Read Loma MAKI 11 Bible Online

MAKI 11 - Loma bible

MAKI 11

¹Tei Ziizɛni te ɣɛni lɔtɔsu Yɛlusulɛɛ và, te ziitini sa taitiɛ zu te laa ga Bɛfaji ta Bɛtani, te Aale ɣizii ma. Ziizɛ zɛba sa é ná kala dopoi felegɔ leve

²é ɣɛ te ma, “A li tai zu é wo luo ɣɛɛɣi daavɛ. Wa lɛɛ na ƃɔɔ nɔ na, wa wɛlɛ soo yuwu va daa lɔgɛi nii nu lɛ dɛ zeini kɔma. A daa ʋũi wo vaa la vɛ.

³Ani nu nɛpɛ ka ɣɛ na wo ma, ‘Aƃɛi wo nii ɣɛɛzu ma?’ a ɣɛ ma, ‘Maƃala ɣa de maliɣii ma. Towaa teve wo wɔ ve wulu ga maa vilea.’ ”

⁴Te liini sa te wɛlɛ soo yuwui va daa lɔgɛi pɛlɛ laavɛ pele‐vɛɛgi ma te daa ʋũi.

⁵Numaitiɛ te ɣɛni loni na te ɣɛni te ma, “Zɛƃɛi wo soo yuwui laa ʋũisu ma?”

⁶Nii Ziizɛ boni kala dopo felegɔitiɛ ma te natiɛ wo te ma. Natiɛ wɔ te ƃe sa te va te lii la.

⁷Te vaani ga soo yuwui Ziizɛ wɔ vɛ te ta zeɣeitiɛ vɛɛ kɔma. Ziizɛ wɔ ge zei sa kɔma.

⁸Nu lamaa te ta zeɣeitiɛ vɛɛni pelei ma. Taniga te gulu yifega vɛɛni pelei zu. Na ɣa ga niitiɛ te te leveni dɔƃɔi zu.

⁹Taitiɛ te ɣɛni ga ná luo vele é vɛɛ niitiɛ va te ɣɛni ga ná wulu vele te ɣɛni lobasu tiɛ ɣɛ tea, “Hosana! Tuuyiɛ ɣa ɣɛ nui nii ma é vaazu de maliɣii Gala na daa‐zeigi zu!

¹⁰Tuuyiɛ ɣa ɣɛ de ɣeea Deeve na masadai ma é vaazu vaazu! Ƃe ba daa‐maa‐lɛɛ wo ga Gala!”

¹¹Ziizɛ lɛɛni sa Yɛlusulɛɛ é li Gala‐feli wɔta walai wu. Tei é wɛlɛni na va leelia ga ŋɛnii ƃɔgɔpe, ta ná kala dopo puugɔ kai felegɔitiɛ te liini Bɛtani, ƃɔvɛlaale siɛgi levegɛi sa ɣɛ.

¹²Tei te ziɣini Bɛtani ga na wulu voloi, pulu ɣɛni Ziizɛ ma.

¹³É wɛlɛni gulu ta va woozala kpinɛi. É liini na é wɛlɛ gá va ga ani mavaa ɣɛni gá. Tei é ziilini na, ɛ́ lɛ wɛlɛni ŋɛni ta nɛpɛ ba gá é wulo malaitiɛ wulu. Ƃɔvɛlaale gului nii vaa ziɛ gɛ lɛ ŋɛni dɛ ziitini.

¹⁴É ɣɛni sa gului ma, “Nu nɛpɛ gɛ lɛ sa wɔlɔ‐wɔlɔ è ɣaa vaa mia wɔnɔ.” Ná kala dopoitiɛ te nii mɛnini.

¹⁵Te vaani Yɛlusulɛɛ. Ziizɛ lɛɛni sa Gala‐feli wɔta walai wu é vɛɛ ga numai niitiɛ ƃɛɛ te ɣɛni ŋɛni zɔ̃wɔ wulozu na ta niitiɛ te ɣɛni ŋɛni ɣeeazu na. Na ɣa ɣɛɛ na é navolo‐maa‐ʋeli beaitiɛ ta leeveitiɛ lɔɔ vilini é vɛɛ wopo‐sɔ̃wɔ‐wulo veaitiɛ te zei‐ma ŋɛniitiɛ va.

¹⁶Ɛ́ lɛ ƃega ʋa bu nu nɛpɛ zeea ɔ́ leve ga ŋɛni nɛpɛ Gala‐feli wɔta walai wu.

¹⁷É te ɣala boni é ɣɛ te ma, “Kɛ̀bɛ, ponɛvɛ Gala kɔlɔi zu Gala giɛ ɣɛ tea, ‘Nà pɛlɛi laa ɣa ɣɛ ga fèli vɛlɛ zii gaazɔ ʋaa ma,’ kɛlɛi? Kɛ̀ wo ná ɣɛɛ ga wũmɔ vea zei‐zu.”

