Read Loma MAFIYU 27 Bible Online

MAFIYU 27 - Loma bible

MAFIYU 27

¹Tei gela boni, laa‐aale gwalaitiɛ ɣaazɔ vɛɛ zuu wũgitiɛ va te deʋeni ga te Ziizɛ vaa.

²Te gilini sa te lo túo te lii la te zée ia gɔmɛti nu walai Paila ya.

³Dudia nii é wuloni ga Ziizɛ wɔwɔ wulu wɔɔ, tei é ná vɛtɛni ga te faa vɛɛ bá ga woo, maa‐wõi looni má ná faa yowũi ʋaa ma é va wulu ga kani kpulu‐kpulu zee saagɔi laa‐ʋaale gwalaitiɛ wɔ ta zuu wũgitiɛ.

⁴É ɣɛni te ma, “Gè faa yowũ ɣɛɛ ga velei gè wuloa la ga nui nii wɔwɔ wulu wɔɔ ga te paa. Na ɣa ga nui nii kɛ́ɛ‐zɔ gɛ lɛ faa zu.” Natiɛ wɔ te ɣɛ ma, “Gá ʋaa zɛƃɛi é nà zu? Wɛlɛ máʋai zu va yà ƃɔɔ.”

⁵É zɛba sa é kani kpulu‐kpulugitiɛ wu ya Gala‐feli wɔta walai wu é ziɣi na é li é ƃɔɔ zɛlɛ.

⁶Kɛ̀ laa‐ʋaale gwalaitiɛ te kani kpulu‐kpulugi yɛvɛni te ɣɛ tea, “Ɛ́ lɛ tɔ su ga gé pu naʋolo wuu‐zu ɣɛɛ‐zuvɛ, toku ge zei ga tɔ ga ŋama naʋolo.”

⁷Na ma te zeini ma te zɛba te diɣi‐lo nui na kpalagi ɣeea la ga tiɛ wɛ̃ɛ loowu na.

⁸Na ma é ziɣi ƃɔɔ nà maziɛ su ma é loo zai ŋɛ ni ma, ta kpalagi na lilisu nɔ ga Ŋama Ƃalagi.

⁹Tɔwɔ nii Gala daa woo‐wo nui Jɛlɛmaiya boni tevea ɣa na é ɣɛ ma. Na ɣa ga tei é ɣɛni tea, “Te kani kpulu‐kpulu zee saagɔ ziɣini. Na ɣa ga nui nii te sɔ̃wɔ ƃala kuloa mázɔ̃wɔi nii Yezɔi nu zuwui taniga te sɔ̃wɔ ƃala kuloni.

¹⁰Te te ʋe sa ga diɣi‐lo nui na kpalagi zɔ̃wɔ, è ɣɛ velei nɔ de maliɣii deʋeni la é da zèea.”

¹¹Ziizɛ loni sa gɔmɛti nu walai laa wu. Gɔmɛti nu walai gaa zaɣa kɛɛni é ɣɛ ma,“? Yà ɣa è ga Dusiitiɛ ta masagi?” Ziizɛ ɣɛ ma, “Kavele ɣa na è boga.”

¹²Kɛ̀ tei laa‐ʋaale gwalaitiɛ ƃɔga zuu wũgitiɛ te ɣɛni kɛ́ɛ‐zɔ bosu, ɛ́ lɛ te woi ɣaa woteni.

¹³Paila ɣɛ sa ma,“? Ɛ̀ lɛ fai liigoi mɛnisu te bosu ga è la?”

¹⁴Kɛ̀ ɛ́ lɛ gói ɣaa woteni. Ɛ́ lɛ gilekpu kpalaa looni ga. Na ma gwala wuloni ga gɔmɛti nu walai.

¹⁵É ɣɛni ga gɔmɛti nu walai yaa ʋaa ga pilisinei kpɔgi ɔ́ wõi ɣɛ é ƃe ba te vɛ teve‐maazu wui zu.

¹⁶Tɔwɔ pilisine ta ɣɛni na kwɛ̃ɛgɛi nu pɛ bɛ ná tuo vele yowũi ʋaa zu dáa ga Ziizɛ Balaaba.

