Read Loma MAFIYU 26 Bible Online

MAFIYU 26 - Loma bible

MAFIYU 26

¹Tei Ziizɛ woloni ga fai niitiɛ ɣaazɔ wo, é ɣɛni ná kala dopoitiɛ ma,

²“Wo kwɛ̃ni ga folo felegɔ ɣa wulo na su teve‐maazu wui ɣa vaazu. Nà wɔ ka ɣɛɛ na nu ƃuse lui yee ɣa la numaa ya ga te kpako gului ma.”

³Laa‐ʋaale gwalaitiɛ ƃɔga zuu wũgitiɛ te ɣaa lɛɛni sa ba laa‐ʋaale gwalaitiɛ ta lo‐tuoi nii wɔ vɛ tɔ tili ga Keeafa.

⁴Te zeini ŋada ɣila te deʋe ga te Ziizɛ zo ga gbana te paa.

⁵Kɛ̀ te ɣɛni tea, “A de mɛ lɛ kɛ kui ma, numaitiɛ yii mɛ lɛ va wu ziɣizu ƃuulu‐ƃaala faa ɔ́ wulo na.”

⁶Tei Ziizɛ ɣɛni gee zeeƃɛ keea nui Saimɔ na pɛlɛi wu Bɛtani lai zu,

⁷ŋaza nu ta vaani ga gulo ƃadi ƃoƃo folo‐ʋolo é ga gulo ƃadii sɔ̃wɔ wɔɔlɔi yíɛ pu Ziizɛ wũmɔ nà ɣɛɛ ma laa miizu.

⁸Kɛ̀ tei kala dopoitiɛ te wɛlɛni na va, te yii ɣaa wãlani tiɛ ɣɛ tea, “Zɛƃɛi é vaani ga ŋɛni ŋala‐ŋala fai nii?

⁹Maa nɛi ɣɛ gulo ƃadii nii zɔ̃wɔ wulo naʋolo ƃakpa ma mazɔ̃wɔi ʋe maa‐wõi vea ya.”

¹⁰Kɛ̀ fai nii ɣaa‐ɣaa vele ma Ziizɛ vɛ, é ɣɛni te ma, “Zɛƃɛi é kɛɛ wo ƃoeizu ŋaza nui la? Ƃɔvɛlaale é faa vagɔ ɣɛɛ màʋaa ma.

¹¹Wa maa‐wõi veaitiɛ wa ma wɔ. Kɛ̀ nà dɛi a da wani dɛ lɛ yɛsu ma wɔ.

¹²Guloi nii wuu vele ma bɛ́ ẁũmɔ é màwomai maʋaa ɣavele ƃɛtɛɛ doowu faa ma.

¹³Gè bo wiɛ ga gaama, vɛ nɛpɛ woo niinɛ vagɔi nii ɣa wo na zui wɔlɔ‐kɔlɔ ma ɣaali, nii ŋaza nui nii kɛɛ towaa wo dáa ɣigi‐yɛ faa ma nu ɣa.”

¹⁴Tei sa na ɣɛɛni, Ziizɛ na kala dopo puugɔ kai felegɔitiɛ te ɣilagi nii tɔ tili ga Dudia Asikaalia é liini laa‐ʋaale gwalaitiɛ wɔ vɛ

¹⁵é ɣɛ te ma, “Ani gà Ziizɛ yee la na wo ya, zɛƃɛ ɣa wa fe zèea?” Natiɛ wɔ te fɔɔnɛ ʋe ga kani kpulu‐kpulu zee saagɔ.

¹⁶É ziɣi ƃɔɔ sa na zu ma, é ɣɛni pele ɣaa ziɛzu ga é wulo ga kɔ́wɔ wulu wɔɔ.

¹⁷Kala dopoitiɛ te vaani Ziizɛ wɔ ga kpoolo‐lɛʋɛ‐mii wui maʋolo maa wũgi te ɣɛ ma, “Minɛ ɣa è wõini gé ná ɣavele ƃɛtɛ ga è teve‐maazu wui malaa‐miigi wo na?”

