Read Loma JƆ̃ 2 Bible Online

JƆ̃ 2 - Loma bible

JƆ̃ 2

¹Folo felegɔ wuloni su sava kelei ma ŋaza‐wulo ʋaa ɣɛni Keena lai zu, Geealali yui zu. Ziizɛ dee ɣɛni na.

²Ziizɛ ƃɔga ná kala dopoitiɛ te te lilini kui ma ƃalaa pɛ.

³Tei ŋasa vai mayiɛi ƃeani, Ziizɛ dee ɣɛni ma, “Ŋasa vai mayiɛi ta lɛ te ya.”

⁴Ziizɛ ɣɛ ma, “Ná yɛ zèea. Siɛgi lɛ dɛ ziitini fàa ma.”

⁵Dee ɣɛ tii‐ɣɛɛ veaitiɛ ma, “Nii nɛpɛ yá bo wiɛ a kɛ.”

⁶Kwɔti yiɛ liɣi lɔzita ɣɛni zeini na Dusiitiɛ maa‐ziɣi yekegi ʋaa ma Gala gaazu. Diɣi gila gɔ zoo é ɣɛ ga tĩi sala zee felegɔ ɔɔ zee saagɔ.

⁷Ziizɛ ɣɛni tii‐ɣɛɛ veaitiɛ ma, “A diɣiitiɛ laa ʋe ga ziɛ.” Te ziɛ wuuni te zu é te laa ʋe nɛŋɛ‐nɛŋɛ.

⁸É ɣɛ te ma, “A ta zaɣa su wo lii la kuu‐maazu nui wɔ.” Te li sa la.

⁹Tei kuu‐maazu nui ziɛi wɔ̃ɔni maa ʋeligɛi sa ga dɔɔ, tɔwɔ ɛ́ lɛ ŋɛni kwɛ̃ni ga vɛ é wuloa na velei ƃalaa kwɛ̃ɛgɛi ɣɛ la tii‐ɣɛɛ veaitiɛ vɛ, é ŋaza keea nui lilini.

¹⁰É ɣɛni ma, “Nu pɛ ka dɔɔ nɛɛ‐nɛɛgi ve ga maa wũ. Numaa ta kpoale na ga tamaa é zɔi ʋe sa. Kɛ̀ è manɛɛ‐nɛɛgi yɛga na wulu é yɛsu vɛ yɔɔzu ziilia.”

¹¹Nii Ziizɛ kɛɛni Keena, Geealali yui zu, é ɣɛni ga faitiɛ é te ɣɛɛni ga é dɛ ga seelea te mamaa wũgi. Fai nii na bɔɔlɔlai ɣaa wodoni. Ná kala dopoitiɛ te maʋaa ziɣi sa ga gaama.

¹²Tei sa nii wuloni ba, Ziizɛ liini Kapɔɔnia ta dee é vɛɛ deɣeitiɛ va ta ná kala dopoitiɛ. Te kuu fele kuloni na.

¹³Dusiitiɛ ta leve‐maazu wui maa ƃuai sa ɣɛ. Ziizɛ zɛba é li Yɛlusulɛɛ.

¹⁴É wɛlɛni numaitiɛ va tiɛ nikɛ zinɛa zɔ̃wɔ wulo Gala‐feli wɔta walai wu ta baalaga é vɛɛ ƃiiƃɔkua va. É wɛlɛni pɛ naʋolo‐maa‐ʋeli beaitiɛ va te ta lii ma.

¹⁵É kɔlɔ ƃaɣa ƃɛtɛni ga galu é te ƃɔgɔpɛ te ƃɛ ta ta vaalagitiɛ ƃɔga ta nikɛ zinɛitiɛ. É naʋolo‐maa‐ʋeli beaitiɛ ta naʋoloi wuuni é ta leeveitiɛ laa vɛɛ.

¹⁶Niitiɛ te ɣɛ ƃiiƃɔkui zɔ̃wɔ wulozu é ɣɛ natiɛ ma, “A ŋɛnii niitiɛ ziɣi. Wɛ lɛ kèea Gala na pɛlɛi ɣɛɛ ga podi‐lɔɔ vɛlɛ.”

¹⁷Ná kala dopoitiɛ te ɣi gaa ziɛni su ga ponɛvɛ Gala kɔlɔi zu mawoi ga, “Nà wõilai yà vɛlɛi ʋaa ma towaa zii ɣala è ɣɛ ŋabu.”

¹⁸Dusiitiɛ te ɣɛni sa ma, “Zɛƃɛ ɣa yà kɛ è dɛ ga gíɛ ga seele nii ɣɛɛ ʋai ma yìɛ?”

¹⁹Ziizɛ gaa wote te ya é ɣɛ tea, “A Gala‐feli wɔta walai nii wolo. Gà to folo saagɔ yee wu.”

²⁰Dusiitiɛ wɔ te ɣɛ ma, “Te kɛɛni Gala‐feli wɔta walai nii losu ga kwena zee naagɔ kai lɔzita, è ɣɛ yà to ga folo saagɔ?”

²¹Kɛ̀ Gala‐feli wɔta walai é ʋaani ma é ɣɛni ga dɔ́tɔi.

²²Na ma tei é wu ziɣini saa ya, ná kala dopoitiɛ te ɣi ge ɣɛnii su ga é nii woni. Nii ponɛi Gala kɔlɔi zu é vɛɛ Ziizɛ woi va te zɛba sa te natiɛ ziɣi ga gaama.

²³Tei Ziizɛ ɣɛni Yɛlusulɛɛ teve‐maazu wui zu, nu lamaa te ná daa‐zeigi ʋaa ziɣini ga gaama. Na ɣa ga tei te wɛlɛni faitiɛ va é te ɣɛɛni é te lɛ ga seelea.

²⁴Kɛ̀ Ziizɛ lɛ ƃɔɔ laa looni ga tiɛ.

²⁵Ƃɔvɛlaale é ɣɛni ga nui pɛ kavele wɛ̃ɛga. Kpala lɛ ŋɛni ma ga kɛni dɛ nu nɛpɛ ka seele woo ʋe nu ƃuse ʋaa ma, ƃɔvɛlaale tɔ ƃɔɔ é nu ɣi su ʋaa ɣavele wɛ̃ni.