Read Loma LUKI 7 Bible Online

LUKI 7 - Loma bible

LUKI 7

¹Tei sa Ziizɛ woloni ga ná faitiɛ ɣaazɔ wo numaitiɛ ma, é liini Kapɔɔnia.

²Tɔwɔ sɔdasi wũ‐gila maazu nu ɣɛni na duo zéea, duoi ƃɔɔ maƃɛdɛ wɔɔlɔi má. Duoi nii ɣɛni zeeƃɛzu é sa saa yeɣe la.

³Tei é Ziizɛ maa woo mɛnini, é Dusiitiɛ ta yuu wũgi taniga leveni pɔ́ vɛ ga te maa nɛɛnɛ é va é ná tii‐ɣɛɛ nui valo.

⁴Tei te vaani Ziizɛ wɔ vɛ, te maa nɛɛnɛni ƃɔɔ ga zɔƃɛlɛ tiɛ ɣɛ ma, “Kulovɛ bu bɛ́ ga è nii ɣɛ bɛ́.

⁵Toku ge zei ga é da yui wõini. Na ɣa ɣɛɛ na towa é gá Ɣala‐feli wɔtai loni gé vɛ.”

⁶Ziizɛ vɛɛni sa te va ta tiɛni te li. Tei sa maa ƃuai ɣɛ pɛlɛi va, sɔdasi wũ‐gila maazu nui é ná wɛ̃ɛ vagɔitiɛ leveni pɔ́ vɛ ga te ɣɛ ma, “Sɔdasii ɣɛ è ma, ‘Kèea, mɛ lɛ ƃɔɔ ɣaa mɔɔlɛ. Toku ge zei ga gɛ̀ lɛ kuloni bu ga è lɔ nà pɛlɛi wu.

⁷Na ɣa é kɛɛni gɛ̀ lɛ ƃɔɔ ziɣini ga nui tɔ ƃɔɔ yá va è wɔ vɛ. Kɛ̀ woi wo nɔ è ƃe ba nà tii‐ɣɛɛ nui valo.

⁸Ƃɔvɛlaale gà ga nu ta gè gaa‐ƃaa yee wu, sɔdasia te bù. Gà ɣɛ na te ta ma, ‘Li,’ towaa li. Gà ɣɛ ta ma, ‘Va,’ é va. Gà ɣɛ na kɔnɔ nà duoi ma, ‘Nii ɣɛ,’ é kɛ.”

⁹Tei Ziizɛ nii mɛnini, gwala wuloni la. É lite sa, kpɔ gwalai é vileni púlu é ɣɛ te ma, “Gè bo wiɛ, gɛ̀ dɛ wɛlɛni nii ɣavele yee‐la‐mai va nu ya Yezɔitiɛ ƃalaa zu.”

¹⁰Numaitiɛ te te leveni pɔ́ vɛ, tei te liini wulu, te wɛlɛni duoi va dɔtɔ zu wodoai sa.

¹¹Tei na wuloni ba su lɛ woozani Ziizɛ yíɛ li tai ta zu daa ga Nẽi. Ta ná kala dopoitiɛ ɣa te ɣɛni liizu é vɛɛ sa kpɔ gwala va.

¹²Tei é ɣɛni lɔtɔsu taa ziɣigi laavɛ va, zunu ta ɣɛni tai zu sai te siɣi tiɛ wulo la na va. Tɔ ɣilekpu nɔ ɣa é ɣɛni dee ya ga duu. Tɔwɔ dee ɣɛni ga po ŋazai nii zini gɛ lɛ ŋɛni bɛ́. Taa veaitiɛ te maƃɔ gwala ɣɛni ba ta tiɛni tiɛ va.

¹³Tei de maliɣii wɛlɛni ba, gaazu‐maa‐wõi soni é ɣɛ ma, “Mɛ lɛ wɔlɔ.”

¹⁴É va sa é ʋowũ ƃaala‐ƃaalagi va pomai ɣɛni laani gá. Taitiɛ te ɣɛ liizu la te lo kpɛ. É ɣɛ tea, “Zùnu, gè ɣɛ è ma, wu ziɣi.”

