Read Loma MAKI 13 Bible Online

MAKI 13 - Loma bible

MAKI 13

¹Tei Ziizɛ ɣɛni wulozu Gala‐feli wɔta walai wu, ná kala dopoitiɛ te ɣila ge ɣɛni ma, “Wɛlɛ, kala‐mɔi, Gala‐feli wɔtai mawɔtiitiɛ vapa pelei va ta velei pɛlɛitiɛ vapagɛi la!”

²Ziizɛ ɣe ma,“? È wɛlɛɛ kwɔti vɛlɛ vapagi niitiɛ va? Pɛlɛi nii mawɔtiitiɛ te ɣila kpalaa lɛ yɛga laani bɔɔ maazu tɔ ƃe kulozu maazu tɔ too.”

³Tei é ɣɛni zeini Aale ɣizii ma Gala‐feli wɔta walai ɣeeɣi daavɛ, Pite ƃɔga Jĩi ta Jɔ̃ é vɛɛ Ɛĩdulu va te gaa zaɣa kɛɛni ta letele ŋada laa.

⁴Te ɣɛni ma, “Siɛ sɛƃɛ ɣa nii vaazu ɣɛɛzu la? Zɛƃɛ ɣa yá ɣɛ é dɛ ga seele ga fai niitiɛ ɣaazɔ ta leve ma? Bo gé ma.”

⁵Ziizɛ vɛɛ ga ɣɛɛ te ma, “A ƃɔɔ maazu vɛtɛ ga nu ta mɛ lɛ wo ziɣi pele va.

⁶Nu lamaa ɣa va nà daa‐zeigi zu tiɛ ɣɛ tea, ‘Nà vee de!’ Tɔwɔ ta nu lamaa ziɣi pele va.

⁷Ani wa kɔɔni maazu woo mɛni na wiɛ kɔɔ‐wɔɔ ʋaa mahũ‐hũ goo mɛni, a mɛ lɛ ƃɔ ba duo ɔ́ vili wo wɔlɔ ga. Kɛni dɛ nii ɣa wulo ba. Tɔwɔ nà lɛ dɛ ɣɛɛ ga ŋeteai mawɛ̃ɛ‐pele‐ma.

⁸Ƃɔvɛlaale zuu ɣa wu ziɣi é vɛɛ bɔɔ yuu va ga kɔɔ, ɣalaso zuu yiɛ vɛɛ bɔɔ ɣalaso zuu va ga kɔɔ. Zui ɣa ƃeli yíɛ wu su ŋada ɣile‐giledaitiɛ zu, pulu yìɛ loo. Na ɣa ɣɛ dɛ nɔ ga daa‐nɔwɔ‐wogi lɔɔ‐zei‐zuvɛ.

⁹Kɛ̀ a ƃɔɔ wũ maazu vɛtɛ, ƃɔvɛlaale ta wo yee la faa‐wo‐bo kpɔ zeea tiɛ wo ƃooʋɛ Gala‐feli wɔtaitiɛ wu. Na ɣa ɣɛɛ na wa lo gɔmɛti vea ƃaaza daa wu ta ɣalasoga ga wo seele woo ʋe te laa wu màzaƃu ma.

¹⁰Tɔwɔ kɛni dɛ woo niinɛ vagɔi ɣa wo zii ƃɔgɔpɛ ma ga maa wũ pa.

¹¹Ta li na ga wiɛ faa‐wo‐bo bea wɔ te wo yee la te ya, a mɛ lɛ leve na luo wɔ zii‐zɛlɛ pili ƃɔɔ ma ga nii wa bo. Kɛ̀ nii nɛpɛ yá loo wo wuu zu siɛgi na zu, a bo. Ƃɔvɛlaale wa lei wa ɣɛ bosu, kɛ̀ Gala baa ŋinɛgi ɣa ɣɛ le.

¹²Duu‐ɣaaga ta ɣiini zee la numaa ya ga te za. Duu keea wɔ giɛ daamɔdai ɣɛ ga duu. Lopaa ta wu ziɣi ga te ɣaa vea tiɛ yee la numaa ya ga te te vaa.

¹³Nu pɛ ka zili ga wiɛ nà daa‐zeigi mazaƃu ma. Kɛ̀ nui yá yii lɔ gá é yɛsu é ziiti gaa ƃela su towaa valo.”

¹⁴Maa nɛɛvɛ kɔlɔ‐lodo nui fai nii ɣaa ɣa. Na ɣa ga nii Ziizɛ boni yíɛ ɣɛ tea, “Ani wa wɛlɛ na ŋada‐zu‐ŋala ŋɛni va é loni vɛ maa lɛ nɛɛni ɔ́ ɣɛ na, a kɛ tii maa nɛɛvɛ sa taitiɛ te Yudiiya yui zu te vela te lɛ gizi gwalaitiɛ ma.

¹⁵Maa nɛɛvɛ nui nii yá ɣɛ pɛlɛ wɔma é mɛ lɛ vile ɔ́ nɔ ɣɛ ga é li ná pɛlɛi wu ga é ŋɛni ta nɛpɛ siɣi na.

¹⁶Maa nɛɛvɛ nui nii yá ɣɛ kpala ga é mɛ lɛ li wulu ɔ́ ná seɣei ziɣi.

¹⁷Edei! Ko ŋazaa vɛɛ duu deea va te maa wõi siɛgi na zu.

¹⁸A Gala feli ga é mɛ lɛ ɣɛ sama yiɛ wu.

