Read Loma MAKI 6 Bible Online

MAKI 6 - Loma bible

MAKI 6

¹Ziizɛ ziɣini na é va kpɔɔ yui zu ná kala dopoitiɛ te daɣa ba.

²Tei sa doowo foloi ziitini, é vɛɛni ga kala‐bo boga Gala‐feli wɔtai wu. Nu lamaa te goi mɛnini maʋai wala wulo ga tiɛ. Te ɣɛni tea, “Minɛ ɣa zunui nii é fai niitiɛ ɣaazɔ ziɣia na? Kele‐ɣele sɛƃɛ ɣa ga nii maa zɔlɔ wogɛi bɛ́? Aƃɛ lii maa‐wɔlɔ‐wɔlɔ ka é kɛɛzu ŋɛ ni?

³Nii lei ɔ́ ɣɛ ga kamidai nii é ga Meele dui? Jĩi ta Joosi é vɛɛ Dudia va ta Saimɔni te liɛi lɛ ga zunui nii? A da ná seelaitiɛ lei dɔ ɣɛ vɛ ga sei?” Máʋai ɣɛni wãlasu te ma.

⁴Ziizɛ ɣɛni te ma, “Gala daa woo‐wo nu lɛ ga nui ƃaa ɔ́ ƃe ɣɛɛzu ma é wulo kpɔɔ yui zu wulu ta kaa yɔ̃wɔitiɛ zaama é vɛɛ kpɔɔ wɔ pɛlɛ wu vea va.”

⁵Ziizɛ lɛ ŋɛni tii maa‐wɔlɔ‐wɔlɔ‐kɛɛ vele ɣaani na é wulo seeƃɛ vea ɣile‐gilegitiɛ wulu é yee vɛɛni te ma te valo.

⁶Ta yee‐la‐ma lalai vilini ma ga ki‐gaa‐ziɛ. Tei na ɣɛɛni, Ziizɛ vileni taitiɛ zu yíe kala‐bo bo.

⁷É kala dopo puugɔ kai felegɔi lilini pɔ́ vɛ é vɛɛ sa ga te levega ga fele‐fele. Na ɣa ɣɛɛ na é gɔʋɛ‐yowũ‐ƃɛɛ ɣaa‐ƃaa ʋeeni te ya.

⁸É boni te ma ga te mɛ lɛ ŋɛni ta nɛpɛ siɣi ta ziɛi ʋaa ma é wulo tukpo pulu. Te mɛ lɛ daa‐mii ŋɛni ziɣi ɔɔ bɛbɛ ɔɔ te li ga naʋolo ta yiiʋɛgitiɛ zu.

⁹É boni te ma ga te savala kɔlɔ lɔ, kɛ̀ te mɛ lɛ li ga seɣe fele‐fele.

¹⁰É ɣɛni wɔnɔ te ma, “Vɛ nɛpɛ wa li na, pɛlɛi wa lɔ bu a yɛ bu é yɛsu wo ziɣi na.

¹¹Vɛ nɛpɛ wa li na tɛ lɛ ɣɛ yee zeini wo wu, na ɣa ɣɛɛ na tɛ lɛ kɛɛni tɔ wo woi mɛni, wa ɣɛ na ziɣizu na, a wɔwaa ƃɛkpɛnɛ ga fifiligi é ɣɛ ga te ŋalama zeele.”

¹²Na ʋaa ma te liini te ƃɔɛ numaitiɛ wɔ ga te wulu ɣaa ʋe faa yowũ va.

¹³Te gɔʋɛ yowũ lamaa ƃɛɛni numaa wulu te gulo wu seeƃɛ vea lamaa wũmɔ te valo.

¹⁴Masagi Yɛloo ni mɛnini, ƃɔvɛlaale Ziizɛ lɔwɔi ziɛni. Nui taniga te ɣɛni tea, “Bataize‐ɣɛɛ Jɔ̃ ve é wu ziɣia saa ya. Nà ɣa é gaa‐ƃaa ɣɛɛ zéea ga yíɛ tii niitiɛ ɣɛ.”

¹⁵Taniga te ɣɛni tea, “Yiilaija ve.” Kɛ̀ zɔitiɛ te ɣɛni tea, “Tɔ ga Gala daa woo‐wo nu kuloai kɔnɔ ga Gala daa woo‐wo bea wɔlɔ‐zaɣagitiɛ te ɣila.”

¹⁶Kɛ̀ tei Yɛloo mɛnini, é ɣɛni tea, “Jɔ̃ nii gè wũ teveni tɔ na é wu ziɣia saa ya.”

¹⁷Yɛloo é numaa leveni te Jɔ̃ zo te gili te pili kpidi vɛlɛ wu, toku ge zei Yɛloo ƃɔɔ deɣei Fele ŋazai Yɛloodia va. Yɛloo ƃɔɔ seini ga ŋaza.

