Read Loma MAFIYU 6 Bible Online

MAFIYU 6 - Loma bible

MAFIYU 6

¹Ziizɛ ɣɛni tea, “A kɛsɛ wo mɛ lɛ wa Ɣala tuoi wo nɔ nu ƃuse ɣaazu ga te wo vɛtɛ. Ƃɔvɛlaale wa na ɣɛɛ na, wɛ lɛ wuloa ná nu ma wo ɣeeai nii ya é gee‐zuvɛ.

²“Na mavele ma ani yà ɣɛ na faa‐nɛɛ ɣɛɛzu, mɛ lɛ kɛ ga puu‐loo‐ma ʋaa è ɣɛ velei daa‐nɛɛ‐wũ‐ba veaitiɛ ta kɛɛ la Gala‐feli wɔtaitiɛ wu ta pele‐vɛɛgitiɛ ma kɛɛ ʋaa ma nu ƃusea te te laa maa lɛ. Gè bo wiɛ ga gaama, mawulo‐nu‐mai nɔ na sa te ya.

³Kɛ̀ ani yà ɣɛ na faa‐nɛɛ ɣɛɛzu, mɛ lɛ ƃe ba nii è yee‐zagi ɣa ɣɛ kɛɛzu è wɔwɔ‐yeegi ƃalaa ɔ́ su wɛ̃ɛ,

⁴kɛɛ ʋaa ma yà ʋaa‐nɛi ɣɛ ga doowu ʋaa. Nà wɔ ka ɣɛɛ na, è ɣeea Gala nii yá wɛlɛ doowu ʋaa zu va towaa su loo yìɛ.

⁵“Wa ɣɛ na wɔnɔ Gala felizu, a mɛ lɛ ƃɔɔ wulo ga daa‐nɛɛ‐wũ‐ba veaitiɛ. Natiɛ wɔ ka te wõini te lo Gala‐feli wɔtaitiɛ wu ta vɛ pele‐vɛɛgitiɛ ta wũi na tiɛ Gala feli na, kɛɛ ʋaa ma numaa tiɛ te vɛtɛ. Gè bo wiɛ ga gaama, mawulo‐nu‐mai nɔ na te ya.

⁶Kɛ̀ yà ɣɛ na Gala felizu, lɔ yà lumui zu è daa wulu è è ɣeea Gala nii ʋeli nu ƃuse lɛ pɛtɛga. È ɣeeai na wɔgi yá wɛlɛ doowu ʋaa zu va towaa su loo yìɛ.

⁷Wa ɣɛ na Gala felizu, a mɛ lɛ woo yãka letele gaa kpɔ ba è ɣɛ velei zii ƃalaagitiɛ ta kɛɛ la. Tɔ te ɣigi zu ga Gala ka te woi mɛni ta woo lama‐lamagi ʋaa ma.

⁸A mɛ lɛ ɣɛ ga te ɣavele, ƃɔvɛlaale nii maƃala wo ma wo ɣeea Gala ge kwɛ̃ni pɛ wɔ teɣa ɣɛ bosu má.

⁹Na ma wa Gala feli ŋɛ ni. ‘Yài è ga gé ɣeeai è gee‐zuvɛ, ƃaa ɣa la yà laa‐zeigi ma,

¹⁰yà masadai va, è yii‐mai ɣɛ zui zu è ɣɛ velei é ɣɛɛzu la è wɔ vɛ,

¹¹è zaa mii ŋɛnigi ʋe gé ya,

¹²è gé vaa ʋaitiɛ zu ʋaa yɛ, è ɣɛ velei gá ƃalaa gé zɔitiɛ zu ʋaa yɛga la gá ʋaa yɛga te va.

¹³Mɛ lɛ kɛ tɛ‐ga ɔ́ wo ga gíɛ, kɛ̀ è gé wulo tuƃo‐vele‐yowũ nui ya.’

¹⁴Ƃɔvɛlaale ani wa numaa ta ʋaa yowũ zu ʋaa yɛ na, wo ɣeeai é gee‐zuvɛ towaa wo zu ʋaa yɛ tɔ ƃalaa.

¹⁵Kɛ̀ ani wɛ lɛ numaa ta ʋaa yowũ zu ʋaa yɛga, vele nɔ na wo ɣeea lɛ wa ʋaa yowũitiɛ zu ʋaa yɛga la.

¹⁶“Wa ɣɛ na zi dɔɔzu, a mɛ lɛ ƃɔɔ ɣaazu maa wõi è ɣɛ velei daa‐nɛɛ‐wũ‐ba veaitiɛ ta kɛɛ la, ƃɔvɛlaale ta ɣaazu maa ʋeli kɛɛ ʋaa ma nu ƃuse wɛlɛ ta zi‐dɔɔ ʋai zu va. Gè bo wiɛ ga gaama, mawulo‐nu‐mai nɔ na te ya.

¹⁷Kɛ̀ wa ɣɛ na zi dɔɔzu, a gulo ƃadi ziɛ wũmɔ wo ɣaazu wuo,

¹⁸kɛɛ ʋaa ma nu ƃuse mɛ lɛ wɛlɛ wa zi‐dɔɔ ʋai zu va, kɛni nɔ wo ɣeeai nii nu ƃuse lɛ pɛtɛga. Wo ɣeeai nii ɣá wɛlɛ doowu ʋai zu va towaa su loo wiɛ.

