Read Loma LUKI 9 Bible Online

LUKI 9 - Loma bible

LUKI 9

¹Ziizɛ kala dopo puugɔ kai felegɔitiɛ lilini ŋada ɣila é te yee zu ƃaa é gaa‐ƃaa ʋe te ya gɔʋɛ yowũitiɛ maazu é gaa‐ƃaa ʋe wɔnɔ te ya ga tiɛ seeƃɛitiɛ valo.

²É te wuloni sa é te leve ga tiɛ Gala goi wo é vile Gala na masadai va tiɛ numaa valo.

³É ɣɛni te ma, “A mɛ lɛ ŋɛni ta nɛpɛ siɣi wa ziɛi ʋaa ma. A mɛ lɛ tukpo siɣi ɔ́ nɔ ɣɛ ga bɛbɛ ɔɔ daa‐mii ŋɛni ɔɔ naʋolo. Na ɣa ɣɛɛ na seɣe fele‐fele ge mɛ lɛ ɣɛ wo ya.

⁴Pɛlɛi nɛpɛ wa lɛ bu, a yɛ bu é yɛsu wo ziɣi na.

⁵Vɛ nɛpɛ tɛ lɛ ɣɛ yee zei na wo wu, wa ɣɛ na ziɣizu tai na zu, a wɔwaa ƃɛkpɛnɛ ga fifiligi é ɣɛ ga te ŋalama zeele.”

⁶Kala dopoitiɛ te ziɣini sa na te li tiɛ leve‐teve taitiɛ zu tiɛ woo niinɛ vagɔi wo tiɛ numaitiɛ valo ŋadɛi ɣaazɔ.

⁷Faitiɛ ɣaazɔ te ɣɛni ɣɛɛzu, Yɛloo nii é ɣɛ ga masa zee‐wu masa é te mɛnini. É ɣɛɛni pɔ̃ɔ, ƃɔvɛlaale nui taniga te ɣɛni bosu ga Bataize‐ɣɛɛ Jɔ̃ wu ziɣia saa ya,

⁸taniga tiɛ wɔnɔ bo ga Yiilaija ɣa é wuloa. Zɔitiɛ tiɛ bo ga Gala daa woo‐wo bea wɔlɔ‐zaɣagitiɛ te ɣila ka é wu ziɣia saa ya.

⁹Yɛloo ɣɛni tea, “Gè Jɔ̃ wũ teveni. Kɛ̀ ƃɛi mu ka ga nui nii gè fai niitiɛ mɛnisu é vile ba?” É ɣɛni sa pele ɣaa ziɛzu ga é wɛlɛ Ziizɛ va.

¹⁰Tei sa Ziizɛ na keelaitiɛ te galeni ma, faitiɛ te te ɣɛɛni te te woni ma. É te ziɣini sa te wulo ná va ta letele te li tai ta zu daa ga Bɛseeda.

¹¹Tei kpɔgitiɛ te faa wɛ̃ɛni é vile ba, te vileni Ziizɛ wulu. Tɔwɔ é yee zeini te wu é ƃɔɛ te wɔ é vile Gala na masadai va, niitiɛ balo ʋaa maƃala ɣɛni te ma yíɛ natiɛ valo.

¹²Foloi wɔ ge ɣɛni sa liizu ʋii. Kala dopo puugɔ kai felegɔitiɛ vaa vele ɣa na ɣɛ te ɣɛ ma, “Kpɔgitiɛ leve te li taitiɛ zu ta kpalagitiɛ te laa‐zu‐vɛɛ ʋaa zu ta te laa‐mii ʋaa. Toku ge zei ga ŋadavɛ vɛ de na ná ɣa ƃu.”

¹³Kɛ̀ é ɣɛni te ma, “Wa ɣa wa ŋɛni ʋe te ya te mi.” Te ɣɛ ma, “Ŋɛni lɛ gé ya é wulo kpoolo‐ʋɔɔ looluoi wulu ta feza felegɔ‐kɛni kilaa gá li gé daa‐mii ŋɛni ɣeea numai niitiɛ ɣaazɔ ʋaa ma.”

¹⁴Tɔwɔ zinaitiɛ te ɣɛni na tɔ zoo te ziiti nu wulu dooluo zu. Ziizɛ ɣɛ sa ná kala dopoitiɛ ma, “A bo numaitiɛ ma te zei ga nu ƃulu gile‐gile. Nu ƃulu gile‐gilegi yìɛ ɣɛ su ga nu yee looluo.”

