Read Loma MAKI 15 Bible Online

MAKI 15 - Loma bible

MAKI 15

¹Tei gela boni ƃɔɔ nɔ feea, laa‐ʋaale gwalaitiɛ vɛɛ zuu wũgitiɛ va ta tɔ‐dɛɛ ɣala‐mɔitiɛ é vɛɛ faa‐wo‐bo kpɔgi zu vea ɣaazɔ va te ʋuoni ga Ziizɛ la. Te gilini te li te zee la Paila ya.

²Paila gaa zaɣa kɛɛni é ɣɛ ma,“? Yà ɣa è ga Dusiitiɛ ta masagi?” Ziizɛ ɣɛ ma, “Kavele ɣa na è boga.”

³Laa‐ʋaale gwalaitiɛ te kɛɛ‐zɔ tamaa woni.

⁴Paila gaa zaɣa kɛɛni kɔnɔ é ɣɛ ma,“? Gaa‐wote gɛ lɛ è la ɔ̀ bo? Wɛlɛ faa liigoi va te bosu ga è la.”

⁵Kɛ̀ Ziizɛ lɛ ta nɛpɛ gaa woteni. Na ma é wuloni ga Paila.

⁶É ɣɛni ga Paila ɣɛɛ ʋaa wɔlɔ‐zaɣa ga é ƃe pilisinei ɣila ba te vɛ teve‐maazu wui zu. Na ɣa ga nii tɔ yee ƃado ba ga é ƃe ba.

⁷Pilisinea te ɣɛni na te ga ŋapi‐wɔɔ vea gɔmɛtii wɔ. Te numaa vaani. Te ɣila daa ɣɛni ga Balaaba.

⁸Kpɔgi vaani é vɛɛ ga boga Paila ma ga nii wɔlɔ ɔ́ lia kɛ tiɛ é daamɔdai ɣɛ te vɛ kɔnɔ.

⁹Paila te woi ɣaa woteni é ɣɛ tea,“? Wo wõini gè ƃe Dusiitiɛ ta masagi Ziizɛ va wiɛ?”

¹⁰Ƃɔvɛlaale Paila gaa ɣaani ga sili laa‐zɔ‐su ɣa laa‐ʋaale gwalaitiɛ te zee laani la zéea.

¹¹Kɛ̀ laa‐ʋaale gwalaitiɛ te lɔɔni kpɔgi wũ su te pote ga te bo ga é ƃe Balaaba va, Ziizɛ yɛ na.

¹²Paila ɣɛni kɔnɔ te ma, “Aƃɛ mu ka sa gà kɛ ga nii wo tilisu ga Dusiitiɛ ta masagi?”

¹³Te lobani kɔnɔ te ɣɛ tea, “Kpako gului ma!”

¹⁴Paila ɣɛ sa te ma, “Zɛƃɛ ʋaa zu? Faa yowũ zɛƃɛ ɣa é kɛɛ?” Kɛ̀ te liini nɔ ga luo doba‐bogai zu tiɛ ɣɛ tea, “Kpako gului ma!”

¹⁵Tei tɔwɔ Paila ɣɛni wõi ɣɛɛzu ga é kpɔgi yii la, é ƃeni sa Balaaba va te vɛ. Tei sa é kɛɛni te Ziizɛ ƃooʋe, é zee laani sa numaitiɛ ya ga te kpako gului ma.

¹⁶Sɔdasiitiɛ te liini sa ga Ziizɛ siɣigi zu vɛ ta ná lili ga “pelatoolia”. Te zɛba te sɔdasi ƃulu kpakpa lili na.

¹⁷Te seɣe ƃoei tooni kɔba te ŋai fɛlɛ ga masa bɔɔlɔ kavele te dɔ wũmɔ.

¹⁸Te vɛɛni sa ga laalia ma tiɛ ɣɛ tea, “È yĩsɛ‐o, Dusiitiɛ ta masagi!”

¹⁹Te dowani wũ ba ga gulu te laa yiɛ wu ma te loo kɔwɔ wu è ɣɛ ta ɣɛ kolo wulozu bɛ́.

²⁰Tei sa te ŋɛɛ wuloni su, te seɣe ƃoeigi wuloni kɔba te kpɔɔ zeɣei loo kɔba. Te li sa la ga te kpako gului ma.

²¹Teve‐kɔwɔ zu nu ta ziɣini kpalagi zu yìɛ lɛ taa zu. Dáa ɣɛni ga Saimɔ, é ga Saalĩi lai zu nu. Towa é ɣɛni ga Alezãda ƃɔga Luufɔ te ɣeea. Te zunui nii zoni ga gaa‐ƃaa ga é li ga Ziizɛ na pɛɛ‐pulu wulu likpii.

²²Te vaani ga Ziizɛ ŋadɛi vɛ tɔ ná lili ga Gɔgata, nà wɔ su‐wulo‐zu ɣa ga wũ fooyo ŋada laavɛ.

²³Te dɔɔ leveni pɔ́ supuai ga gulu yiɛ, mawului laa ga “mɔi”. Kɛ̀ ɛ́ lɛ soni.

²⁴Na ɣa ɣɛɛ na te kpakoni gului ma. Te ná seɣei ɣaa wɛɛni ɣii vɛ. Te taali ta ɣɛɛ la ga kpɔzɔ‐loo ʋaa ɣavele, kɛɛ ʋaa ma te ná vɛtɛ ga nii nui gila gɔ sɔlɔ wo ná sɔɔlaitiɛ zu.

²⁵Te kpakoni gului ma ga folo wui.

²⁶Nii te ponɛni ga dá ga nu pɛ ge dodo é ɣɛni ga “Dusiitiɛ ta masagi.”