¹⁵Saa nui wu ziɣi sa é zei é vɛɛ ga yɛpɛɛ. Ziizɛ teve dee wɔ.

¹⁶Duo vilini te pɛ te ma tiɛ Gala daa maa lɛ tiɛ ɣɛ tea, “Gala daa woo‐wo nu ƃakpa wu ziɣia de zaama!” Tiɛ ɣɛ wɔnɔ tea, “Gala ge vaa ná numaitiɛ vɛ!”

¹⁷Tɔwɔ Ziizɛ ɣɛɛ ʋai nii mawoi ziɛni Yudiiya yui wɔlɔ‐kɔlɔ ma ɣaazɔ é vɛɛ ná woba ligi zu va.

¹⁸Bataize‐ɣɛɛ Jɔ̃ ná kala dopoitiɛ te fai niitiɛ ɣaazɔ zu wuloni ma.

¹⁹É ná kala dopoi felegɔ leveni sa de maliɣii Ziizɛ wɔ vɛ é ɣɛ te ma, “A bo ma ga Jɔ̃ ɣɛ,‘? Yà ɣa è ga nui é vaazu vaazu, ƃaa gé ɣaazu kɛ nu ƃɔnɔ tuo?’ ”

²⁰Tei numaitiɛ te vaani, te ɣɛni Ziizɛ ma, “Bataize‐ɣɛɛ Jɔ̃ ɣa é gé levega è wɔ vɛ é ɣɛ tea, ‘A gaa zaɣa kɛ wo ɣɛ ma,? Yà ɣa è ga nui é vaazu vaazu, ƃaa gé ɣaazu kɛ nu ƃɔnɔ tuo?’ ”

²¹Na maziɛ daa yɔɔzu Ziizɛ seeƃɛ lamaa valoni yíɛ taƃa ziɣi numaa va yíɛ gɔʋɛ yowũ lamaa ƃɛ numaa wulu. Na ɣa ɣɛɛ na nu lamaa ɣɛni na te ɣaazu wuai é te ɣaazu ƃɛtɛni ga kavele.

²²Ziizɛ te woi ɣaa woteni é ɣɛ te ma, “Nii wo pɛtɛga ta nii wo mɛniga, a li wo te wo Jɔ̃ ma. Gaazu wele vea ɣaazu ɣa ziɣizu ma, mɛlɛ‐ŋɛlɛ bea tiɛ ziɛ, gee yìɛ ƃea gee kɛɛ vea ma te maa yìɛ ziɣi, gui ʋoole vea tiɛ faa mɛni. Na ɣa ɣɛɛ na saa vea wu ziɣivɛ saa ya, woo niinɛ vagɔi yìɛ wo maa‐wõi vea ma.

²³Tuuyiɛ ɣa nui nii ma màʋai lɛ ɣɛɛ ga wãla‐ma ʋaa.”

²⁴Tei sa Jɔ̃ na keelaitiɛ te liini, Ziizɛ vɛɛni ga ƃɔɛ kpɔgitiɛ wɔ é vile Jɔ̃ ƃɔɔ va é ɣɛ tea, “Aƃɛ ɣa wo wuloni wo li kpooʋei zu ga wo wɛlɛ ba? ?Gui fãgai ɣɛni tubusu nà ve?

²⁵Zɛƃɛ ɣa mu wo wuloni wo li pɛtɛsu? ?Zunui maa ɣa ɣili ga seɣe muʋɔɔ? A wɛlɛ! Niitiɛ te maa ɣa ɣili ga seɣe ɣaazu‐loga tiɛ ta ŋeteai ɣɛ ga zii‐ma‐ɣɛɛ ƃakpa, natiɛ ta ɣalaso pɛlɛa wu.

²⁶Zɛƃɛ mu ka sa wo wuloni wo li pɛtɛsu? ?Gala daa woo‐wo nu? Ƃɔɔƃɔɔ su nà ɣɛni de. Tévegɛ ʋɔlɔ ƃalaa Gala daa woo‐wo nu va.

