Read Loma JƆ̃ 15 Bible Online

JƆ̃ 15 - Loma bible

JƆ̃ 15

¹Ziizɛ ɣɛni tea, “Nà ɣa gè ga ŋasa ƃɔɔƃɔɔgi. Kèea Gala ka é ga ŋasai maazu‐vɛtɛ nui.

²Màwulo‐bai zɔi nɛpɛ ɛ́ lɛ ɣɛ vaazu, kèea Gala ka teve bà. Màwulo‐bai zɔi nɛpɛ yá ɣɛ vaazu, towaa gaa leve ga yíɛ vaa ga tamaa.

³Wo ɣaa levevɛ sa gòi gè boga wo ma.

⁴A yɛ vileni bà, nà wɔ gè yɛ vileni wo va. È ɣɛ velei nɔ ŋasa wulo‐bai lɛ zooga ɔ́ vaa la tɔ ƃɔɔ kɛni yá yɛ vileni ŋasai va, vele nɔ na wɛ lɛ zooga la wɔ vaa kɛni wɔ yɛ vileni bà.

⁵Nà ɣa gè ga ŋasai, wa wɔ wo ga mawulo‐baitiɛ. Nui nii yá yɛ vileni bà, nà wɔ gè vileni bá towa yá vaa ga tamaa. Ƃɔvɛlaale ani wa leve na bà, wɛ lɛ zooga wɔ faa ta nɛpɛ kɛ.

⁶Nui lɛ ɣɛ vileni bà, manui ɣa leve bà è ɣɛ ta ŋasa mawulo‐ba leve ba. Na ɣa ɣɛɛ na é ʋɔ. Ta ŋasa wulo‐bai natiɛ ɣaa lɛ ba te te vili ŋabu ɣa te ɣala.

⁷Ani wa ɣata na bà, gòitiɛ ɣatagɛi wo yii zu ƃalaa pɛ, nii nɛpɛ wo wõini a bo. Towaa ɣɛ wo vɛ.

⁸Velei saala ɣa laa la kèea ma tɔ ga wo ɣaa‐vaa lama wo ɣa. Vele wɔ ka na wa dɛɛ la ga wa ga nà kala dopoa.

⁹Gè wõini ga wiɛ é ɣɛ velei kèea Gala ge wõini la gàazu. A yɛ nà wõilai malogi zu.

¹⁰Ani wa ziɛ na ga nà tɔgitiɛ, wa yɛ nà wõilai malogi zu. Wa na ɣɛ è ɣɛ velei nɔ gè zia la ga kèea Gala na tɔgitiɛ gè ɣɛ ná wõilai malogi zu.

¹¹“Fai niitiɛ wogɛ bɛ̀ wo ma kɛɛ ʋaa ma nà kuu‐zu‐nɛi ɣɛ ga wa wuu‐zu‐nɛi. Na ɣa ɣɛɛ na wa wuu‐zu‐nɛi wɔ ge ziili kwɛ̃ɛ ma.

¹²Nà tɔgi ɣa ga nii. Na ɣa ga wo wõi ga ɣiini è ɣɛ velei gè wo wõini la.

¹³Wõila lɛ wɔɔlɔɔ nu nɛpɛ zeea ɔ́ leve nii va. Na ɣa ga nu yɛʋui yɛ ná siɛ‐puluitiɛ ʋaa zu.

¹⁴Ani nii gà bo wiɛ wa kɛɛ na, wa ɣɛ ga nà siɛ‐pulua.

¹⁵Gɛ̀ lɛ sa wo liliga ga tii‐ɣɛɛ vea, ƃɔvɛlaale tii‐ɣɛɛ nui lɛ nii wɛ̃ɛga ná nu keea nu ɣa ɣɛ kɛɛzu. Kɛ̀ gè wo liliga ga nà siɛ‐pulua, ƃɔvɛlaale nii ƃɔgɔpɛ kèea Gala ge boga mà gè kɛɛ wo kwɛ̃.

¹⁶Wɛ lɛ kùloni. Kɛ̀ gè wo wuloni gè yee ƃako wo va ga wo li wo mavaa loo wo ɣa é ɣɛ ga wo mavai nii yá yɛ wo ɣa, kɛɛ ʋaa ma nii nɛpɛ wa kèea Gala feli ma nà daa‐zeigi zu é fe wo ya.

¹⁷Nii ɣa gè deʋea gè da wo ya. Na ɣa ga wo wõi ga ɣiini.”

¹⁸Ziizɛ ɣɛni tea, “Ani zui zilivɛ ga wiɛ, a kwɛ̃ɛ ga é zilini gàazu ɔ́ vɛɛ zilizu ga wiɛ.

¹⁹È ɣɛ wo ɣɛni zui zu ʋaa ma, zui ɔ́ wõi ga wiɛ ga tei wo ga ná dɔ. Tei tɔwɔ wɛ lɛ zui zu ʋaa ma, kɛ̀ to mu gè yee ƃadoga wo va ga wo wulo su, zui ɣa zili ga wiɛ nii mazaƃu ma.

²⁰A ɣi zɛ woi zu gè boga wiɛ. Na ɣa ga, ‘Tii‐ɣɛɛ nui lɛ levega ná nu keea nu va.’ Ani te kpɔ̀ɔlani, ta wo ƃɔɔla ƃalaa pɛ. Ani te ziɛni ga gòi, ta ziɛ ga wo woi ƃalaa pɛ.

²¹Kɛ̀ ta nii ƃɔgɔpɛ kɛ ga wiɛ màzaƃu ma, ƃɔvɛlaale nui é tèvega tɛ lɛ kwɛ̃ni.

²²È ɣɛ gɛ̀ lɛ ŋɛni vaani gɔ̀ ƃɔɛ te wɔ, faa yowũ lɛ ƃega yɛ te va. Kɛ̀ tɔwɔ goo‐zu‐wulo‐kɛɛ lɛ te la ta ʋaa yowũi ʋaa ma.

²³Nui nii siliai gàazu, manui zilivɛ ga kèea Gala ƃalaa pɛ.

²⁴È ɣɛ gɛ̀ lɛ tiitiɛ ɣɛɛni te ɣaazu ɛe ga nii nu lɛ dɛ wɔlɔ‐wɔlɔ ta ɣɛɛni, faa yowũ lɛ ƃega ɣɛ te va. Kɛ̀ tɔwɔ te wɛlɛɛ gé va gá kèea Gala gé felegɔ te zili ga gíɛ.

²⁵Kɛɛvɛ ga woi nii leve ma ponɛi ta lɔ kɔlɔ zu. Na ɣa ga nii é wosu ga, ‘Te zilia gàazu, mawũ pɔ gɛ lɛ ba.’

²⁶Kɛ̀ kpɔ‐ba‐wo nui ɣa vaa na, na ɣa ga nui gè vaazu kulozu kèea Gala pɔ vɛ gè teve wo wɔ, towaa seele woo ʋe fàa ma. Kpɔ‐ba‐wo nui ɣa ga Gala baa ŋinɛgi é ga gaama‐lɛɛ nui nii yá wulo kèea Gala pɔ vɛ.

²⁷Wa ƃalaa pɛ wa seele woo ʋe fàa ma, ƃɔvɛlaale é ziɣi ƃɔɔ tɔɔ‐zei ʋolo ma wo ɣɛɛve bà.