Read Loma LUKI 21 Bible Online

LUKI 21 - Loma bible

LUKI 21

¹Ziizɛ wũ bu ziɣini é wɛlɛ kpɛtɛ veaitiɛ va tiɛ ta ʋaa‐nɛɛ‐ɣɛɛ ŋɛniitiɛ wu naʋolo‐wuu‐zuvɛ Gala‐feli wɔta walai ʋaa va.

²Tɔwɔ é wɛlɛni wɔnɔ po ŋazai nii va mɔɔlɛi ɣɛ zini gɛ lɛ ŋɛni bɛ́. É kapa felegɔ loo su.

³Ziizɛ ɣɛni sa tea, “Gè bo wiɛ ga gaama, ŋaza nui nii mɔɔlɛi ŋɛni loovɛ bɛ́ ná é leve nui pɛ ba.

⁴Toku ge zei ga te pɛ te kulovɛ te weli tama‐tamagitiɛ zu. Kɛ̀ ná dɛi nii nɛpɛ é yɛga zéea ná ŋeteai‐ɣɛɛ ʋaa ma é ga ná mɔɔlɛ ŋɛni towa é toa su.”

⁵Nui taniga te ɣɛni faa wosu é vile Gala‐feli wɔta walai va ga velei maʋaa maa ɣeleai ɣɛ la, na ɣa ga velei to kwɔti vapagitiɛ te ɣɛni la ta faa‐nɛɛ‐ɣɛɛ zɔɔlaitiɛ te te ʋeeni Gala faa ma. Ziizɛ ɣɛni sa tea,

⁶“Ŋɛnii niitiɛ wo te vɛtɛsu ta dɛi, siɛgi ɣa vaazu ziitizu ga kwɔtii ta nɛpɛ gɛ lɛ yɛga laani bɔɔ maazu tɔ ƃe kulozu maazu tɔ too.”

⁷Te gaa zaɣa kɛɛni sa te ɣɛ ma, “Kala‐mɔi, siɛ sɛƃɛ ɣa nii ɣa ɣɛɛ la? Na ɣa ɣɛɛ na faa zɛƃɛ ɣa yá ɣɛ é dɛ ga seele ga fai nii ɣa sa vaazu ɣɛɛzu?”

⁸Ziizɛ ɣɛ te ma, “A wɛlɛ wũ maazu va te mɛ lɛ va wo ziɣizu pele va. Toku ge zei ga nu lamaa ɣa va nà daa‐zeigi zu tiɛ ɣɛ tea, ‘Nà vee de!’ Tiɛ wɔnɔ ɣɛ tea, ‘Siɛgi ziitia!’ A mɛ lɛ vile te wulu.

⁹Wa ɣɛ na kɔɔ maazu woo mɛnisu ta kpɔɛ‐loo ʋaa zuu vea yɔɔzu, wo zu mɛ lɛ wu wo va. Toku ge zei ga kɛni dɛ niitiɛ ta ɣɛ. Tɔwɔ ŋeteai maʋaa lɛ wɛ̃ɛga nɔ dɛ ga maa ʋilea.”

¹⁰Ziizɛ zɛba sa é ɣɛ te ma, “Zuu ɣa wu ziɣi é vɛɛ bɔɔ yuu va ga kɔɔ, ɣalaso zuu yìɛ vɛɛ bɔɔ ɣalaso zuu va ga kɔɔ.

¹¹Zui wala ɣa ɣɛ ƃelizu yíɛ wu su, pulu yiɛ loo, siɛ‐ziɛ seeƃɛ yiɛ va. Fai niitiɛ ta ɣɛ nɔ wulu. Ta ɣɛ nɔ zɔ ŋada laavɛ te ɣɛ na wulu ŋada laavɛ. Na ɣa wulo na ba, duo ʋaa ƃakpa ƃɔga po‐kɔ̃ɔ kpakpa ta wulo gee wɔlɔgi ma.

¹²Kɛ̀ niitiɛ tɔ vɛɛ ɣɛɛzu, ta yee vɛɛ wo ma te wo ƃɔɔla tiɛ wo yee la Gala‐feli wɔta wu veaitiɛ ya tiɛ wo vili kpidi vɛlɛ wu. Na ɣa ɣɛɛ na ta va ga wiɛ ɣalasoga laa wu ta gɔmɛti vea nà daa‐zeigi mazaƃu ma.

¹³Nii ɣa ɣɛ ga siɛgi wo ʋaa ma ga wo seele woo ʋe.

¹⁴Na ma a kpɛtɛ ɣigi zu wo mɛ lɛ ɣi gaa ziɛ ma ga wo ná yɛ ná luo wo woo zu wulo.

¹⁵Ƃɔvɛlaale gà vaazu wo ɣɛɛzu ga nui daa ɣa ʋa gè kele‐ɣele fe wo ya ga wo lo‐da veaitiɛ te ta nɛpɛ gɛ lɛ ɣɛɛ na zobo gɔ ɣɛ bɛ́ ga é lo wo la ɔɔ é wo woo wulo ga.

¹⁶Wo ɣaa veaitiɛ ƃalaa vɛɛ wo liɛni ba ta wo leɣeni é vɛɛ wo ɣaa yɔ̃wɔa va ta wa ziɛ‐pulua ta wo yee la numaa ya. Na ɣa ɣɛɛ na ta wo taniga vaa.

¹⁷Nu pɛ ka zili ga wiɛ nà daa‐zeigi mazaƃu ma.

¹⁸Kɛ̀ wo wũ deɣai ɣila kpalaa lɛ ŋala‐ŋalaga.

¹⁹Wo yii‐lɔɔ vele ma faa ɣa, wa yɛʋui maa zɔlɔ wo.”

