Read Loma LUKI 10 Bible Online

LUKI 10 - Loma bible

LUKI 10

¹Tei sa na wuloni ba, de maliɣii Ziizɛ nu yee lɔfela kai felegɔ wuloni wɔnɔ é te leve. É te leveni ga fele‐fele. É te leveni tai ɣaazɔ zu ta ŋadɛivɛtiɛ ɣaazɔ tɔ ɣagi ɣɛni vaazu liizu na.

²É ɣɛni te ma, “Mɔlɔ ƃoei zu wɔɔlɔvɛ ma, kɛ̀ mɔlɔ‐leve veaitiɛ ta nɔ ga gile‐gile. Na ma nui pó ge ga kpalagi, a feli ga é mɔlɔ‐leve vea leve te ná mɔlɔi leve.

³A li na ga lii‐zu vele. A wɛlɛ, gà wo wulozu gè wo leve wo maʋaa wulo è ɣɛ baala zuwua ta ɣɛ gozo koeini saama.

⁴A mɛ lɛ li ga naʋolo‐wuu vɛbɛ. A mɛ lɛ li ga sɔɔla‐wuu vɛbɛ. A mɛ lɛ li ga kɔwaa wɔlɔ. A mɛ lɛ daali‐ma wo pelei ma.

⁵Pɛlɛi nɛpɛgi wa lɛ bu mamaa wũgi pa a ɣɛ tea, ‘Zii‐laa ɣa ɣɛ pɛlɛi nii wu fãa.’

⁶Tɔwɔ ani zii‐laa wõi‐ɣɛ‐ma nu ɣa é na, wa yii‐lai ɣa ɣɛ zéea. Kɛ̀ ani ɛ́ lɛ ŋɛ na, towaa gale ma wulu wo wɔ.

⁷Wa yɛ pɛlɛi zii ɣilagi nɔ wu, daa‐mii ŋɛni nɛpɛ ta fe wo ya wo mi, kpoale ŋɛnii ta fe wo ya wo kpoale. Toku ge zei ga kulovɛ bu tii‐ɣɛɛ nui vɛ ga é ʋɔɔnɛi zɔlɔ wo. A mɛ lɛ li wɔ kɛ ga wa wulo pɛlɛi zɔi wu wo lɔ zɔi wu.

⁸Wa li na taa ta nɛpɛ su te yee zei wo wu na, nii nɛpɛ ta sei wo laa wu, a nà mi.

⁹Wa seeƃɛ vea valo malai zu wo ɣɛ ná veaitiɛ ma, ‘Gala na masadai maa ƃua wo va.’

¹⁰Kɛ̀ wa lɛɛ na taa ta nɛpɛ su tɛ lɛ yee zeini wo wu na, a li tai ƃɔɔ mavele‐vɛɛgi ma wo ɣɛ tea,

¹¹‘Wa lai zu ʋifiligi ƃalaa é ɣataga gé wɔwaa gá kpalesu wɔwaa é vɛɛ wo va ga faa. Nà pɛ ge ɣɛɛvɛ, a fai nii wɛ̃ɛ. Na ɣa ga Gala na masadai maa ƃua wo va.’ ”

¹²Ziizɛ ɣɛni tea, “Gè bo wiɛ, faa‐wo gaa‐leve ʋoloi wala ɣa va Saadɔ̃ ʋaa ma é leve tai na va.”

¹³Ziizɛ ɣɛni tea, “Kpalo velivɛ yìɛ, yài è ga Koloazĩ lai! Kpalo velivɛ yìɛ, yài è ga Bɛseeda lai! Toku ge zei ga è ɣɛ tii maa‐wɔlɔ‐wɔlɔ kpaazagitiɛ te ɣɛɛ wo zu natiɛ te ɣɛɛni Taalɔ lai zu ta Saidɔ̃ lai, è ɣɛ ná veaitiɛ tɛ wulu ɣaa ʋega wɔlɔ faa yowũ va ná zu wooza. Seɣe yaŋala gɔ ƃalaa ɣɛ te ma, zuwu wuai te ma, nà yíɛ dɛ ga te maa wõivɛ.

¹⁴Kɛ̀ faa‐wo gaa‐leve ʋoloi maʋaa‐yɛ‐mai wala ɣa va Taalɔ lai ʋaa ma ta Saidɔ̃ é leve wo va.