¹⁵Kala dopoitiɛ te na ɣɛ. Te kɛɛni nu pɛ ge zei.

¹⁶Ziizɛ kpoolo‐ʋɔɔ looluoi ziɣini ta feza felegɔi é ɣaazu lɛ gee zu é mama fe Gala bɛ é te zu ɣale‐ɣale é te ʋe kala dopoitiɛ ya ga te sei kpɔgi laa wu.

¹⁷Te pɛ te miini te vile. Nii é wuloni na wulu ga maƃulu‐kpulugi te gale‐ɣaleni nà ɣɛni ga kpɔlɔ puugɔ kai fele.

¹⁸Ziizɛ ɣɛni Gala felizu tɔ ɣilekpu ga siɛ ta kala dopoitiɛ te ba. É te ɣaa za ɣa kɛɛni é ɣɛ te ma, “Ƃɛ ɣa numaitiɛ te bosu ga gà le?”

¹⁹Te goi ɣaa woteni te ɣɛ ma, “Ta bosu ga yà ga Bataize‐ɣɛɛ Jɔ̃, taniga tiɛ bo ga yà ga Yiilaija, zɔitiɛ tiɛ wɔnɔ bo ga Gala daa woo‐wo bea wɔlɔ‐zaɣagitiɛ te ɣila ka é wu ziɣia saa ya.”

²⁰Ziizɛ ɣɛ sa te ma, “Wa wɔ ƃɛ ɣa wo bosu ga gà le?” Pite goi ɣaa woteni é ɣɛ ma, “Yà ɣa è ga Gala na nui é yee ƃadoga ba ga masagi, na ɣa ga Kolai.”

²¹Kɛ̀ Ziizɛ kpɛtɛni ga tɔ é da te ya ga Gala‐zee‐ƃako fai ba te mɛ lɛ ta wo nu ma.

²²É ɣɛni tea, “Kɛni nu ƃuse lui ɣa laa nɔwɔ wo faa lamaa zu. Zuu wũgitiɛ ta ɣɛlɛ ba ta laa‐ʋaale gwalaitiɛ é vɛɛ tɔ‐dɛɛ ɣala‐mɔitiɛ va. Na ɣa ɣɛɛ na ta paa, tɔwɔ Gala ka bu ziɣi saa ya ga foloi sava kelei.”

²³É boni sa nui pɛ ma é ɣɛ te ma, “Ani nu nɛpɛ ka ɣɛ na é vile pùlu, pagɛ manui ɣi kulo ƃɔɔ ʋaa zu é ná pɛɛ‐pulu wulu likpii ziɣi é ɣɛɛ la pùlu wɔ.

²⁴Toku ge zei ga nui nɛpɛ yá ɣɛ é ƃaa yɛʋui maazu towaa ɣɛ pilisu. Nui wɔgi yá yɛʋui vili màzaƃu ma towaa yɛ zéea.

²⁵Su‐wulo‐zu ɣa ga nii. Zɛƃɛ ɣa yá ɣɛ ga mawulo‐nu‐mai nu ʋaa ma ani yá zui ɣaazɔ zɔlɔ wo na, tɔwɔ é ƃɔɔ vili ɔɔ é vala ƃɔɔ ma?

²⁶Nui nɛpɛ màʋai ɣa wũfe é vɛɛ gòi va, manui ɣa máʋai ɣa ẁũfe, nài gè ga nu ƃuse lui. Na ɣa ga gà vaa na nà saala‐malai zu ta kèea Gala na saala‐malai é vɛɛ keelaitiɛ va te wuloai su leelaa ga ná dɔa.

²⁷Kɛ̀ gè bo wiɛ ga gaama, nui taniga ta loni vɛ te ga numaitiɛ tɛ lɛ saa wɛ̃ɛga tɔ teɣa vɛɛ wɛlɛzu Gala na masadai va.”

²⁸Fai niitiɛ wogɛi ma Ziizɛ vɛ ɔ́ sa zoo é ziiti folo lɔsava zu. É Pite ziɣini ta Jɔ̃ é vɛɛ Jĩi va é lɛ ga tiɛ gizi gwalai ma ga é Gala feli.

²⁹Kɛ́i ma sa Gala felizu, gaazuvɛ maa ʋelini ná seɣei wala yíɛ wele.

