Read Loma JƆ̃ 12 Bible Online

JƆ̃ 12 - Loma bible

JƆ̃ 12

¹Tei sa é ɣɛni na ga folo lɔzita teve‐maazu wui ɔ́ vɛɛ ziilizu, Ziizɛ liini Bɛtani vɛ Laazɔi ɣɛni na, nui é bu ziɣini saa ya.

²Ná ɣa te Ziizɛ ʋata woni na. Maata ɣa é ɣɛni daa‐mii ŋɛnii mayeke kɛɛzu, kɛ̀ Laazɔi ɣɛni ga nui niitiɛ te ɣila ta Ziizɛni te ɣɛni daa‐miigi wosu.

³Meele gulo ƃadi ziɣini gulu yiɛ wũ‐nɛɛ‐nɛɛ ge su sɔ̃wɔ ƃai. Ɔ́ pãi daa ʋe. É siɛni Ziizɛ wɔwɔitiɛ ma é te maa ƃale ga ná wũ deɣai. Gulo ƃadii wũgi é pɛlɛi laa ʋeni.

⁴Dudia Asikaalia nii é ɣɛni ga Ziizɛ na kala dopoitiɛ te ɣila é ga nui nii é ɣɛni vaazu wulozu ga Ziizɛ wɔwɔ wulu wɔɔ, é ɣɛni tea,

⁵“Aƃɛ ʋaa zu tɛ lɛ gulo ƃadii nii zɔ̃wɔ wuloni dala wũ felegɔ ma tɔ sɔ̃wɔi ʋe maa‐wõi vea ʋaa ma?”

⁶Nii wo saƃui lɛ ga kpala ɣa bogɛi ɣɛ maa‐wõi vea ʋaa ma, kɛ̀ kɛ́ɛ ɣa bogɛi ɣɛ ga wũmɔ nu. Na ɣa ɣɛɛ na naʋolo ŋala‐ŋalagi ɣɛni zéea, tɔwɔ nii tɔ pu su ɔ́ kɛ yíɛ siɣi su.

⁷Ziizɛ ɣɛ tea, “Ƃe Meele va. Ƃe ba é daa‐zu ƃɛtɛ dòowu foloi ʋaa ma.

⁸Wa maa‐wõi vea wa ma wɔ, kɛ̀ nà dɛi a da wani dɛ lɛ vaazu ɣɛɛzu ma wɔ.”

⁹Tei Dusi ƃɔ gwalai mɛnini ga Ziizɛ ɣɛni na, te vaani. Ziizɛ ʋaa ɣilekpu gɛ lɛ ŋɛni nɔ le, kɛ̀ te vaani ga te wɛlɛ ƃaalaa pɛ Laazɔi va, nui Ziizɛ bu ziɣini saa ya.

¹⁰Na ʋaa ma laa‐ʋaale gwalaitiɛ te deʋeni ga te Laazɔi vaa ƃalaa pɛ,

¹¹ƃɔvɛlaale maʋai kɛɛni Dusi lamaa yíɛ ziɣi te wulu yíɛ Ziizɛ maʋaa ziɣi ga gaama.

¹²Na wulu ʋoloi kpɔ gwalai nii é vaani kui ma é mɛnini ga Ziizɛ ɣɛni vaazu Yɛlusulɛɛ.

¹³Na ʋaa ma te dɔɔ laɣaga ziɣini te lii la ga te tuola wũi tiɛ loba tiɛ ɣɛ tea, “Hosana! Tuuyiɛ ɣa ɣɛ nui nii ma é vaazu de maliɣii Gala na daa‐zeigi zu, nii é ga Yezɔi masagi!”

¹⁴Ziizɛ wɛlɛ soo ʋaale kpokpa ba é zei kɔ ma, è ɣɛ velei ponɛi la Gala kɔlɔi zu mawoi ga

¹⁵“A mɛ lɛ luo, Zaayã veaitiɛ! A wɛlɛ, wa masagi ɣa vaazu! Tɔ zeini soo ʋaale kpokpa kɔ ma!”

¹⁶Ziizɛ na kala dopoitiɛ tɛ lɛ nii ɣaa ɣaani ga maa wũ. Kɛ̀ tei bɔɔlɔla ziitini ma, te ɣi ge looni su ga nii wonɛi ɣɛ Gala kɔlɔi zu ga towaa ɣɛ ga Ziizɛ, tɔwɔ é ɣɛɛni la.

¹⁷Kpɔgi é ɣɛni ba tei é Laazɔi lilini ga é bu ziɣi saa ya é wulo kwɔti ɣabai zu te seele woo ʋeeni maʋaa ma.

