Read Loma LUKI 18 Bible Online

LUKI 18 - Loma bible

LUKI 18

¹Ziizɛ sakpe sɔɔni ga é dɛ ga numaitiɛ ga kɛni ta yɛ Gala felizu wɔ te ʋii mɛ lɛ ƃɛ.

²É ɣɛni tea, “Faa‐wo‐bo nu ɣɛni taa ta zu nii ɛ́ lɛ ƃega luo Gala ba ɔ́ nɔ ɣɛ ga wũfe‐ma ɣɛ zéea nu ʋaa ma.

³Tɔwɔ po ŋaza ta ɣɛni tai na zu nii zini gɛ lɛ ŋɛni bɛ́. Po ŋazai nii vɛɛni ga vaa pɔ́ nɔ kelẽi yíɛ ɣɛ ma, ‘Nui nii kpɔɛi gé yɔɔzu gá tɔ, kɛ fai ziɣi mà é yɛ má.’

⁴Faa‐wo‐bo nui sakpeni dɛ ga ta wolo zu wooza. Kɛ̀ é boni ɣigi zu ga ná yee luo vele é ɣɛ tea, ‘Velei ƃalaa gɛ̀ lɛ lua la Gala ba ɔ́ nɔ ɣɛ ga gè wũfe nu ma,

⁵tei tɔwɔ po ŋazai nii ƃoeizu dà, gà fai ziɣizu bá. Na laale tɔ vaazu gwàla ƃɔlɔzu ga páa vele pɔ̀ nɔ kelẽi.’ ”

⁶De maliɣii ɣɛnii tea, “A nii mɛni tele‐bo tuo‐wo tala ʋaa‐wo‐bo nui boni.

⁷?Nà mu ka é ɣɛɛzu, Gala ka ɛ́ lɛ fai ziɣia niitiɛ va é yee ƃakoga te va, na ɣa ga niitiɛ ta ɣɛ wɔlɔzu ma kpidi vɛɛ folo va? ?Towaa fai nii ɣɛɛ ʋai maa nɛkɛ?

⁸Gè bo wiɛ, towaa faa ziɣi te va ga su ʋilea.? Nà pɛ ge ɣɛɛvɛ, ani nu ƃuse lui ɣa vaa na, towaa wɛlɛ zee‐la‐ma va numaa ya zui ɣa?”

⁹Ziizɛ sakpegi nii zɔɔni nui taniga ma niitiɛ te laani ga ƃɔɔ ga ta ga tele‐bo tuo‐wo bea te ɣaazu wudɛ sa zɔitiɛ maazu. É ɣɛni tea,

¹⁰“Nu felegɔ liini Gala‐feli wɔta walai wu Gala felizu. Gila ge ɣɛni ga Favilesi, gilagi ga gɔmɛti naʋolo‐wulo nu.

¹¹Favilesii wu ziɣini é lo yíɛ Gala feli ŋɛ ni ɣigi zu yíɛ ɣɛ tea, ‘Gala, è mama ga tei gɛ̀ lɛ wuloni ga numai zɔitiɛ te ga woia bea, tele‐bo tala vea, wɛ̃ɛ‐ziɛ‐bo bea, ɔɔ velei ƃalaa kani‐kulo nui nii la.

¹²Gà vilida ɣɛ zi su fele dɔwɔ zu. Ŋɛnii nɛpɛ gà sɔlɔ wo gà gaa wɛɛ su puu gè sei‐zu gila fe è ya.’

¹³Kɛ̀ gɔmɛti naʋolo‐wulo nui ɣɛni loni woozala. Ɛ́ lɛ ƃega ɣaazu lɛ ʋɔlɔ ƃalaa gee zu, kɛ̀ é yee vɛɛni yii ma yíɛ ɣɛ tea, ‘Gala, gàazu‐maa‐wõi ɣa, gà ga faa yowũ‐ɣɛɛ nu.’

