Read Loma MAFIYU 22 Bible Online

MAFIYU 22 - Loma bible

MAFIYU 22

¹Ziizɛ sakpe sɔɔni wɔnɔ te ma yíɛ ɣɛ tea,

²“Gala ta masadai wo kɔ̃ɔgɛ masa gwalai ma é dúi na ŋaza‐wulo wuu ɣaani.

³É ná tii‐ɣɛɛ veaitiɛ leveni ga te niitiɛ lili bogɛi ɣɛ te ma ga te li ŋaza‐wulo wui ma. Kɛ̀ tɛ lɛ ŋɛni kɛɛzu tɔ va.

⁴É tii‐ɣɛɛ veai zɔitiɛ leveni wɔnɔ yíɛ ɣɛ tea, ‘A bo niitiɛ ma te liligɛi kui ma ga gè daa‐mii ŋɛnii maʋaa ɣavele ƃɛtɛɛ sa. Nà nikɛ zineitiɛ vɛɛ nà nikɛ yuwu ƃaazagitiɛ va te te vaa. Ŋɛnii ɣaazɔ maʋaa ɣavele ƃɛtɛvɛ sa. A va ŋaza‐wulo wui ma.’

⁵Kɛ̀ te maʋai zoni paaya te li ŋada ƃɔnɔ pele. Gila ge liini ná kpalagi zu, gila ge li wɔnɔ wutii ma.

⁶Mataitiɛ wɔ te ná tii‐ɣɛɛ veaitiɛ zo ga ƃaa‐wulo vele te ma te te vaa.

⁷Masa gwalai yii ɣaa wãlani é ná sɔdasiitiɛ leve te nu‐vaa veai niitiɛ zu ŋala‐ŋala te ta lai ɣala.

⁸Masagi ɣɛ sa ná tii‐ɣɛɛ veaitiɛ ma, ‘Ŋaza‐wulo wui ɣavele ƃɛtɛvɛ sa, kɛ̀ niitiɛ te liligɛi tɛ lɛ kuloni bu ga te va kui ma.

⁹Na ma a li pele‐vɛɛgitiɛ ma, nu liigoi nɛpɛ wa pɛtɛ wo te lili ŋaza‐wulo wui ma.’

¹⁰Tii‐ɣɛɛ veai natiɛ te wulo sa te vile kui yɔɔzu pele‐vɛɛgitiɛ ma. Niitiɛ nɛpɛgi te te vɛtɛni te te ɣaa lɛ ba, nu yowũa vɛɛ nu vagɔa va. Na ma ŋaza‐wulo vɛlɛi laa ʋegɛi ɣɛ ga wɛ̃ɛya.

¹¹Kɛ̀ tei masa gwalai vaani ga é wɛlɛ wɛ̃ɛtiɛ va, é zunu ta vɛtɛni ná nii ŋaza‐wui mazeɣei ta lɛ ŋɛni ma.

¹²É ɣɛ ma, ‘Bɔ̀i, è vaa laalii ɣa vɛ ɣɛ le ŋaza‐wulo wui mazeɣei ta lɛ è ma?’ Tɔwɔ dáa ɣɛɛni mɛ.

¹³Masagi ɣɛ sa maa veaitiɛ ma, ‘A zée zu ɣili ta kɔ́wɔ wo wulo la wo pili kpidii zu. Ná ɣa numaa ta yɛ wɔlɔzu na tiɛ yĩ gaa mi.’ ”

¹⁴Ziizɛ ɣɛni sa tea, “Ƃɔvɛlaale nu lamaa liligɛ, kɛ̀ nu gile‐gile nɔ ɣa siɣia te zaama.”

¹⁵Favilesiitiɛ te liini te fuo loo ga Ziizɛ laa ga velei tɔ só da gói ma.

