Read Loma LUKI 14 Bible Online

LUKI 14 - Loma bible

LUKI 14

¹Tei é ɣɛni ga doowo folo ɣila Ziizɛ li laa miizu to‐tuoi ta na pɛlɛ wu malo‐tuoi ga Favilesii ta, te ɣɛni Ziizɛ maa ʋɛɛnɛsu.

²Tɔwɔ zunu ta ɣɛni daa wu fe seeƃɛ ba.

³Ziizɛ ƃɔɛni sa tɔ‐dɛɛ ɣala‐mɔitiɛ wɔ ta Favilesiitiɛ yíɛ ɣɛ tea,“? Tɔ tɔ su ga te nu valo ga doowo folo ƃaa nu mɛ lɛ na ɣɛ?”

⁴Kɛ̀ te maazu ɣɛɛni ƃu. Ziizɛ wɔ ge seeƃɛ nui ziɣi sa é balo é ƃe ba é li.

⁵Ziizɛ ɣɛni te ma, “Wo ta zɛƃɛ ɣa duu ɣɛɛzu zéea ɔɔ nikɛ zinɛ toai ziɛ yeɣe zu, manui ƃe kulozu ga maa ʋilea ga doowo foloi?”

⁶Tɛ lɛ ŋɛni zoosu tɔ goi ɣaa wote.

⁷Niitiɛ sa te te lilini daa‐mii ŋɛnii ma, tei Ziizɛ wɛlɛni na va ga velei te ɣɛni zeizu la to‐su‐ba vea zei‐zu, é sakpe sɔɔni te ma yíɛ ɣɛ te ma,

⁸“Ta è lili na ŋaza‐wulo wuu ma, mɛ lɛ zei to‐su‐ba nu zei‐zu, è mɛ lɛ yɛ su numaitiɛ te te liliga te ta ɔ́ va ɔ́ ɣɛ ga nu ɣaa wua ɔ́ leve è va.

⁹Na ɣa ɣɛɛ na nui sa é wo liliga wa tɔ ɔ́ va ɔ́ ɣɛ è ma, ‘Ziɣi vɛ, zunui nii zei na.’ Yá ɣɛ na ŋɛ na, yà sa yà zei sei‐zuvɛ vɛ ná loai bu wũfe maazu.

¹⁰Kɛ̀ ta è lili na, li è zei vɛ ná loai bu, kɛɛ ʋaa ma wo lili nui ɣa vaa na é ɣɛ è ma, ‘Bɔ̀i, li è zei munu ná ɣaa wuai.’ Wũfe‐ma ɣa ɣɛ sa è vɛ niitiɛ ɣaazɔ ɣaazu wa tiɛni wa ɣɛ daa‐miigi wosu.

¹¹Ƃɔvɛlaale nui nɛpɛ yá ƃɔɔ ʋaa wɔɔlɔ, manui ɣa yii bu. Nui nɛpɛ ɛ́ lɛ ƃɔɔ ʋaa wɔɔlɔ, manui ɣa wɔɔlɔ.”

¹²Nui nii é Ziize lilini daa‐mii ŋɛnii ma Ziizɛ ɣɛni ma, “Ani yà diɣi ƃakpa ɣili na ɔɔ yìɛ kuu ɣa, mɛ lɛ yà wɛ̃ɛ vagɔitiɛ lili ɔɔ è leɣea ta è liɛni ɔɔ è ɣaa yɔ̃wɔa ɔɔ è zii yɔ̃wɔi niitiɛ te ƃɛtɛi, ta ƃalaa te mɛ lɛ va è lilisu ɔ́ ɣɛ ga ɣà wui‐wuloa.

¹³Kɛ̀ yà ɣɛ na kuu ɣaazu, mɔɔlɛ vea lili ta tɔbɔ‐zu‐ba vea, è ɣɛ velei mɛlɛ‐ŋɛlɛ bea te la ta gaazu‐wuu vea.

¹⁴Na ɣa ɣɛɛ na tuuyiɛ ɣa ɣɛ yìɛ, ƃɔvɛlaale tɛ lɛ zooga tɔ poto fe è ya. Yà dɛi woto ka ʋe tele‐bo beaitiɛ wu‐ziɣi‐zuvɛ saa ya.”

¹⁵Taitiɛ ta Ziizɛni te ɣɛni laa miizu, tei te ɣila ge fai nii mɛnini Ziizɛ boni, é ɣɛni ma, “Tuuyiɛ ɣa nui nii ma yá laa mi Gala na masadai zu!”

¹⁶Kɛ̀ Ziizɛ ɣɛni ma, “Zunu ta ɣɛni kuu ƃakpa ɣaazu é numaa lamaa lili.

¹⁷Kuu‐ɣaa ziɛgi zu sa é ná tii‐ɣɛɛ nui leveni ga é ɣɛ numai niitiɛ ma é te lilini, ‘A vaa na, Ƃɔvɛlaale ŋɛnii ƃɔgɔpɛ kavele ƃɛtɛvɛ sa.’