¹⁸Jɔ̃ ɣɛni Yɛloo ma, “Ɛ́ lɛ tɔ su ga è è leɣei ŋazai wulo zéea.”

¹⁹Sili ɣɛni Yɛloodia wuu zu é vile Jɔ̃ va. É ɣɛni wõizu é paa, kɛ̀ ɛ́ lɛ ŋɛni zooni.

²⁰Ƃɔvɛlaale Yɛloo ɔ́ luo Jɔ̃ va kwɛ̃ɛ fai ma Yɛloo ƃɔɔ vɛ ga Jɔ̃ ɣɛni ga tele‐bo tuo‐wo nu é ga nui kuloai su leelaa Gala faa ma. Na ma é ɣɛni maa ƃɛɛzu. Yɛloo ɔ́ Jɔ̃ woo mɛni na, kí daa ɔ́ vili, kɛ̀ tɔwɔ ɔ́ wui lo goo ma ga kuu‐zu‐nɛɛ.

²¹É zolowo sa Yɛloodia ya ga tei Yɛloo ɣaa ʋoloi ziitini. Yɛloo kuu ɣaani maʋoloi nu ƃaazagitiɛ vɛ te ɣɛni ba ta sɔdasi maazu nu ƃaaza‐gitiɛ é vɛɛ Geealali nu ɣaa wuaitiɛ va.

²²Tei Yɛloodia duu ŋaza nui vaani é ɣaa te vɛ ná Yɛloo yii laani ta maa wɛ̃ɛtiɛ. Yɛloo ɣɛ ma, “Fai nɛpɛ è wõini bo mà. Gà kɛ yìɛ.”

²³É woto leveni zéea é ɣɛ ma, “Ŋɛnii nɛpɛ yà daa wo mà ga fe è ya, anɛɛ ƃalaa é ɣɛ ga nà masadai mazɛvɛ ɣila.”

²⁴Ŋaza nu lomai liini é ɣɛ dée ma, “Zɛƃɛ ɣa ga daa wo?” Nà ɣɛ ma, “Bataize‐ɣɛɛ Jɔ̃ mawũgi.”

²⁵É liini wulu ga kpize ga maa ʋilea masagi wɔ vɛ é ɣɛ ma, “Gè wõini è Bataize‐ɣɛɛ Jɔ̃ mawũgi ʋe zèea pelete wala zu ga maa ʋilea.”

²⁶Masagi maa wõini ga tamaa. Kɛ̀ tɔwɔ koto‐levei é boni é vɛɛ maa wɛ̃ɛtiɛ te mazaƃui va ɛ́ lɛ ŋɛni wõini ɔ́ woi yɛvɛ wulu.

²⁷Masagi kɛɛni sa maa‐ƃɛɛ zɔdasii ta va ga Jɔ̃ mawũgi ga maa ʋilea. Na ɣa ga é liini é wũ teve kpidi vɛlɛi wu.

²⁸É vaani la pelete zu é teve ŋaza nu lomai wɔ, nà wɔ ge teve dée wɔ.

²⁹Tei Jɔ̃ na kala dopoitiɛ te mɛnini, te vaani te mawomai ziɣi te doowu kwɔti ɣabai zu.

³⁰Ziizɛ na keelaitiɛ te ziɣini siɛi ma te va wulu pɔ́. Nii nɛpɛ te kɛɛni é vɛɛ kala‐bogi va te boni te te woni ma.

³¹É ɣɛni te ma, “A va wa letele a dii ŋadavɛ vɛ ná ɣa ɣɛ ƃu wo loowo ga ta wolo.” Ƃɔvɛlaale nu lamaa ɣɛni lɛɛzu yíɛ yii, pele lɛ ŋɛni na ƃalaa ga te laa mi.

³²Te ziɣini na te vili kẽegi zu te li ta lee‐lee ŋadavɛ vɛ ná ƃu.

³³Kɛ̀ tɔwɔ nu lamaa wɛlɛni te va tiɛ li te te wɛ̃ɛ. Te wuloni ná woba laitiɛ zu ga kpize te ziɛ wɔwaa te ziili na te luo.

³⁴Tei Ziizɛ wuloni kẽegi zu, é wɛlɛni kpɔ gwala va. Te ɣaazu‐maa‐wõi soni, ƃɔvɛlaale te maʋaa wuloai ɣɛ è ɣɛ baalagitiɛ te maazu‐vɛtɛ nu ʋaa lɛ ŋɛni te va. É vɛɛni sa ga te ɣala boga ga faa lamaa.

³⁵Tei sa foloi bɔɔlɔ kele ge leveni, ná kala dopoitiɛ te vaani pɔ́ te ɣɛ ma, “Ŋadavɛ vɛ ɣa ƃu‐ƃu. Siɛgi wɔ giɛ sa leve.

