Read Loma LUKI 15 Bible Online

LUKI 15 - Loma bible

LUKI 15

¹Gɔmɛti naʋolo‐wulo veaitiɛ ƃɔga numai zɔitiɛ te luo velei lɛ ŋɛni vani te pɛ te ɣɛni lɔtɔsu Ziizɛ va ga te goo mɛni.

²Favilesiitiɛ ƃɔga tɔ‐dɛɛ ɣala‐mɔitiɛ te zili zaɣani tiɛ ɣɛ tea, “Zunuí nii ɣa yee zeizu faa yowũ‐ɣɛɛ vea wu ta tiɛni tiɛ laa mi.”

³Na ma Ziizɛ sakpegi nii zɔɔni te ma. É ɣɛni tea,

⁴“Wo ta zɛƃɛ ɣa baala wũ gila ka ɣɛ zéea, ani gila ge viliga, é ƃe zee taawuo kai taawuoi yɛsu kpooʋe zu zɔi piligɛi é yɛ nà ʋo‐fo wulozu su é yɛsu pɛtɛ?

⁵Ani yá pɛtɛ na é pɛɛ ɣala ga yíɛ kuu‐zu‐nɛɛ wulo.

⁶Yá vaa na wɔ pɛlɛ wu, é ná siɛ‐puluitiɛ lili ta sii yɔ̃wɔitiɛ yíɛ ɣɛ te ma, ‘A vɛɛ bà a de kuu‐zu‐nɛɛ wulo, ƃɔvɛlaale nà baalagi nii piligɛi ɣɛ gè pɛtɛga.’

⁷Gè bo wiɛ, vele nɔ na é la. Kuu‐zu‐nɛɛ ɣa ɣɛ Gala ta ɣeelaitiɛ laa wu faa yowũ‐ɣɛɛ nu ɣilagi maazu yá wulu ɣaa ʋe faa yowũ va é leve nu zee taawuo kai taawuoi niitiɛ va faa yowũ lɛ te va ga te wulu ɣaa ʋe ba.”

⁸Ziizɛ ɣɛni wɔnɔ tea, “Ŋaza nu zɛƃɛ ɣa kani kpulu‐kpulu puugɔ ɣa ɣɛ zéea gila ge vili, é ƃe labo ɣaa zosu é ná pɛlɛi wu ƃale yíɛ gaa ziɛ ƃɔɔ sɛ‐sɛ é yɛsu é wɛlɛ ba? Yá wɛlɛ na ba é ná siɛ‐puluitiɛ lili ta sii yɔ̃wɔitiɛ é ɣɛ te ma, ‘A vɛɛ bà de kuu‐zu‐nɛɛ wulo. Gè naʋoloi nii vɛtɛga é vilini zèea.’

¹⁰Gè bo wiɛ, vele nɔ na ƃalaa kuu‐zu‐nɛɛ ɣa ɣɛɛ la Gala ta ɣeelaitiɛ laa wu faa yowũ‐ɣɛɛ nu ɣila faa ma nii yá wulu ɣaa ʋe ná faa yowũitiɛ va.”

¹¹Ziizɛ ɣɛni tea, “Zunu ɣila ge ɣɛni na dea zinaa te fele.

¹²Leɣe ɣelei ɣɛni te ɣeea ma, ‘Kèea, nii é fàa ma è weligi zu fe zèea.’ Nà weligitiɛ ɣaa wɛɛ te yɔɔzu.

¹³Folo lamaa lɛ ʋɔlɔ leveni, nii ɣaazɔ é ɣɛni leɣe ɣelei ya é gaa lɛ ba é siɛ wulo sa é li ƃɔɔ zuu zu‐wooza zu. Ná ɣa é weligi ɣaa valani na ba ga dɔɔ vele wukɛ‐wukɛ.

¹⁴Tei sa é kpɔgɔpɛ dɔɔni, pulu ƃakpa looni zui na zu. Ŋɛni ƃala yiɛ sa loo ma.

¹⁵Dii vele ɣa na ɣɛ é ƃɔɔ vɛɛ zui na zu laa‐zeigi ɣila ba. Nà wɔ ge teve sa ná kpalagi zu ga yíɛ bũigitiɛ ɣaa wɔ.

¹⁶Kuu zu ɔ́ nɛɛ ga kɔ̃nɔ ge ɣɛ ga ŋɛnii nii bũigitiɛ tɔ mi maɣalai, tɔwɔ nu ta lɛ ŋɛni nɛpɛ feeni zéea.

