Read Loma MAFIYU 3 Bible Online

MAFIYU 3 - Loma bible

MAFIYU 3

¹Na maziɛ su Bataize‐ɣɛɛ Jɔ̃ vaani yíɛ Gala goi wo kpooʋei zu Yudiiya yui zu.

²É ɣɛni ɣɛɛzu tea, “A wulu ɣaa ʋe wa ʋaa yowũitiɛ va, toku ge zei ga Gala ta masadai maa ƃuovɛ sa.”

³Jɔ̃ ɣa Gala daa woo‐wo nui Aizeea ƃɔɛni é vile ba yíɛ ɣɛ tea, “Nu ta ɣa lobasu kpooʋei zu yíɛ bo ga ‘A de maliɣii na pelei ɣavele ƃɛtɛ. A ná pelei lete to.’ ”

⁴Tɔwɔ seɣei Jɔ̃ ɔ́ tɛ ma kpɛtɛi ɣɛ ga suoi daa ga “keeamɔ” maleɣai yíɛ zaama ɣili ga suo wɔlɔ zaama‐ɣili. Koto kpɔga kõei gulo ɣa te ɣɛni ga kɔ̃nɔgi.

⁵Yɛlusulɛɛ veaitiɛ te liini pɔ́, Yudiiya vea ɣaazɔ te li pɔ́ é vɛɛ Jɔdɛ̃ woba ligi zu vea ɣaazɔ va.

⁶Te ta ʋaa yowũitiɛ wuloni sa la te bo, tɔwɔ é bataize ɣɛ ga tiɛ ziɛ walai Jɔdɛ̃ wu.

⁷Kɛ̀ tei Jɔ̃ wɛlɛni Favilesiitiɛ lamaa va ta Sadusiitiɛ lamaa tiɛ va bataize‐ɣɛɛ ʋaa ma ga tiɛ, é ɣɛni te ma, “Wai ŋɛ ni wo ʋaa wuloai ga kaalia, ƃɛ ɣa é boga wo ma ga wo vela Gala na zii‐ɣaa‐wãlai va é vaazu?

⁸Ka dɔ kɛ mu a tii nii ɣɛ solowogɛi nui ma púlu ɣaa ʋegɛi faa yowũ va.

⁹A mɛ lɛ ɣi gaa ziɛ wɔ ɣɛ woo zu wulozu ga ‘Eeƃɔlɔhɛ̃ɛ ɣa ga gé mama gwala.’ Gè bo wiɛ, Gala ka zoo é kwɔtii niitiɛ ziɣi é te ɣɛ ga Eeƃɔlɔhɛ̃ɛ dea.

¹⁰Nii zu ƃalaa zooʋai ɣa sa guluitiɛ te maŋasai va yíɛ teve. Na ma gului nɛpɛ ɛ́ lɛ vaa ga gulu‐vaa vagɔ ta teve te pili ŋabui ɣa.

¹¹Gà bataize ɣɛɛzu ga wiɛ ga ziɛ pulu‐ɣaa‐ʋe‐bo fai ma faa yowũ va. Kɛ̀ nui é pùlu é vaazu kée ɣaa ƃaavɛ é leve bà. Tɔ ga nui gɛ̀ lɛ kuloni bu ga gè ɣɛ ga ná savalagi‐ziɣi nu. Towaa bataize ɣɛ ga wiɛ ga Gala baa ŋinɛgi ta ŋabu.

¹²Ná mɔlɔ‐ɣaa‐ʋɛ ŋɛnii ɣa zéea. Towaa mɔlɔi ɣaa ʋɛ é gaa lɛ ba mɔlɔ wuu‐zuvɛ. Kɛ̀ nii é ga mɔlɔ ɣalai towaa nà ɣala ga ŋabui nii ɛ́ lɛ wɔlɔ‐wɔlɔ liʋiga.”

¹³Ziizɛ wuloni Geealali é li Jɔdɛ̃ ma Jɔ̃ wɔ vɛ ga nà bataize ɣɛɛ la.

¹⁴Jɔ̃ ɣɛni wõi ɣɛɛzu ga é Ziizɛ ƃe teve nà ɣɛɛ ʋaa va. É ɣɛni má,“? Nà mu ka kpàlai è ma ga è bataize ɣɛ gàazu è va pɔ̀?”

¹⁵Kɛ̀ Ziizɛ gaa woteni é ɣɛ ma, “Ƃe ba é ɣɛ ŋɛ na sa. Nii mavelei ma solowogɛ de ʋaa ma ga de nii ɣaazɔ ɣɛ Gala ki ge ba ga de kɛ.” Jɔ̃ ʋa sa bu ga é kɛ.

¹⁶Tei bataizei ɣɛɛni ga Ziizɛ, é wuloni ziɛi wu ga maa ʋilea. Na ɣa ɣɛɛ na gee‐zuvɛ laa laoni gáazu é wɛlɛ Gala baa ŋinɛgi va yíɛ yii è ɣɛ ƃiiƃɔku é zei ma.

¹⁷Tɔwɔ woo ta wuloni sa gee‐zuvɛ yíɛ ɣɛ tea, “Nii ɣa é ga ẁõila lui, nii zìi wala lai máʋai vɛ.”