³⁰Na ɣɛɛzu ta zinaa felegɔ tiɛ sa yɛpɛ. Nu felegɔi niitiɛ te ɣɛni ga Mooze ƃɔga Yiilaija.

³¹Ta ɣa te wuloni te ɣaazu Gala ta zaala‐malai zu tiɛ ƃɔɛ pɔ́ é vile kulo ʋai va ŋeteai nii zu, na ɣa ga nii é ɣɛni vaazu ɣɛɛzu la Yɛlusulɛɛ.

³²Pite vɛɛ niitiɛ va te ɣɛni ba te ŋiini ƃɔɔ fɔlɔ‐wɔlɔ̃i. Tɔwɔ te ɣaazu laoni te wɛlɛ saala‐malai nii va ta zinaa felegɔitiɛ ta Ziizɛni te ɣɛni loni.

³³Tei sa numaitiɛ te ɣɛni ziɣizu Ziizɛ woba ga te li, Pite ɣɛni Ziizɛ ma, “Gá nu keea nu, de ɣɛɛ ʋai vɛ gaa nɛɛvɛ. Ƃe ba gé kwɔta saagɔ lo vɛ, gila ge ɣɛ è ʋaa ma, gila ge ɣɛ Mooze ʋaa ma, gila ge ɣɛ Yiilaija ʋaa ma.” Nii é ɣɛni bosu ɛ́ lɛ ŋɛni ga kwɛ̃ɛga.

³⁴É ɣɛni nɔ nii wosu, tine ƃiligi yii é te maa ƃoale. Kala dopoitiɛ te ɣɛni luozu tine ƃiligi ɣɛi ma yiizu te ma.

³⁵Woo ta wuloni sa tine ƃiligi zu yíɛ ɣɛ tea, “Nii ɣa é ga dùi, nii zèe ƃadogɛi ba. A wui to góo ma!”

³⁶Tei sa woi na woni, Ziizɛ tɔ ɣilekpu nɔ sa te pɛtɛni. Te ná ɣɛɛni ƃu, nii nɛpɛgi te pɛtɛni tɛ lɛ ta woni nu ma nà maziɛ su.

³⁷Na wulu ʋoloi, tei sa te gizigi yiini, kpɔ kpakpa ta te luo laa wũini.

³⁸Na ɣɛɛzu zunu ta yíɛ loba kpɔgi zu yíɛ ɣɛ tea, “Kala‐mɔi, è veevɛ wɛlɛ bɛ̀ dùu zunui va. Tɔ ɣilekpu nɔ ɣa é zèea ga duu.

³⁹Gɔʋɛ yowũi ɣa laa lɛ bu é loba sa ga maa ʋilea. Towaa yɛ kpelizu é yɛsu daa ʋũi wulo. Na ɣa ɣɛɛ na towaa maa ŋala‐ŋala. Kpesu ʋɔlɔ ɣa ɣɛ ba ga tii.

⁴⁰Gè pee ʋeeni yà ɣala dopoitiɛ vɛ ga te kpɛ pulu, kɛ̀ tɛ lɛ zooni tɔ kɛ.”

⁴¹Ziizɛ gaa woteni é ɣɛ tea, “Ee zei‐zaa vea! Zee‐la‐ma lɛ wo ya, wo wui zu ƃɔlɔgɛi. Debi tiigo zɛƃɛ ɣa sa gà bo wo woba?” É boni sa zunui ma ga é va ga dui.

⁴²Tei lopoi ɣɛni vaazu Ziizɛ wɔ vɛ, gɔʋɛ yowũi tooni yíɛ ƃeli. Kɛ̀ Ziizɛ yii ɣaa wãlani gɔʋɛi ma é kpɛ pulu, nà valo sa é teve wulu keea wɔ.

⁴³Te pɛ Gala na bɔɔlɔlai wala te ɣaazu laa ʋeni. Fai ɣaazɔ é kɛɛni, pilegɛ dɛ nɔ ɣɛ numaitiɛ ma ga ki‐gaa‐ziɛ, é ɣɛ sa ná kala dopoitiɛ ma,

⁴⁴“A ƃe ba woi niitiɛ te lɔ wo wui zu. Na ɣa ga ta vaazu nu ƃuse lui yee laazu nu ƃusea ya.”

⁴⁵Kɛ̀ tɛ lɛ woi nii ɣaa ɣaani. Doowugɛi ɣɛ te va kɛɛ ʋaa ma te mɛ lɛ gaa ɣa. Tɔwɔ te ɣɛni luozu ga te gaa zaɣa kɛ woi niitiɛ ʋaa ma.