¹⁸Laa‐ʋaale gwalaitiɛ ƃɔga tɔ‐dɛɛ ɣala‐mɔitiɛ te nii mɛnini. Tɔwɔ te pele ɣaa ziɛni sa ga te Ziizɛ zu ƃɔnɔ wo. Ƃɔvɛlaale te ɣɛni luozu ba, toku ge zei ga ná kala‐bogi vilini numaitiɛ ƃɔgɔpɛ ma ga ki‐gaa‐ziɛ.

¹⁹Tei kpɔkɔ ziitini, Ziizɛ ƃɔga ná kala dopoitiɛ te wuloni tai va.

²⁰Tei te ɣɛni levesu ga subu‐zubu, te wɛlɛni sa gului nii va daa ga “fi” fɔi ƃɔɔ é ziiti maŋasai ma.

²¹Pite ɣigi yɛni maʋai zu é ɣɛ Ziizɛ ma, “Kala‐mɔi, wɛlɛ! Gului nii è kotoni é ʋɔɔ!”

²²Ziizɛ gaa woteni te ya é ɣɛ tea, “A la ga Gala!

²³Gè bo wiɛ ga gaama, nu nɛpɛ ka ɣɛ gizii nii ma, ‘Ƃekpe è vili yuwu wu,’ nà wɔ ge zoo é ɣɛ bɛ́. Ani nɔ nii é boga daave la ɣigi zu ga towaa ɣɛ, tɔwɔ sakpe gɛ lɛ kigi zu, maʋai ɣa ɣɛ bɛ́.

²⁴Na ma gè bo wiɛ, ŋɛnii nɛpɛgi wa Gala gaa zaɣa kɛ ma feli woi zu wo vɛ, a siɣi ga gaama ga wo maa zɔlɔ woga. Nà wɔ ka ɣɛɛ na wa sɔlɔ wo.

²⁵Siɛ nɛpɛ wa ɣɛ na Gala felizu, ani nu nɛpɛ kɛɛ‐zɔ ka wo wuu zu, a su ʋaa yɛ, kɛɛ ʋaa ma wo ɣeea Gala nii é gee‐zuvɛ tɔ ƃalaa é wa ʋaa yowũitiɛ zu ʋaa yɛ.

²⁶[Kɛ̀ ani wɛ lɛ su‐ʋaa‐yɛ boga, wo ɣeea Gala é gee‐zuvɛ tɔ ƃalaa lɛ wa ʋaa yowũitiɛ zu ʋaa yɛga.]”

²⁷Ziizɛ ƃɔga ná kala dpoitiɛ te liini Yɛlusulɛɛ kɔnɔ. Tei é ɣɛni ziɛ‐ziɛsu Gala‐feli wɔta walai wu, laa‐ʋaale gwalaitiɛ ƃɔga tɔ‐dɛɛ ɣala‐mɔitiɛ é vɛɛ sa zuu wũgitiɛ va te vaani pɔ́ vɛ

²⁸te ɣɛ ma, “Gaa‐ƃaa zɛƃɛ ga è fai niitiɛ ɣɛɛzu la? Ɔɔ ƃɛ ɣa é gaa‐ƃai nii ʋeea è ya ga è niitiɛ ɣɛ?”

²⁹Ziizɛ ɣɛ te ma, “Gà gaa‐zaga‐kɛɛ wosu ga wiɛ. Ani wa gaa wote na, gaa‐ƃai gè fai niitiɛ ɣɛɛzu la gà sa gà daa wo wiɛ.

³⁰Jɔ̃ na bataizei maʋaa wuloni Gala ta ƃaa é wuloni nu ƃuse ya? A gaa wote na.”

³¹Te pili‐pilini yɔɔzu tiɛ ɣɛ ɣiini ma, “Ani da ɣɛ na tea, ‘Kulovɛ Gala zeea,’ towaa ɣɛ tea, ‘Zɛƃɛi é kɛ mu wɛ lɛ Jɔ̃ woi ziɣini ga gaama?’

³²Tɔwɔ da zoo de bo ga kulovɛ nu ƃuse ya?”— Te ɣɛni luozu numaitiɛ va, ƃɔvɛlaale nui ƃɔgɔpɛ te ʋaani bu ga Jɔ̃ ɣɛni ga Gala daa woo‐wo nu ƃɔɔƃɔɔ.

³³Na ma te Ziizɛ woi ɣaa woteni te ɣɛ ma, “Gɛ́ lɛ kwɛ̃ni.” Ziizɛ wɔ ge ɣɛ te ma, “Nà ƃalaa gaa‐ƃai gè fai niitiɛ ɣɛɛzu la gɛ̀ lɛ daa woga wo ma.”