¹⁴Gè bo wiɛ, nui nii mu ka é liini wɔ pɛlɛ wu maa wuai, kɛ̀ zɔi laale. Ƃɔvɛlaale nui nɛpɛ yá ƃɔɔ ʋaa wɔɔlɔ, manui ɣa yii bu. Nui nɛpɛ ɛ́ lɛ ƃɔɔ ʋaa wɔɔlɔɔ, manui ɣa wɔɔlɔ.”

¹⁵Numaitiɛ te ɣɛni vaazu ga duuyɛ̃ga ƃalaa pɛ ga Ziizɛ yee ʋowũ te va. Tei ná kala dopoitiɛ te wɛlɛni na va, te yii ɣaa wãlani te ma.

¹⁶Kɛ̀ Ziizɛ te lilini ga te li pɔ́ vɛ yíɛ ɣɛ tea, “A ƃe lopaitiɛ va te va wo mɛ lɛ ƃesa te luo. Ƃɔvɛlaale te ɣavelei ɣa Gala na masadai te ʋaa ma.

¹⁷Gè bo wiɛ ga gaama, nui nɛpɛ ɛ́ lɛ yee zeiya Gala na masadai wu ga velei lopo wolo ɣa kɛɛ la, manui lɛ wɔlɔ‐wɔlɔ lɛɛ na.”

¹⁸Maazu‐ʋaa‐wo‐bo nu ta Ziizɛ ɣaa zaɣa kɛɛni é ɣɛ ma, “Kala‐mɔɔ vagɔi, zɛƃɛ ɣa gà kɛ gè zɛʋui nii zɔlɔ wo kwɛ̃ɛ gɛ lɛ ba?”

¹⁹Ziizɛ ɣɛ ma, “Zɛƃɛi é kɛɛ yìɛ tìli ga nu vagɔ? Nu ta nɛpɛ gɛ lɛ ga nu vagɔ é wulo Gala tɔ ɣilekpu pulu.

²⁰È Gala na tɔgitiɛ wɛ̃ni. Natiɛ ta ga: Yài è ga ŋaza keea nu ɔɔ yài è ga zini‐bɛ nu, mɛ lɛ wɛ̃ɛ zo. Mɛ lɛ nu vaa. Mɛ lɛ wũmɔ wo. Mɛ lɛ zɛɛ ʋaa zeele woo ʋe. Wũfe è ɣeea ma ta è lee.”

²¹Zunui ƃɔɔ ɣɛ Ziizɛ ma, “Gà nii ɣaazɔ ɣɛɛzu é ziɣi ƃɔɔ nà lopo wolo ʋolo ma.”

²²Tei Ziizɛ nii mɛnini, é ɣɛni ma, “Faa ɣila ka ɛ̀ lɛ dɛ kɛɛni. Ŋɛnii ɣaazɔ é è ya te zɔ̃wɔ wulo è mazɔ̃wɔi ɣaa wɛɛ maa‐wõi vea vɛ è weli ka ɣɛ Gala ta. Yà na ɣɛɛ na, è va sa è vile pùlu.”

²³Kɛ̀ tei é nii mɛnini maa wõini, toku ge zei ga kpɛtɛi ɣɛ ga tamaa.

²⁴Ziizɛ wɛlɛni sa ba é ɣɛ tea, “Niitiɛ te ƃɛtɛi tɔ ga fai kpaanagɛi ga te lɛ Gala na masadai zu!

²⁵Ƃɔvɛlaale tɔ ga faa ʋii‐ƃɛɛ suo ƃakpai nii ʋaa ma daa ga “keeamɔ” ga é leve siɣile wũ su é leve kpɛtɛ nu lɛɛ ʋaa va Gala na masadai zu.”

²⁶Taitiɛ te mɛnini te ɣɛni tea, “Ƃɛi mu ka a wulo su?”

