Read Loma JƆ̃ 10 Bible Online

JƆ̃ 10 - Loma bible

JƆ̃ 10

¹Ziizɛ ɣɛni tea, “Gè bo wiɛ ga gaama, nui nii lɛ lɔɔ ga baala kpakigi laavɛ vele, to mu yíɛ lɔ ga pele ta ƃalaa, nà nui ɣa ɣɛ ga wũmɔ nu é ga nui yá ɣizi numaa ma ga é te weli kulo te ya.

²Kɛ̀ nui yá lɔ ga daavɛ vele towa é ga baalagitiɛ maazu‐vɛtɛ nui.

³Towa kpaki‐maa‐ƃɛɛ nui ɣa daa lao tuo. Baalagitiɛ ta baala‐maazu‐vɛtɛ nui woi mɛni. Towaa kpɔɔ vaalagitiɛ lili ga ta laa‐zeigi é lo te luo é wulo ga tiɛ.

⁴Baala‐maazu‐vɛtɛ nui ɣa ƃɔɔ ɣeleitiɛ ƃɔgɔpɛ kulo na, towaa lo te luo te vile pulu, ƃɔvɛlaale te goi wɛ̃ni.

⁵Tɛ lɛ vilega wɛ̃ɛ wulu. Ta vela ba, ƃɔvɛlaale tɛ lɛ wɛ̃ɛya woo wɛ̃ni.”

⁶Ziizɛ sakpegi nii zɔɔni te ma. Kɛ̀ nii é ɣɛni bosu tɛ lɛ gaa ɣaani.

⁷Na ʋaa ma Ziizɛ ɣɛni kɔnɔ te ma, “Nà ɣa gè ga baala kpakigi laavɛ.

⁸Nuitiɛ ɣaazɔ te vaani tùo ta ga wũmɔ vea te ga nui yá ɣizi nu ma é kweli kulo zéea. Kɛ̀ baalagitiɛ tɛ lɛ wui loni te woo ma.

⁹Nà ɣa gè ga kpakigi laavɛ. Ani nu nɛpɛ ka leve na ga pɔ̀ vele, towaa wulo faa zu. Na ɣa ɣɛɛ na towaa ɣɛ lɔɔzu kpakigi zu yíɛ wulo yíɛ daa‐mii ŋɛni zɔlɔ wo.

¹⁰Wũmɔ nui na dɛi towaa va nɔ ga é wũmɔ wo yíɛ te vaa yíɛ te zu ŋala‐ŋala. Gè vaa ga numaitiɛ te ŋetea ɣɛ. Gà ŋetea nɛɛ te ma ga tamaa.

¹¹Nà ɣa gè ga baala‐maazu‐vɛtɛ nu vagɔi. Baala‐maazu‐vɛtɛ nu vagɔi ɣa yɛʋui yɛ baalagitiɛ ʋaa zu.

¹²Nui é baalagitiɛ maazu vɛtɛsu fɔɔnɛ ʋaa ma, ɛ́ lɛ ga baala — maazu‐vɛtɛ nu ƃɔɔƃɔɔ tɔwɔ pó gɛ lɛ ga baalagitiɛ, yá wɛlɛ na koei va yíɛ va towaa baalagitiɛ yɛ na é vela. Koei wolo sa ta ma é te zu yɛzɛ.

¹³Towaa vela ƃɔvɛlaale tɔ ga ʋɔɔnɛ‐ʋɛɛ lii‐ɣɛɛ nu, ɛ́ lɛ ƃalani baalagitiɛ ʋaa ma ga bɛnɛ.

¹⁴Nà ɣa gè ga baala‐maazu‐vɛtɛ nu vagɔi. Gè nà dɛitiɛ wɛ̃ni, nà wɔ kẁɛ̃ɛgɛi te vɛ

¹⁵è ɣɛ velei nɔ kèea Gala ge kẁɛ̃ni la nà wɔ kẃɛ̃ɛgɛi bɛ̀. Gà yɛʋui yɛ baalagitiɛ ʋaa zu.

¹⁶Baala kpaalaga ta zèea. Tɛ lɛ baala kpakigi nii zu. Kɛni gà va ga tiɛ ƃalaa pɛ. Ta wui lo gòi ma. Na ʋaa ma baala kpulugi ɣa sa a ɣɛ ɣile, te maazu‐vɛtɛ nui ɣile.

¹⁷Nii mazaƃui ɣa kèea Gala ge wõiya la gàazu. Na ɣa ga gà ƃe ɣɛʋui va. Tɔwɔ gà sɔlɔ wo wɔnɔ wulu.

¹⁸Nu nɛpɛ gɛ lɛ kuloa zèea. Kɛ̀ gà ƃe ba ga ƃɔɔ yee. Gaa‐ƃaa ɣa zèea ga gè ƃe ba, gaa‐ƃaa zèea kɔnɔ ga gè sɔlɔ wo wulu. Kèea ɣa é nii leʋea é da zèea.”

¹⁹Dusiitiɛ te ɣaa wɛɛni kɔnɔ woo ma woi niitiɛ mazaƃu ma.

²⁰Te lamaa te ɣɛni tea, “Gɔʋɛ yowũ ɣa pulu. Wũgi zu lɛ laani. Zɛƃɛ wui‐to ka wo bosu goo ma?”