¹⁷Na ma tei te ɣaa lɛɛni ba, Paila ɣɛni te ma, “Ƃɛ ɣa wo wõini gè ƃe bá wiɛ, Ziizɛ Balaaba ƃaa Ziizɛi nii ta tili ga Kolai?”

¹⁸Ƃɔvɛlaale é ɣɛni ga kwɛ̃ɛga ga sili laa zɔ‐su ɣa te Ziizɛ yee laani la zéea.

¹⁹Na wuloa su, tei Paila ɣɛni zeini faa‐wo‐bo kpɔkpɔgi ɣa, ŋazai woo leveni pɔ́ vɛ yíɛ ɣɛ ma, “Mɛ lɛ faa nɛpɛ kɛ ga tele‐bo tuo‐wo nui na, toku ge zei ga gè laa nɔwɔ woni zaa máʋai zu sè‐suvɛ.”

²⁰Tɔwɔ laa‐ʋaale gwalaitiɛ ƃɔga zuu wũgitiɛ te lɔɔni numaitiɛ wũ su ga te bo Paila ma é ƃe Balaaba va é Ziizɛ zu ƃɔnɔ wo.

²¹Gɔmɛti nu walai te ɣaa zaɣa kɛɛni wɔnɔ é ɣɛ te ma, “Ƃɛ ɣa wo wõini gè ƃe ba wo vɛ nu felegɔi niitiɛ zu?” Te ɣɛ tea, “Balaaba.”

²²Paila ɣɛ te ma, “Zɛƃɛ mu ka sa gà kɛ ga Ziizɛi nii dáa ga Kolai?” Te pɛ te ɣɛ ma, “Pagɛ é ƃako pɛɛ‐pulu wulu likpii ma.”

²³Paila ɣɛ te ma, “Zɛƃɛ ʋaa zu? Faa yowũ zɛƃɛ ɣa é kɛɛ?” Kɛ̀ te liini nɔ ga luo doba‐bogai zu tiɛ ɣɛ tea, “Pagɛ é ƃako gului ma.”

²⁴Tei Paila wɛlɛni na va ga góo ta wolo ƃalaa lɛ ŋɛni lɔɔzu te va, kɛ̀ to mu zaɣa‐zaɣa faa lɔɔ ɣɛni zeizu, é ziɛ ziɣini é ya wuo kpɔgi ɣaazu yíɛ ɣɛ tea, “Màa wuovɛ zunui nii maŋamai ʋaa zu. A wɛlɛ máʋai zu va wa ƃɔɔ.”

²⁵Numaitiɛ ɣaazɔ te gói ɣaa woteni te ɣɛ ma, “Ƃe ba máŋamai ʋaa ɣɛ ga gé vaa ʋaa gá gé lea!”

²⁶Paila zɛba sa é ƃe Balaaba va te vɛ. Tei sa é kɛɛni te Ziizɛ ƃooʋe, é zée laani sa numaitiɛ ya ga te kpako gului ma.

²⁷Gɔmɛti nu walai na sɔdasiitiɛ te Ziizɛ ziɣini sa te lii la ná pɛlɛi wu, sɔdasi ƃulu kpakpa walai ɣaazɔ ɣaa lɛi ba dáa wu.

²⁸Te maa ʋooni te seɣe ƃoei yogbo too kɔ́ba.

²⁹Te zɛba te ŋai fɛlɛ ga masa bɔɔlɔ kavele te pɛɛ wũmɔ. Te tukpo la zée zagi ɣa. Tei sa te vileni ŋibia dáa wu, te ɣɛni ŋɛɛ wulozu su tiɛ ɣɛ ma, “È yĩsɛ‐o, Dusiitiɛ ta masagi!”

³⁰Te laa lifeni ma te tukpogi ziɣi te dowa la wũgi va.

³¹Tei sa te ŋɛɛ wuloni su, te yogbo kpoeigi wuloni kɔ́ba te kpɔɔ zeɣei loo kɔba te li sa la ga te kpako gului ma.

³²Te ɣɛi ma sa liizu, te wũ kuloni Saalĩi lai zu zunu ta ma dáa ga Saimɔ. Te Zunui nii zoni ga gaa‐ƃaa é pɛɛ‐pulu wulu likpii ziɣi Ziizɛ vɛ.