¹⁵?Yài wɔgi è ga Kapɔɔnia lai, è laavɛ la ga è lamata ɣa lɛ Gala ta? Ƃa! Yà yii saa vea ɣɛɛ‐zuvɛ.”

¹⁶Ziizɛ ɣɛni sa ná kala dopoitiɛ ma, “Nui nɛpɛ yá wo woo mɛni, manui gòo mɛniga. Nui nɛpɛ yá ɣɛlɛ wo va, manui ɣɛlɛɛ bà. Nui wɔgi yá ɣɛlɛ bà, manui ɣɛlɛɛ nui nii va é tèvega.”

¹⁷Nu yee lɔfela kai felegɔi vaani wulu ga kuu‐zu‐nɛɛ tiɛ ɣɛ Ziizɛ ma, “Gé maliɣii, gɔʋɛ yowũitiɛ ƃalaa te woloni gé vɛ yà laa‐zeigi zu!”

¹⁸Ziizɛ ɣɛ te ma, “Gè wɛlɛni Seeta va yíɛ loo è ɣɛ mea‐mea ɣa wulo gee‐zuvɛ.

¹⁹A wɛlɛ! Gè gaa‐ƃaa ʋeea wo ya ga wiɛ ziɛ kaalia ma ta ŋaku ɣaalia, gè gaa‐ƃaa ʋe wɔnɔ wo ya wo zili nui na gaa‐ƃai ɣaazɔ maazu. Ŋɛni ta nɛpɛ gɛ lɛ ŋada zeiya wo va.

²⁰Nà pɛ ge ɣɛɛvɛ, a mɛ lɛ kuu‐zu‐nɛɛ wulo fai nii zu. Na ɣa ga gɔʋɛ yowũitiɛ wolo ʋai wo vɛ. Nii mugi wa kuu‐zu‐nɛɛ wulo su tɔ ga wa laa‐zeigi wonɛvɛ Gala ta.”

²¹Nà maziɛgi nɔ zu Ziizɛ kuu‐zu‐nɛɛ wuloni Gala baa ŋinɛgi ɣɛɛ vele ma zii zu é ɣɛ tea, “È mama, kèea, yài è ga zuu pɛ gee pɛ te maliɣii, ga velei è fai niitiɛ loowuga la kele‐ɣele beaitiɛ va ta niitiɛ ta faa ɣaa ɣa è te wulo kɛnɛ ma niitiɛ ɣaazu ta ɣi‐gaa‐ziɛi ʋaa wuloai ga lopaa. Tɔ na, kèea! Na ɣa é ɣɛni ga è yii‐ma velei.

²²Ŋɛni ɣaazɔ yee laavɛ sa zèea kèea vɛ. Tɔwɔ nu ta nɛpɛ gɛ lɛ kwɛ̃ni ga nui gè le, nài gè ga dúi, é wulo kèea wulu. Ɔ̀ nɔ ɣɛ ga nu ta nɛpɛ ge kwɛ̃ɛ ga nui kèea é le é wulo pùlu, nài gè ga dúi, é vɛɛ sa nui nɛpɛ ba nài gè ga dúi gà wõi ɣɛ gè máʋaa wulo kɛnɛ ma gáazu.”

²³Tei Ziizɛni te ɣɛni ta letele ŋada laa, é ɣaa woteni ná kala dopoitiɛ ma é ɣɛ tea, “Tuuyiɛ ɣa niitiɛ ma ta wɛlɛ fai niitiɛ va wo wɛlɛzu ba!

²⁴Gè bo wiɛ, Gala daa woo‐wo bea lamaa ta masaga te ɣɛni wõi ɣɛɛzu ga te wɛlɛ nii va wo wɛlɛzu ba, tɔwɔ tɛ lɛ wɛlɛni ba. Tiɛ wõi ɣɛ ga te fai nii mɛni wo mɛnisu, tɔwɔ tɛ lɛ mɛnini.”

²⁵Na ɣɛɛzu tɔ‐dɛɛ ɣala‐mɔi ta wu ziɣi é lo ga é Ziizɛ zu wɔ̃ɔ yíɛ ɣɛ tea, “Kala‐mɔi, zɛƃɛ ɣa gà kɛ pɔ̀ɔ laa ɣɛ zɛʋui nii va kwɛ̃ɛ gɛ lɛ ba?”

