Read Loma MAKI 3 Bible Online

MAKI 3 - Loma bible

MAKI 3

¹Ziizɛ lɛɛni wɔnɔ Gala‐feli wɔtai wu, zunu ta na zee ʋɔi ma.

²Te ɣɛni sa Ziizɛ maa ʋɛɛnɛsu ga te wɛlɛ na va ga ani towaa balo ga doowo foloi, kɛɛ ʋaa ma te faa vɛɛ ba.

³Nui nii zee ʋɔi ɣɛ ma, Ziizɛ ɣɛni sa ma, “Va vɛ.”

⁴Na ɣa ɣɛɛ na é ɣɛni numaitiɛ ma,“? Tɔ tɔ su ga nu faa vagɔ ɣɛ ga doowo folo ɔɔ nu faa ŋala‐ŋala kɛ? Tɔ tɔ su ga nu nu yɛʋui yɛ zéea ɔɔ é nu vaa?” Kɛ̀ te fɔɔni su kpãa.

⁵É wɛlɛni te va ga zii‐ɣaa‐wãla zíi yiɛ zuuli nu ʋaa vala fai ma te ɣaazu. É ɣɛ sa zee‐ʋɔ‐ma nui ma, “Yee zu zakpa.” Nà yee zu zakpa. Zée ƃɛtɛ sa ga kavele.

⁶Favilesiitiɛ te wuloni sa ga maa ʋilea te li ta Yɛloo maa veaitiɛ te fuo loo ga Ziizɛ la ga velei ta su ƃɔnɔ wo da.

⁷Ziizɛ zu wuloni numaitiɛ va ta ná kala dopoitiɛ te li ziɛ walai la. Kpɔ gwala ziɣini Geealali é vile pulu. Kpɔgi ta wala ƃɔni su te wulo Yudiiya,

⁸Yɛlusulɛɛ, Yedumia yui zu é vɛɛ Jɔdɛ̃ wuluvɛ vele va. Te wuloni Taalɔ lai ƃɔga Saidɔ̃ lai te wobavɛ laitiɛ zu te va pɔ́. Ƃɔvɛlaale te kɛ́ɛ ʋai natiɛ ɣaazɔ mɛnini.

⁹É boni ná kala dopoitiɛ ma ga te kɛ kẽegi ta ɣɛ na máʋaa ma kpɔgi mazaƃu ma, kɛɛ ʋaa ma ani tɔ kpaɣi na é vili su.

¹⁰Ƃɔvɛlaale é nu lamaa valoni. Na maʋaa ma taitiɛ nɛpɛ seeƃɛ ɣɛni te va te maa ʋilini ba kɛɛ ʋaa ma te ʋowũ ba.

¹¹Siɛ nɛpɛ gɔʋɛ yowũ kɛɛ veaitiɛ tɔ pɛtɛ na, tɔ vɛɛ kɔwɔ wu tiɛ loba tiɛ ɣɛ ma, “Yà ɣa è ga Gala dui.”

¹²É maazu ɣilini ga kpaanaga te ya ga te mɛ lɛ dada maa ziɛ.

¹³Ziizɛ lɛɛni sa ɣɛ gizii ma é niitiɛ lili é te wõi ɣɛɛni. Natiɛ wɔ te va pɔ́ vɛ.

¹⁴É nu puugɔ kai felegɔ wuloni te zu, niitiɛ é te laa zeini wɔnɔ ga keelaitiɛ ga te ɣɛ ba, na ɣa ɣɛɛ na é te leve ga te Gala goi wo.

¹⁵Na ɣa ɣɛɛ na gaa‐ƃaa ɣa ɣɛ te ya pɛ ga te gɔʋɛ yowũa ƃɛ numaa wulu.

¹⁶Nu puugɔ kai felegɔitiɛ é te wuloni tiɛ ɣa: Saimɔ nii é daa zeini ga Pite;

¹⁷Jĩi nii é ga Zɛbɛdi dui ta déɣei Jɔ̃, niitiɛ é te laa zeini ga Boanɛgi, na zu‐wulo‐zu ɣa ga niitiɛ te ga gee‐ƃɛdɛ vea;

¹⁸Ɛĩdulu, Fele, Bɔtalɛmu, Mafiyu, Taamɔ, Afia dui Jĩi, Taadia, Saimɔ nii é ga Keena nui,

¹⁹é vɛɛ Dudia Asikaalia va, nii é wuloni ga kɔ́wɔ wulu wɔɔ.