³³Tei te ziitini ŋadɛi vɛ tɔ ná lili ga Gɔgata, nà wɔ su‐wulo‐zu ɣa ga wũ fooyo ŋada laavɛ,

³⁴te ŋasa vai mayiɛi ta ʋeeni zéea ga é kpoale. Tɔwɔ supuai ɣɛ ga ŋɛni wãla‐wãla. Kɛ̀ tei é kɔ̃ɔni, ɛ́ lɛ ŋɛni kɛɛni ɔ́ kpoale.

³⁵Tei te kpakoni gului ma, te ná seɣei ɣaa wɛɛni ɣii vɛ. Te nii ɣɛɛni ga kpɔzɔ‐loo vele ga te kwɛ̃ ga zɔi yá ziiti nu ma.

³⁶Te zeini sa ga te maazu vɛtɛ na.

³⁷Te ŋɛni ta wonɛni ga dá te pɛɛ wũ maazuvɛ. Mawoi ɣɛni ga “Ziizɛ ɣa, nii é ga Dusiitiɛ ta masagi.”

³⁸Tɔwɔ te wũmɔ vea felegɔ vɛɛni bá ta tiɛni te te ƃako gului ma, gila ge ga zée za‐su vele, zɔi wɔ ge ga kɔ́wɔ yee su vele.

³⁹Numai niitiɛ te ɣɛni levesu bá te ɣɛni ŋɛɛ wulozu sú tiɛ wũgi ɣɛ ma kpɔkɔ‐kpɔkɔ

⁴⁰tiɛ ɣɛ ma, “Yài ɔ̀ zoo è Gala‐feli wɔta walai wolo è to folo saagɔ zu, ƃɔɔ valo na! Ani yà ɣa è ga Gala dui, wulo gului ma è vile.”

⁴¹Vele nɔ na wɔnɔ ƃalaa laa‐ʋaale gwalaitiɛ vɛɛ tɔ‐dɛɛ ɣala‐mɔitiɛ va ta zuu wũgitiɛ te ɣɛni ŋɛɛ wulozu la sú tiɛ ɣɛ tea,

⁴²“É numai zɔitiɛ valoni, tɔwɔ ɛ́ lɛ zooga ɔ́ ƃɔɔ valo. Towa é ga Yezɔi masagi. Ƃe na ba é wulo gului ma é vile. Na ɣa ɣɛɛ na gá sa gá máʋaa ziɣi ga gaama.

⁴³Dáavɛ ga Gala. Ƃe ba Gala ge kulo su ani kpalavɛ máʋaa ma. Toku ge zei ga é ɣɛni tea, ‘Nà ɣa gè ga Gala dui.’ ”

⁴⁴Wũmɔ veaitiɛ te ƃakogɛi ɣɛ ta tiɛni natiɛ ƃalaa te ƃɔɛni nɔ ma ŋɛ na.

⁴⁵Tɔwɔ é ziɣi ƃɔɔ folo gaa‐lɔ‐ga ma é loo kpɔkɔ ʋolo ɣaa‐ƃaa‐ƃaa ma kpidi vɛɛni zui maazu.

⁴⁶Tei sa é ɣɛni ga kpɔkɔ ʋolo ɣaa‐ƃaa‐ƃaa daa yɔɔzu, Ziizɛ lobani yíɛ ɣɛ tea, “Yiilai, Yiilai, lama sabatani?” Nà wɔ ka ga, “Nà Galagi, nà Galagi, zɛƃɛi é kɛɛ è yee wuloa màʋaa zu?”

⁴⁷Taitiɛ te ɣɛni loni ná woba tei te nii mɛnini, te taniga te ɣɛni tea, “Zunui nii ɣa Yiilaija lilisu.”

⁴⁸Te ɣila ge ƃizeni sa é su‐wuogi lɔ dɔɔ ƃoda‐ƃoda bu nà su laa ʋe é dɔ gului ɣa é fe zéea ga é kpoale.

⁴⁹Kɛ̀ zɔitiɛ te ɣɛni ma, “Ná maa kpowũ de wɛlɛ na va ga ani Yiilaija ɣa va é balo.”

⁵⁰Ziizɛ lobani wɔnɔ ƃɔɔ ga woo wala zɛ́ʋui wulo sa zéea.

