Read Loma MAFIYU 28 Bible Online

MAFIYU 28 - Loma bible

MAFIYU 28

¹Tei doowo foloi leveni yíɛ sa ziiti gela‐boga ma ga laali ʋolo subu, Meele Mɛdaliini ƃɔga Meele zɔi te liini ga te wɛlɛ kabai va.

²Tɔwɔ zui ƃelini ga kpakpaa. Toku ge zei ga de maliɣii na keelai wuloni gee‐zuvɛ é vile é kwɔti walai ɣili‐kili é ziɣi kaba yeɣei la é zei sa kwɔtii ƃɔɔ maazu.

³Kpɛtɛ velei wuloai ɣɛ è ɣɛ mea‐mea. Máa zeɣei yìɛ wele è ɣɛ dɛɣɛ.

⁴Tɔwɔ kabai maa‐ƃɛɛ veaitiɛ te luo vele ma te ƃelini te maʋaa wulo è ɣɛ poma.

⁵Kɛ̀ Gala ta ɣeelai ɣɛni ŋazaitiɛ ma, “A mɛ lɛ luo. Gè kwɛ̃ni ga wa Ziizɛ ɣaa ziɛzu nii te kpakoni gului ma.

⁶Ɛ́ lɛ vɛ, ƃɔvɛlaale é wu ziɣia è ɣɛ velei é boni la. A va wo wɛlɛ vɛ va te daani na.

⁷A li ga maa ʋilea wo bo ná kala dopoitiɛ ma ga é wu ziɣia saa ya. Na ɣa ɣɛɛ na tɔ liizu te luo Geealali. Ná ɣa ta pɛtɛ na. A wɛlɛ, gè boga wo ma.”

⁸Na ma te ziɣini kabai la ga maa ʋilea duo maazu ta kuu‐zu‐nɛɛ ƃakpa wala te li ga kpize ga te bo ná kala dopoitiɛ ma.

⁹Tɔwɔ ta Ziizɛni te wũini, nà ɣɛ te ma, “Wa na‐ee!” Te va sa te loo kɔ́wɔ wu.

¹⁰Ziizɛ ɣɛni sa te ma, “A mɛ lɛ luo. A li wo bo bàitiɛ ma te li Geealali. Ná ɣa ta pɛ̀tɛ na.”

¹¹Tei sa te ɣɛni liizu, kaba maa‐ƃɛɛ veaitiɛ te taniga te liini taa zu. Nii nɛpɛgi é ɣɛɛni te su wulo laa‐ʋaale gwalaitiɛ ma.

¹²Tei sa te ɣaa lɛɛni ba ŋada ɣila ta ƃɔga zuu wũgitiɛ te deʋe wo, te naʋolo ʋeeni sɔdasiitiɛ ya te ɣɛni kabai maazu vɛtɛsu.

¹³Te ɣɛni te ma, “A bo numaitiɛ ma ga ‘Tei gé ɣɛni ŋiizu, Ziizɛ na kala dopoitiɛ te vaani ga kpidi te mawomai wũmɔ.’

¹⁴Ani wɔnɔ fai nii ɣa loo na gɔmɛti nu walai wui zu, gá zii la ga gé wo wulo faa ƃoei zu.”

¹⁵Na ma natiɛ te naʋoloi zoni, nii nɔ te dɛɛni ga tiɛ te na ɣɛ. É yɛga su ƃɔɔ é ziiti zai ŋɛ ni ƃalaa ma, kwona‐bo goi nii yɛzɛgɛ dɛ nɔ Dusiitiɛ zaama.

¹⁶Kala dopo puugɔ kai ɣilagi liini Geealali gizigi nii ma Ziizɛ ná lɛɛni ga tiɛ.

¹⁷Tei te pɛtɛni, te looni kɔ́wɔ wu. Kɛ̀ sakpe ge ɣɛni te taniga yii zu.

¹⁸Ziizɛ vaani é ɣɛ te ma, “Gaa‐ƃai ɣaazɔ é zui zu ta gee feevɛ zèea.

¹⁹Na ma a li wo zii pɛ kala bo wiɛ bataize ɣɛ ga tiɛ kèea Gala na daa‐zeigi zu, nài gè ga dúi nà daa‐zeigi zu, kèea Gala baa ŋinɛgi na daa‐zeigi zu.

²⁰A wiɛ te ɣala bo ga te ziɛ ga fai ɣaazɔ gè wo leʋea la. A wɛlɛ! Gà ɣɛ wo woba ga ɣee nɛpɛ é yɛsu ŋeteai ɣaa‐ƃela folo ziiti.”