Read Loma LUKI 16 Bible Online

LUKI 16 - Loma bible

LUKI 16

¹Ziizɛ ɣɛni wɔnɔ ná kala dopoitiɛ ma, “Kpɛtɛ nu ta ɣɛni na, kweligitiɛ maʋaa ƃawola nu na. Faa ƃawola nui nii ɣɛɛ‐zɔ ge ziitini kpɛtɛ nui ma ga tɔ ná sɔɔlaitiɛ ɣaa valasu ba.

²Nà wɔ ge tilini sa é ɣɛ ma, ‘Zɛƃɛ ɣa ga nii gè mɛniga é vile yìɛ? Ŋɛniitiɛ è yɛga te ƃawola, va è te mawona‐bo bo, toku ge zei ga ɛ̀ lɛ sa wɔlɔ‐wɔlɔ ɣɛɛzu ga te ƃawola nu.’

³Faa ƃawola nui boni ɣigi zu yíɛ tea, ‘Tei tɔwɔ nà nu keea nu sìɣizu kwéligitiɛ maʋaa ƃawola, zɛƃɛ ɣa sa gà kɛ? Sù lɛ ƃaani ga gè kpeleɣa‐zaɣa lii ɣɛ. Na ɣa ɣɛɛ na gà wũfesu ga gè feli wo.

⁴Nii gè kɛɛzu gè deʋea, kɛɛ ʋaa ma gà ziɣi na kweligitiɛ maʋaa ƃawola, numaa tiɛ yee zei bù ta vɛlɛitiɛ wu.’

⁵Na ma é ná nu keea nu ná kui kɛɛ veaitiɛ lilini ga gile‐gile. É ɣɛni mamaa wũgi ma, ‘Nà nu keea nu na kui ɣa yìɛ ga liide?’

⁶Nà ɣɛ ma, ‘Gulo lĩi wũ felegɔ.’ É ɣɛ kui keea nui ma, ‘Yà wui wɔlɔi ziɣi è zei ga maa ʋilea è ponɛ ga tĩi wũ gila.’

⁷É ɣɛ wɔnɔ ta ƃɔnɔ ma, ‘Yà ƃalaa, liide wui ɣa yìɛ?’ Nà ɣɛ ma, ‘Wulu ɣila mɔlɔ ƃɔlɔgi zu.’ É ɣɛ ma, ‘Yà wui wɔlɔi ziɣi è ponɛ ma ga wũ dɔsava.’

⁸Faa ƃawola nui nii gaa lɛ ŋɛni lɔni, ná nu keea nu tɛɛni ná kele‐ɣele fai ma. Ƃɔvɛlaale ŋeteai‐nii‐zu veaitiɛ te ɣele‐ɣelegɛ ta ʋala‐wonɛɛ ŋeteai zu é leve ŋada‐wodoai‐zu veaitiɛ va.”

⁹Ziizɛ ɣɛni tea, “Gè bo wiɛ, a siɛ‐pulu ɣaa ziɛ ƃɔɔ ʋaa ma ŋeteai‐nii‐zu ƃɛtɛ ŋɛniitiɛ zu, kɛɛ ʋaa ma ani kpɛtɛ ŋɛniitiɛ ta ɣale na wo wu, wo ɣɛ ga nuitiɛ ta yee zei te wu vɛ ta yɛ na wɔ.

¹⁰Nui nu ɣa laa la faa wolo zu towaa ɣɛ ga nui nu ɣa laa la faa ƃakpa zu ƃalaa pɛ. Nui wɔgi wɔnɔ nu lɛ laa la faa wolo zu towaa ɣɛ ga nui nu lɛ laa la faa ƃakpa zu ƃalaa pɛ.

¹¹Ani tɔwɔ wa ɣɛ na ga nui nu lɛ laa la ŋeteai‐nii‐zu ƃɛtɛ ŋɛniitiɛ ʋaa zu, ƃɛ ɣa a wo lo kpɛtɛ ŋɛni ƃɔɔƃɔɔgitiɛ maʋaa ƃawola?

¹²Na ɣa wulo na su, ani wa ɣɛ na ga nui nu lɛ laa la ŋɛnii niitiɛ ʋaa zu te ga nu ƃɔnɔ na dɔ, ƃɛ mu ka a wa ƃɔɔ wa dɔ ʋe wo ya?

¹³Tii‐ɣɛɛ nu ɣila na nu keea nu lɛ ɣɛɛ fele ɔ́ zoo ɔ́ ɣɛ tii ɣɛɛzu te wu. Towaa zili ga gila é wõi ga zɔi, ɔɔ é wũ kpado gila maʋaa va ɛ́ lɛ ƃalaa zɔi ʋaa ma. Wɛ lɛ zooga wɔ ɣɛ tii ɣɛɛzu Gala bu wɔ ɣɛ wɔnɔ tii ɣɛɛzu kpɛtɛ ŋɛniitiɛ te maɣaa‐ƃai yee wu.”

¹⁴Favilesiitiɛ te fai nii ɣaazɔ mɛnini te ŋɛɛ wulo sa Ziizɛ zu. Ta ɣa te ɣɛ ga naʋolo‐wõi veaitiɛ.