²⁶Ziizɛ ɣɛ ma, “Zɛƃɛ ɣa ponɛi Gala kɔlɔi zu? Zɛƃɛ ɣa yà dodo su?”

²⁷É gaa wote é ɣɛ tea, “Yà wõi ga è maliɣii Gala ga è yii ɣaazɔ ta è ɣigi ɣaazɔ ta yà ɣaa‐ƃai ɣaazɔ é vɛɛ yà ɣi‐gaa‐ziɛi ɣaazɔ va. Na ɣa ɣɛɛ na è wõi ga è zii yɔ̃wɔ è ɣɛ velei è ƃɔɔ wõini la.”

²⁸Ziizɛ ɣɛ ma, “È gaa wotega ga gaama. Nà ɣɛ. Yà kɛɛ na, è yɛʋui ɣa yɛ è ya.”

²⁹Kɛ̀ é ɣɛni wõi ɣɛɛzu ga é faa ziɣi ƃɔɔ va. É ɣɛ sa Ziizɛ ma, “Ƃɛ ɣa é ga sìi yɔ̃wɔi?”

³⁰Ziizɛ gaa wote zéea é ɣɛ ma, “Zunu ta ziɣini Yɛlusulɛɛ yíɛ li Yɛlikoo. É wulo wũmɔ vea ma. Niitiɛ te maa ʋooni te dowa te zɛ na te ziɣi na saa‐zu wolo yɛ sa tekpe.

³¹É zolowo sa ga laa‐ʋaalegi ta yíɛ li ga pelei. Tei é pɛtɛni, é maa lani é leve.

³²Vele nɔ na é ɣɛni la ga Liiʋai ta. Tei é vaani na é wɛlɛ ba, é maa lani é leve.

³³Kɛ̀ Sameelia nui ta ɣɛni ziɛzu é va vɛ é ɣɛni na. Tei é pɛtɛni, gaazu‐maa‐wõi soni.

³⁴É li pɔ vɛ é gulo wu ná palaitiɛ ɣa ta dɔɔ é te ɣaa ɣili. É sei sa kpɔɔ zoo‐ʋaalegi wɔma é vaa la wɛ̃ɛ vɛlɛ ta wu é ƃala zo ma.

³⁵Na wulu ʋoloi é sɛni dooluo ziɣini é fe wɛ̃ɛ vɛlɛ maazu‐vɛtɛ nui ya yíɛ ɣɛ ma, ‘Ƃala zo ma. Nii nɛpɛ yà dɔ nà wulu, gà vaa na wulu gà yà dɛi ʋe.’ ”

³⁶Ziizɛ ɣɛ sa tɔ‐dɛɛ ɣala‐mɔi ma, “Nu saagɔi niitiɛ zaama, ƃɛ ɣa kuloai bu bɛ́ ga zunui nii zii yɔ̃wɔ nii é wuloni wũmɔ veaitiɛ zaama?”

³⁷É ɣɛ Ziizɛ ma, “Nui é gaazu‐maa‐wõi ɣaani.” Ziizɛ ɣɛ ma, “Li è daamɔdai ɣɛ.”

³⁸Tei sa Ziizɛni te ɣɛni liizu ta ziɛi ma ta ná kala dopoitiɛ, te lɛɛni taa ta zu, ŋaza nu ta na dáa ga Maata nà yee zei bu ná pɛlɛi wu.

³⁹Maata deɣe ŋaza nui wɔ ge ɣɛni na daa ga Meele. Meele ɣa é ɣɛni zeini de maliɣii Ziizɛ wɔwɔ wu yíɛ wui to ná kala‐bogi ma.

⁴⁰Maata ɣigi ziɣini koba daa‐mii ŋɛni yeke tama‐lamagi vɛ é ɣɛni kɛɛzu. É liini sa é ɣɛ de maliɣii ma, “Ɛ̀ lɛ ƃalani ga dèɣei é fɔ̀ɔ tii ɣa nà ɣilekpu? Bo na má é ƃɔ bà.”

⁴¹Kɛ̀ de maliɣii gaa woteni é ɣɛ ma, “Maata, Maata, faa lamaa mayii‐zɛlɛ ka è ma yìɛ ɣi gaa ziɛ faa lamaa ma.

⁴²Tɔwɔ faa ɣila nɔ ɣa pagɛi nu ƃala ma. Meele ɣa é fai pa kelei ziɣia ga yii‐ma. Nà wɔ gɛ lɛ wuloa zéea.”