Read Loma MAFIYU 5 Bible Online

MAFIYU 5 - Loma bible

MAFIYU 5

¹Tei Ziizɛ wɛlɛni kpɔgi va, é lɛɛni gizigi ma. Tei sa é zeini, ná kala dopoitiɛ te vaani pɔ́.

²É laa wu ziɣi sa kala‐bo ma yiɛ bo ga tiɛ.

³É ɣɛni ɣɛɛzu tea, “Tuuyiɛ ɣa niitiɛ ma te yii lɛ wɔɔlɔni, ƃɔvɛlaale ta ɣa te wo ge ga Gala ta masadai.

⁴“Tuuyiɛ ɣa niitiɛ ma gwɔlɔ yiɛ te ɣaazu, ƃɔvɛlaale gaa‐nɛkpɛ ka vaazu wosu ga tiɛ.

⁵“Tuuyiɛ ɣa niitiɛ ma te woloai, ƃɔvɛlaale zui ɣa vaazu ɣɛɛzu ga te weli.

⁶“Tuuyiɛ ɣa niitiɛ ma te tele‐bo tuo maa‐wõi‐wõi kulozu, ƃɔvɛlaale te yii ɣa vaazu laazu su.

⁷“Tuuyiɛ ɣa niitiɛ ma te ga gaazu‐maa‐wõi‐ɣaa vea, ƃɔvɛlaale ta vaazu gaazu‐maa‐wõi‐ɣaa maa zɔlɔ wosu.

⁸“Tuuyiɛ ɣa niitiɛ ma te yii zu wuai, ƃɔvɛlaale ta vaazu Gala pɛtɛsu.

⁹“Tuuyiɛ ɣa niitiɛ ma ta kɛ zii‐laa ɣɛ zui zu, ƃɔvɛlaale ta vaazu te lilisu ga Gala dea.

¹⁰“Tuuyiɛ ɣa niitiɛ ma te ƃɔɔlagɛi tele‐bo tuoi wulu vele zu, ƃɔvɛlaale ta ɣa te wo ge ga Gala ta masadai.

¹¹“Tuuyiɛ ɣa ɣɛ wo ma ani numaa ta ɣɛ na wo laa wo zu loozu ga yowũa tiɛ wo ƃɔɔla tiɛ faa yowũ mazii ɣaazɔ wo ga wo laa ga ƃaa‐wo‐ma vele tiɛ kɛ màʋaa zu.

¹²A wiɛ kuu‐zu‐nɛɛ wulo, wo wuu zu yìɛ nɛɛ, ƃɔvɛlaale mawulo‐nu‐mai wɔɔlɔvɛ wo ya Gala ta. Gala daa woo‐wo beai niitiɛ te ŋeteai ɣɛɛni wo luo, vele nɔ na numaitiɛ te te ƃɔɔlani la.

¹³“Wa ɣa wo ga zui maƃoloi. Kɛ̀ tɔwɔ ani kpolo mayɛmi ka wulo na ba, tɔ sa a yɛ ɣɛ le kpololai zu? Ɛ́ lɛ sa wɔlɔ‐wɔlɔ vaga faa ta nɛpɛ faa ma, kɛni nɔ te pili ya numaa wɔwɔ wu tiɛ ziɛ su.

¹⁴Wa ɣa wo ga zui maŋada wodoai. Tai é wuuni gizi ga ɛ́ lɛ loowuga.

¹⁵Nu lɛ wɔnɔ labo ɣaa zoga ɔ́ dɔ kpɔlɔ bu. Kɛ̀ ta sei labo‐zei ŋɛnii ɣa é nu pɛ gaazu wodo pɛlɛi wu.

¹⁶A wiɛ ʋolo ƃɔɔ nu ƃuse ɣaazu kɛɛ ʋaa ma te wɛlɛ wa lii vagɔitiɛ va, wo ɣeeai nii é gee‐zuvɛ tiɛ dáa maa lɛ.

¹⁷“A mɛ lɛ ɣi kɛ ná ga pàavɛ ga gè Gala na tɔgi maʋaa ziɣi gá ta Gala daa woo‐wo beaitiɛ ta wɔlɔitiɛ laa woi. Gɛ̀ lɛ vaani ga gè te maʋaa ziɣi gá. Kɛ̀ nà mu pàavɛ ga gè te maʋaa ƃaso.

¹⁸Gè bo wiɛ ga gaama, é yɛsu zui ƃɔga gee te maʋaa ƃea gá tɔgi laa woi maa ƃuo ƃalaa lɛ ziɣia ma, bɛnɛ wolo ƃalaa lɛ ziɣia ma é yɛsu máʋai ɣaazɔ laa wulo palo.

