Read Loma LUKI 20 Bible Online

LUKI 20 - Loma bible

LUKI 20

¹É ɣɛni ga folo ɣila Ziizɛ yiɛ numaitiɛ ɣala bo Gala‐feli wɔta walai wu yíɛ woo niinɛ vagɔi wo. Laa‐ʋaale gwalaitiɛ ƃɔga tɔ‐dɛɛ ɣala‐mɔitiɛ é vɛɛ zuu wũgitiɛ va te vaani

²te ɣɛ ma, “Gaa‐ƃai è fai niitiɛ ɣɛɛzu la bo gé ma ɔɔ ƃɛ ɣa é gaa‐ƃai nii ʋeeni è ya?”

³Ziizɛ te woi ɣaa woteni é ɣɛ te ma, “Nà ƃalaa gà wo ɣaa zaɣa kɛɛzu. A fai nii wo mà.

⁴?Jɔ̃ na bataizei maʋaa wuloni Gala ta ƃaa é wuloni nu ƃuse ya?”

⁵Te ɣɛni sa su wulozu ɣii ma tiɛ ɣɛ tea, “Ani a da bo na ga maʋai wulovɛ Gala ta, towaa ɣɛ tea, ‘Zɛƃɛi é kɛ wɛ lɛ máʋai ziɣini ga gaama?’

⁶Tɔwɔ a da bo na ga maʋai wulovɛ nu ƃuse ya, numaitiɛ ɣaazɔ ta de zɔɔ ga kwɔti. Ƃɔvɛlaale te laavɛ la ga Jɔ̃ ɣɛni ga Gala daa woo‐wo nu.”

⁷Na ma te Ziizɛ woi ɣaa woteni ga vɛ maʋai wuloni na tɛ lɛ ná wɛ̃ni.

⁸Ziizɛ wɔ ge ɣɛ te ma, “Nà ƃalaa gaa‐ƃai gè fai niitiɛ ɣɛɛzu la gɛ̀ lɛ daa woga wo ma.”

⁹Ziizɛ vɛɛni sa ga sakpegi nii zɔɔ numaitiɛ ma. É ɣɛni tea, “Zunu ta ŋasa ƃala daa leveni é fe numaa ya ga tiɛ mayiiti wulo. É zɛba sa é li zuu ta ƃɔnɔ su ga é lebi na.

¹⁰Tei siɛgi ziitini, é tii‐ɣɛɛ nu leveni yiiti‐wulo veaitiɛ wɔ vɛ ga te ŋasai mavai ta ʋe zéea. Kɛ̀ yiiti‐wulo veaitiɛ te dowani te teve ga zeea yãka.

¹¹Zunui zɛba é tii‐ɣɛɛ nui ta ƃɔnɔ teve. Te na lowa te luo la ga ƃaa‐wulo vele ma te zɛba te teve ga zeea yãka.

¹²É tii‐ɣɛɛ nui sava kelei leve. Nà na dɛi te ŋada zeini ba te kulo na te pili.

¹³Ŋasa ƃala keea nui ɣɛni sa tea, ‘Zɛƃɛ ɣa gà kɛ? Gà ẁõila lui levesu. Ɣee ta ta wũfe na ma.’

¹⁴Kɛ̀ tei yiiti‐wulo veaitiɛ te dui vɛtɛni, te ɣɛni ɣii ma, “Po ŋɛni keea nu ɣa é vaazu ɣɛɛzu do. A de paa kɛɛ ʋaa ma kwéligi ɣɛ ga de wo.’

¹⁵Te kuloni sa ŋasa ƃalagi va te paa.” Ziizɛ ɣɛni tea, “Zɛƃɛ ɣa sa ŋasa ƃala keea nui ɣa kɛ ga tiɛ?

¹⁶Towaa va é yiiti‐wulo veaitiɛ zu ŋala‐ŋala é ŋasa ƃalagi leve ta ƃalaaga wɔ.” Tei numaitiɛ te nii mɛnini, te ɣɛni Ziizɛ ma, “Gala ge nà yowũ ʋoolo!”

¹⁷Kɛ̀ é wɛlɛni te va é ɣɛ tea, “Zɛƃɛ mu ka sa ga nii ponɛi Gala kɔlɔi zu? Na ɣa ga ‘Kwɔti ƃɔɔƃɔɔgi nɔ pɛlɛ‐lo veaitiɛ te ɣɛlɛɛ ba, towa é ɣɛɛ ga kwɔtii maʋaa wɔɔlɔɔ baa pɛ ba.’