¹⁸Zaƃui kpɔ gwalai liini la Ziizɛ luola wũisu tɔ ga te mɛini ga é fai nii ɣɛɛni é dɛ ga seele.

¹⁹Favile‐siitiɛ te ɣɛ sa ɣiini ma, “Wa kaazu, wɛ lɛ zooga wɔ faa ta nɛpɛ kɛ. A wɛlɛ! Zuu pɛ ge vilega púlu.”

²⁰Taitiɛ te liini Gala felizu kui ma, Geliiki vea taniga te ɣɛni te zaama.

²¹Geliikii niitiɛ te vaani Fele wɔ, nui é ziɣini Bɛseeda lai zu Geealali yui zu te ɣɛ ma, “Kèea, gé wõini gé wɛlɛ Ziizɛ va.”

²²Fele liini é bo Ɛĩdulu ma. Ɛĩdulu yɛ Fele va te li te bo Ziizɛ ma.

²³Ziizɛ bo te ma é ɣɛ tea, “Siɛgi ziilia ga bɔɔlɔla ziiti nu ƃuse lui ma.

²⁴Gè bo wiɛ ga gaama, kɛni mɔlɔ ɣai ɣa loo zuwãvɛ é za, na laale towaa yɛ ga mɔlɔ ɣai gilagi. Kɛ̀ ani yá zaa na, maɣai ɣa lama gá.

²⁵Nui zɛʋui ʋaa wala ɣa wɔɔlɔ gaazu, a kɛ tii zɛʋui vili ka na é bosu. Nui zɛʋui ʋaa wala ɣa wɔɔlɔ gaazu, a kɛ tii zɛʋui vili ka na é bosu. Nui zɛʋui ʋaa wala lɛ wɔɔlɔɔ gaazu ŋeteai nii zu, faa lɛ vɛɛ zɛʋui va é yɛsu é ɣɛ ga zɛʋui nii kwɛ̃ɛ gɛ lɛ ba.

²⁶Ani nu nɛpɛ ka ɣɛ na mɔɔlɛzu bɛ̀, kɛni yá vile pùlu. Na ɣa ɣɛɛ na vɛ gà ɣɛ na ná ɣa nà tii‐ɣɛɛ nui ɣa ɣɛ na ƃalaa pɛ. Ani nu nɛpɛ ka ɣɛ na mɔɔlɛzu bɛ̀, de ɣeea Gala ka wũfe má.”

²⁷Ziizɛ ɣɛni wɔnɔ tea, “Kìgi zu ɣɛɛ pɔ̃ɔ. Zɛƃɛ ɣa gà bo? Gà ɣɛ tea, ‘Kèea, siɛgi nii wudɛ ẁũ maazu’? Ɛ́ lɛ ŋɛ na. Ƃɔvɛlaale nii é vaazu ɣɛɛzu siɛgi nii zu towa gè mavaa woga.

²⁸Kèea, sàala la yà laa‐zeigi ma.” Na ɣɛɛzu woo ta wulo gee‐zuvɛ é ɣɛ tea, “Gè saala laa ma. Gà saala la ma kɔnɔ.”

²⁹Kpɔgitiɛ te ɣɛni loni na te mɛnini. Te boni ga gee ƃɛdɛ ɣa é toa. Zɔitiɛ te ɣɛ tea, “Gala ta ɣeelai ɣa é ƃɔɛ Ziizɛ wɔ.”

³⁰Ziizɛ boni é ɣɛ tea, “Wo mazaƃu ɣa woi nii vaa la, màʋaa laale.

³¹Zui nii zu ʋaa‐wo gaa‐leve ziɛgi ziitia sa. Zui nii zu masagi ɣa sa yá ƃɛ.

³²Kɛ̀ nà dɛi — ta bù ziɣi na zuwãvɛ te tɛ̀, gà nui ƃɔgɔpɛ tɔtɔ va.”

³³Ziizɛ nii woni kɛɛ ʋaa ma é dɛ ga sai nii mazii é ɣɛni vaazu bosu.

³⁴Kpɔgi gaa woteni zéea é ɣɛ tea, “Gé mɛniga tɔgi zu ga Kolai ɣa yɛ na wɔ‐wɔ‐wɔ. Yà bo ɣɛ le mu ga kɛni ta nu ƃuse lui wu ziɣi te tɛ? Ƃɛ ɣa é ga nu ƃuse lui nii?”