¹⁵Kɛ̀ Ziizɛ ɣɛni te ma, “Wa ga numai niitiɛ te ƃɔɔ wuloa numaa ɣaazu ga gaama‐ɣɛɛ vea. Tɔwɔ Gala ge wo yii zu wɛ̃ni. Su‐wulo‐zu ɣa ga nii maʋaa lɛi nu ƃuse zaama tɔ ga fai gwala maa yɛ̃ɛlɛi Gala gaazu.

¹⁶Gala na tɔgi vɛɛ kɔlɔi niitiɛ va Gala daa woo‐wo beaitiɛ te te wonɛni Gala kɔlɔi ʋaa va te ɣɛni na é yɛsu Bataize‐ɣɛɛ Jɔ̃ na yɛmini ge ziiti. É ziɣi na ziɛ su ma é loo zai ŋɛ ni ma, Gala na masadai mawoo niinɛ vagɔi ɣa nɔ wosu. Tɔwɔ nu pɛ ka lɛɛzu na ga gaa‐ƃaa vele.

¹⁷Kɛ̀ tɔ ga faa ʋii‐ƃɛɛ ga gee wɔlɔgi ƃɔga zui te maʋaa ƃea ga é leve tɔgi laa woi maƃuo ƃalaa ziɣia va ma.

¹⁸Nui nɛpɛ yá ƃe ŋaza va é ŋaza nu ƃɔnɔ kulo, manui wɛ̃ɛ‐zo tɔgi ŋala‐ŋalaga. Nui wɔgi wɔnɔ yá ŋaza nui wulo pɔɔ nu ƃega ba, manui wɛ̃ɛ‐zo tɔgi ŋala‐ŋalaga.”

¹⁹Ziizɛ ɣɛni tea, “Kpɛtɛ nu ta ɣɛni na ɔ́ maa ɣili ga seɣe ƃoei ta gbaza papa. Ɔ́ kuu ƃakpa ɣaa ga folo nɛpɛ.

²⁰Maa‐wõi nu ta ɣɛni laani ná kpakigi la daa ga Laazɔi. Pala wuai ɣɛ ba.

²¹Laazɔi ɣɛni wõi ɣɛɛzu ga daa‐mii ŋɛnii nii ɔ́ wulo kpɛtɛ nui na teevei ɣa yíɛ loo, nà ɣɛ ga kɔ̃nɔ. Na wuloa su, gilewuitiɛ tɔ va tiɛ ná palaitiɛ ɣaa wɔmɔ.

²²Maa‐wõi nui za sa, Gala ta ɣeelaitiɛ te lii la ga é zei Eeƃɔlɔhɛ̃ɛ woba kui zu te ɣɛni kaazu Gala ta. Kpɛtɛ nui tɔ ƃalaa é zaani te doowu.

²³Kɛ́i ma sa daa‐nɔwɔ‐wo ŋada laavɛ yíɛ laƃa, é wũ bu ziɣini é wɛlɛ Eeƃɔlɔhɛ̃ɛ va woozala Laazɔi kóba.

²⁴É tili bo sa ga woo wala yíɛ ɣɛ tea, ‘Kèea Eeƃɔlɔhɛ̃ɛ, gàazu‐maa‐wõi ɣa è Laazɔi leve é yee ƃeɣa zokpala vile ziɛ ɣa é nɛ̀gi ɣaa lei la, ƃɔvɛlaale gà laƃazu ga ʋikɛ ŋabu‐zogi nii zu.’

²⁵Kɛ̀ Eeƃɔlɔhɛ̃ɛ ɣɛni ma, ‘Dùu, ɣi zɛ su ga è ɣɛi ma ʋulu‐ʋulu kɔwaa è yà ŋɛni vagɔitiɛ maa zɔlɔ woni, Laazɔi wɔ ge mayowũitiɛ maa zɔlɔ wo. Tɔwɔ gáa nɛkpɛgɛ sa vɛ, yà wɔ yìɛ laƃa ga ʋikɛ.

²⁶Na pɛ ka wulo na su, zeɣe ƃakpa levevɛ a de yɔɔzuvɛ, kɛɛ ʋaa ma taitiɛ ta ɣɛ te ziɣi vɛ te va è wɔ vɛ tɛ lɛ zooga. Nu nɛpɛ gɛ lɛ wɔnɔ levega ɔ́ va gé wɔ vɛ.’

²⁷É ɣɛ sa tea, ‘Ka dɔ kɛ mu kèea, è veevɛ. Laazɔi leve kèea na pɛlɛi wu

²⁸ƃɔvɛlaale dèɣea ta na loolu, kɛɛ ʋaa ma é te lɛnɛ te mɛ lɛ va ŋadavɛ vɛ nu ɣa laƃa na.’

²⁹Kɛ̀ Eeƃɔlɔhɛ̃ɛ ɣɛni ma, ‘Mooze ƃɔga Gala daa woo‐wo beaitiɛ te woi wonɛvɛ Gala kɔlɔi zu é te ya. Pagɛ te te woi mɛni.’

³⁰É ɣɛ tea, ‘Ƃa, kèea Eeƃɔlɔhɛ̃ɛ. Ani nu ta ɣa wu ziɣi na saa ya é li te wɔ, ta wulu ɣaa ʋe ta ʋaa yowũi va.’

³¹Nà ɣɛ ma, ‘Ani tɛ lɛ ɣɛ Mooze laa woi mɛnini ta Gala daa woo‐wo beaitiɛ, nu ƃalaa wu ziɣivɛ saa ya tɛ lɛ kɛɛ tɔ laa la.’ ”