¹⁸Tɔwɔ nui yá loo kwɔtii nii ma manui ɣa ɣale su kpulu‐kpulu. Kɛ̀ ani a loo na nu nɛpɛ ma, towaa kpɔlɔ‐wɔnɔ.”

¹⁹Tɔ‐dɛɛ ɣala‐mɔitiɛ ƃɔga laa‐ʋaale gwalaitiɛ te ɣaa ƃaani ga te yee vɛɛ Ziizɛ ma nà maziɛ kpɔɔƃɔɔgi nɔ zu, ƃɔvɛlaale te gaa ɣaani ga é sakpegi zɔɔ ga te la. Kɛ̀ te ɣɛni luozu numaitiɛ va.

²⁰Na ma te ɣɛni sa maa ʋɛɛnɛsu. Te maa‐ʋɛɛnɛ bea leveni, niitiɛ te ƃɔɔ wuloni ga faitiɛ te te wosu ta ga ƃɔɔƃɔɔ‐su ʋaa, kɛɛ ʋaa ma faitiɛ Ziizɛ ɣa te wo te te ziɣi. Na wɔ ka ɣɛɛ na sa te zee la gɔmɛti nu walai nii ya gaa‐ƃai zéea ga é wɛlɛ maʋai zu va.

²¹Maa‐ʋɛɛnɛ‐bo beaitiɛ te Ziizɛ ɣaa zaɣa kɛɛni te ɣɛ ma, “Kala‐mɔi, gé kwɛ̃ni ga yà ƃɔɛ ga gaama vele yìɛ kala‐bo bo ga gaama vele. Na ɣa ɣɛɛ na ɛ̀ lɛ nu zu yɛvɛga. Yà kɔnɔ Gala na pelei maʋaa lɛɛzu ga ƃɔɔƃɔɔ su.

²²?Tɔ pele ma Gala gaazu ga gíɛ wũ‐fɔɔnɛ‐ʋee ʋe ɣalaso gwalai Siiza ya, ƃaa gé mɛ lɛ kɛ?”

²³Kɛ̀ Ziizɛ ta gbana luoi ɣaa ɣaani é ɣɛ te ma,

²⁴“A naʋoloi ta lɛ gàazu. Ƃɛɛ maa‐niini ka é ma? Ƃɛ ɣa wɔnɔ ná daa‐zeigi ma?” Te ɣɛ ma, “Siiza ve.”

²⁵É ɣɛ te ma, “Ka dɔɔ mu nii é ga Siiza na dɔ a nà ʋe Siiza ya. Nii é ga Gala na dɔ wo nà ʋe Gala zeea.”

²⁶Tɛ lɛ sa zooni tɔ so goo ma numaitiɛ ɣaazu. Kɛ̀ ná gaa‐wotegi wala wuloni ga tiɛ te na ɣɛ ƃu.

²⁷Sadusiitiɛ te taniga te vaani Ziizɛ wɔ. Sadusiitiɛ wɔ ka ta bo ga nu lɛ wu ziɣia saa ya.

²⁸Te Ziizɛ ɣaa zaɣa kɛɛni te ɣɛ ma, “Kala‐mɔi, Mooze kɔlɔ wonɛni gé ʋaa ma ga ani nu diɛ ɣa zaa na tɔwɔ ŋaza zéea duu lɛ te ya, kɛni yá ŋazai ziɣi é diɛ wuu‐zu luu ɣa.

²⁹Tɔwɔ zinaa lea lɔfela te ɣɛni na. Te liɛ zɛba é ŋaza wulo, tɔwɔ é za ɛ́ lɛ duu ɣaani.

³⁰Pulu‐lete‐ma leɣei ŋaza nui zeini ta tɔ tɛ lɛ duu ɣaani é yɛsu é za.

³¹Na wɔ pulu‐lete‐ma leɣei seini wɔnɔ ga ŋaza, faa zii ɣilagi nɔ ɣɛɛ la. Vele wɔ nɔ na é ɣɛɛni la ga zinaa lea lɔfelaitiɛ ɣaazɔ. Te zaani te ta lɛ duu yɛni wulu.

³²Tei sa na wuloni ba, ŋaza nui tɔ ƃalaa é zaani.”

³³Te ɣɛ Ziizɛ ma, “Na ma towaa ɣɛ na sa ga bu‐ziɣi‐wo foloi saa ya, ƃɛ ɣa sa ŋaza ɣa ɣɛ ga ŋaza nui? Toku ge zei ga te nu lɔfela pɛ te seini ga ŋaza.”