³⁵Ziizɛ ɣɛ te ma, “Ŋada wodoai ɣa la wolo lebisu wo woba. Tei ŋada wodoai é wo ya, a ziɛ, wo mɛ lɛ yɛ su kpidi ɔ́ vɛɛ wiɛ. Nui nii yá ɣɛ ziɛzu kpidi zu ɛ́ lɛ lii‐zu wɛ̃ɛga.

³⁶Tei dɛ ŋada wodoai wo ya, a laa la, kɛɛ ʋaa ma wo ɣɛ ga ŋada wodoai zu vea.” Tei Ziizɛ nii woni, é ziɣini na é loowu te va.

³⁷Velei ƃalaa Ziizɛ faa lamaa ɣɛɛni la te ɣaazu ma é dɛ ga seele, tɛ lɛ maʋaa ziɣini ga gaama.

³⁸Nii ɣɛɛ zaƃui ɣɛni ga Gala daa woo‐wo nui Aizeea laa woi leve ma. Na ɣa ga nii é boni yíɛ ɣɛ tea, “Gé maliɣii, ƃɛ ɣa é gá wona‐bo goi ziɣia ga gaama? Ƃɛ ɣa Gala na gaa‐ƃai maʋaa ɣaa wodoa la?”

³⁹Nii mavele ma tɛ lɛ ƃega siɣi ga gaama, ƃɔvɛlaale Aizeea boni wɔnɔ yíɛ ɣɛ tea,

⁴⁰“Gala te ɣaazu wuuni é faa vala te ɣaazu, kɛɛ ʋaa ma te mɛ lɛ wɛlɛ tɔ faa ɣaa ɣa tɔ lite wɔnɔ tɔ va pɔ́ ga é te valo.”

⁴¹Aizeea nii woni, ƃɔvɛlaale é wɛlɛni Ziizɛ na bɔɔlɔlai va é ƃɔɛ sa é vile Ziizɛ va.

⁴²Nii pɛ ge ɣɛɛvɛ taitiɛ gaa‐ƃaa ɣɛni te ya numaitiɛ maazu te lamaa te maʋaa ziɣini ga gaama. Kɛ̀ Favilesiitiɛ ta luo‐bai kɛɛni tɛ lɛ laa wu ziɣini maʋaa ma, kɛɛ ʋaa ma te mɛ lɛ te wulo Gala‐feli wɔtai maʋaa va.

⁴³Ƃɔvɛlaale te ɣɛni daa‐maa‐lɛi nii wõi ɣɛɛzu nu ƃuse ɔ́ bo ga tiɛ é leve Gala na dɛi va.

⁴⁴Ziizɛ boni ga woo wala yíɛ ɣɛ tea, “Nui é màʋaa ziɣia ga gaama, nà lɛ na ɔ́ màʋaa ziɣi ga gaama, kɛ̀ nui é tèvega nà ɣa é máʋaa ziɣia ga gaama.

⁴⁵Nui é pɛ̀tɛga towaa é nui nii vɛtɛga é tèvega.

⁴⁶Gè vaa ga gè ɣɛ ga ŋada wodoai zui zu, kɛɛ ʋaa ma nui nɛpɛ yá màʋaa ziɣi ga gaama é mɛ lɛ yɛ kpidi zu.

⁴⁷Ani nu nɛpɛ ka fai niitiɛ mɛni na gè bosu, tɔwɔ ɛ́ lɛ ziɛni ga tiɛ, gɛ̀ lɛ ná faa‐wogi ɣaa levea. Ƃɔvɛlaale gɛ̀ lɛ vaani ga gè faa vɛɛ zui va, kɛ̀ pàavɛ ga gè zui wulo faa zu.

⁴⁸Nui nii yá ɣɛlɛ bɛ̀ ɛ́ lɛ yee zeini fai niitiɛ wu gè bosu, ná faa‐wogi ɣaa‐leve ŋɛni ɣa na. Woi gè boga towaa yá ɣɛ ga ná faa‐wo gaa‐leve ŋɛnii ga ŋetea ɣaa‐ƃela foloi.

⁴⁹Ƃɔvɛlaale gɛ̀ lɛ ƃɔɛni ga ƃɔɔ ɣaa‐ƃaa. Kèeai nii é tèvega tɔ ɣagi ɣa é dèʋea ga nii gà bo.

⁵⁰Nà wɔ gè kwɛ̃ni ga ná deʋei ɣa ga zɛʋui nii kwɛ̃ɛ gɛ lɛ ba. Na ma nii gà bo gà bo ga velei nɔ kèea ɣa bo da mà.”