²⁷Kɛ̀ Ziizɛ ɣɛni te ma, “Fai nii pele lɛ na ɔ́ zolowo nu ƃuse ya tɔ ga solowo faa Gala zeea.”

²⁸Pite zɛba sa é ɣɛ Ziizɛ ma, “Wɛlɛ! Gé ƃega gá vɛlɛitiɛ va gé vile è wulu.”

²⁹Ziizɛ ɣɛ te ma, “Gè bo wiɛ ga gaama, nu nɛpɛ gɛ lɛ ƃega ná pɛlɛ va ɔɔ ŋazai ɔɔ deɣei ƃɔga diɛ ɔɔ kaa veaitiɛ ɔɔ dea Gala na masadai mazaƃu ma,

³⁰manui ɔ́ ƃe tamaa maa zɔlɔ wosu siɛgi nii zu. Na ɣa ɣɛɛ na siɛgi é vaazu vaazu manui zɛʋui nii zɔlɔ wo kwɛ̃ɛ gɛ lɛ ba.”

³¹Tei Ziizɛ wuloni ga kala dopo puugɔ kai felegɔitiɛ numai zɔitiɛ zaama, é ɣɛni te ma, “A wɛlɛ! A da liizu Yɛlusulɛɛ. Na ɣa ɣɛɛ na fai nɛpɛgi ponɛi Gala daa woo‐wo beaitiɛ vɛ Gala kɔlɔi zu é vile nu ƃuse lui va ta leve ma.

³²Toku ge zei ga ta vaazu zée laazu zii ƃalaagitiɛ ya. Na ɣa ɣɛɛ na ta ŋɛɛ wulo su te gaazu‐ƃaala‐ƃaala tuo wo da tiɛ laa yiɛ wu má.

³³Ta dowa te paa. Tɔwɔ folo felegɔ ɣa leve na sava kelei, towaa wu ziɣi.”

³⁴Kɛ̀ kala dopoitiɛ tɛ lɛ fai nii ta nɛpɛ gaa ɣaani. Fai nii loowugɛi ɣɛ te va. Tɛ lɛ su‐wulo‐zu ɣaa ɣaani.

³⁵Tei Ziizɛ ɣɛni lɔtɔsu Jɛlikoo lai va, gaazu‐wuu nu ta ɣɛni zeini pelei woba yíɛ feli wo.

³⁶Tei é kpɔgi woo mɛnini tiɛ leve ba, é gaa‐zaɣa‐kɛɛ woni ga te su‐wulo‐zuvɛ lɛɛ la.

³⁷Te bo ma te ɣɛ ma, “Nazɔi Yiizɛ ɣa levesu.”

³⁸Yíɛ sa bo ga doba yíɛ ɣɛ tea, “Deeve dui Ziizɛ, gàazu‐maa‐wõi ɣa!”

³⁹Niitiɛ te ɣɛni ná luo te goi leveni gá tiɛ bo ma ga é na ɣɛ ƃu. Kɛ̀ é lobani é leve minɛ va yíɛ ɣɛ tea, “Deeve dui, gàazu‐maa‐wõi ɣa!”

⁴⁰Ziizɛ lo sa é bo ga te vaa la pɔ́ vɛ. Tei é lɔtɔni Ziizɛ va, nà gaa zaɣa kɛɛni é ɣɛ ma,

⁴¹“Zɛƃɛ ɣa è wõini gè kɛ yìɛ?” É ɣɛ ma, “Màliɣii, kɛ gè wɛlɛ wɔnɔ.”

⁴²Ziizɛ ɣɛ ma, ‘Ƃe ba è ɣaazuvɛ ziɣi ma. Yà yee‐la‐mai ɣa é è valoa.”

⁴³Gaazuvɛ ziɣi sa ma ga maa ʋilea. É vile Ziizɛ wulu yíɛ Gala daa maa lɛ. Tei nui ɣaazɔ ná vɛtɛni, te Gala daa maa lɛɛni.