²⁷Nui nii ɣa faa wonɛi Gala kɔlɔi zu é vile ba Gala giɛ ɣɛ tea, ‘Wɛlɛ! Gà nà keela woo‐wo nui levesu è ɣaazu luo, nii yá yà velei ƃɛtɛ è luo.’ ”

²⁸Ziizɛ ɣɛni sa te ma, “Gè bo wiɛ, numai niitiɛ zu ƃɔɔ te ɣai ŋaza nu vɛ, te ta nɛpɛ gɛ lɛ leveni Jɔ̃ va. Na pɛ ge ɣɛɛvɛ nui ƃɔɔ toai nui pɛ bu Gala na masadai zu, tévegɛ Jɔ̃ va.”

²⁹Tei te nii mɛnini, nui ɣaazɔ vɛɛ gɔmɛti naʋolo‐wulo veaitiɛ va te dɛɛni ga Gala maʋai ɣa ga gaama. Ta ɣa te Jɔ̃ tà vataizei maa zɔlɔ woni.

³⁰Kɛ̀ Favilesiitiɛ vɛɛ tɔ‐dɛɛ ɣala‐mɔitiɛ va, nii Gala ge pulu te ɣɛlɛni nà va ta ƃɔɔ ʋaa ma. Ta ɣa Jɔ̃ lɛ bataize ɣɛɛni ga tiɛ.

³¹Ziizɛ ɣɛni tea, “Zɛƃɛ ɣa sa gà zei‐zaa nu ƃuseitiɛ wo kɔ̃ɔ ma? Na ɣa ɣɛɛ na te wulovɛ ga zɛƃɛ?

³²Te maʋaa wulovɛ ga lopaitiɛ te zeini dɔwɔ ƃalagi ɣa tiɛ woo vili ɣii ma tiɛ ɣɛ tea, ‘Gé puu ʋɛɛni wo ma, wa wɔ wɛ lɛ ɣaani. Gé kpee loo, wɛ lɛ wɔlɔni.’

³³Toku ge zei ga Bataize‐ɣɛɛ Jɔ̃ vaani ɛ́ lɛ ŋɛni ŋɛni maa‐nɛɛ miizu ɛ́ lɛ ŋɛni dɔɔ ƃoalezu, wo ɣɛ tea, ‘Gɔʋɛ yowũ ɣa púlu.’

³⁴Nài wɔgi gè ga nu ƃuse lui, gè vaa gìɛ laa mi gìɛ dɔɔ ta ƃoale, wo ɣɛ tea, ‘A wɛlɛ! Mii‐ŋɛni‐wõi nu ƃakpa ɣa é ga dɔɔ‐ƃoale nu ƃakpa. Ta gɔmɛti naʋolo‐wulo vea ta wulu é vɛɛ niitiɛ va te luo velei lɛ vani.’

³⁵Tɔwɔ kele‐ɣelegi lɛɛvɛ ga tɔ ga gaama taitiɛ ɣaazɔ vɛ te yee zeiya máʋai wu.”

³⁶Favilesiitiɛ te ɣila ge Ziizɛ lilini ga ta tɔ te laa mi. É liini Favilesii nà ná pɛlɛi wu te laa mi na.

³⁷Tɔwɔ ŋaza nu ta ɣɛni tai zu túo vele yowũai. Tei ŋaza nui nii kwɛ̃ɛni ga Ziizɛ liivɛ laa miizu Favilesii na pɛlɛi wu, é vaani na ga gulo ƃadi wũ‐nɛɛ‐nɛɛ kpoƃo folo‐ʋolo.

³⁸Ŋaza nui ɣɛni loni Ziizɛ wɔwɔ wuluvɛ yíɛ wɔlɔ. É vɛɛni sa ga kɔwɔitiɛ maa yɛƃɛɛ ga ɣaazu‐maa‐yiɛ yíɛ maa ƃale ga ná wũ deɣai. É ɣɛni laa vɛɛzu kɔ́wɔi va yíɛ gulo ƃadi wũ‐nɛɛ‐nɛɛgi wu ma.