¹⁹“A mɛ lɛ yii‐ma ŋɛnia laa‐zu ɣɛ zui ɣa, vɛ koi kpɔga koi‐koi ta te mii na. Na ɣa ɣɛɛ na wũmɔ vea te pɛlɛ laa wolo te ma te te wũmɔ.

²⁰Kɛ̀ a yii‐ma ŋɛnia laa‐zu ɣɛ Gala ta vɛ koi gɛ lɛ mia na ɔ́ nɔ ɣɛ ga koi‐koi. É wɔnɔ ga ŋadɛi wũmɔ vea tɛ lɛ pɛlɛ laa woloa na te ma tɔ te wũmɔ.

²¹Toku ge zei ga vɛ nu yii‐ma ŋɛni na ná ɣa kígi na ƃalaa pɛ.

²²“Nu ɣaazu ɣɛzɛgi ɣa é ga nu lɔtɔi malaboi. Na ma ani è ɣaazu ɣɛzɛgi maʋaa za‐su wuovɛ, è lɔtɔi laa ɣa ʋe ga ŋada wodoa.

²³Kɛ̀ ani è ɣaazu ɣɛzɛgi za‐su lɛ wuoni, è lɔtɔi laa ɣa ʋe ga ŋada ƃidia. Ani tɔwɔ mu nii é ga è maŋada wodoai sú ƃidivɛ, maƃidi maʋaa wala zu ɣa wɔɔlɔ ma.

²⁴“Nu ɣila na nu keea nu lɛ ɣɛɛ fele ɔ́ zoo é ɣɛ tii ɣɛɛzu te wu. Towaa zili ga gila é wõi ga zɔi, ɔɔ é wũ kpado gila maʋaa va ɛ́ lɛ ƃalaa zɔi ʋaa ma. Wɛ lɛ zooga wɔ ɣɛ tii ɣɛɛzu Gala bu wɔ ɣɛ wɔnɔ tii ɣɛɛzu kpɛtɛ ŋɛniitiɛ te maɣaa‐ƃai yee wu.

²⁵“Na ma gè bo wiɛ, a mɛ lɛ yii zɛlɛ wa ŋeteai maʋaa ma toku ge zei zɔi va wa mi ɔɔ zɔi wa kpoale, ɔ́ nɔ ɣɛ ga wo yii zɛlɛ é vile wo lɔtɔi va ga zɔi wa tɛ ma.? Zɛʋui lɛ leveni daa‐mii ŋɛni va? ?Ɔɔ nu lɔtɔi lɛ leveni seɣe va?

²⁶A wɛlɛ wɛ̃niitiɛ va. Tɛ lɛ sii‐zii ŋɛni zeizu ɔ́ nɔ ɣɛ ga te gaa lɛ ba te pu kwɔta zu. Na ƃalaa ɣɛɛvɛ wo ɣeeai nii é gee‐zuvɛ tɔ te wɔ̃nɔ kulozu.? Wo maʋaa lɛ ʋize woni te va?

²⁷Wo ta zɛƃɛ ɣa kui dái zéea ŋeteai zu yá zoo é maƃuo ƃalaa vɛɛ ba manui yii‐zɛlɛ pele ma?

²⁸Zɛƃɛi é kɛɛ wo seɣe mayii‐zɛlɛ seizu ma? A ɣi gaa ziɛ lɛɛ é vile gulu wuoitiɛ va te fitegi zu, velei ta ƃɛtɛ la. Tɛ lɛ tii ƃaa‐ƃaa kɛɛzu ɔ́ nɔ ɣɛ ga te geze wõɛ.

²⁹Gè bo wiɛ, Salamɔ̃ ƃalaa na bɔɔlɔlai ɣaazɔ zu máa lɛ ŋɛni ziɣini ga gulu wuoi niitiɛ te ta ɣavele.

³⁰?Tɔwɔ tifei nii mugi towaa ɣɛ za ga maʋulu ŋina te pili ŋabu ɣa nà mu ka Gala ge maa ziɣizu, wa mu ka teɣa ɛ́ lɛ wo maa zeɣe wuloa, wai ŋɛ ni zee‐la‐ma vɛnɛi wo ya?

³¹Na ma a mɛ lɛ yii zɛlɛ a wɔ ɣɛ ɣɛɛzu tea, ‘Zɛƃɛ ɣa gá mi?’ ɔɔ ‘Zɛƃɛ ɣa gá kpoale?’ ɔɔ ‘Zɛƃɛ ɣa gá tɛ ma?’

³²Ƃɔvɛlaale zii ƃalaa‐gitiɛ ta niitiɛ ɣaazɔ maa vele ɣaa ziɛzu. Tɔwɔ wo ɣeeai é gee‐zuve é kwɛ̃ni ga te maƃala ɣa wiɛ kpowũ.

³³Kɛ̀ a ná masadai maa vele ɣaa ziɛ dɛ ɣaʋu pa é vɛɛ ná tele‐bo tuoi va. Na ɣa ɣɛɛ na ŋɛnii niitiɛ ɣaazɔ ta ɣɛ ga wo wo ƃalaa pɛ.

³⁴Na ma a mɛ lɛ yii zɛlɛ ŋina ʋaa ma, ƃɔvɛlaale ŋina ɣagi yii ɣa zɛlɛ ƃɔɔ ʋaa ma. A ƃe ba faa ƃaagitiɛ ta wulo folo yee wu te wooli ƃɔɔ nɔ foloi na ma.”