Read Loma MAFIYU 8 Bible Online

MAFIYU 8 - Loma bible

MAFIYU 8

¹Tei Ziizɛ wuloni gizigi ma é vile, kpɔ kpakpa vileni púlu.

²Na ɣɛɛzu gee nu gila ge va pɔ́ é vɛɛ kɔ́wɔ wu yíɛ ɣɛ ma, “Kèea, ani yà ʋaa na bu, yà zoo è bàlo màa ziɣi.”

³Ziizɛ yee zu zakpa sa é ʋowũ ba yíɛ ɣɛ ma, “Daavɛ zìi ma. Valo è maa ziɣi.” Ná gee zeeƃɛi ƃale sa ma ga maa ʋilea.

⁴Ziizɛ ɣɛ ma, “Kɛsɛ ga è mɛ lɛ ta wo nu ta nɛpɛ ma. Kè li è ƃɔɔ lɛ ga laa‐ʋaalegi. Na ɣa ɣɛɛ na è faa‐nɛi nii ɣɛ Mooze máʋaa leʋeni é da wo ya dɛ́ɛ ʋaa ma ga numaitiɛ ga seele ga è valoa.”

⁵Tei Ziizɛ ɣɛni lɛɛzu Kapɔɔnia, sɔdasi wũ gila wũ‐tuo nu vaani yíɛ maa nɛɛnɛ

⁶yíɛ ɣɛ ma, “Kèea, nà tii‐ɣɛɛ nui ɣa laani pɔ̀ pɛlɛ wu zée zai ma ta kɔ́wɔ yíɛ laƃa ga ná ŋala‐ŋala pele.”

⁷Ziizɛ ɣɛni ma, “Gà va gè bálo.”

⁸Kɛ̀ sɔdasii ɣɛni ma, “Kèea, gɛ̀ lɛ kuloni bu ga è lɔ nà pɛlɛi wu. Kɛ̀ woi wo nɔ, na ɣa ɣɛɛ na nà tii‐ɣɛɛ nui ɣa valo.

⁹Gà ga nu ta gè gaa‐ƃaa yee wu, sɔdasia te bù. Gà ɣɛ na te ta ma, ‘Li,’ towaa li. Gà ɣɛ ta ma, ‘Va,’ é va. Gà ɣɛ na kɔnɔ nà duoi ma, ‘Nii ɣɛ,’ é kɛ.”

¹⁰Tei Ziizɛ gói mɛnini, é vilini ma ga ki‐gaa‐ziɛ. Niitiɛ te vileni pulu é ɣɛ te ma, “Gè bo wiɛ ga gaama, gɛ̀ lɛ dɛ wɛlɛni nii ɣavele yee‐la‐mai va nu ya Yezɔitiɛ ƃalaa zaama.

¹¹Gè bo wiɛ, nu lamaa ɣa wulo folo wulo‐zu vele ta folo lii‐zu vele te va tiɛ laa mi ŋada ɣila ta Eeƃɔlɔhɛ̃ɛni, Aizeni é vɛɛ Yeekɔni ba Gala ta masadai zu.

¹²To mu niitiɛ Gala ta masadai te ʋaa ma ta vili ƃɔɔ na wulu vele kpidi zu. Ná ɣa numaitiɛ ta ɣɛ na tiɛ wɔlɔ tiɛ yĩ gaa mi.”

¹³Ziizɛ ɣɛ sɔdasi wũ‐tuo nui wɔ ma, “Li. Towaa ɣɛ è vɛ ga velei è siɣia la ga gaama.” Tii‐ɣɛɛ nui wɔ ge valoni na maziɛgi ƃɔɔƃɔɔ nɔ ma.

¹⁴Tei Ziizɛ lɛɛni Pite na pɛlɛi wu, é wɛlɛni Pite mɔɛ va laani kɔɔlɛ ʋile yiiyai la.

¹⁵É ʋoẁũni nà yee va kɔɔlɛ ʋilei ƃea sa ba é wu ziɣi é Ziizɛ wɔ̃nɔ zeke kɛ.

¹⁶Nà maƃɔkɔi te vaani ga nu lamaa gɔʋɛ te wulu. Ziizɛ gɔʋɛitiɛ ƃɛɛni te wulu ga laa woi, taitiɛ ɣaazɔ seeƃɛ ɣɛni te va é te valo.

¹⁷Nii ɣɛɛni ga Gala daa woo‐wo nui Aizeea woi leve ma é boni yíɛ ɣɛ tea, “É gá zeeƃɛitiɛ ziɣini gé va gé lɔtɔ zu wodo.”