¹⁹Ƃɔvɛlaale faa ƃoei mazii ɣa wulo siɛgi na zu é ga faa ƃoei nii ta lɛ dɛ wɔlɔ, ɣɛɛni é ziɣi ƃɔɔ ŋeteai lɔɔ‐zei ʋolo ma Gala bɛ é loo zai ŋɛ ni ma. Mazii ta wɔ gɛ lɛ sa wɔlɔ‐wɔlɔ ɣɛɛ na wulu.

²⁰È ɣɛ de maliɣii Gala gɛ lɛ ŋɛni mawui zu ƃuoni, nu ƃuse ta nɛpɛ gɛ lɛ ƃega wulo su. Kɛ̀ Gala na numaitiɛ é te wuloa su leelaa kpɔɔ ʋaa ma, natiɛ te mazaƃu ma é kui zu ƃua.

²¹Na ma ani nu ta nɛpɛ ka ɣɛ na wo ma, ‘A wɛlɛ! Kolai ɣaa!’ ɔɔ ‘Tɔ nu,’ a mɛ lɛ siɣi ga gaama.

²²Numaa ta vaazu wu ziɣizu tiɛ ƃɔɔ wulo ga Kolai ga zɛɛ vele, zɛɛ ʋaa Ɣala daa woo‐wo bea tiɛ wu ziɣi tiɛ faa maa‐wɔlɔ‐wɔlɔga ɣɛ tiɛ faaniga ɣɛ ga seelea, kɛɛ ʋaa ma ani yá ɣɛ na ga solowo faa, niitiɛ Gala ge yee ƃadoga te va te natiɛ ziɣi pele va.

²³Kɛ̀ a ƃɔɔ maazu vɛtɛ. Gè ƃɔgɔpɛ zɛga ná luo gè bo wiɛ.

²⁴“Kɛ̀ siɛgi na zu, ani faa ƃoei na maʋaa ɣa wulo na ba, foloi maa ɣa ƃibi, ɣalogi wɔ gɛ lɛ ʋoloa.

²⁵Na ɣa ɣɛɛ na sɔmɔ dekaitiɛ te wulo gee‐zuvɛ te wu. Gee‐zuvɛ ɣaa‐ƃaitiɛ ta sa ta ƃeli.

²⁶Nà wɔ ka ɣɛɛ na, ta sa ta wɛlɛ nu ƃuse lui va é tine ƃiliga ma yíɛ va gaa‐ƃaa ƃakpa zéea ta ƃɔɔlɔla.

²⁷Towaa Gala ta ɣeelaitiɛ leve te numaitiɛ wulo zui lo‐su naagɔitiɛ zu, na ɣa ga niitiɛ Gala ge te wuloa su leelaa ga ná dɔa, te te ɣaa lɛ ba. Na ɣa ga é ziɣi ƃɔɔ zui wɛ̃ɛ ma é loo gee wɔlɔgi wɛ̃ɛ ma.”

²⁸Ziizɛ ɣeni tea, “Fai gɔɔva wului ɣa dɛ ga nu, a maa woli. Na ɣa ga yá ƃuʋu na ba yíɛ leni, wa kwɛ̃ɛ ga tine yiɛ ɣa sa vaazu.

²⁹Vele nɔ na é la ga nii. Wa wɛlɛ na fai niitiɛ va tiɛ leve ma, wa kwɛ̃ɛ ga nu ƃuse lui maa ƃua é sa kpo zeɣei ƃɔɔƃɔɔ da.

³⁰Gè bo wiɛ ga gaama, zei‐zaa nu ƃusei woo lɛ ƃeazu su fai niitiɛ ɣaazɔ te leve ma.

³¹Gee wɔlɔgi ƃɔga zui te maʋaa ɣa ƃea gá, kɛ̀ gòitiɛ laa‐zu ɣa ga daa‐zu.”

³²Ziizɛ ɣɛni tea, “Kɛ̀ foloi ƃɔga ɣalavai nii fai na vaazu ɣɛɛzu ma foloi ʋaa va, nu ta lɛ kwɛ̃ni. Gala ta ɣeelaitiɛ ƃalaa te gee‐zuvɛ tɛ lɛ kwɛ̃ni ɔ́ nɔ ɣɛ ga Gala dui. Kɛni nɔ kèea Gala tɔ ɣilekpu.

³³A wũ maazu vɛtɛ wiɛ ná maa ƃɛɛ, ƃɔvɛlaale wɛ lɛ kui ziili ʋolo wɛ̃ni.

³⁴Kulovɛ è ɣɛ nu ɣa ɣɛ liizu siɛ ma. Yá ɣɛ na wulozu wɔ taa zu va, é gaa‐ƃaa ʋe ná tii‐ɣɛɛ veaitiɛ ya é ta liitiɛ ʋe te ya ga gile‐gile é bo sa pɛlɛ‐maa‐ƃɛɛ nui ma ga é ná maazu vɛtɛ.

³⁵Na ʋaa ma, a ná maa ƃɛɛ. Ƃɔvɛlaale wɛ lɛ kwɛ̃ni ga ʋoloi pɛlɛ keea nui vaazu la. Towaa ɣɛ ga kpɔkɔ ƃaa kpidi zaama ƃaa tɛɛ zine maa wũ kɔkwɛlɛ‐su yɔɔzu ɔɔ subu, wɛ lɛ kwɛ̃ni.

³⁶A ná maa ƃɛɛ kɛɛ ʋaa ma é mɛ lɛ wulo ga wiɛ kpusɛ ɔ́ wo vɛtɛ ŋiizu.

³⁷Nii gè bosu wiɛ, nui pɛ faa ve. Na ɣa ga, a ná maa ƃɛɛ.”