³⁴Ziizɛ ɣɛ te ma, “Ŋeteai‐nii‐zu numaitiɛ ta ŋaza wulozu maŋazaitiɛ tiɛ zei zini bɛ.

³⁵Kɛ̀ taitiɛ te ziɣiai ga numaitiɛ kulo‐ɣɛɛ wogɛi te vɛ ga ŋeteai nii é vaazu vaazu te ná maa zɔlɔ wo, na ɣa ɣɛɛ na te bu‐ziɣi‐saa‐ya ʋai ɣalama maa zɔlɔ wo, ta ɣɛ ga numaitiɛ tɛ lɛ ŋaza wuloa ɔ́ nɔ ɣɛ ga te maŋazaa te zei zini bɛ.

³⁶Toku ge zei ga tɛ lɛ sa wɔlɔ‐wɔlɔ zaa, ƃɔvɛlaale ta ɣɛ ga Gala ta ɣeelaitiɛ ɣavele. Na ɣa ɣɛɛ na ta ɣɛ ga Gala dea, tei tɔwɔ ta wu ziɣi sa saa ya.

³⁷Tɔwɔ Mooze ƃalaa dɛɛni woi na zu é ponɛni Gala kɔlɔi zu pilegɛi fitegi va ga saa vea ta wu ziɣi saa ya. Na ɣa ga vɛ é de maliɣii Gala daa lilisu na ná kɔlɔi zu ga Galagi nii é ga Eeƃɔlɔhɛ̃ɛ na Galagi, é ga Aize na Galagi, é ga Yeekɔ na Galagi.

³⁸Ɛ́ lɛ ga saa vea ta Ɣala. Kɛ̀ ʋulu‐su vea ta Ɣala be. Toku ge zei ga towa ʋululai nu pɛ zéea saƃu zu.”

³⁹Tɔ‐dɛɛ ɣala‐mɔitiɛ te taniga te goi ɣaa woteni te ɣɛ ma, “Kala‐mɔi, è ƃɔɛvɛ ga pagɔ.”

⁴⁰É ɣɛni sa ga te mɛni‐masa‐kɛ̃ɛ ʋaa ga te gaa‐zaɣa‐kɛɛ nɛpɛ pili ma.

⁴¹Ziizɛ ɣɛni te ma, “Tɔ ɣɛ le te bosu ga nui Gala zee ƃakogɛi ba ga masa tɔ ga Deeve duu, na ɣa ga Kolai?

⁴²Su‐wulo‐zu ɣa ga Deeve boni kɔlɔi nii zu é Gala kɔlɔi ʋaa va daa ga Gala daa‐maa‐lɛɛ wuitiɛ yíɛ ɣɛ tea, ‘Gala ge ɣɛni màliɣii ma, Zei ga zèe za‐su vele

⁴³é yɛsu gè è wɔɔ yɔ̃wɔitiɛ ɣɛ ga è wɔwɔ‐ma ƃɔkpɔ.’

⁴⁴Tei tɔwɔ Deeve Kolai lilisu ŋɛ na ga máliɣi, towaa leve ɣɛ le é ɣɛ ga Deeve ƃɔɔ duu?”

⁴⁵Nui pɛ ge ɣɛni mɛnisu Ziizɛ ɣɛ ná kala dopoitiɛ ma,

⁴⁶“A ƃɔɔ maazu vɛtɛ ga tɔ‐dɛɛ ɣala‐mɔitiɛ. Ta ɣa te wõini ga yogbo sɔkpɔ te ma tiɛ leve da. Na ɣa ɣɛɛ na te wõini ƃaa‐la‐ma laali‐ma yiɛ wo ga tiɛ dɔwɔ ƃalagitiɛ ɣa. Te wõivɛ kɔnɔ ga sei‐wo‐suvɛ vɛtiɛ ná vapagɛi é leve baa pɛ ba Gala‐feli wɔtaitiɛ wu é vɛɛ vɛtiɛ va ná ga ƃaa‐la‐ma zei‐wo‐suvɛ kuu‐ɣaa‐zuvɛtiɛ ʋaa va.

⁴⁷Po ŋazaitiɛ zini gɛ lɛ te vɛ, ta ɣa te natiɛ ta vɛlɛitiɛ ƃolosu te ya. Na ɣa ɣɛɛ na ta ƃɔɔ wulo sa ga nui mazii tɛ lɛ le ga Gala‐feliai ga su wooza. Fai é vaazu yɛsu te ma gwala ɣa ƃakpa.”