Read Loma MAFIYU 24 Bible Online

MAFIYU 24 - Loma bible

MAFIYU 24

¹Ziizɛ wuloni sa Gala‐feli wɔta walai wu yíɛ li. Nà ɣɛɛzu ná kala dopoitiɛ tiɛ va ga te dɛɛ la ga velei Gala‐feli wɔta walai logɛi ɣɛ la.

²Ziizɛ te woi ɣaa woteni é ɣɛ te ma, “Wa wɛlɛzu niitiɛ ɣaazɔ va, kɛlɛɛ? Gè bo wiɛ ga gaama, pɛlɛi nii mawɔtiitiɛ te ɣila kpalaa lɛ yɛga laani bɔɔ maazu tɔ ƃe kulozu maazu tɔ too.”

³Tei Ziizɛ ɣɛni zeini Aale ɣizii ma, kala dopoitiɛ te vaani pɔ́ ta letele te ɣɛ ma, “Fai nii zu wulo gíɛ. Ʋolo ƃɛɛ ɣa fai nii ɣa ɣɛɛ la? Na ɣa ɣɛɛ na zɛƃɛ ɣa a ɣɛ é è vaa ʋai lɛ ga seele é vɛɛ ŋetea ɣaa ƃela fai va?”

⁴Ziizɛ te woi ɣaa woteni é ɣɛ te ma, “A ƃɔɔ maazu vɛtɛ ga nu ta mɛ lɛ wo ziɣi pele va.

⁵Ƃɔvɛlaale nu lamaa ɣa va nà daa‐zeigi zu tiɛ ɣɛ tea, ‘Nà ɣa gè ga Kolai, nui Gala zee ƃakogɛi ba ga masa.’ Tɔwɔ ta nu lamaa ziɣi pele va.

⁶Wa kɔɔni maazu woo mɛni wiɛ kɔɔ‐wɔɔ ʋai mahũ‐hũ goo mɛni. Kɛ̀ mɛ lɛ ƃe ba duo ɔ́ vili wo wɔlɔ ga. Toku ge zei ga kɛni dɛ nii ɣa wulo ba. Tɔwɔ nà lɛ dɛ ɣɛɛ ga ŋeteai mawɛ̃ɛ‐pele‐ma.

⁷Zuu ɣa wu ziɣi é vɛɛ bɔɔ yuu va ga kɔɔ, ɣalaso zuu yìɛ vɛɛ bɔɔ ɣalaso zuu va ga kɔɔ. Na ɣa ɣɛɛ na pulu ɣa loo, zui yìɛ ƃeli yíɛ wu su ŋada ɣile‐giledaitiɛ zu.

⁸Nii ɣaazɔ ɣa dɛ nɔ ga daa‐nɔwɔ‐wogi lɔɔ‐zei‐zuvɛ.

⁹Na ɣa ɣɛɛ na ta wo yee la faa ƃoei ya tiɛ wo vaa. Zii pɛ ka zili ga wiɛ nà daa‐zeigi mazaƃu ma.

¹⁰Nu lamaa ɣa sa yá ziɣi pele va tiɛ wulo ga ɣiini kɔwɔ wulu wɔɔ tiɛ zili ga ɣii.

¹¹Zɛɛ ʋaa Ɣala daa woo‐wo bea ta wu ziɣi tiɛ nu lamaa ɣaka pelei va.

¹²Tuo vele yowũi sú wɔɔlɔɔ ma nà mazaƃu ma, nui bɔɔlɔ‐zu na wõilai ɣaa ɣa lei.

¹³Kɛ̀ nui yá yii lɔ gá é yɛsu é ziiti gaa ƃela su towaa valo.

¹⁴Tɔwɔ woo niinɛ vagɔi nii pilegɛi Gala ta masadai va towaa wo zui wɔlɔ‐kɔlɔ ma ɣaali ga é ɣɛ ga seele zii pɛ faa ma. Nà wɔ ka ɣɛɛ na ŋetea ɣaa ƃɛla foloi ɣa sa a ziiti.”

¹⁵Maa nɛɛvɛ kɔlɔ‐lodo nui fai nii ɣaa ɣa. Na ɣa ga Ziizɛ ɣɛni tea, “Wa wɛlɛ na ŋada‐zu‐ŋala‐ŋala ŋɛni va é loni ŋada maa wuai zu yíɛ ná maa‐ŋɛɛ wu ma, na ɣa ga nii Gala daa woo‐wo nui Dayã é ƃɔɛni é vile ba,

¹⁶a kɛ tii maa nɛɛvɛ sa taitiɛ te Yudiiya yui zu te vela te lɛ gizi gwalaitiɛ ma.

¹⁷Maa nɛɛvɛ nui nii yá ɣɛ pɛlɛ wɔma é mɛ lɛ vile ɔ́ ŋɛnii nii ziɣi yá ɣɛ ná pɛlɛi wu.

