Read Loma JƆ̃ 20 Bible Online

JƆ̃ 20 - Loma bible

JƆ̃ 20

¹Meele Mɛdaliini zubuni kabai la ga dɔwɔi maʋolo maa wũgi. Kpidi vɛi ɣɛ dɛ. É wɛlɛni ná va é kwɛ̃ sa ga kwɔtii ziɣivɛ kaba yeɣei la.

²Na ʋaa ma é ƃizeni é li Saimɔ Pite wɔ vɛ ta kala dopoi zɔi Ziizɛ wõiyai ɣɛ la é ɣɛ te ma, “Te de maliɣii wuloa kabai zu. Vɛ te daa na gɛ́ lɛ ná wɛ̃ni.”

³Pite ƃɔga kala dopoi zɔi te wulo sa te li ga kabai la vele.

⁴Te felegɔ pɛ te ƃizeni, kɛ̀ kala dopoi zɔi Pite yɛni é ziiti tuo kabai la.

⁵Tei é maa vɛɛni ga é wɛlɛ zeɣei zu va, é wɛlɛni gbazagitiɛ va wuuni na. Kɛ̀ ɛ́ lɛ lɔɔni su.

⁶Na ɣɛɛzu Saimɔ Pite yɛ fo‐fo va é va é lɔ kaba yeɣei zu é gbazagitiɛ vɛtɛ wuuni

⁷ta gaazu‐ƃale seɣei é ɣɛni Ziizɛ wũmɔ. Gaazu‐ƃale seɣei ƃɔga gbazagitiɛ tɛ lɛ ŋɛni wuuni ŋada ɣila, kɛ̀ gaazu‐ƃale seɣei maa ƃitigɛi ɣɛ é wuuni ga tee.

⁸Kala dopoi nii sa é ziitini kaba yeɣei la ga maa wũ tɔ ƃalaa pɛ é lɔɔni su. Nii é ɣɛɛni é pɛtɛ é siɣi ga gaama.

⁹Ƃɔvɛlaale tɛ lɛ ŋɛni dɛ Gala kɔlɔi zu woi wɛ̃ni, na ɣa ga kɛni ɔ́ wu ziɣi saa ya.

¹⁰Kala dopoitiɛ te li sa wulu ta vɛlɛitiɛ wu.

¹¹Kɛ̀ Meele loni kabai la yíɛ kpee loo. Tei é ɣɛni kpee loozu, é maa vɛɛni ga é wɛlɛ kabai zu va.

¹²É wɛlɛni Gala ta ɣeela felegɔ va seɣe wele ge te ma te zeini vɛ Ziizɛ mawomai ɣɛni laani na. Gila ge ɣɛni ná wũ tuovɛ, gila ge ná wɔwɔ lɔɔvɛ.

¹³Te ɣɛni Meele ma, “Ŋàza nu, zɛƃɛi è maƃee loozu?” É ɣɛ te ma, “Màliɣii ɣa te lia la. Vɛ te daa na gɛ̀ lɛ ná wɛ̃ni.”

¹⁴Tei Meele nii woni, é liteni é wɛlɛ Ziizɛ va loni, kɛ̀ lɛ ŋɛni kwɛ̃ni ga Ziizɛ ɣɛni le.

¹⁵Ziizɛ ɣɛni ma, “Ŋàza nu, zɛƃɛ ƃee ɣa è toozu? Ƃɛ ɣa è gaa ziɛzu?” É ɣɛni Ziizɛ ɣaazu ga ŋadavɛ‐maazu‐vɛtɛ nu. Na ma é ɣɛni ma, “Kèea, ani è pomai ziɣia è lii la, vɛ è daa na ná lɛ gàazu. Na ɣa ɣɛɛ na gà siɣi gè lii la.”

¹⁶Ziizɛ ɣɛ tea, “Meele.” Meele lite é bo Hiiƃulu woi zu é ɣɛ ma, “Laboni.” Nii zu‐wulo‐zu ɣa ga “Kala‐mɔi”.

¹⁷Ziizɛ ɣɛni ma, “Mɛ lɛ ɣili bà, ƃɔvɛlaale gɛ̀ lɛ dɛ lɛɛni kèea Gala pɔ vɛ. Kɛ̀ li bàitiɛ wɔ vɛ é bo te ma ga gà lɛɛzu kèea wɔ vɛ nii é ga wo ɣeeai, nii é ga nà Galagi é wɔnɔ ga wa Ɣalagi.”