¹⁸É ɣɛ te ma, “A li taa zu wo nii wo mɛ̃i ma wo ɣɛ ma, ‘Kala‐mɔi ɣɛni tea, Nà kui maa ƃuovɛ sa. Nà kala dopoitiɛ ta vɛɛ bà gé teve‐maazu wui ɣa yà vɛlɛi wu.’ ”

¹⁹Kala dopoitiɛ wɔ te kɛɛni nɔ è ɣɛ velei Ziizɛ dɛɛni la ga tiɛ te teve‐maazu wui mamii ŋɛnigi maʋaa ɣavele ƃɛtɛ.

²⁰Tei sa é ɣɛni ga kpɔkɔ, ta ƃɔga ná kala dopo puugɔ kai felegɔitiɛ te zeini tiɛ laa mi.

²¹Te ɣɛi ma sa daa‐miigi wosu, Ziizɛ ɣɛni te ma, “Gè bo wiɛ ga gaama, wo ɣila ka vaazu wulozu ga kɔ̀wɔ wulu wɔɔ.”

²²Maa‐wõi looni te pɛ te ma. Te vɛɛ sa ga kuloa gá ga gile‐gile tiɛ ɣɛ ma, “Nà vee de, gé maliɣii?”

²³É gaa woteni é ɣɛ te ma, “Nui gá tɔ gé yee lɔɔ kokoi zu towaa wulo ga kɔ̀wɔ wulu wɔɔ.

²⁴Nu ƃuse lui ɣa li nɔ è ɣɛ velei ponɛi la Gala kɔlɔi zu é vile bá. Kɛ̀ tɔwɔ kpalo velivɛ nui nii ma yá wulo ga kɔ́wɔ wulu wɔɔ. Ɔ́ ɣɛ ga faa vagɔ nui na ʋaa ma ga ani tɔ ƃe na kaazu.”

²⁵Dudia nii é wuloni ga kɔ́wɔ wulu wɔɔ nà ɣɛni má, “Kala‐mɔi, nà vee de?” Ziizɛ ɣɛ ma, “Kavele ɣa na è boga.”

²⁶Tei sa te ɣɛni daa‐miigi wosu, Ziizɛ kpoolo‐ʋɔi ziɣini é zɛba é Gala feli é su ɣale‐ɣale é fe ná kala dopoitiɛ ya é ɣɛ te ma, “A so wo mi. Màlɔtɔi ɣa.”

²⁷É zɛba wɔnɔ é kpoale ŋɛnii ziɣi. Tei sa é mama feeni Gala bɛ, é teveni te wɔ yíɛ ɣɛ tea, “A kpoale su, wo ɣaazɔ.

²⁸Ƃɔvɛlaale nii ɣa é ga deʋei màŋamai daa, nii puai nu lamaa ʋaa ma faa yowũ zu‐ʋaa‐yɛ fai ma.

²⁹Gè bo wiɛ, gɛ̀ lɛ sa wɔnɔ ŋasa vai nii mayiɛi ta ƃoalea é yɛsu é ziiti foloi na ma gà ta ƃoale la ga niinɛ a da wani kèea Gala na masadai zu.”

³⁰Tei sa te Gala gui looni, te wuloni te li Aale ɣizii ma.

³¹Ziizɛ ɣɛni sa te ma, “Wo pɛ wa ziɣi pele va kpidii nii màzaƃu ma. Toku ge zei ga ponɛvɛ Gala kɔlɔi zu Gala giɛ ɣɛ tea, ‘Gà baala‐maazu‐vɛtɛ nui vaa, na ɣa ɣɛɛ na baala kpulugi zu ɣa sa a yɛzɛ.’ ”

³²Ziizɛ ɣɛ sa tea, “Tɔwɔ Gala ka bù ziɣi na saa ya, gà li wo luo Geealali.”

³³Pite ɣɛni Ziizɛ ma, “Velei ƃalaa te pɛ ta ziɣi la pele va è mazaƃu ma, nà dɛi gɛ̀ lɛ wɔlɔ‐wɔlɔ ziɣia pele va.”

