Read Loma MAKI 7 Bible Online

MAKI 7 - Loma bible

MAKI 7

¹Tei Favilesiitiɛ vɛɛ tɔ‐dɛɛ ɣala‐mɔitiɛ va te taniga te wuloni Yɛlusulɛɛ te ɣaa lɛ ba Ziizɛ ma,

²te wɛlɛni na va ga ná kala dopoitiɛ taniga te laa miini ga te maa‐woola pele. Na ɣa ga tɛ lɛ zeea‐wuo‐yeke kɛɛni.

³Su‐wulo‐zu ɣa ga Favile‐siitiɛ vɛɛ Dusii zɔitiɛ ɣaazɔ va tɛ lɛ ŋɛni mia ani dɛ tɛ lɛ maa‐wuo yeke kɛɛni. Ta fai nii ɣɛ ga te ziɛ ga nu wɔlɔ‐zaɣagitiɛ yaa ʋai.

⁴Ŋɛni nɛpɛ ka ziɣi na dɔwɔ ƃalagi zu, kɛni dɛ ta maa‐wuo yeke kɛɛ la tɔ vɛɛ miizu. Faa lamaa ɣa na ta ziɛ la è ɣɛ velei kpoale ŋɛnia maa‐wuo yeke fai la ta diɣia, kokoa é vɛɛ betea va.

⁵Na ʋaa ma Favilesiitiɛ ƃɔga tɔ‐dɛɛ ɣala‐mɔitiɛ te gáa zaɣa kɛɛni te ɣɛ ma, “Zɛƃɛi é kɛɛ yà ɣala dopoitiɛ tɛ lɛ zia ga nu wɔlɔ‐zaɣagitiɛ yaa ʋai, to mu tiɛ laa mi ga te maa‐woola pele?”

⁶É ɣɛ te ma, “Aizeea woi ɣɛni ƃo pa pele ma fai nii zu é zɛni na luo é bo ga wo la, wai ŋɛ ni wo ga daa‐nɛɛ‐wũ‐ba vea. È ɣɛ velei ponɛi la ná kɔlɔi zu, Gala giɛ ɣɛ tea, ‘Numai niitiɛ ta wũfesu mà ga te laa vele‐zuvɛ, kɛ̀ te ɣigi maa woozavɛ bà.

⁷Ta nɔ fèlizu ƃɔɔvɛ tiɛ numaa ɣala bo ga nu ƃuse yaa lɔgi è ɣɛ yá ɣɛ ga deʋei kuloai zèea.’ ”

⁸Ziizɛ ɣɛni wɔnɔ te ma, “Wa ƃesu Gala na tɔgi va wiɛ ɣata nu ƃuse yaa ʋaa va.

⁹Wo welevɛ ga ɣɛlɛ vele Gala na tɔgi va kɛɛ ʋaa ma wo ƃɔɔ luo lɔɔ zei!

¹⁰Ƃɔvɛlaale Mooze ɣɛni tea, ‘Wũfe è ɣeea ma ta è lee.’ Na ɣa ɣɛɛ na, ‘Nui nɛpɛ yá faa yowũ wo ga kéea la ta dée, ƃe ba manui za ga gaama.’

¹¹Kɛ̀ wa bosu ga ani nu ɣa bo na kéea ma ɔɔ é bo dée ma ga, ‘Nii pagɛi ɣɛ è maa zɔlɔ wo zèea tɔ ga “kɔbã” na zu‐wulo‐zu ɣa ga feevɛ Gala zeea,’

¹²— yá na wo na, wɛ lɛ kɔnɔ ƃega bá ɔ́ faa nɛpɛ kɛ kéea vɛ ɔ́ nɔ ɣɛ ga dée.

¹³Vele ɣa na wo Gala daa woi ɣɛɛ la ga faa yãka ga wo yaa ʋai wo daazu wo manu zuwui ya, é vɛɛ faa zii lamaa va wa kɛ.”

¹⁴Ziizɛ numaitiɛ lilini kɔnɔ pɔ́ vɛ é ɣɛ te ma, “A wui lo wo pɛ wo nii ɣaa ɣa.

¹⁵Ŋɛni ta nɛpɛ gɛ lɛ ŋetea nu ɔ́ mi ɔ́ máa woola. Kɛ̀ fai niitiɛ ta wulo nu ɣigi zu ta ɣa ta maa woola. [

¹⁶Nui nɛpɛ faa‐mɛni gui wũ ba, é wui lo.]”

¹⁷Tei sa é numaitiɛ yɛni é lɛ pɛlɛi wu, ná kala dopoitiɛ te gaa zaɣani sakpegi ʋaa ma.

¹⁸É ɣɛni te ma,“? Wa ƃalaa wa ga faa‐ɣaa‐ɣaa lala vea? We lɛ kwɛ̃ni ga ŋɛnii nɛpɛ nu ɣa mi ɛ́ lɛ maa woolaga?