¹⁶Te te wulu veaitiɛ leveni pɔ́ vɛ é vɛɛ Yɛloo maa veaitiɛ va, natiɛ tiɛ ɣɛ má, “Kala‐mɔi, gé kwɛ̃ni ga yà ga gaama luo‐wo nu yìɛ Gala na pelei maʋaa lɛ ga gaama vele. Ɛ̀ lɛ nɛɛ‐nɛɛ gaa ziɛzu nu ta nɛpɛ ba, ƃɔvɛlaale nu ƃuse lo‐suvɛ lɛ è ɣaazu ga faa.

¹⁷Na ma nii é ga yà ɣi‐gaa‐ziɛi bo gé ma fai nii zu.? Na ɣa ga tɔ pele ma Gala gaazu ga gíɛ wũ‐fɔɔnɛ‐ʋee ʋe ɣalaso gwalai Siiza ya, ƃaa, gé mɛ lɛ kɛ?”

¹⁸Tei tɔwɔ Ziizɛ ɣɛni ga ta wãla‐lɔɔ ʋai zu wɛ̃ɛga, é ɣɛni tea, “Aƃɛ zu‐wɔ̃ɔ ka wo bosu gàazu, wai ŋɛ ni wo ga daa‐nɛɛ‐wũ‐ba vea?

¹⁹A wũ‐fɔɔnɛ‐ʋee manaʋoloi lɛ lɛɛ gàazu.” Te va sa pɔ́ ga naʋoloi ta.

²⁰Ziizɛ ɣɛ te ma, “Ƃɛɛ máa niini ka ga nii é naʋoloi ma ta ná daa‐zeigi?”

²¹Te ɣɛ tea, “Siiza ve.” Ziizɛ ɣɛ te ma, “Ka dɔɔ mu nii é ga Siiza na dɔ a na ʋe Siiza ya. Nii é ga Gala na dɔ wo na ʋe Gala zeea.”

²²Tei te mɛnini, ki‐gaa‐ziɛ vilini te ma. Te ziɣini sa púlu te li.

²³Nà maʋoloi nɔ Sadusiitiɛ te vaani pɔ́. Na ɣa ga niitiɛ te ɣɛ bosu ga nu lɛ wu ziɣia saa ya. Te Ziizɛ ɣaa zaɣa kɛɛni

²⁴tiɛ ɣɛ má, “Kala‐mɔi, Mooze ɣɛni tea, ‘Ani zunu ɣa zaa na, déa tɛ lɛ na, déɣei ɔɔ díɛi ɣa pó ŋazai zei ga ŋaza é káa yɔ̃wɔi wuu‐zu luu ɣa.’

²⁵Tɔwɔ zinaa lea lɔfela te ɣɛni gé zu. Mamaa wũgi ŋaza wuloni ɛ́ lɛ duu ɣaani é yɛsu é za. Ŋázai yɛ déɣei ya.

²⁶Vele nɔ na pulu‐lete‐ma leɣei kɛɛni la. Vele nɔ na kɔnɔ te zava kelei kɛɛni la é yɛsu sa é lii la te nu lɔfela pɛ pɔ.

²⁷Tei sa te pɛ te zaani ŋɛ na, ŋaza nui wɔ tɔ ƃalaa é zaani.

²⁸Na ma towaa ɣɛ na sa ga bu‐ziɣi‐wo foloi saa ya, ƃɛ ɣa ŋaza ɣa ɣɛ ga ŋaza nui na nu lɔfelaitiɛ zaama? Toku ge zei ga te pɛ te séini ga ŋaza.”

²⁹Kɛ̀ Ziizɛ te woi ɣaa woteni é ɣɛ te ma, “Wo woi lɛ pele ma. Ƃɔvɛlaale wɛ lɛ Gala kɔlɔi zu woi wɛ̃ni ɔ́ nɔ ɣɛ ga wo Gala na gaa‐ƃai wɛ̃ɛ.