¹⁸Meele Mɛdaliini liini é ɣɛ kala dopoitiɛ ma, “Gè wɛlɛɛ de maliɣii va.” É bo sa te ma ga Ziizɛ ɣa é fai niitiɛ woga ma.

¹⁹Kpɔkɔi na, na ɣa ga folo maa wũgi é dɔwɔi zu maƃɔkɔi, kala dopoitiɛ te ɣaa lɛi ɣɛ ba pɛlɛ ta wu pulu ƃakogɛi te ma, toku ge zei Dusiitiɛ ta luo‐bai va. Ziizɛ lɛ sa bu é lo te zaama é ɣɛ tea, “Zii‐laa ɣa ɣɛ wo ya.”

²⁰Tei é nii woni, é yeetiɛ lɛɛni ga tiɛ ta kakamavɛ. Tei kala dopoitiɛ te wɛlɛni de maliɣii va, te wuu zu nɛɛni sa.

²¹Ziizɛ ɣɛ wɔnɔ te ma, “Zii‐laa ɣa ɣɛ wo ya.” È ɣɛ velei kèea Gala ge tèvega la, vele nɔ na gè wo levesu la.”

²²Tei é nii woni, é yɛʋuuni te ma é ɣɛ te ma, “A yee zei Gala baa ŋinɛgi wu.

²³Ani wa nu ta nɛpɛ na faa yowũitiɛ zu ʋaa yɛ na, su‐ʋaa‐ɣɛga ɣa na. Ani wɛ lɛ ɣɛ nu ta nɛpɛ na faa yowũitiɛ zu ʋaa yɛni, a kɛ tii su ʋaa lɛ yɛni.”

²⁴Taamɔ nii tɔ tili ga Yoogi, é ga nu puugɔ kai felegɔitiɛ te ɣila, ɛ́ lɛ ŋɛni kala dopoitiɛ zaama tei Ziizɛ vaani te wɔ.

²⁵Na ʋaa ma kala dopoi zɔitiɛ te ɣɛni Taamɔ ma, “Gé wɛlɛɛ de maliɣii va.” Kɛ̀ é ɣɛni te ma, “Kɛni gà wɛlɛ meele wogi va zéeavɛ gè yee ƃeɣa vɛɛ meele wogavɛ gè yee lɔ kakamavɛ, na laale gɛ̀ lɛ siɣia ga gaama.”

²⁶Tei folo lɔsava wuloni su, kala dopoitiɛ te ɣɛni pɛlɛi wu kɔnɔ Taamɔ sa te zaama. Pɛlɛi wulu ƃakogɛi ɣɛ, kɛ̀ Ziizɛ lɛɛni bu é lo te zaama é ɣɛ tea, “Zii‐laa ɣa ɣɛ wo ya.”

²⁷É ɣɛ sa Taamɔ ma, “Yee ƃeɣai lɔ vɛ è wɛlɛ zèeavɛtiɛ va è yee zakpa è dɔ kàkamavɛ. Mɛ lɛ sakpe, kɛ̀ siɣi ga gaama.”

²⁸Taamɔ gaa wote zéea é ɣɛ ma, “Màliɣii, nà Galagi!”

²⁹Ziizɛ ɣɛ ma, “È siɣia ga gaama ƃɔvɛlaale è pɛ̀tɛga, kɛlɛi? Tuuyiɛ ɣa zɔitiɛ ma tɛ dɛ pɛ̀tɛni kɛ̀ te siɣia ga gaama.”

³⁰Ziizɛ é faa zii ƃalaa tamaa ɣɛɛni ná kala dopoitiɛ ɣaazu é dɛ ga seelea. Fai niitiɛ tɛ lɛ wonɛni kɔlɔi nii zu.

³¹Kɛ̀ niitiɛ te wonɛi kɔlɔi nii zu, te wonɛvɛ ga wo siɣi ga gaama ga Ziizɛ ɣa é ga nui Gala zee ƃakogɛi ba ga masagi é ga Gala dui. Na ɣa ɣɛɛ na máʋaa‐ziɣi vele ma wiɛ ga gaama wo zɛʋu maa zɔlɔ wo ná daa‐zeigi zaala zu.