¹⁹Ƃɔvɛlaale ɛ́ lɛ lɔɔ kigi zu, kɛ̀ kuu‐zuvɛ ɣa a lɔ na é leve.” Ziizɛ maa ŋɛɛ ziɣini daa‐mii ŋɛni ɣaazɔ va woi niitiɛ mavele ma.

²⁰É ɣɛni wɔnɔ te ma, “Nii yá wulo nu ɣigi zu towa a maa woola.

²¹Ƃɔvɛlaale nu ɣigi zu ɣa tuƃo‐vele‐yowũ‐wulo ɣi‐gaa‐ziɛ ɣa wulo na é vɛɛ niitiɛ va. Natiɛ ta ga kui‐yɔɔzu wɛ̃ɛ‐yeke‐kɛɛ, wũmɔ, nu‐vaa ʋaa,

²²zini‐bɛ nu ƃɔga ŋaza keea nu ta wɛ̃ɛ‐zo fai, kuu‐zu‐yii, wãla‐lɔɔ, pɛɛ ʋaa, ƃaa‐wulo‐ma luo, sili, daa‐ŋala‐ŋala, kpɔɔ‐ʋaa‐wɔɔlɔ‐gaazu é vɛɛ titi tuo va.

²³Faa yowũi niitiɛ ƃɔgɔpɛ ta wulo nu ɣigi zu te maa woola.”

²⁴Ziizɛ ziɣini na é li Taalɔ ligi zu. É lɛ na pɛlɛ ta wu. Ɛ́ lɛ ŋɛni wõini nu ɔ́ kwɛ̃ ga é ɣɛni na. Tɔwɔ ɛ́ lɛ ŋɛni loowu pele ɣaa.

²⁵Ŋaza nu ta ɣɛni na gɔʋɛ yowũ dúu ŋaza nui wulu. É Ziizɛ maa woo mɛnini ga maa ʋilea é va é loo kɔwɔ wu.

²⁶Ŋaza nui nii ɣɛni ga Geliiki nu é ga Sailofinisia luu‐ɣaa. É pee ʋeeni Ziizɛ vɛ ga nà gɔʋɛ yowũi ƃɛ duu ŋaza nui wulu.

²⁷Ziizɛ ɣɛni ŋaza nui ma, “Pagɛ dɛ lopaitiɛ te vile, ƃɔvɛlaale ɛ́ lɛ pele ma ga nu é lopaitiɛ ta laa‐mii ŋɛnii ziɣi é pili gilewua vɛ.”

²⁸Ŋaza nui gaa woteni zéea é ɣɛ ma, “Kèea, gilewuitiɛ ƃalaa te teevei wu ta mɔkolu vɛnɛi nii mi yá loo lopaitiɛ ya.”

²⁹Ziizɛ ɣɛ ma, “È woi nii ma, yà lii wo sa. Gɔʋɛ yowũi ziɣia è lui wulu.”

³⁰Ŋaza nui liini ná pɛlɛi wu é wɛlɛ lopoi va laani betei ɣa gɔʋɛ yowũi ziɣiai sa pulu.

³¹Ziizɛ wulu ɣaa ʋeni sa é wulo Taalɔ ligi zu é leve Saidɔ̃ lai zu é ziiti Geealali yiɛ walai ma. É leveni Dikapɔlɔ ligi zu ga é ziiti na.

³²Te vaani pɔ́ ga zunu ta gui ʋooleai daa ɣatagɛi te pee ʋe bɛ ga é yee vɛɛ ma.

³³Tei Ziizɛ kuloni kpɔgi zu é lii la te felegɔ ŋada laa, é yee ƃeɣaitiɛ lɔɔni gui zu é laa life ya é ʋowũ nɛgi va.

³⁴É wɛlɛni gee‐zuvɛ va é yɛʋui lɛ é too é ɣɛ ma, “Ɛfata,” na ɣa ga “Ƃe ba daa zu leve.”

³⁵Guitiɛ zu laa laoni sa ga maa ʋilea, nɛgi wu ziɣi é laa wɔlɔ ga gaa wodoa.

³⁶Ziizɛ te lɛnɛni ga te mɛ lɛ bo nu nɛpɛ ma. Kɛ̀ velei nɔ ɔ́ te lɛnɛ da, vele nɔ na tɔ wɔɔlɔ la boga zu ga woo maa zeezea.

³⁷É wuloni ga numaitiɛ é leve kɛɛzu va tiɛ ɣɛ tea, “Fai ɣaazɔ é kɛɛ maa‐wulo‐zu lɛ ta va. Tɔ ƃalaa kɛɛzu gui ʋoole vea tiɛ faa mɛni, mumuga tiɛ yɛpɛ.”