²⁰Ziizɛ ɣɛni tea, “Wa wɛlɛ na Yɛlusulɛɛ va maa ɣaligɛi ga sɔdasia, a kwɛ̃ɛ ga ŋada‐zu‐ŋala‐ŋala fai maa ƃua.

²¹Na wo ka ɣɛɛ na, pagɛ taitiɛ te Yudiiya yui zu te vela te li gizi gwalaitiɛ ma. Niitiɛ wɔgi ta ɣɛ Yɛlusulɛɛ lai zu, pagɛ te wulo ba. Na ɣa ɣɛɛ na niitiɛ tɛ lɛ ɣɛɛ taa zu te dɔƃɔ zu, kɛni ta ɣɛ ga nu ta te mɛ lɛ sa li wulu tai zu.

²²Ƃɔvɛlaale na maziɛgi ɣa a ɣɛ ga Gala na faa woto‐kulo ziɛgi, kɛɛ ʋaa ma faitiɛ ɣaazɔ te wonɛi Gala kɔlɔi zu te leve ma.

²³Edei! Ko ŋazaa vɛɛ duu deea va te maa wõi siɛgi na zu! Faa ƃoei ƃakpa wala ɣa ɣɛ zui ɣa. Na ɣa ɣɛɛ na Gala na zii‐ɣaa‐wãla ƃakpai ɣɛ numai niitiɛ maazu.

²⁴Boa zɔkpɔ ɣa te wu bu. Na ɣa ɣɛɛ na ta te zo kɔɔ zu te te ɣɛ ga dua zii pɛ saama. Zii ƃalaagitiɛ ta Yɛlusulɛɛ wolo te ziɛ maazu é yɛsu zii ƃalaagitiɛ ƃɔɔ ta dɔ wui ƃea.”

²⁵Ziizɛ ɣɛni tea, “Po‐kɔ̃ɔga ta ɣɛ foloi ma ta ɣalogi é vɛɛ sɔmɔ dekaitiɛ va, niitiɛ ta dɛ ga faa ɣa vaazu ɣɛɛzu. Yá ɣɛ na ga zui ma vele, daa‐nɔwɔ‐wo kpakpa ɣa ziiti ziitiɛ ma te ɣɛɛ vele ma pɔ̃ɔ yuwu zulu tigi vɛ ta yuwu maɣiligi.

²⁶Numaa ta vata ga duo é vɛɛ fai nii va te ɣi ka ɣɛ ba ga tɔ vaazu laazu zui ma, ƃɔvɛlaale gee‐zuvɛ ɣaa‐ƃaitiɛ ta ƃeli.

²⁷Na ɣa ɣɛɛ na ta sa ta wɛlɛ nu ƃuse lui va é tine ƃiligi ma yíɛ va gaa‐ƃaa ƃakpa zéea ta ƃɔɔlɔla.

²⁸Tɔwɔ fai niitiɛ ta vɛɛ na sa ga levea ma, a wũ bu ziɣi wo wɛlɛ wũ maazu va, ƃɔvɛlaale wo wũ‐maa‐wo fai zu ɣa ɣɛ sa ƃuozu.”

²⁹Ziizɛ sakpe sɔɔni te ma yíɛ ɣɛ tea, “A wɛlɛ gɔɔva wului va ta gului zɔitiɛ ɣaazɔ.

³⁰Ta ɣɛ na ƃɔɔ nɔ lɛnisu, wa ƃɔɔ wa wɛlɛ te va wo kwɛ̃ɛ ga tine yiɛ ɣa sa vaazu.

³¹Vele nɔ na ƃalaa é la ga fai niitiɛ. Wa wɛlɛ na te va tiɛ leve ma, wa kwɛ̃ɛ ga Gala na masadai maa ƃuovɛ sa.

³²Gè bo wiɛ ga gaama, zei‐zaa nu ƃusei woo lɛ ƃeazu su fai niitiɛ ɣaazɔ te leve ma.

³³Gee wɔlɔgi ƃɔga zui te maʋaa ɣa ƃea ga, kɛ̀ gòitiɛ laa‐zu ɣa ga daa‐zu.”

³⁴Ziizɛ ɣɛni tea, “A ƃɔɔ wũ maazu vɛtɛ wo mɛ lɛ va yii laa ʋesu ga gaa‐vala‐ba yii‐ma‐ɣɛɛ ʋaa ta dɔɔ‐ƃakpa‐ƃoalea é vɛɛ ŋeteai nii zu ʋai mayii‐zɛlɛ seiya va ma wɔ yɛ su kui ɔ́ wulo ga wiɛ kpuse.

³⁵Ƃɔvɛlaale siɛgi nii ɣa ziiti nui ɣaazɔ va é zui wɔlɔ‐kɔlɔ ma ɣaali è ɣɛ nu ɣa vili bɛli zu.

³⁶Kɛ̀ a ƃɔɔ maazu vɛtɛ ga ɣee nɛpɛ wiɛ Gala feli ga wo zu ƃaa wo wulo fai niitiɛ zu te vaazu ɣɛɛzu. Na ɣa ɣɛɛ na wo lo nu ƃuse lui laa wu.”

³⁷Ziizɛ ɣɛni sa kala‐bo bosu ga gela‐bo pele ɣile‐gile Gala‐feli wɔta walai wu. Kɛ̀ kpidi ɔ́ vɛɛ na, ɔ́ li yíɛ ŋii kpaƃa zu é gizigi na ma daa ga Alevɛ.

³⁸Ɔ́ ɣɛ na ga subu‐zubu numaitiɛ ɣaazɔ tɔ va pɔ́ Gala‐feli wɔta walai wu ga te goi mɛni.