⁵¹Tei na ɣɛɛni, Gala‐feli wɔta walai wu zeɣei velini su fele é ziɣi ƃɔɔ maazu é yii kɔwaavɛ. Zui ƃelini sa, kwɔtia tiɛ veli‐veli.

⁵²Kabaitiɛ te laa laoni. Na ɣa ɣɛɛ na Gala na dɔ numaitiɛ te laa wɔlɔ yee ma te lamaa te mawomaitiɛ te wu ziɣini saa ya.

⁵³Tei sa Ziizɛ wu ziɣini saa ya, te wuloni kaba yeɣeitiɛ zu te li taa wala maa wuai zu te wulo numaa lamaa ɣaazu.

⁵⁴Sɔdasi wũ gila maazu nui ƃɔga taitiɛ te ɣɛni ba tiɛ Ziizɛ maazu vɛtɛ, tei te wɛlɛni zui va yiɛ ƃeli é vɛɛ fai zɔitiɛ va te ɣɛɛni, te laa ʋeni ga duo te ɣɛ tea, “Ƃɔɔƃɔɔ su nii ɣɛni ga Gala duu!”

⁵⁵Ŋazaa lamagɛi ɣɛ ƃalaa na te ƃɔɔ woozala tiɛ wɛlɛ. Ta ɣa te vileni Ziizɛ wulu ta tiɛni te ziɣi Geealali tiɛ báa ʋaa ɣɛ.

⁵⁶Meele Mɛdaliini, Jĩi ƃɔga Zoosɛ te lee Meele é vɛɛ Zɛbɛdi dea zinaitiɛ te lee va te ɣɛni ŋazai niitiɛ zaama.

⁵⁷Tei sa é ɣɛni ga kpɔkɔ, kpɛtɛ nu ta vaani é ga Alematia nu dáa ga Zoosɛ. É ɣɛni ga Ziizɛ na kala dopoi ta ƃalaa pɛ.

⁵⁸É liini Paila wɔ é feli Ziizɛ mawomai ma. Paila wɔ ge bo ga te fe zéea.

⁵⁹Zoosɛ é pomai ziɣini é maa ƃiti ga gbaza niinɛ é

⁶⁰da kpɔɔ ɣaba yeɣɛ niinɛi zu nii teveai ɣɛ bɛ́ kwɔti va. É zɛba do sa é kwɔti ƃakpa ɣili‐kili é pɛɛ kaba yeɣei la é ziɣi na é li.

⁶¹Meele Mɛdaliini ƃɔga Meele zɔi te ɣɛni na zeini kabai la.

⁶²Na wulu ʋoloi, na ɣa ga tei sa dɔwɔ walai wuloni ga, laa‐ʋaale gwalaitiɛ te vɛɛ Favilesiitiɛ va te ɣaa lɛɛni ba Paila yii la.

⁶³Te ɣɛni ma, “Kèea, gé ɣi ka su ga nii ŋɛ ni é zɛɛ ʋaa laa‐zeigi zeiya ƃɔɔ va kɛ́i ma ʋulu‐ʋulu kɔwɔ ɣa, é ɣɛni tea, ‘Folo saagɔ ɣa wulo na su gà wu ziɣi saa ya.’

⁶⁴Na ma bo te kabai maazu vɛtɛ é yɛsu foloi sava kelei leve, ná kala dopoitiɛ te mɛ lɛ va liizu tɔ wũmɔ tɔ lii la tɔ ɣɛ numaitiɛ ma, ‘É wu ziɣia saa ya.’ Na ɣa ɣɛɛ na gaa‐wɔlɔ gaa‐ƃelagi ɣa yowũ é leve mamaa wũgi va.”

⁶⁵Paila ɣɛ te ma, “A sɔdasia ziɣi. A li wo kɛ te ná maazu vɛtɛ ga velei ta zoo te kɛɛ la.”

⁶⁶Te lii vele ɣa na é ɣɛ te kabai maa ƃɛ. Te nii ɣɛɛni ga velei te kɔlɔ wonɛni la te pɛɛ ba ga nu mɛ lɛ daa lao ta sɔdasiitiɛ te te zeini na ga te ná maa ƃɛ.