¹⁸Ziizɛ wɛlɛni kpɔ kpakpa wala va maa ɣaligɛi bɛ́. É deʋe sa ga ta ná kala dopoitiɛ te li ga zɔlaavɛ vele ziɛ walai ʋaa va.

¹⁹Tei na ɣɛɛni, tɔ‐dɛɛ ɣala‐mɔɔ ta vaani pɔ́ é ɣɛ ma, “Kala‐mɔi, gà vile è wulu dii vɛ nɛpɛ yà li na.”

²⁰Ziizɛ wɔ ge ɣɛni ma, “Zazawua te mayeɣe ɣa te ya. Wɛ̃niitiɛ te malaɣa ge te ya. Kɛ̀ ŋada nɛpɛ gɛ lɛ zèea, nài gè ga nu ƃuse lui, ga gè wũ da na.”

²¹Na wulu nu ɣɛni wɔnɔ na é ga ná kala dopoitiɛ te ta. É ɣɛni Ziizɛ ma, “Kèea, ƃe ba dɛ gè li gè yɛ kèea woba é yɛsu gè máa wulu.”

²²Kɛ̀ Ziizɛ ɣɛni ma, “Vile pùlu. Ƃe saa veaitiɛ va te te vaa zaa veaitiɛ loowu.”

²³Tei Ziizɛ vilini kẽegi zu ziɛi ɣa, ná kala dopoitiɛ te vileni púlu.

²⁴Tɔwɔ fãga wala ɣɛni vaazu ziɛ walai maazu. Na ma ziɛ‐ɣiligi ɣɛni kẽegi maa ƃoalezu, kɛ̀ Ziizɛ ɣɛni ŋiizu.

²⁵Te li te gaazu lao tiɛ ɣɛ ma, “Va gíɛ, gé maliɣii! Gé zu ɣa ƃɔnɔ wosu!”

²⁶É ɣɛ te ma, “Tɔ ɣɛ le wo luozu, wai ŋɛ ni zee‐la‐ma vɛnɛi wo ya?” É zɛba do sa é wu ziɣi é fãgai ɣaa ƃɛ ta ziɛi. Na ɣa ɣɛɛ na ná ɣaa leiyai sa ɣɛ ga ʋikɛ.

²⁷Fai nii te ɣi daa vilini tiɛ ɣɛ tea, “Nu zɛƃɛ mazii ɣa ga nii? Fãgai ƃɔga ziɛi ƃalaa ta goo‐mɛni kulo zéea!”

²⁸Tei Ziizɛ vaani ga zɔlaavɛ vele é va Gadalini yui zu, ta gɔʋɛ yowũ kɛɛ vea felegɔ te wũini te wulo kwɔti ɣaba yeɣeitiɛ zu te va. Te wala maʋaa maa luai ɣɛ ga nu ta nɛpɛ gɛ lɛ ƃega zoo ɔ́ leve ga pelei na.

²⁹Te lobani ga maa ʋilea tiɛ ɣɛ tea, “Yà ʋaa zɛƃɛ ɣa é gé va, Gala dui? È vaa ga è kɛ gé laƃa siɛgi ɔ́ vɛɛ ziitizu?”

³⁰Tɔwɔ bũi kpuluga te ɣɛni laa miizu ná ligi zu te maa wala lɛ ŋɛni woozani te va.

³¹Gɔʋɛ yowũitiɛ te pee ʋeeni Ziizɛ vɛ tiɛ ɣɛ ma, “Ani yà gé ƃɛɛ na te wulu, gé leve gé vile bũi kpulu‐gitiɛ wulu.”

³²Ziizɛ wɔ ge ɣɛni te ma, “A li.” Te ziɣi vele ɣa na ɣɛ numaitiɛ wulu te li te vile bũi kpulugitiɛ wulu. Na ɣɛɛzu bũi kpulugi ɣaazɔ yìɛ ƃolo te yii ga gizigi gáa zɛlɛgɛi ɣɛ te vili ziɛ walai wu te zu ƃɔnɔ wo.

³³Bũi‐maazu‐vɛtɛ beaitiɛ te velani te li tai zu, fai ɣaazɔ é ɣɛɛni te bo é vɛɛ pɛ fai nii va é ɣɛɛni ga numaitiɛ gɔʋɛ yowũi ɣɛni te wulu.

³⁴Tei na ɣɛɛni, tai zu vea ɣaazɔ te vaani ga te Ziizɛ luola wũi. Tei te wɛlɛni ba, te pee ʋeeni bɛ́ ga é wulo ta yui va.