Read Loma JƆ̃ 16 Bible Online

JƆ̃ 16 - Loma bible

JƆ̃ 16

¹“Gè nii ƃɔgɔpɛ boga wo ma ga wo mɛ lɛ ziɣi pele va.

²Ta wo wulo Gala‐feli wɔtaitiɛ te maʋaa va. Ƃɔɔƃɔɔ su siɛgi ɣa vaazu ga nui nɛpɛ yá ɣɛ wo vaazu manui yiɛ ka ga tɔ tii ɣɛɛzu Gala faa ma.

³Ta nii ɣɛ ƃɔvɛlaale tɛ lɛ dɛ kèea Gala kwɛ̃ni ɔ́ nɔ ɣɛ ga nà.

⁴Kɛ̀ gè niitiɛ woga wo ma kɛɛ ʋaa ma siɛgi ɣa ziiti na te va ga te nii ɣɛ ga wiɛ wo kwɛ̃ɛ ga gè fai niitiɛ woni wiɛ é vile te va.” Ziizɛ ɣɛni wɔnɔ ná kala dopoitiɛ ma, “Gɛ̀ lɛ niitiɛ woni wiɛ tɔɔ‐zei‐zuvɛ, ƃɔvɛlaale gè ɣɛni wo woba.

⁵Kɛ̀ gà sa liizu nui nii wɔ vɛ é tèveni. Tɔwɔ wo ta nɛpɛ gɛ lɛ gàa zaɣa kɛɛzu ga, ‘Minɛɛ è liizu na?’

⁶Kɛ̀ wo yii laa ʋega ga maa‐wõi, ƃɔvɛlaale gè fai niitiɛ woga wo ma.

⁷Na pɛ ge ɣɛɛvɛ gà gaamai wosu wo ma. Tɔ ga wa wulo‐su‐nu‐ma ʋaa ga gè li. Ƃɔvɛlaale gɛ̀ lɛ ɣɛ liini, kpɔ‐ba‐wo nui lɛ vaa wo wɔ. Kɛ̀ ani gà lii na, gà teve wo wɔ vɛ.

⁸Kpɔ‐ba‐wo nui ɣa vaa na, towaa kɛ zui loo ga ná laa ga nii é ga faa yowũ ta nii é ga gaama ta faa‐wo‐gaa‐leveai.

⁹Towaa kɛ zui loo ga faa yowũ ɣalama laa, ƃɔvɛlaale tɛ lɛ màʋaa ziɣini ga gaama.

¹⁰Towaa loo ga gaamai ɣalama laa, ƃɔvɛlaale gà liizu kèea Gala pɔ vɛ, wɛ lɛ pɛ̀tɛga.

¹¹Towaa loo ga faa‐wo‐gaa‐leveai, ƃɔvɛlaale fai yɛga zui nii mamasagi ma.

¹²“Faa lamaa ɣa dɛ dà ga gè bo wiɛ, kɛ̀ wɛ lɛ sa zia te wu.

¹³Gala baa ŋinɛgi é ga gaama‐lɛɛ nui yá vaa na, towaa pele wulo ga wiɛ gaamai ɣaazɔ zu. Ƃɔvɛlaale ɛ́ lɛ ƃɔɛ ga ƃɔɔ ɣaa‐ƃaa. Kɛ̀ nii nɛpɛ yá mɛni towaa yá bo. Niitiɛ te vaazu ɣɛɛzu, towaa te wo wiɛ.

¹⁴Towaa màʋaa wɔɔlɔ, ƃɔvɛlaale nii pilegɛi màʋaa va towaa bo wiɛ.

¹⁵Niitiɛ ɣaazɔ te vilegɛi kèea Gala ba te vilegɛ bà. Na ma gè boga ga nii pilegɛi màʋaa va towaa bo wiɛ.”

¹⁶Ziizɛ ɣɛni tea, “Ná ta wolo ɣa kɛɛ na wɛ lɛ sa pɛ̀tɛga. Ná ta wolo ɣa kɛɛ na wɔnɔ wa pɛ̀tɛ.”

¹⁷Ná kala dopoitiɛ taniga te ɣɛ ɣiini ma, “Zɛƃɛ ɣa ga nii é boga de ma ga ‘Ná ta wolo ɣa kɛɛ na wɛ lɛ sa pɛ̀tɛga. Ná ta wolo ɣa kɛɛ na wɔnɔ wa pɛ̀tɛ’? Zɛƃɛ ɣa ga nii ƃalaa é boga de ma yíɛ ɣɛ tea, ‘Ƃɔvɛlaale gà liizu kèea Gala pɔ vɛ’?”