⁴⁶Kala dopoitiɛ te ɣɛni daaza wulozu ga zɔi yá ɣɛ te zaama ga nu walai é leve baa pɛ ba.

⁴⁷Kɛ̀ tei Ziizɛ ta ɣi‐gaa‐ziɛi ɣaa ɣaani, é lopo wolo ta ziɣini é pile woba.

⁴⁸É ɣɛ te ma, “Nui nɛpɛ yá yee zei lopoi nii wu nà daa‐zeigi zu, manui yee zeiya bù. Nui wɔgi yá yee zei bù, manui yee zeiya nui nii wu é tèvega. Ƃɔvɛlaale nui nii toai wo pɛ wo wu towaa é ga nu walai.”

⁴⁹Jɔ̃ ɣɛni Ziizɛ ma, “Gá nu keea nu, gé wɛlɛni nu ta va yíɛ gɔʋɛ yowũa ƃɛ numaa wulu yà laa‐zeigi zu. Tɔwɔ gé kpe teveni nà ɣɛɛ va, ƃɔvɛlaale ɛ́ lɛ vɛɛni gé va gá tiɛni gɔ́ vile è wulu.”

⁵⁰Kɛ̀ Ziizɛ ɣɛni ma, “A mɛ lɛ kpe teve kɛ́ɛ va. Toku ge zei ga nui ɛ́ lɛ wɔɔzu wo wɔ tɔ wo ʋaa ma.”

⁵¹Tei sa siɛgi ɣɛni lɔtɔsu ga Ziizɛ lɛ Gala ta, é deʋeni sa ɣigi zu ga é li Yɛlusulɛɛ. É keela leveni ɣɛ ná luo.

⁵²Keelai niitiɛ te lɛɛni Sameelia lai ta zu ga te faitiɛ ɣavele ƃɛtɛ na Ziizɛ ʋaa ma.

⁵³Kɛ̀ numaitiɛ tɛ lɛ ŋɛni kɛɛni tɔ yee zei bu, ƃɔvɛlaale Yɛlusulɛɛ ziɛ ɣa é ɣɛni kɔ́waa.

⁵⁴Tei ná kala dopoitiɛ te wɛlɛni fai nii va é ɣɛɛni, na ɣa ga Jĩi ƃɔga Jɔ̃, te ɣɛni Ziizɛ ma, “Gé maliɣii, è wõini gé ŋabu maa lili é wulo gee‐zuvɛ é yii é te ɣala ʋũa?”

⁵⁵Kɛ̀ Ziizɛ liteni é yii ɣaa wãla te ma.

⁵⁶Te liini sa taa ta ƃɔnɔ su.

⁵⁷Tei sa te ɣɛni pelei ma tiɛ li, nu ta ɣɛni Ziizɛ ma, “Gà vile è wulu dii vɛ nɛpɛ yà li na.”

⁵⁸Ziizɛ ɣɛ sa ma, “Zazawua te mayeɣe ɣa te ya. Wɛ̃niitiɛ te malaɣa ge te ya. Kɛ̀ ŋada nɛpɛ gɛ lɛ zèea, nài gè ga nu ƃuse lui, ga gè wũ da na.”

⁵⁹Ziizɛ boni wɔnɔ nui ta ƃɔnɔ ma é ɣɛ ma, “Vile pùlu.” Kɛ̀ é ɣɛni ma, “Kèea, ƃe ba dɛ gè li gè yɛ kèea woba é yɛsu gè maa wulu.”

⁶⁰Kɛ̀ Ziizɛ ɣɛni ma, “Ƃe saa veaitiɛ va te te vaa zaa veaitiɛ loowu. Kɛ̀ yà dɛi, li è Gala na masadai maʋaa wo ga woo maa zeezea.”

⁶¹Nui ta ƃɔnɔ ge ɣɛni Ziizɛ ma, “Gà vile è wulu, màliɣii. Kɛ̀ mamaa wũgi pa ƃe ba gè ʋeli niitiɛ ma te pɔ̀ pɛlɛ wu.”

⁶²Ziizɛ ɣɛni ma, “Gala na masadai zu lii wulovɛ ga nu ɣa ɣɛ woza vilizu é ɣɛ é wɛlɛ wulu va. Ani manui ɣa na ɣɛɛ na, ɛ́ lɛ kuloa bu Gala na masadai ʋaa ma.”