²⁰Ziizɛ lɛ sa pɛlɛi wu. Kpɔgi ɣaa lɛɛni ba na kɔnɔ ga tɛ lɛ ƃega zoo ƃalaa tɔ laa mi.

²¹Tei kaa yɔ̃wɔitiɛ te maʋai mɛnini, te liini ga te so, ƃɔvɛlaale te ɣɛni tea, “Kígi lɛ koba.”

²²Tɔ‐dɛɛ ɣala‐mɔitiɛ te ziɣini Yɛlusulɛɛ te ɣɛni tea, “Biazibɔ ɣa púlu. Gɔʋɛ yowũitiɛ ta masagi na gaa‐ƃai ɣa é gɔʋɛ yowũ ƃɛɛzu la numaa wulu.”

²³Na ʋaa ma Ziizɛ te lilini pɔ vɛ é sakpe sɔɔ te ma é ɣɛ tea,“? Seeta ɣa Seeta ƃɛ nu wulu?

²⁴Ani masada ɣaa ɣa wɛɛ na su tiɛ wɔ ɣiini pɔ, masadai na lɛ yɛga ma.

²⁵Ani kaalaa ɣaa ɣa wɛɛ na su tiɛ wɔ ɣiini pɔ, kaalai na ɣa leve.

²⁶Ani Seeta ɣa wu ziɣi na ga ƃɔɔ na ɣa ɣɛɛ na gaa wɛɛ su yíɛ wɔ ƃɔɔ wɔ, máʋai lɛ yɛga ma. Ná gaa‐ƃai ɣa wɛ̃ɛ.

²⁷Kɛ̀ nu lɛ zooga ɔ́ lɛ gaa‐ƃaa nu na pɛlɛ wu ɔ́ kweligitiɛ ziɣi ga gaa‐ƃaa, kɛni kilaa manui ɣa gaa‐ƃaa nui ɣili ɣaʋu pa. Na ɣa ɣɛɛ na tɔ sa yá nà ná pɛlɛi wu ʋowo ga ƃɔɔƃɔɔ su.”

²⁸Ziizɛ ɣɛni tea, “Gè bo wiɛ ga gaama, faa yowũ ɣaazɔ zu ʋaa ɣa yɛ numaa vɛ é vɛɛ Gala daa ŋala‐ŋala goi nɛpɛ ba ta bo.

²⁹Kɛ̀ nui nɛpɛ yá Gala baa ŋinɛgi laa ŋala‐ŋala, ná faa yowũi zu ʋaa lɛ wɔlɔ‐wɔlɔ yɛga. Kɛ̀ faa yowũi nii su ʋaa lɛ yɛga wɔlɔ‐wɔlɔ ta wɔlɔ‐wɔlɔ towa zɛgɛi manui ma.”

³⁰Ziizɛ nii woni te ma ƃɔvɛlaale te ɣɛni tea, “Gɔʋɛ yowũ ɣa púlu.”

³¹Ziizɛ dee vɛɛ déɣeitiɛ va te vaani te lo pɛlɛi woba te woo leve túo ga é va.

³²Kpɔgi ɣɛni wuuni Ziizɛ woba. Te ɣɛ sa ma, “È lee vɛɛ è leɣeitiɛ va ta ŋeteavɛ tiɛ wõi ɣɛ ga te è vɛtɛ.”

³³Ziizɛ gaa woteni te ya é ɣɛ tea, “Ƃɛ ɣa é ga dèe ta dèɣeitiɛ?”

³⁴Taitiɛ te ɣɛni wuuni koba é wɛlɛni te ɣaazu va leelia é ɣɛ tea, “Dèeni ka ta dèɣeitiɛ!

³⁵Nui nɛpɛ yá Gala zii‐mai ɣɛ, manui ɣa é ga dèɣe é ga nà seela é ga dèe.”