¹⁸Te ɣɛ tea, “Woi nii ga ‘Ná ta wolo ɣa kɛɛ na’ su‐wulo‐zu ɣa zéea ga minɛ? Dɛ lɛ goi nii zu‐wulo‐zu wɛ̃ni zéea.”

¹⁹Ziizɛ kwɛ̃ɛni ga te ɣɛni wõi ɣɛɛzu ga te gaa zaɣa kɛ. Na ʋaa ma é ɣɛni te ma, “?Woi nii gè boga ga ‘Ná ta wolo ɣa kɛɛ na wɛ lɛ sa pɛ̀tɛga. Ná ta wolo ɣa kɛɛ na wɔnɔ wa pɛ̀tɛ,’ su‐wulo‐zuvɛ ɣa wo maɣaa‐zaɣa‐kɛɛ wosu ga ɣiini?

²⁰Gè bo wiɛ ga gaama, wa kpee loo wiɛ maa wõi, kɛ̀ zui ɣa kuu‐zu‐nɛɛ wulo. Wo maa ɣa wõi, kɛ̀ wa maa‐wõi ɣa wote ga kuu‐zu‐nɛɛ.

²¹Ŋaza nu ɣa ɣɛ na kuu‐zu‐wãla zu, maa ɣa wõi, ƃɔvɛlaale siɛgi ziilia ba. Kɛ̀ yá dui ɣaa na, kí gɛ lɛ sa yɛga kɔnɔ kuu‐zu‐wãlai zu kuu‐zu‐nɛɛ mazaƃu ma yá ɣɛ zéea nu ƃuse ɣaa ʋai ma zui zu.

²²Na ma maa‐wõi loovɛ sa wiɛ nii zu. Kɛ̀ gà wɛlɛ wiɛ kɔnɔ wo wuu zu nɛɛ. Nu nɛpɛ gɛ lɛ wa wuu‐zu‐nɛi wuloa wo ya.

²³Nà maʋoloi wɛ lɛ ŋɛni ta nɛpɛ felia mà. Gè bo wiɛ ga gaama, wa ŋɛni ta nɛpɛ feli na kèea ma, towaa fe wo ya nà daa‐zeigi zu.

²⁴É yɛga su é ziili vɛ yɔɔzu ma, wɛ dɛ ŋɛni ta nɛpɛ felini nà daa‐zeigi zu. A feli wo, wa maŋɛnii zɔlɔ wo kɛɛ ʋaa ma wa wuu‐zu‐nɛi ziili kwɛ̃ɛ ma.”

²⁵Ziizɛ ɣɛni tea, “Gè nii woga wo ma sakpega zu. Siɛgi ɣa vaazu ga gɛ̀ lɛ sa ƃɔɛ wo wɔ sakpe goo zu. Kɛ̀ gà kèea Gala maʋai wo wiɛ ga gaa‐wodo vele.

²⁶Siɛgi na zu wa feli wo nà daa‐ziegi zu. Gɛ̀ lɛ bosu wiɛ ga gà kèea Gala feli wo ʋaa ma.

²⁷Toku ge zei ga kèea Gala kagi é wo wõini, ƃɔvɛlaale wo ẁõini wo siɣia ga gaama ga sìɣivɛ pɔ́ vɛ.

²⁸Gè ziɣini kèea wɔ vɛ gè va zui zu. Gà sa wulozu zui zu gè li wulu pɔ́ vɛ.”

²⁹Ná kala dopoitiɛ te ɣɛ tea, “Ƃaa, yà sa ƃɔɛzu ga gaa wodoa. Ɛ̀ lɛ bosu sakpe goo nɛpɛ su!

³⁰Gé kwɛ̃ni sa ga è fai ƃɔgɔpɛ kwɛ̃ni. Nu ta nɛpɛ na gaa‐zaɣa‐kɛi lɛ yìɛ. Nii kɛɛ gé siɣi ga gaama ga è ziɣivɛ Gala pɔ vɛ.”

³¹Ziizɛ te woi ɣaa woteni é ɣɛ te ma, “?Wo siɣia sa ga gaama?

³²Siɛgi ɣa vaazu — to mu fɔlɔ paavɛ sa — ga wo yɛzɛ. Wo ɣile‐giledai wa ɣɛ wa vɛlɛitiɛ wu. Wa leve bà, nà ɣilekpu gè yɛ wulu. Na ƃalaa ɣɛɛvɛ gɛ̀ lɛ ɣɛɛ wulu nà ɣilekpu. Toku ge zei ga kèea Gala ka kòba.

³³Gè nii woga wiɛ ga zii‐laa ɣɛ wo ya de ɣɛɛ vele ma su ɣilekpu da wani. Faa ƃoei ɣa zei wo ma zui zu. Kɛ̀ a wuu zu nɛɛ. Zèe levega zui va.”