³⁹Tɔwɔ Favilesii nii é tilini daa‐mii ŋɛni ma, tei é wɛlɛni ná va, é boni ɣigi zu é ɣɛ tea, “È ɣɛ zunui nii ɣɛni ga Gala daa woo‐wo nu, ŋaza nui nii é ʋowũsu ba ɔ́ kwɛ̃ɛ. Na ɣa ɣɛɛ na ɔ́ kwɛ̃ɛ ƃalaa ga nui mazii é le. Ƃɔvɛlaale ŋaza nui ƃɔɔ ɣa ga faa yowũ‐ɣɛɛ nu.”

⁴⁰Ziizɛ goi ɣaa woteni é ɣɛ ma, “Saimɔ, faa ta ɣa dà ga gè bo yìɛ.” É ɣɛ Ziizɛ ma, “Zɛƃɛ ve, kala‐mɔi?”

⁴¹Nà ɣɛ ma, “Kui‐vɛɛ nu ta ná kui ɣɛni nu felegɔ ma. Dala wũ gila kui ɣa é ɣɛni gilagi ma, dala puugɔ wui wɔ ge zɔi ma.

⁴²Tei tɔwɔ tɛ lɛ ŋɛni zoosu tɔ kui wulo, é te felegɔ pɛ te zu ʋaa yɛni. Yá ɣɛɛ na ŋɛ na, ƃɛ ɣa sa yá wõi ga kui‐vɛɛ nui ga kpakpaa nu felegɔi niitiɛ zu?”

⁴³Saimɔ goi ɣaa woteni é ɣɛ ma, “Kìgi zu, nui nii ve é naʋolo ƃakpa zu ʋaa yɛni bɛ́.” Ziizɛ yɛ ma, “È gaa levea ga gaama vele.”

⁴⁴É liteni sa ŋaza nui wɔ vele é ɣɛ Saimɔ ma,“? È wɛlɛɛ ŋaza nui nii va? Gè lɛɛni yà vɛlɛi wu ɛ̀ lɛ ziɛ ʋeeni zèea kɔ̀wɔitiɛ ʋaa ma. Kɛ̀ é kɔ̀wɔi maa yɛƃɛɛ ga ɣaazu‐maa‐yiɛ é maa ƃale ga ná wũ deɣai.

⁴⁵Ɛ̀ lɛ laa vɛɛni kòmagi va ga yee‐zei vele bù. Kɛ̀ é ziɣi ƃɔɔ siɛgi ma gè lɛɛni yà vɛlɛi wu, ŋaza nui lɛ dɛ ƃɔlɔni laa‐vɛɛ va kɔ̀wɔitiɛ va.

⁴⁶Ɛ̀ lɛ gulo wuuni wũmɔ. Kɛ̀ é gulo ƃadi wũ‐nɛɛ‐nɛɛ pua kɔ̀wɔitiɛ ma.

⁴⁷Na ma gè bo yìɛ, ná faa yowũitiɛ te lamagɛi te zu ʋaa yɛga. Na ɣa é kɛɛ é wõiya ga tamaa. Kɛ̀ nui su ʋaa yɛgɛi ga ta wolo, towaa ẁõila wo nɔ ga ta wolo.”

⁴⁸É ɣɛni sa ŋaza nui ma, “Yà ʋaa yowũitiɛ zu ʋaa yɛga.”

⁴⁹Taitiɛ te ɣɛni daa‐miigi nii wosu ta Ziizɛni te vɛɛni sa ga ɣɛɛ tea, “Ƃɛ ɣa ga nii yá faa yowũ zu ʋaa yɛ ƃalaa pɛ?”

⁵⁰Ziizɛ ɣɛ sa ŋaza nui ma, “Yà yee‐la‐mai ɣa éè valoa. Li zii‐laa zu.”