³⁰Toku ge zei ga numaitiɛ ta wu ziɣi na saa ya, zinaa tɛ lɛ sa ŋaza wuloa ɔ́ nɔ ɣɛ ga ŋazaa te zei zini bɛ. Kɛ̀ ta ɣɛ ga Gala ta ɣeelaitiɛ ɣavele.

³¹?A li na kɔnɔ ga bu‐ziɣi‐saa‐ya ʋai wɔ vele, wɛ lɛ dɛ nii lodoni Gala ge boni yíɛ yɛ tea,

³²‘Nà ɣa gè ga Eeƃɔlɔhɛ̃ɛ na Galagi, gè ga Aize na Galagi, gè kɔnɔ ga Yeekɔ na Galagi’? Ɛ́ lɛ ga saa vea ta Ɣala, kɛ̀ ʋulu‐su vea ta Ɣala be.”

³³Tei kpɔgi nii mɛnini, Ziizɛ na kala‐bogi wala vilini te ma ga ki‐gaa‐ziɛ.

³⁴Tei Favilesiitiɛ te mɛnini ga Ziizɛ é Sadusiitiɛ laa vaani, te ɣaa lɛɛni ba ŋada ɣila.

³⁵Na ɣa ɣɛɛ na te ɣila ge ɣɛni na é ga tɔ‐kwɛ̃ɛ nu é Ziizɛ ɣaa zaɣa kɛɛni ga é su wɔ̃ɔ.

³⁶É ɣɛni ma, “Kala‐mɔi, tɔgi zɛƃɛ ɣa é ga bɔɔlɔ kelegi Gala na tɔgitiɛ zaama?”

³⁷Ziizɛ ɣɛ ma, “Wõi ga è maliɣii Gala ga yii ɣaazɔ ta è ɣigi ɣaazɔ é vɛɛ yà ɣi‐gaa‐ziɛi ɣaazɔ va.

³⁸Nii ɣa é ga tɔgi kpakpa kelegi é ga mamaa wũgi.

³⁹Fele kelei wɔ kulovɛ nɔ la. Na ɣa ga è wõi ga è wɔɔ nu è ɣɛ velei è ƃɔɔ wõini la.

⁴⁰Tɔ felegɔi niitiɛ ɣa tɔgi ɣaazɔ zɛlɛgɛi ga tiɛ, Gala daa woo‐wo beaitiɛ ta wɔlɔi zu woi zɛlɛgɛi ga tiɛ wɔnɔ.”

⁴¹Tɔwɔ tei Favilesiitiɛ ɣaa lɛi ɣɛ ba ŋada ɣila, Ziizɛ te ɣaa zaɣa kɛɛni

⁴²yíɛ ɣɛ te ma, “Zɛƃɛi é ga wa ɣi‐gaa‐ziɛi é vile nui va Gala zee ƃakogɛi ba ga masa, na ɣa ga Kolai? Ƃɛ ɣa dúu le?” Te ɣɛ ma, “Deeve duu ve.”

⁴³É ɣɛ te ma, “Tɔ ɣɛ le mu Gala baa ŋinɛgi puuni Deeve yii zu yíɛ Kolai lili ga máliɣi yíɛ ɣɛ tea,

⁴⁴‘Gala ge ɣɛni màliɣii ma, zei ga zèe za‐su vele é yɛsu gè è wɔɔ yɔ̃wɔitiɛ vɛɛ è wɔwɔ wu.’?

⁴⁵Ani Deeve ɣa ɣɛ na Kolai lilisu ŋɛ na ga máliɣi, nà ɣa leve ɣɛ le é ɣɛ ga dúu?”

⁴⁶Nu ta nɛpɛ gɛ lɛ zooni ɔ́ gói ɣaa wote. É ziɣi nà maʋolo ma nu ta nɛpɛ mɛni‐masa kɛ̃i ɣɛ é gaa‐zaɣa‐kɛi ta nɛpɛ pili má.