³⁴Ziizɛ ɣɛ ma, “Gè bo yìɛ ga gaama, kpidii nii ƃɔɔƃɔɔ tɛɛ zinɛ ɔ́ vɛɛ wɔkwɛlɛsu, yà màʋaa zakpe ná zei‐zu ɣɛ sava.”

³⁵Pite ɣɛ ma, “Anɛɛ ƃalaa gè vɛɛ è va de za, na ɣa ɣɛ. Kɛ̀ gɛ̀ lɛ è maʋaa zakpega.” Vele nɔ na kala dopoitiɛ ɣaazɔ te boni la.

³⁶Ziizɛ vɛɛni sa te va ta tiɛni te li ŋada ta ná laa ga Gɛsɛmani. É ɣɛ ná kala dopoitiɛ ma, “A zei vɛ gè li munu gè Gala feli.”

³⁷Tei sa é Pite ziɣini ta Zɛbɛdi dea zina felegɔitiɛ ta tiɛni te li, maa‐wõi vɛɛni ga loa má zíi yìɛ dowa.

³⁸É ɣɛni te ma, “Maa‐wõi wala loovɛ mà zìi zu gìɛ ɣi gaa ziɛ ƃalaa ga gà vaazu zaazu. A yɛ vɛ wo vɛɛ bà a diɛ ná maa ƃɛɛ.”

³⁹Tei sa é lamata wolo liini, é vɛɛni é Gala feli yíɛ ɣɛ tea, “Kèea, ani yá ɣɛ na ga solowo faa, ƃe ba fai nii wudɛ ẁũ maazu. Kɛ̀ na ƃalaa ɣɛɛvɛ ɛ́ lɛ ga zìi‐mai ɣɛ, kɛ̀ to mu è yii‐mai ɣɛ.”

⁴⁰É vaani sa kala dopoitiɛ wɔ vɛ é te vɛtɛ tiɛ ŋii. É ɣɛ Pite ma,“? Wɛ lɛ zooni wɔ vɛɛ bà a dɔ ná maa ƃɛɛ ɣalava ɣila zee wu?

⁴¹A ɣɛ ɣi su wiɛ Gala feli ga tɛ‐ga ʋaa mɛ lɛ ziiti wo ma. Nu na ki‐gaa‐ziɛi ʋaave bu ga fai ɣɛ, kɛ̀ nu ɣagi ɣa mazobo gɛ lɛ bɛ́.”

⁴²É zɛba do wɔnɔ é dii fele kelei wo é Gala feli yíɛ ɣɛ tea, “Kèea, ani fai nii lɛ levega màazu kɛni gè bu ƃoale, è yii‐mai ɣa ɣɛ.”

⁴³É vaani wɔnɔ wulu é wɛlɛ te va tiɛ ŋii, toku ge zei ga te ɣaazu wɔlɔgi viiyai ɣɛ te ma.

⁴⁴Tei sa wɔnɔ é ziɣini te woba, é liini é Gala feliai sava kelei ɣɛ yíɛ woo zii ɣilagitiɛ wo nɔ.

⁴⁵Tei na wuloni ba, é vaani ná kala dopoitiɛ wɔ vɛ é ɣɛ te ma,“? Wa dɛ nɔ ŋiizu wiɛ wa loowo bo? A wɛlɛ! Siɛgi maa ƃuovɛ sa. Te wulovɛ sa ga nu ƃuse lui wɔwɔ wulu wɔɔ zée la faa yowũ‐ɣɛɛ vea ya.

⁴⁶A wu ziɣi na a diɛ li. A wɛlɛ! Nui é wuloa ga kɔ̀wɔ wulu wɔɔ máa ƃuovɛ sa.”

⁴⁷Ziizɛ ɣɛni nɔ ƃɔɛzu, Dudia nii é ɣɛni ga kala dopo puugɔ kai felegɔitiɛ te ɣila yíɛ va kpɔ kpakpa vɛi bá boa zɔkpɔa te te ya é vɛɛ kpɔɔlɔ kpua va. Te wuloni laa‐ʋaale gwalaitiɛ wɔ vɛ é vɛɛ zuu wũgitiɛ va.