²¹Zɔitiɛ wɔ te ɣɛni tea, “Daa wɔlɔi niitiɛ tɛ lɛ ga gɔʋɛ yowũ pulu nu na daa wɔlɔ. ?Gɔʋɛ yowũ ɣa zoo é gaazu‐wuu nu ɣaazu ziɣi ma?”

²²É ɣɛni ga Gala‐feli wɔta walai laa‐wona‐bo fai Gala ma nà mawui‐ɣaa ʋai Yɛlusulɛɛ. É ɣɛni ga kɔɔlɛ‐vaa ziɛ su.

²³Ziizɛ ɣɛni ziɛ‐ziɛsu vɛ ná laa ɣɛni ga Salama‐veelii‐ɣa Gala‐feli wɔta walai ʋaa va.

²⁴Na ʋaa ma Dusiitiɛ te ɣaa lɛɛni ba ma te ɣɛ ma, “Minɛ yɔɔzu ɣa na ɣa ziili ga è gé wulo kilimaa taaniigi zu? Ani yà ɣa è ga nui Gala zee ƃakogɛi ba ga masagi, bo gé ma ga gaa wodoa.”

²⁵Ziizɛ gaa woteni te ya é ɣɛ tea, “Gè boni wo ma, tɔwɔ wɛ lɛ siɣini ga gaama. Tiitiɛ gè te ɣɛɛzu kèea Gala na daa‐zeigi zu, ta ɣa ta seele woo ʋe fàa ma.

²⁶Wɛ lɛ siɣini ga gaama, ƃɔvɛlaale wɛ lɛ ga nà baalagitiɛ te ta.

²⁷Nà baalagitiɛ ta gòi mɛni. Gè te wɛ̃ni. Ta vile pùlu.

²⁸Zɛʋui nii kwɛ̃ɛ gɛ lɛ ba gà fe te ya. Te zu lɛ wɔlɔ‐wɔlɔ ƃɔnɔ woga. Nu nɛpɛ gɛ lɛ te ŋasaga zèea.

²⁹Kèea Gala nii é te ʋeea zèea to‐su levegɛ nu pɛ ba. Nu nɛpɛ gɛ lɛ zooga ɔ́ te ŋasa zèea.

³⁰Gá kèea Gala gá ga ŋɛni ɣila.”

³¹Dusiitiɛ te kwɔtia yɛvɛni kɔnɔ ga te sɔɔ la.

³²Ziizɛ boni te ma é ɣɛ tea, “Gè tii vagɔ lamaa lɛɛ ga wiɛ te ga tiitiɛ te wuloai kèea ya. Tii niitiɛ te mazɛƃɛ kele ka wo ɣɛ wo sɔ̀ɔ maʋaa ma?”

³³Dusiitiɛ te goi ɣaa woteni te ɣɛ ma, “Gɛ́ lɛ è zɔɔ tii vagɔ nɛpɛ faa ma. Kɛ̀ Gala daa‐ŋala‐ŋala fai ve yìɛ. Ƃɔvɛlaale yà ga nu ƃuse, kɛ̀ è ƃɔɔ ƃɛtɛɛ ga Gala.”

³⁴Ziizɛ ɣɛ te ma, “?Nii lɛ wonɛni wa lɔgi zu vɛ Gala ge ɣɛni faa wosu na yíɛ ɣɛ tea, ‘Wa ga galaga’?

³⁵Gala kɔlɔi laa woi lɛ ziɣia ma.?Niitiɛ Gala daa woi ziitini te ma, tei tɔwɔ Gala ge natiɛ lilini ga galaga,

³⁶wa ƃɔɛ pɔ̀ nài gè ga nui kèea Gala ge kuloa su leelaa ga ná dɔ é tève zui zu wiɛ ɣɛ mà, ‘Yà Gala daa ŋala — ŋalasu’ kɛ̀ɛ ʋai ma tea, ‘Gà ga Gala duu’?

³⁷Ani gɛ̀ lɛ kèea na tiitiɛ ɣɛɛzu, a mɛ lɛ màʋaa ziɣi ga gaama.

³⁸Kɛ̀ ani gà te ɣɛɛzu, velei ƃalaa wɛ lɛ màʋaa ziɣini la ga gaama, a tiitiɛ maʋaa ziɣi ga gaama, kɛɛ ʋaa ma wo kwɛ̃ɛ wo gaa ɣa ga fai nii wa pɛ̀tɛ su tɔ nɔ ɣa wa kèea vɛtɛ su.”

³⁹Te ɣaa ƃaani kɔnɔ ga te so. Kɛ̀ é wuloni te yee wu sɔlɔlɔ.

⁴⁰Ziizɛ Jɔdɛ̃ yiɛi leveni kɔnɔ é li é ɣɛ vɛ Jɔ̃ bataize ɣɛɛni na ga maa wũ.

⁴¹Nu lamaa vaani pɔ́ te ɣɛ tea, “Jɔ̃ lɛ faa nɛpɛ kɛɛni ɔ́ dɛ ga seele. Kɛ̀ nii nɛpɛ é boni é vile zunui nii va é ɣɛni ga gaama.”

⁴²Nu lamaa Ziizɛ maʋaa ziɣini sa ga gaama na.