Read Loma JƆ̃ 13 Bible Online

JƆ̃ 13 - Loma bible

JƆ̃ 13

¹Teve‐maazu wui‐ɣaa ʋoloi ɔ́ vɛɛ ziitizu, Ziizɛ kwɛ̃ɛni ga siɛgi ziilia ga é wulo zui zu é li kéea Gala pɔ vɛ. É wõini ɣɛ ga niitiɛ te ɣɛni ga ná dɔ numaa zui zu. É ɣilini wõiya va ga tiɛ é yɛsu é ziili la daa‐wulo‐zuvɛ.

²Dɛvele é pilini sa ɣɛ Saimɔ Asikaalia dui Dudia yii zu ga é wulo ga Ziizɛ wɔwɔ wulu wɔɔ.

³Kwɛ̃ɛgɛi sa ɣɛ Ziizɛ vɛ kpɔkɔ laa‐mii‐bo siɛgi zu ga kèea Gala ge fai ƃɔgɔpɛ pua kakala. É ɣɛni wɔnɔ ga kwɛ̃ɛga ga kuloai ɣɛ Gala pɔ vɛ yíɛ li wulu wɔnɔ pɔ́.

⁴Na ma é wu ziɣini daa‐mii‐bo‐suvɛ é ná seɣei wulo wɔ ba é pu é taawɔ ɣili zaama.

⁵É ziɛ wuuni sa koko zu é vɛɛ ga ná kala dopoitiɛ wɔwɔ maa wua yíɛ te wɔwɔ maa ƃale ga taawɔi nii giliai ɣɛ saama.

⁶É vaani Saimɔ Pite wɔ. Nà ɣɛ ma, “?Màliɣii, yà kɔ̀wɔ maa wuozu?”

⁷Ziizɛ gaa wote é ɣɛ ma, “Nii gè kɛɛzu ɛ̀ lɛ kwɛ̃ni dɛ. Kɛ̀ yà vaazu gaa ɣaazu ga ná yee luo vele.”

⁸Pite ɣɛ ma, “Ɛ̀ lɛ wɔlɔ‐wɔlɔ kɔ̀wɔ maa wua.” Ziizɛ ɣɛ ma, “Gɛ̀ lɛ ɣɛ è wɔwɔi maa wuoni, è wɔɔ laa lɛ ɣɛɛ màʋaa va.”

⁹Saimɔ Pite ɣɛ ma, “Màliɣii, ɛ́ lɛ nɔ ga kɔ̀wɔi, kɛ̀ zèe pɛ ẁũgi pɛ te maa wuo!”

¹⁰Ziizɛ ɣɛ ma, “Nui nii é wua, guo ʋaa lɛ ɣɛɛ ba é wulo kɔ́wɔitiɛ wulu. Manui wɔlɔ‐kɔlɔ ma ƃɔgɔpɛ maa ziɣivɛ. Tɔwɔ wo maa ziɣivɛ, kɛ̀ wo ƃɔgɔpɛ taale.”

¹¹Ziizɛ nii woni, ƃɔvɛlaale é ɣɛni ga nui nii wɛ̃ɛga é ɣɛni vaazu wulozu ga kɔwɔ wulu wɔɔ. Na ɣa é kɛɛni é ɣɛ tea, “Wo pɛ ge lei wo maa ɔ́ ziɣi.”

¹²Tei sa é te wɔwɔi maa wuoni é ná seɣei loo wɔ ba é zei kɔnɔ zei‐zuvɛ, é ɣɛni te ma, “?Nii gè kɛɛ ga wiɛ wo kwɛ̃ni?

¹³Wa tìlisu ga kala‐mɔɔ wiɛ tìli ga wo maliɣii. Wo woi ɣa ga gaama, ƃɔvɛlaale gà le.

¹⁴Tei tɔwɔ mu gè ga wo maliɣii gè ga wa ɣala‐mɔɔ nà wɔ gè wo wɔwɔ maa wua, wa ƃalaa pɛ kɛni wa ɣiini kɔwɔ maa wuo.

¹⁵Gè po‐kɔ̃ɔ dɛɛ ga wiɛ ga wo kɛ ga velei gè kɛɛ la ga wiɛ.

¹⁶Gè bo wiɛ ga gaama, tii‐ɣɛɛ nu lɛ leveni ná nu keea nu va ɔ́ nɔ ɣɛ ga nui tevegɛi é leve nui nii va é tévega.

¹⁷Ani wa niitiɛ wɛ̃ɛ na, tuuyiɛ ɣa ɣɛ wo ma. Na ɣa ga ani wa ziɛ na ga tiɛ.

¹⁸Wo ɣaazɔ lei gɔ̀ ɣɛ ʋaazu wo ma. Niitiɛ gè yee ƃakoga te va gè te wɛ̃ni. Nii ɣa ɣɛɛzu ga Gala kɔlɔi zu woi leve ma. Na ɣa ga woi nii é bosu ga ‘Nui é nà daa‐mii ŋɛnii miini é ɣaa lɔga gàazu.’

¹⁹Gà sa nii wosu wo ma ɔ́ vɛɛ ɣɛɛzu, kɛɛ ʋaa ma ani a ɣɛɛ na, wo siɣi ga gaama ga gà ga nui mazii gè le.

