa wũgi ve.” Ziizɛ ɣɛ te ma, “Gè bo wiɛ ga gaama, gɔmɛti naʋolo‐wulo veaitiɛ ƃɔga ŋazaitiɛ te ƃɔɔ ɣɛɛ ga yaawo ta li Gala na masadai zu wo luo.

³²Toku ge zei ga Jɔ̃ vaani wo wɔ tele‐bo tuoi zu. Kɛ̀ wɛ lɛ máʋaa ziɣini ga gaama. Niitiɛ mugi te ga gɔmɛti naʋolo‐wulo veaitiɛ ta ŋazaitiɛ te ƃɔɔ ɣɛɛ ga yaawoa te máʋaa ziɣini ga gaama. Tei ƃalaa wɔnɔ wo wɛlɛni fai nii va, wɛ lɛ wulu ɣaa ʋeni wɔ máʋai ziɣi ga gaama.”

³³Ziizɛ ɣɛni tea, “A wui to sakpegi ta ƃɔnɔ ma. Pɛlɛ wũda nu ta ɣɛni na é ŋasa ƃala daa leve, é kpaki tite ma, é zɛba é ŋasa vai ziɣe wɔɔwɔi lo kpalagi zu. Na ɣa ɣɛɛ na é taka gaa wooza loni é kpalagi yɛ sa yiiti‐wulo veaitiɛ ya é li zuu ƃɔnɔ su.

³⁴Tei ŋasa vaa ziɛgi maa ƃuoni, é ná tii‐ɣɛɛ veaitiɛ leveni yiiti‐wulo veaitiɛ wɔ vɛ ga é ná ŋasa vai maa zɔlɔ wo.

³⁵Tɔwɔ yiiti‐wulo veaitiɛ te ná tii‐ɣɛɛ veaitiɛ zoni te gila dowa te gila paa te gilagi vaa ga sɔɔ ga kwɔti.

³⁶É zɛba wɔnɔ é tii‐ɣɛɛ veai zɔitiɛ leve. Natiɛ te levegɛi ɣɛ mamaa wũgitiɛ va. Te faa zii ɣilagi ɣɛ nɔ ga tiɛ.

³⁷Tei sa na wuloni ba, é duu zunui leveni é ɣɛ tea, ‘Ta wũfe dùi ma.’

³⁸Kɛ̀ tei yiiti‐wulo veaitiɛ te dúi vɛteni, te ɣɛni ɣii ma, ‘Po ŋɛni keea nu ɣa é vaazu ɣɛɛzu do. A de paa kɛɛ ʋaa ma kweligi ɣɛ ga de wo.’

³⁹Te soni sa te pili ga ŋasa ƃalagi wulu vele te paa.”

⁴⁰Ziizɛ ɣɛni tea, “Ani ŋasa ƃalagi keea nu ɣa vaa na nà mavele ma, zɛbɛ ɣa yá kɛ ga yiiti‐wulo veai niitiɛ?”

⁴¹Te ɣɛni ma, “Towaa ŋada‐ŋala‐ŋala beai natiɛ vaa é kɛ ƃɔɔ ga daa‐nɔwɔ‐wo paa‐woga ga tiɛ, é zɛba é ŋasa ƃalagi leve yiiti‐wulo veai zɔitiɛ wɔ ta ɣɛ ná ŋasa vai levesu pɔ́ mawui ma.”

⁴²Ziizɛ ɣɛni te ma,“? Wɛ lɛ dɛ wɔlɔ‐wɔlɔ fai nii lodoni Gala kɔlɔi zu? Na ɣa ga nii mawoi ga ‘Kwɔti ƃɔɔƃɔɔgi nɔ pɛlɛ‐lo beaitiɛ te ɣɛlɛɛ ba, towa é ɣɛɛ ga kwɔtii máʋaa wɔɔlɔɔ baa pɛ ba. Nii ɣa ga de maliɣii ɣɛɛ ʋaa. Tɔwɔ máʋai wala wulovɛ ga diɛ.’

⁴³Na ma gè bo wiɛ, Gala na masadai ɣa wulo wo ya é ʋe zii niitiɛ ya malɔnɔ ɣa ɣɛ ba te ya. [

⁴⁴Tɔwɔ nui yá loo kwɔtii nii ma, manui maa ɣa ɣale su kpulu‐kpulu. Kɛ̀ ani a loo na nu nɛpɛ ma, towaa kpɔlɔ‐wɔnɔ.”]

⁴⁵Tei laa‐ʋaale gwalaitiɛ ƃɔga Favilesiitiɛ te ná sakpegitiɛ mɛnini, te gaa ɣaani ga é ɣɛni ʋaazu te ma.

⁴⁶Kɛ̀ tei te ɣaa ƃaani ga te só, te ɣɛni luozu kpɔgi va. Ƃɔvɛlaale natiɛ te síɣini ga nui é ga Gala daa woo‐wo nu.