¹⁸Kɛ̀ te pɛ te vɛɛni ga woo‐zu‐wuloa. Nu maa wũgi ɣɛni ma, ‘Gè zuu ta ɣeea. Kɛni gà li gè wɛlɛ na va. Gɛ̀ lɛ vaa vele ɣaa.’

¹⁹Zɔi ɣɛ tea, ‘Gè nikɛ zinɛ puugɔ ɣeea. Gà liizu gè te maa ƃɛɛ. Gɛ̀ lɛ vaa vele ɣaa.’

²⁰Zɔi ɣɛ wɔnɔ tea, ‘Gè ŋaza wuloa. Na ma gɛ̀ lɛ zooga gɔ̀ va.’

²¹Tii‐ɣɛɛ nui vaa vele ɣa na ɣɛ é kwena‐bogi nii wo na nu keea nu ma. Zii‐ɣaa‐wãla maazu pɛlɛ wũda nui ɣɛ ná tii‐ɣɛɛ nui ma, ‘Li ga maa ʋilea pele‐vɛɛgitiɛ ma ta pele woloitiɛ te tai zu è va ga mɔɔlɛ vea ta tɔbɔ‐zu‐ba vea, è ɣɛ velei gaazu‐wuu vea te la ta mɛlɛ‐ŋɛlɛ bea.’

²²Tii‐ɣɛ nui ɣɛ ma, ‘Kèea, nii è deʋea gè na ɣɛɛ, kɛ̀ ŋada yãka ɣa dɛ na.’

²³Ná nu keea nu ɣɛ ma, ‘Li pele walai ma ta pele‐wulo‐baitiɛ è kɛ numaitiɛ te va, kɛɛ ʋaa ma nà pɛlɛi laa ʋe.

²⁴Gè bo yìɛ, numai niitiɛ gè te liliga ta nɛpɛ gɛ lɛ sa nà daa‐mii ŋɛnii ta vilega nɛ ma.’ ”

²⁵Nu ƃulu kpakpa wala vɛɛni Ziizɛ va. Tɔwɔ é liteni sa é ɣɛ te ma,

²⁶“Ani nu ɣa ɣɛ na é va pɔ̀, manui lɛ zilini ga kpɔɔ ɣeeai ta dee ta ŋazai é vɛɛ dea va, deɣeni te vɛɛ diɛni ba, na ɣa ɣɛɛ na é ɣɛ ga fai maa nɛi ʋɔlɔ ƃalaa ga manui zili ga ƃɔɔ yɛʋui, ɛ́ lɛ zooga ɔ́ ɣɛ ga nà kala dopo.

²⁷Nui nɛpɛ ɛ́ lɛ ƃɔɔ vɛɛ‐pulu wulu likpii ziɣia ɔ́ vile da pùlu, manui lɛ zooga ɔ́ ɣɛ ga nà kala dopo.

²⁸Su‐wulo‐zu ɣa ga nii. Wo ta zɛƃɛ ɣa yá ɣɛ wõi ɣɛɛzu ga é sebe wooza to manui ƃe dɛ zeizu ɣaʋu pa ga nii liigoi yá ɣɛ ga to ŋɛnii é su zei ga é wɛlɛ na va ga ani nii liigoi é zéea towaa kulo‐ɣɛɛ wo ga é to?

²⁹Ani na lɛ ɣɛ ɣɛɛni, manui ɣa toga lɔɔ zei na ɛ́ lɛ zooni ɔ́ daa wulo, taitiɛ ɣaazɔ te wɛlɛni ba é tɔɔ zei ta ɣɛ ŋɛɛ wulozu su

³⁰tiɛ ɣɛ tea, ‘Zunui nii sebe‐loga lɔɔ zeini, tɔwɔ ɛ́ lɛ zooni ɔ́ daa wulo.’

³¹Ɔɔ ɣalaso sɛƃɛ ɣa a ɣɛ liizu ƃɔɔ ɣalasogi nii luo é vaazu pɔ́ ga kɔɔ é ƃe dɛ zeizu ɣaʋu pa é su zei ga ani towaa zoo é wɔ bɔɔ ɣalasogi wɔ ga wuluƃo wulu puugɔ? Na ɣa ga ɣalasogi nii é vaazu ga é wɔ pɔ́ ga wuluƃo wulu zee felegɔ.

³²Ani ɛ́ lɛ zooga ná la, towaa bɔi yɛ ƃɔɔ woozala é keela leve pɔ́ vɛ é tɛɛ vili ma.

³³Vele nɔ na é la ga nui nɛpɛ ɛ́ lɛ yee wuloa ŋɛni ɣaazɔ ʋaa zu é zéea. Manui lɛ zooga ɔ́ ɣɛ ga nà kala dopo.”

³⁴Ziizɛ ɣɛni tea, “Kpolo ɣa ga ŋɛni vagɔ. Kɛ̀ ani kpolo mayɛmi ka wulo na ba, ná kpololai ɣa sa a yɛ le?

³⁵Ɛ́ lɛ sa vaga tulu gaa luule ʋaa ma ɔ́ nɔ ɣɛ ga ŋɛnii nii yá tulu gaa luule. Numaa ta pili nɔ ya. Nui faa‐mɛni gui wũ ba, pagɛ é mɛni.”