²⁰Gè bo wiɛ ga gaama, nui yá yee zei nui nii wu gà teve, manui yee zeiya bù. Nui wɔgi yá yee zei bù, é yee zeiya nui nii wu é tèvega.”

²¹Tei Ziizɛ bɔɛni ŋɛ na, zii‐zɛlɛ ge looni ma é ɣɛ ná kala dopoitiɛ ma, “Gè bo wiɛ ga gaama, wo ɣila ka vaazu wulozu ga kɔ̀wɔ wulu wɔɔ.”

²²Kala dopoitiɛ te wɛlɛni ɣiini gaazu va. Te ɣi gɛ lɛ vileni nui nii va Ziizɛ ɣɛni ʋaazu ma.

²³Kala dopoi ɣila ge ɣɛni na nii Ziizɛ wõiyai ɣɛ la. Tɔtɔgɛi ɣɛ Ziizɛ va.

²⁴Na ʋaa ma Saimɔ Pite wũ kɛɛni kala dopoi na ma kpɔkɔ ga nà Ziizɛ ɣaa zaɣa kɛ nui nii ʋaa ma é ɣɛni ʋaazu ma.

²⁵Na ma kala dopoi nii tɔtɔgɛi ɣɛ Ziizɛ va é ɣɛni ma, “Gé maliɣii, ƃɛɛ ve?”

²⁶Ziizɛ gaa wote é ɣɛ tea, “Gà kpoolo‐vɔi ɣale sɔyiɛ ɣa gè teve manui wɔ.” É zɛba sa é kpɔɔlo‐ʋɔɔ ƃuoi ɣale sɔyiɛi ɣa é teve Saimɔ Asikaalia dui Dudia wɔ.

²⁷Tei ƃɔɔ nɔ Dudia kpoolo‐ʋɔi miini, Seeta vilini kigi zu. Ziizɛ ɣɛ sa ma, “Nii è vaazu kɛɛzu, kɛ́ ɣaʋu.”

²⁸Tɔwɔ taitiɛ nɛpɛ te ɣɛni daa‐miigi‐wo‐suvɛ tɛ lɛ ŋɛni kwɛ̃ni ga nii é kɛɛni Ziizɛ yíɛ fai na wo Dudia ma.

²⁹Taniga te kaani ga tei tɔwɔ naʋolo ŋala‐ŋalagi ʋaa laa lɔgɛi ɣɛ Dudia va, na ma Ziizɛ ɣɛni ɣɛɛzu ma, “Nii maƃala de ma kui ʋaa ma, geea.” Ɔɔ ɣee ta é ɣɛni bosu ma ga é ŋɛni ta leve maa‐wõi vea wɔ.

³⁰Na ma tei sa Dudia é kpoolo‐ʋɔɔ ƃuoi zoni, é wuloni ŋetea ga maa ʋilea. É ɣɛni sa ga kpidi.

³¹Tei Dudia wuloni ŋetea, Ziizɛ ɣɛni tea, “Bɔɔlɔla ziitivɛ sa nu ƃuse lui ma. Saala laavɛ sa ƃalaa Gala ma nu ƃuse lui zaala zu.

³²Ani saala wɔ ka la na Gala ma nu ƃuse lui zaala zu, bɔɔlɔla ɣa ziiti ƃalaa pɛ nu ƃuse lui ma Gala saala zu. Gala ka bɔ́ɔlɔ ga maa ʋilea.

³³Dèa woloitiɛ, gà dɛ wo woba ga ta wolo. Wa gàa ziɛ. Kɛ̀ nii gè boni Dusiitiɛ ma gà sa bosu wo ma. Na ɣa ga vɛ gè liizu na wɛ lɛ zooga wɔ va na.

³⁴Gà tɔ niinɛ laazu wo ya. Tɔ ga wo wõi ga ɣiini. Kɛni wa wõi ga ɣiini è ɣɛ velei gè wõini la ga wiɛ.

³⁵Nii ɣa a kɛ nui pɛ ge wo wɛ̃ɛ ga nà kala dopoa. Na ɣa ga wõila ɣa ɣɛ na wo ya ɣiini faa ma.

³⁶Saimɔ Pite ɣɛni Ziizɛ ma, “Gé maliɣii, minɛ ɣa è liizu na?” Ziizɛ gaa wote zéea é ɣɛ ma, “Vɛ gè liizu na ɛ̀ lɛ zooga ɔ̀ daɣa bà nii zu. Kɛ̀ ná ta wolo ɣa kɛɛ na, yà sa yà daɣa bà.”

³⁷Pite ɣɛ ma, “Gé maliɣii, aƃɛi é kɛɛ gɛ̀ lɛ zooga gɔ̀ daɣa è va nii zu? Gà yɛʋui yɛ è ʋaa zu.”

³⁸Ziizɛ gaa zaɣa kɛ é ɣɛ ma, “?È yɛʋui yɛ fàa zu? Gè bo yìɛ ga gaama, tɛɛ zinɛ ɔ́ vɛɛ ƃɔɛzu, yà zakpe fàa ma ná zei‐zu ɣɛ sava.”