⁴⁸Tɔwɔ nui é kuloi woni ga Ziizɛ wɔwɔ wulu wɔɔ é po‐kɔ̃ɔ dɛɛni ga nà zo beaitiɛ é ɣɛ te ma, “Nui nii gà laa vɛɛ koma ba, manui ɣa na. A nà zo.”

⁴⁹Dudia vaa vele ɣa na ɣɛ Ziizɛ wɔ vɛ ga maa ʋilea é ɣɛ ma, “Kala‐mɔi, yà na‐ee.” É laa vɛɛ sa nà womagi va.

⁵⁰Ziizɛ wɔ ge ɣɛni ma, “Bɔ̀i, zɛƃɛ ɣa è ma vɛ?” Numaitiɛ te va sa te Ziizɛ zo.

⁵¹Tɔwɔ taitiɛ te ɣɛni Ziizɛ va te ɣila ge ná boai wuloni taɣa ga é laa‐ʋaale gwalaitiɛ te mawũgi na duoi wui leve.

⁵²Ziizɛ wɔ ge ɣɛni ma, “Yà woai lɔ dɔɔ‐zu. Toku ge zei ga taitiɛ ɣaazɔ ta boa zɔkpɔ ziɣi te zu ɣa ƃɔnɔ wo nɔ ga boa zɔkpɔ.

⁵³?È ɣigi zu gɛ̀ lɛ zooga gɔ̀ da kèea Gala bɛ ɔ́ sɔdasi ƃuluga leve vɛ ná keelaitiɛ zu ɔ́ leve sɔdasi ƃulu kpakpa sei‐zu puugɔ kai felegɔ va?

⁵⁴Nà wɔ gɔ ɣɛɛ na, Gala kɔlɔi zu woi ɔ́ sa leve ma ɣɛ le ga kɛni é ɣɛ ŋɛ na?”

⁵⁵Nà maziɛgi zu nɔ sa Ziizɛ ɣɛni la kpɔgitiɛ ma,“? Wo wuloa wo va è ɣɛ wa ɣɛ wɔɔzu wũmɔ nu wɔ, boa zɔkpɔa te wo ya é vɛɛ kpɔɔlɔ kpua va ga wo sò? Folo li folo va gè ɣɛni zeini Gala‐feli wɔta walai wu gìɛ kala‐bo bo, wa wɔ wɛ lɛ sòni.

⁵⁶Kɛ̀ nii pɛ kɛɛvɛ kɛɛ ʋaa ma Gala daa woo‐wo beaitiɛ ta wɔlɔi zu woi leve ma.” Ná kala dopoitiɛ ɣaazɔ te wulu ɣaa ʋeni sa bɛ́ te vela.

⁵⁷Taitiɛ te Ziizɛ zoni te liini sa la Keeafa nii wɔ vɛ é ɣɛni ga laa‐ʋaale gwalaitiɛ te mawũgi. Ná ɣa tɔ‐dɛɛ ɣala‐mɔitiɛ ƃɔga zuu wũgitiɛ te ɣaa lɛi ɣɛ ba na.

⁵⁸Pite vileni pulu, tɔwɔ lɛ ŋɛni laƃani te va. Laa‐ʋaale gwalaitiɛ te mawũgi na pɛlɛi maziɣigi nɔ ɣa é wɛ̃ɛni su. Tei é lɛɛni siɣigi zu, é zeini niitiɛ woba te ɣaazu ɣɛni Ziizɛ va kɛɛ ʋaa ma é wɛlɛ fai laa‐wulo‐zuvɛ va.

⁵⁹Tɔwɔ laa‐ʋaale gwalaitiɛ te vɛɛ faa‐wo‐bo kpɔgi ɣaazɔ va te ɣɛni pele ɣaa ziɛzu ga nu ta zɛɛ ʋaa zeele woo ʋe Ziizɛ ʋaa ma kɛɛ ʋaa ma te paa.

⁶⁰Kɛ̀ tɛ lɛ ná ta nɛpɛ maa zɔlɔ woni, velei ƃalaa zɛɛ ʋaa zeelea lamaa te vaani la. Gaa‐ƃela‐suvɛ sa felegɔ wuloni.