¹⁷Kɛ̀ tei sa é looni ɣi su, é ɣɛni tea, ‘Tii‐ɣɛɛ vea liigoi vɛtɛ te kèea ya daa‐mii ŋɛni te ya mata yɛgɛi, nɔ̀wɔ gè vɛ sù yiɛ ƃɔnɔ wo ga pulu!

¹⁸Gà wu ziɣizu gè li kèea wɔ gè ɣɛ ma, Kèea, gè faa yowũ ɣɛɛ ga Gala é vɛɛ è va.

¹⁹Gɛ̀ lɛ sa kuloni bu ga te tìli ga è luu. Luo sa gàazu è ɣɛ yà lii‐ɣɛɛ nui ta.’

²⁰É wu ziɣini sa é va kéea wɔ. Kɛ̀ tei maa woozai ɣɛ dɛ, keea wɛlɛni ba gaazu‐maa‐wõi so. É ƃizeni é li é ɣili ba é laa vɛɛ komagi va.

²¹Dui ɣɛ ma, ‘Kèea, gè faa yowũ ɣɛɛ ga Gala é vɛɛ è va. Gɛ̀ lɛ sa kuloni bu ga te tìli ga è luu.’

²²Kɛ̀ keea ɣɛni ná tii‐ɣɛɛ veaitiɛ ma, ‘Yogbogi ƃɔɔ pagɛi baa pɛ ba, a vaa la ga maa ʋilea wo too kɔ ba so bala ɣai too zee va wo kɔlɔ lɔ kɔwɔ ɣa.

²³Na ɣa ɣɛɛ na nikɛ yuwui nii kpakpai baa va wo vaa la wo paa. A de laa mi de kuu‐zu‐nɛɛ wulo.

²⁴Ƃɔvɛlaale dùi nii zai yɛga, zɛʋu wɔ ka sa zéea wɔnɔ. Piligɛi yɛga, tɔwɔ pɛtɛgɛ sa.’ Te vɛɛ sa ga kuu‐zu‐nɛɛ wuloa.

²⁵“Tɔwɔ liɛ ɣelei ɣɛni kpalagi zu. Tei é ɣɛni vaazu é lɔtɔ pɛlɛi va, é gãi ŋɛnii woo mɛnini ta kaa‐wo tigi.

²⁶É zɛba do sa é tii‐ɣɛɛ nui gila tili é gaa zaɣa kɛ ga nà é su‐wulo‐zuvɛ lɛɛ la.

²⁷Nà ɣɛ ma, ‘È leɣei vaa. Na ɣa ɣɛɛ na nikɛ yuwui nii kpakpai, è ɣeea é paa. Ƃɔvɛlaale é zée maa zɔlɔ woga dɔtɔ zu wodoai faa lɛ ba.’

²⁸Kɛ̀ liɛ ɣelei yii ɣaa wãlani. Ɛ́ lɛ ŋɛni kɛɛzu ɔ́ lɔ pɛlɛi wu. Kéea va sa é maa nɛɛnɛ.

²⁹Kɛ̀ é keea woi ɣaa woteni é ɣɛ ma, ‘Wɛlɛ kwena tama‐tamagi va gè kɛɛ tii ɣɛɛzu yìɛ, ɛ̀ lɛ wɔlɔ‐wɔlɔ faa woni mà gɔ̀ kulo ga. Na ƃalaa ɣɛɛvɛ ɛ̀ lɛ wɔlɔ‐wɔlɔ bili yuwu ƃalaa ʋeeni zèea kɛɛ ʋaa ma gá nà siɛ‐puluitiɛ gɔ̀ kuu‐zu‐nɛɛ wulo.

³⁰Kɛ̀ tei è lui zɔi vaani, nii é è weligi zu ŋala‐ŋalaga ŋazai niitiɛ ma te ƃɔɔ ɣɛɛ ga yaawoa, nikɛ yuwui nii kpakpai è paani maʋaa ma!’

³¹Kéea ɣɛ ma, ‘Dùu, yà bà ga ɣee nɛpɛ. Nii nɛpɛ é ga pò è wo be.

³²Solowogɛi ɣɛ su ga gè kuu‐zu‐nɛɛ wulo, ƃɔvɛlaale è leɣei nii zai ɣɛ, zɛʋu wɔ ka sa zéea. Piligɛi ɣɛ, tɔwɔ pɛtɛgɛ sa.’ ”