²⁷Te wũmɔ vea felegɔ ƃakoni gulu ma kobavɛ. Gila ge ɣɛni ga zee za‐su vele, gila ge ga kɔwɔ yee‐su vele.[

²⁸Gala kɔlɔi laa woi leveni má, nà ɣa ga nii é bosu yiɛ ɣɛ tea, “Te siɣini ga tɔ‐kãla‐ŋala beaitiɛ te ta.”]

²⁹Numai niitiɛ te ɣɛni levesu ba te ɣɛni ŋɛɛ wulozu su tiɛ wũgi ɣɛ ma kpɔkɔ‐kpɔkɔ tiɛ ɣɛ ma, “Iĩhĩi! Yài ɔ̀ zoo è Gala‐feli wɔta walai wolo è to folo saagɔ zu,

³⁰ƃɔɔ valo na è wulo gului ma è vile!”

³¹Vele nɔ na laa‐ʋaale gwalaitiɛ ƃalaa te ŋɛɛ wuloni la su ta tɔ‐dɛɛ ɣala‐mɔitiɛ tiɛ ɣɛ ɣiini ma, “É numai zɔitiɛ valoni, tɔwɔ ɛ́ lɛ zooga ɔ́ ƃɔɔ valo.

³²Ƃe ba Yezɔi masagi Kolai wulo gului ma é vile nii zu, kɛɛ ʋaa ma gé ná vɛtɛ gé maʋaa ziɣi ga gaama.” Taitiɛ te ƃakogɛi ɣɛ ta tiɛni ƃalaa natiɛte ƃɔɛni ma.

³³Tei foloi gaa lɔni, kpidi vɛɛni zui ɣaazɔ maazu é yɛsu é ziiti kpɔkɔ ʋolo ɣaa‐ƃaa‐ƃaa ma.

³⁴Tei sa é ɣɛni ga kpɔkɔ ʋolo ɣaa‐ƃaa‐ƃaa, Ziizɛ lobani yíɛ ɣɛ tea, “Yiilai, Yiilai, lama saba‐tani?” Na zu‐wulo‐zu ɣa ga, “Nà Galagi, nà Galagi, zɛƃɛi é kɛɛ è yee wuloa màʋaa zu?”

³⁵Taitiɛ te ɣɛni loni ná woba tei te nii mɛnini, te taniga te ɣɛni tea, “Wɛlɛ! Tɔ Yiilaija lilisu.”

³⁶Te ɣila ge ƃizeni sa é su‐wuogi lɔ dɔɔ ƃoda‐ƃoda bu nà su laa ʋe é dɔ gulu ɣa é fe zéea ga é kpoale yíɛ ɣɛ tea, “A ná maa kpowũ de wɛlɛ na va ga ani Yiilaija ɣa va é kulo gului ma é pile.”

³⁷Ziizɛ loba sa ga kpakpaa é yɛʋu ɣaa‐ƃelagi lɛ é too.

³⁸Gala‐feli wɔta walai wu zeɣei velini su fele é ziɣi ƃɔɔ maazu é yii kɔwaavɛ.

³⁹Sɔdasi wũ‐gila wũ‐tuo nui ɣɛni loni gaazu wotegɛi Ziizɛ ma. Tei é pɛtɛni ga Ziizɛ yɛʋui ɣaa‐ƃelagi lɛɛni é too ga nii ɣavele, é ɣɛni tea, “Ƃɔɔƃɔɔ su zunui nii ɣɛni ga Gala duu.”

⁴⁰Ŋaza nu taniga te ɣɛni loni woozala ƃalaa pɛ tiɛ wɛlɛ na va. Meele Mɛdaliini ɣɛni te zaama é vɛɛ Meele nii va dúu ɣɛni ga Jĩi pɛnɛ kelegi ta Joosi. Ŋaza nu ta ƃalaa ge ɣɛni na pɛ daa ga Saloomi.

⁴¹Ŋazai niitiɛ te vileni púlu tiɛ báa ʋaa ɣɛ te ɣɛi ma Geealali. É wulo niitiɛ wulu ŋazaa ƃalaaga te ɣɛni na te lamai, niitiɛ te yɛni púlu te va Yɛlusulɛɛ.

⁴²Tei sa kpɔkɔ ziitini, tɔwɔ é ga Dɔwɔ Wala ʋoloi, na ɣa ga doowo foloi maa ŋii,

⁴³Alematia nui Zoosɛ é ga nui wũfe‐ma bɛ́ faa‐wo‐bo kpɔgi zu, é ga nui tɔ ɣagi gaazu ɣɛni Gala na masadai luo, é yii lɔɔni é li Paila wɔ vɛ é Ziizɛ mawomai ʋeli ma.

⁴⁴Paila ɣi gaa ziɛni ma ga ani Ziizɛ zai ɣɛ sa. É sɔdasi wũ‐gila wũ‐tuo nui lilini é gaa zaɣa kɛ ga ani sai ɣɛ sa.

⁴⁵Tei é mɛnini sɔdasi wũ‐tuo nui la ga é zaa, é ʋaani bu ga Zoosɛ mawomai ziɣi.

⁴⁶Zoosɛ gbaza geeani é Ziizɛ wulo gului ma é maa ƃiti ga gbazagi é da kaba yeɣei nii zu teveai ɣɛ kwɔti va. Na ɣa ɣɛɛ na é kwɔti ɣili‐kilini é tiƃi kaba yeɣei la.

⁴⁷Meele Mɛdaliini vɛɛ Joosi dee Meele va te wɛlɛni vɛ va te doowuni na.