¹⁹Na ma nui nɛpɛgi yá tɔgi niitiɛ te ta wolo ƃalaa maʋaa wulo ga yee wulu vele yíɛ zɔitiɛ ɣala bo ga te daamɔdai ɣɛ, manui ɣa loo báa pɛ bu Gala ta masadai zu. Kɛ̀ nui nɛpɛgi yá ziɛ ga tɔgi laa woi yíɛ numaa ɣala bo ga te ziɛ la, manui lo‐su ɣa wɔɔlɔ Gala ta masadai zu.

²⁰Gè bo wiɛ, kɛni wa lele‐bo tuoi ɣa ʋize wo tɔ‐dɛɛ ɣala‐mɔitiɛ ta dɛi va ta Favilesiitiɛ. Na laale wɛ lɛ wɔlɔ‐wɔlɔ lɛɛ Gala ta masadai zu.

²¹“Wo mɛniga ga te boni wɔlɔ‐wɔlɔ veaitiɛ ma ga ‘Nu mɛ lɛ nu vaa. Nui nɛpɛ yá nu vaa towaa mawoo‐zu‐wulo bo kuuti zu.’

²²Kɛ̀ gà bosu wiɛ ga nui nɛpɛ yá yii ɣaa wãla bɔ́ɔ nu ya, towaa mawoo‐zu‐wulo bo kuuti zu. Nui nɛpɛ yá bɔ́ɔ nu ɣaazu ƃala‐ƃala, towaa mawoo‐zu‐wulo bo faa‐wo‐bo kpɔgi zu. Nui nɛpɛ yá ɣɛ bɔ́ɔ nu ma, ‘È litigɛ,’ towaa mawoo‐zu‐wulo bo daa‐nɔwɔ‐wo ŋada laavɛ maŋabui zu.

²³Na ma ani yà na vaazu ga yà ʋaa‐nɛi Gala zeke‐kɛɛ vanagi laa wu è ɣi ge loo su ga è ɣɛɛ‐zɔ ka è wɔi wuu zu,

²⁴yà ʋaa‐nɛɛ‐ɣɛɛ ŋɛnii yɛ Gala zeke‐kɛɛ vanagi laa wu è li. Mamaa wũgi pa a yɔɔzu ƃɛtɛ wa è wɔi è va sa è yà ʋaa‐nɛi ɣɛ.

²⁵Kɛ́ wa è ɣɛɛ‐zɔ‐daa nui wo nɛɛ ga maa ʋilea wa tɔ wa ɣɛ na wulu wiɛ li kuutii zu, kɛɛ ʋaa ma é mɛ lɛ è yee la faa‐wo‐bo nui ya, nà ɔ́ è yee la polesi ya, na ɣa ɣɛɛ na te è vili kpidi vɛlɛ wu.

²⁶Gè bo yìɛ ga gaama, ɛ̀ lɛ wɔlɔ‐wɔlɔ wuloa bu é yɛsu è kapagi maɣaa‐ƃelagi lɔ.

²⁷“Wo mɛniga ga bogɛ ga ‘Yài è ga ŋaza keea nu ɔɔ yài è ga zini‐bɛ nu, mɛ lɛ wɛ̃ɛ zo.’

²⁸Kɛ̀ gà bosu wiɛ ga nui nɛpɛ yá wɛle ŋaza nu va mayii vili kúu zu, a kɛ tii é vilega púlu ga ɣigi zu vele.

²⁹Ani è yee‐za‐su vele ɣaazu ɣɛzɛgi ɣa ɣɛɛzu ga zaƃu ga è ziɣi pele va, kulo na è pili ya. Pagɛ è vala è lɔtɔi lo‐suvɛ ta ma é leve è lɔtɔi ɣaazɔ viliga va daa‐nɔwɔ‐wo ŋada laavɛ.

³⁰Ani wɔnɔ è yee‐zagi ɣa ɣɛɛzu ga zaƃu ga è ziɣi pele va, teve va è pili ya. Pagɛ è vala è lɔtɔi lo‐suvɛ ta ma é leve è lɔtɔi ɣaazɔ viliga va daa‐nɔwɔ‐wo ŋada laavɛ.

³¹“Te boni ƃalaa wɔnɔ ga ‘Nui nɛpɛ yá ɣɛlɛ ŋaza va, é kɔlɔ ʋe zéea yíɛ dɛ ga é ɣɛlɛɛ bá.’

³²Kɛ̀ gà bosu wiɛ ga nui nɛpɛ yá ɣɛlɛ ŋaza va, ani kɛlɛ‐ba ʋai lɔɔ lɛ zeini nɔ wɛ̃ɛ‐ziɛ‐bo faa va ŋázai vɛ, a kɛ tii é ŋazai ɣɛɛ ga wɛ̃ɛ‐ziɛ‐bo nu. Tɔwɔ nui nɛpɛ yá kɛlɛ‐bɛ ŋaza nui na wulo ga ŋaza, manui ɣa ɣɛ wɛ̃ɛ‐zo tɔgi ŋala‐ŋalasu.