¹⁸Maa nɛɛvɛ nui nii yá ɣɛ kpala ga é mɛ lɛ li wulu ɔ́ ná seɣei ziɣi.

¹⁹Edei! Ko ŋazaa vɛɛ duu deea va te maa wõi siɛgi na zu!

²⁰A Gala feli ga wa vela ziɛgi mɛ lɛ zolowo sama‐yiɛ ma ɔɔ é mɛ lɛ zolowo doowo foloi ma.

²¹Ƃɔvɛlaale faa ƃoei ƃakpa ɣa wulo siɛgi na zu nii mazii ta lɛ dɛ wɔlɔ wuloni é ziɣi zui maʋaa lɔɔ‐zei ʋolo ma é loo zai ŋɛ ni ma. Mazii ta wɔ gɛ lɛ sa wɔlɔ‐wɔlɔ ɣɛɛ na wulu.

²²È ɣɛ Gala gɛ lɛ ŋɛni mawui zu ƃuoni, nu ƃuse ta nɛpɛ gɛ lɛ ƃega wulo su. Kɛ̀ nui niitiɛ Gala ge yee ƃadoga te va, te mazaƃu ma é mawui zu ƃuoni.

²³Na ma ani nu ta nɛpɛ ka ɣɛ na wo ma, ‘A wɛlɛ! Kolai ɣaa!’ ɔɔ ‘Tɔ nu,’ a mɛ lɛ siɣi ga gaama.

²⁴Ƃɔvɛlaale numaa ta vaazu wu ziɣizu tiɛ ƃɔɔ wulo ga Kolai ga zɛɛ vele, zɛɛ ʋaa Ɣala daa woo‐wo bea tiɛ wu ziɣi tiɛ faa maa‐wɔlɔ‐wɔlɔ kpaazaga ɣɛ tiɛ faaniga ɣɛ ga seelea, kɛɛ ʋaa ma ani a ɣɛ na ga solowo faa, niitiɛ ƃalaa Gala ge yee ƃadoga te va ɣee ta te natiɛ ziɣi pele va.

²⁵A wɛlɛ! Gè ná yɛga ná luo gè bo wo ma.

²⁶Na ma ani ta ɣɛ na wo ma, ‘A wɛlɛ! Kolai ɣa kpooʋei zu,’ a mɛ lɛ wulo wɔ li na. Ani ta ɣɛ na wo ma, ‘A wɛlɛ! Tɔ zaama‐zu lumui zu,’ a mɛ lɛ siɣi ga gaama.

²⁷Toku ge zei ga velei nɔ mea‐mea ɣa kulo la ga folo wulo‐zu vele é ziiti folo lii‐zu vele, vele nɔ na nu ƃuse lui vaa ʋai ɣa ɣɛɛ la.

²⁸Vɛ nɛpɛ suo woma na, ná ɣa kooɣɛitiɛ ta ɣaa kpɔ ná.”

²⁹Ziizɛ ɣɛni tea, “Faa ƃoei maʋaa ɣa wulo na ƃɔɔ nɔ ba, foloi maa ɣa ƃidi, ɣalogi wɔ gɛ lɛ ʋoloa. Na ɣa ɣɛɛ na sɔmɔ dekaitiɛ te wulo gee‐zuvɛ te wu. Gee‐zuvɛ ɣaa‐ƃaitiɛ ta sa ta ƃeli.

³⁰Nà wɔ ka ɣɛɛ na, fai yá ɣɛ é nu ƃuse lui maʋaa lɛ ga seele nà ɣa sa a wulo gee wɔlɔgi ma. Maa‐wõi wɔ ka sa a loo ziitiɛ ɣaazɔ ma te zui ɣa. Nà wɔ ka ɣɛɛ na, ta wɛlɛ sa nu ƃuse lui va é tine ƃiligi ma gee‐zuvɛ yíɛ va, gaa‐ƃaa ƃakpa zéea ta bɔɔlɔla.

³¹Tɔwɔ puu woi ɣa lɛɛ na ga kpakpaa, towaa ná keelaitiɛ leve te numai niitiɛ ɣaa lɛ ba te wuloai su máʋaa ma é ziɣi ƃɔɔ zui wui la naagɔitiɛ zu é wulo wɔnɔ gee wɔlɔgi wɛ̃ɛ‐mavɛ é loo zɔ wɛ̃ɛgi ma.

³²Ziizɛ ɣɛni tea, “Fai gɔɔva wului ɣa dɛ ga nu, a maa woli. Na ɣa ga yá ƃuʋu na ba yíɛ lɛni, wa kwɛ̃ɛ ga tine yiɛ ɣa sa vaazu.

³³Vele nɔ na é la ga nii. Wa wɛlɛ na fai niitiɛ ɣaazɔ va, wa kwɛ̃ɛ ga nu ƃuse lui maa ƃua é sa kpo zeɣei ƃɔɔƃɔɔ da.