⁶¹Te ɣɛni tea, “Keea nui nii boni é ɣɛ tea, ‘Gà zoo gè Gala na pɛlɛi ŋala‐ŋala gè to ga folo saagɔ.’ ”

⁶²Laa‐ʋaale gwalaitiɛ te mawũgi wu ziɣini é lo é ɣɛ ma, “Zɛbɛ ɣa numai niitiɛ te bosu ga è la? Maɣaa‐wote nɛpɛ gɛ lɛ è la?”

⁶³Kɛ̀ Ziizɛ maazu ɣɛni ƃu. Laa‐ʋaale to‐tuoi ɣɛni sa ma, “Gà nii wosu ʋululai ma Ɣalagi na daa‐zeigi zu ga è kɛ. Ani yà ɣa è ga nui Gala zee ƃakogɛi ba ga masagi è ga dúi, bo gé ma.”

⁶⁴Ziizɛ ɣɛ ma, “Kavele ɣa na è boga. Kɛ̀ gè bo wiɛ, é ziɣi zai ŋɛ ni ma, wa wɛlɛ nu ƃuse lui va zeini ga gaa‐ƃaa Ɣalagi yee za‐su vele tine ƃiligi maazu é gee‐zuvɛ yíɛ va.”

⁶⁵Laa‐ʋaale gwalaitiɛ te mawũgi zɛba sa é wɔba zeɣei veli gá ga faa‐wãla‐ma yíɛ ɣɛ tea, “É Gala daa‐ŋala‐ŋala kpɔɛ woga. Zɛƃɛ zeele ɣa dɛ maƃala de ma? Wo Gala daa‐ŋala‐ŋala kpɔɛi mɛniga da.

⁶⁶Zɛƃɛ ɣa é wo la su ga wo bo?” Te goi ɣaa woteni te ɣɛ ma, “Kulovɛ bu bɛ́ ga nui yá za.”

⁶⁷Te zɛba sa te laa life Ziizɛ ɣaazu te dowa. Taniga te poolɛni

⁶⁸tiɛ ɣɛ ma, “Nui é è woolɛɛ dáa wo gé ma, yài è ga Kolai! Ƃɛ ɣa é è lowaa?”

⁶⁹Pite ɣɛni zeini ŋetea vele pɛlɛi maziɣigi zu. Ŋaza nu loma ta vaani é ɣɛ Pite ma, “Yà ƃalaa è ɣɛni Ziizɛ nii va é ga Geealali nui.”

⁷⁰Kɛ̀ é sakpeni te pɛ te ɣaazu yíɛ ɣɛ ma, “Nii è bosu gɛ̀ lɛ su‐wulo‐zu wɛ̃ni.”

⁷¹Tei wɔnɔ é wuloni é li biasai ɣa, ŋaza nu lomai ta ƃɔnɔ ge pɛtɛni é bo numaitiɛ ma te ɣɛni loni ná woba é ɣɛ te ma, “Zunui nii ɣɛni Nazɔi Yiizɛ va.”

⁷²Pite zɛba wɔnɔ é maʋaa zakpe ga woto levea yíɛ ɣɛ tea, “Gɛ̀ lɛ zunui wɛ̃ni.”

⁷³Tei sa ná ta wolo kɛɛni, taitiɛ te ɣɛni ná woba te vaani te ɣɛ Pite ma, “Ƃɔɔƃɔɔ su yà ga te ta. Toku ge zei ga è woi mawulo‐bai ɣa é è wulu wulozu.”

⁷⁴É vɛɛni sa ga ƃɔɔ wotoa yíɛ wona yíɛ ɣɛ tea, “Gɛ̀ lɛ zunui wɛ̃ni.” Nà ɣɛɛzu ƃɔɔ nɔ tɛɛ zinɛi yìɛ wɔkwɛlɛ. Pite ɣi ge loo sa Ziizɛ woi zu é boni ma yíɛ ɣɛ ma, “Tɛɛ zinɛ ɔ́ vɛɛ wɔkwɛlɛsu yà màʋaa zakpe ná zei‐zu ɣɛ sava.” É wuloni sa é li é kpee loo ƃɔɔ ga gaa wãlaa.