³³“Na wulu kɔnɔ te boni wɔlɔ‐wɔlɔ veaitiɛ ma ga ‘Nu mɛ lɛ zɛɛ ʋaa wona wo. Kɛ̀ nii nɛpɛ è woto levea ma de maliɣii Gala zeea, kɛ bɛ́.’

³⁴Kɛ̀ gà bosu wiɛ ga a mɛ lɛ kwona mazii ta nɛpɛ bo. A mɛ lɛ wona gee wɔlɔgi ma, ƃɔvɛlaale towaa é ga Gala na masa kpɔkpɔgi.

³⁵A mɛ lɛ wona zui ma, ƃɔvɛlaale towaa é ga kɔ́wɔ‐vile‐suvɛ. A mɛ lɛ wɔnɔ wona Yɛlusulɛɛ lai ma, ƃɔvɛlaale towaa é ga ɣalaso gwalai Gala na tai.

³⁶Mɛ lɛ wona ƃalaa è wũgi ma, ƃɔvɛlaale ɛ̀ lɛ zooga ɔ̀ wũ deɣa kpalaa wele ɔ́ nɔ ɣɛ ga è tei.

³⁷Zɔi nɛpɛgi wa ɣɛ wo bo, a ƃe ba nɔ é ɣɛ ga ‘ooi’ ɔɔ ‘ƃa’. Wa faa ta nɛpɛ bo na é wudɛ minɛ maazu, towaa wulo tuƃo‐vele‐yowũ nui ya.

³⁸“Wo mɛniga ga bogɛ ga ‘Nu ɣa ŋada zei è ɣaazu ɣɛzɛgi va, ŋada zei gáazu ɣɛzɛgi va. Nu ɣa ŋada zei è yĩgɛi va, ŋada zei yĩgɛi va.’

³⁹Kɛ̀ gà bosu wiɛ ga a mɛ lɛ lo nui la é tuƃo vele yowũ wulozu ga wiɛ. Kɛ̀ ani nu nɛpɛ ka è woolɛ na è yee‐za‐su vele womagi va, zɔlaavɛ vele lite manui ma kɔnɔ.

⁴⁰Ani wɔnɔ nu ta ɣa wõi na é è maa ƃolo la ga é yà ɣile seɣei zɔlɔ wo, ƃe ba yà vɛɛ‐pului yɛ manui ya ƃalaa pɛ.

⁴¹Ani nu ɣa è zo na ga gaa‐ƃaa ga è maali gila siɛ wo bɛ́, yɛ púlu è maali felegɔ ziɛ wo bɛ́.

⁴²Nu nɛpɛ ka è ʋeli na ŋɛni ta ma, teve manui wɔ. Nu nɛpɛ ka bo na yìɛ ga è kui vɛɛ má, mɛ lɛ sakpe zéea.

⁴³“Wo mɛniga ga bogɛ ga ‘Wõi ga è zii yɔ̃wɔ è zili ga è wɔɔ yɔ̃wɔ.’

⁴⁴Kɛ̀ gà bosu wiɛ ga a wõi ga wo wɔɔ yɔ̃wɔa wiɛ Gala feli niitiɛ ʋaa ma ta wo ƃɔɔla,

⁴⁵kɛɛ ʋaa ma wo ɣeeai nii é gee‐zuvɛ déa te ɣɛ ga wiɛ. Ƃɔvɛlaale towaa kɛ ná foloi too tuƃo‐vele‐yowũ‐wulo vea ma ta tuƃo‐vele‐vagɔ‐ɣɛɛ vea yíɛ ná tinei leve nà yìɛ pu tele‐bo bea ma ta tele‐bo tala vea.

⁴⁶Ani wa niitiɛ wõi na te wo wõini, zɛƃɛ ɣa yá ɣɛ ga mawulo‐nu‐mai wo ya? Kɛ̀bɛ gɔmɛti ɣani‐kulo veaitiɛ ƃalaa ta nɔ na ɣɛɛzu.

⁴⁷Ani wo veaitiɛ nɔ ɣa wa laali te ma, a kɛ tii zɛƃɛ liigo ɣa sa wa ɣɛ kɛɛzu é leve zɔitiɛ va? ?Nà nɔ lei zii ƃalaagitiɛ tɔ ɣɛ kɛɛzu?

⁴⁸Na ma kɛni wa ɣɛ ga nui maa‐wulo‐zu lɛ máʋaa va, è ɣɛ velei maa‐wulo‐zu lɛ la wo ɣeea Gala maʋaa va, na ɣa ga nii é gee‐zuvɛ.