³⁴Gè bo wiɛ ga gaama, zei‐zaa nu ƃusei woo lɛ ƃeazu su fai niitiɛ ɣaazɔ te leve ma.

³⁵Gee wɔlɔgi ƃɔga zui te maʋaa ɣa ƃea gá, kɛ̀ gòitiɛ laa‐zu ɣa ga daa‐zu.”

³⁶Ziizɛ ɣɛni wɔnɔ tea, “Kɛ̀ foloi ƃɔga ɣalavai nii fai na vaazu ɣɛɛzu ma foloi ʋaa va, nu ta lɛ kwɛ̃ni. Gala ta ɣeelaitiɛ ƃalaa te gee‐zuvɛ tɛ lɛ kwɛ̃ni ɔ́ nɔ ɣɛ ga Gala dui. Kɛni nɔ kèea Gala tɔ ɣilekpu.

³⁷È ɣɛ velei nɔ é ɣɛɛni la Nowa na yɛmini su, vele nɔ na nu ƃuse lui vaa ʋai vaazu ɣɛɛzu la.

³⁸Toku ge zei ga è ɣɛ velei nɔ é ɣɛni la ziɛ‐ʋegi ɔ́ vɛɛ vaazu, numaa te ɣɛni laa miizu tiɛ dɔɔ ƃoale, zinaa tiɛ ŋaza wulo ŋazaa wɔ tiɛ zei zini bɛ é yɛsu sa é ziiti foloi na ma Nowa vilini da kẽe gwalai zu.

³⁹Tɛ lɛ kwɛ̃ɛni é yɛsu ziɛ‐ʋegi va é te ƃale kwɛɛ é yii ga tiɛ. Vele nɔ na yá ɣɛɛ la ga nu ƃuse lui vaa ʋai.

⁴⁰Nà maziɛ su nu felegɔ ɣa ɣɛ tii ɣɛɛzu kpala ga, gila ge wulo su gilagi yɛ su.

⁴¹Ŋazaa felegɔ ta ɣɛ kwɔda ziɣezu, gila ge wulo su gilagi yɛ su.

⁴²Na ma a ɣaazu ɣɛ pele zu, toku ge zei ga wɛ lɛ foloi wɛ̃ni ɔ́ nɔ ɣɛ ga ɣalavai wo maliɣii vaazu ma.

⁴³A ɣi zɛ nii zu. Na ɣa ga è ɣɛ pɛlɛ wũda nui kwɛ̃ni ga siɛgi wũmɔ nui vaazu la kpidii ʋaa va, ɔ́ ná pɛlɛi maazu vɛtɛ ga nà maziɛgi. Nà wɔ gɔ ɣɛɛ na, wũmɔ nui lɛ ƃega daa wolo ɔ́ vili bu.

⁴⁴Na ma kɛni wa ƃalaa wa ɣɛ ga nui kavele ƃɛtɛi. Ƃɔvɛ‐laale nu ƃuse lui ɣa vaazu ga siɛgi wo ɣi gɛ lɛ ɣɛɛ ba ga towaa va ma.

⁴⁵Ziizɛ ɣɛni tea, “Ƃɛɛ mu ka sa é ga tii‐ɣɛɛ nui nu ɣa laa la é ga nui kele‐ɣelegɛi? Na ɣa ga nii ná nu keea nu toga ná pɛlɛi wu veaitiɛ maazu ga yíɛ daa‐mii ŋɛni ʋe te ya maziɛ pagɔi ma.

⁴⁶Tuuyiɛ ɣa ɣɛ tii‐ɣɛɛ nui nii ma. Na ɣa ga nii ná nu keea nu ɣa va é pɛtɛ yíɛ kɛ nɔ ŋɛ na.

⁴⁷Gè bo wiɛ ga gaama, towaa to weligi ɣaazɔ maʋaa ƃawo la.

⁴⁸Kɛ̀ nii yá ɣɛ ga tuƃo‐vele‐yowũ lii‐ɣɛɛ nui, nii yá bo ɣigi zu é ɣɛ tea, ‘Nà nu keea nu lebiga su,’

⁴⁹é vɛɛ sa ga baa lii‐ɣɛɛ veaitiɛ lowaa, é vɛɛ dɔɔ‐ƃakpa‐ƃoale veaitiɛ va ta tiɛni tiɛ laa mi tiɛ dɔɔ ƃoale,—

⁵⁰tii‐ɣɛɛ nui na na nu keea nu ɣa va ga foloi nii kí gɛ lɛ ɣɛɛ ba ga towaa va ma é va siɛgi nii ma ɛ́ lɛ kwɛ̃ɛga ga towaa va ma.

⁵¹Nà wɔ ka su leve‐leve ga tɔ‐kpɛɛ‐ma é pɛɛ daa‐nɛɛ‐wũ‐ba veaitiɛ va nà mavelei ma. Ná ɣa numaa ta ɣɛ wɔlɔzu ná tiɛ yĩ gaa mi.”