³⁶Numaitiɛ leve vɛ ligi zu ƃalaagitiɛ zu é vɛɛ maƃaƃaitiɛ zu va te daa‐mii ŋɛni ɣeea ƃɔɔ ʋaa ma te mi.”

³⁷Kɛ̀ Ziizɛ gaa woteni te ya é ɣɛ tea, “A daa‐mii ŋɛni leve te wɔ te mi.” Te ɣɛ ma, “Gé li gé powũ puugɔ ƃoolo‐ʋɔɔ ɣeea gé teve te wɔ te mi?”

³⁸Kɛ̀ Ziizɛ ɣɛni te ma, “Kpoolo‐ʋɔɔ liide ɣa é wo ya? A li wo ná vɛtɛ.” Tei sa te wɛlɛni na va, te ɣɛni ma, “Kpoolo‐ʋɔɔ looluo ta feza felegɔ.”

³⁹É boni sa ga te pɛ te zei ga ƃulu kpɛ‐kpɛ gui zu.

⁴⁰Na ma natiɛ te zeini su kpɛ‐kpɛ ga wũ gile‐gile, taniga te su ga zee loolu‐loolu.

⁴¹Ziizɛ kpoolo‐ʋɔɔ looluoi ziɣini ta feza felegɔi é ɣaazu lɛ gee zu é mama fe Gala bɛ é kpoolo‐ʋɔɔ ƃumɛi zu ɣale‐ɣale é te ʋe ná kala dopoitiɛ ya ga te sei numaitiɛ laa wu. É feza felegɔi ɣaa wɛɛ te pɛ te vɛ.

⁴²Te pɛ te miini te vile.

⁴³Te kpoolo‐ʋɔɔ vɛnɛi yɛvɛni ta feza pɛnɛi é ɣɛ ga kpɔlɔ puugɔ kai fele.

⁴⁴Taitiɛ te kpoolo‐ʋɔi miini te ɣɛni ga nu wulu dooluo zinaitiɛ zu.

⁴⁵Na ɣɛɛni ƃɔɔ nɔ, Ziizɛ kɛ ná kala dopoitiɛ te vili kẽegi zu te ziɛi leve tuo ga zɔlaavɛ vele Bɛseeda lai zu, tɔwɔ é kpɔgi leve sa wɔ taa zu.

⁴⁶Tei sa é ʋelini te ma, é lɛɛni gizii ma Gala felizu.

⁴⁷Tei kpɔkɔ ziitini, kẽegi maa woozai sa ɣɛ é ziɛi zaama. Ziizɛ tɔ ɣilekpu nɔ ɣa é ɣɛni kakei ɣa.

⁴⁸Ziizɛ ná vɛtɛni ga kẽe‐siai ɣɛni ƃoeizu te la, ƃɔvɛlaale fãgai ɣɛni zeizu te zu. Tei sa é ɣɛni ga gusu laa yɔɔzu, Ziizɛ ɣɛni ziɛzu ziɛi ɣa yíɛ va te wɔ vɛ. É daani wuu zu ga é leve tiɛ.

⁴⁹Kɛ̀ tei te pɛtɛni yíɛ ziɛ ziɛi ɣa, te kaani ga gɔʋɛ. Te loba sa.

⁵⁰Ƃɔvɛ‐laale te pɛ te pɛtɛni te zu ƃɛdɛ ge ɣale. Kɛ̀ é ƃɔɛni te wɔ ga maa ʋilea yíɛ ɣɛ tea, “A mɛ lɛ yii wulo va. Nà vee de. A mɛ lɛ luo.”

⁵¹É vilini kẽegi zu te ma fãgai ƃɔlɔ sa. É wuloni ga tiɛ é leve kɛɛzu va,

⁵²toku ge zei ga tɛ lɛ ŋɛni kpoolo‐ʋɔi maʋai ɣaa ɣaani. Ƃɔvɛlaale maʋai ɣaa‐ɣaazu ƃai ɣɛ te vɛ.

⁵³Tei te ziɛ walai leveni, te vaani Gɛnɛsɛlɛ ligi zu. Te kẽegi la lɔni kake ma.

⁵⁴Te wuloni ƃɔɔ nɔ kẽegi zu numaitiɛ te Ziizɛ wɛ̃ɛ.

⁵⁵Te leve‐teveni ná ligi zu ƃɔgɔpɛ ga kpize te vɛɛ ga vaa ga seeƃɛ vea pɔ́ bebe zu vɛ nɛpɛ tɔ mɛni na ga é ɣɛni na.

⁵⁶Kpaƃaitiɛ nɛpɛ é liini te zu é vɛɛ taitɛ va ta kpalagitiɛ zu tɔ va ga seeƃɛ veaitiɛ te te la nu ƃɔ‐suvɛtiɛ tiɛ pee ʋe bɛ́ ga é ƃe ƃalaa te va te ʋowũ ná seɣei mayifegi va. Tɔwɔ nu liigoitiɛ nɛpɛ te ʋowũni ba te valoni.