Read Loma JƆ̃ 4 Bible Online

JƆ̃ 4 - Loma bible

JƆ̃ 4

¹Ziizɛ ɣɛni wulu vea lamaa zɔlɔ wosu é leve Jɔ̃ va yíɛ bataize ɣɛ ga tiɛ.

²To mu Ziizɛ tɔ ɣagi lɛ ŋɛni bataize ɣɛɛni, kɛni nɔ ná kala dopoitiɛ.

³Tei Ziizɛ kwɛ̃ɛni ga Favile‐siitiɛ te nii mɛniga, é ziɣini Yudiiya yui zu é li wulu Geealali yui zu.

⁵Na ʋaa ma é vaani Sameelia lai ta zu daa ga Sekaa. Na ɣa ga zui Yeekɔ teveni dúi Zoosɛ wɔ kobavɛ.

⁶Yeekɔ na ziɛ yeɣei ɣɛni na. Ziizɛ ƃɔlɔni sa ná siɛi zu. Na ma é zeini ziɛ yeɣei na woba. É ɣɛni ga folo gaa‐lɔ‐ga laa yɔɔzu.

⁷Sameelia ŋaza nu ta vaani ziɛ ɣalama. Ziizɛ ɣɛ ma, “Kɔ̀ ga ziɛ.”

⁸Ƃɔvɛlaale Ziizɛ na kala dopoitiɛ te liini taa zu mii ŋɛni geeazu.

⁹Sameelia ŋaza nui ɣɛ sa Ziizɛ ma, “Tɔ ɣɛ le è ga Dusi nu è fèlia ziɛ ma, nà wɔ gè ga Sameelia nu?” Ƃɔvɛlaale Dusiitiɛ tɛ lɛ ƃega laa mi Sameelia veaitiɛ ta ŋɛni yãka zu.

¹⁰Ziizɛ gaa woteni zéea é ɣɛ ma, “È ɣɛ è ɣɛni ga faa‐nɛi nii wɛ̃ɛga yá wulo Gala zeea, è nui nii wɛ̃ɛ wɔnɔ é ɣɛɛzu è ma, ‘Kɔ̀ ga ziɛ,’ ɔ̀ gaa zaɣa kɛ, tɔwɔ é zeʋu‐ʋee yiɛi ʋe è ya.”

¹¹Ŋaza nui ɣɛ ma, “Kèea, ŋɛni nɛpɛ gɛ lɛ è ya ga è saɣa la, ziɛ yeɣei wɔ suwuvɛ. Minɛ ɣa yà zɛʋu‐ʋee yiɛi na zɔlɔ wo na?

¹²?È levegɛ gé ɣeea Yeekɔ nii va é ziɛ yeɣei ʋeeni gé ya? Tɔ ƃɔɔ é su yiɛi ta ƃoaleni é vɛɛ deaitiɛ va ta ná to ŋɛniitiɛ.”

¹³Ziizɛ ɣɛ ma, “Taitiɛ nɛpɛ te ziɛ yeɣei nii ƃoalezu, kpoale‐wõi ɣa te zo kɔnɔ.

¹⁴Kɛ̀ nui nɛpɛgi yá ziɛi ƃoale gà teve pɔ́, kpoale‐wõi lɛ sa wɔlɔ‐wɔlɔ soga. Ziɛi gà teve manui wɔ towaa ɣɛ zéea ga ziɛ ɣai yíɛ lɛ kpɔ̃ɔ é yɛsu é zée la zɛʋui nii ya kwɛ̃ɛ gɛ lɛ ba.”

¹⁵Ŋaza nui wɔ ge ɣɛ ma, “Kèea, ziɛi nii ʋe zèea ga kpoale‐wõi ge mɛ lɛ sa sò ɔ́ nɔ ɣɛ ga gè va ziɛ ɣalama.”

¹⁶Ziizɛ ɣɛ ma, “Li è è wɔɔ nu lili wa tɔ wo va.”

¹⁷Ŋaza nui gaa wote zéea é ɣɛ ma, “Zini gɛ lɛ bɛ̀.” Ziizɛ ɣɛ ma, “Nii è boga ga ‘Zini gɛ lɛ bɛ̀,’ è woi ɣa su ga gaama.

¹⁸Ƃɔvɛlaale è zini seila ɣɛɛ loolu. Nii è zéea nii zu è zini taale. È na woni ga gaama.”

¹⁹Ŋaza nui ɣɛ ma, “Kèea, gè gaa ɣaa ga yà ga Gala daa woo‐wo nu.

²⁰Gé ɣeeani te Gala felini gizii nii ma. Wai wo ga Dusiitiɛ wa bo ga Yɛlusulɛɛ ɣa maa nɛi nu Gala feli na.”

²¹Ziizɛ ɣɛ ma, “Ŋàza nu, la gàazu. Siɛgi ɣa vaazu ziilizu ga wɛ lɛ de ɣeea Gala felia gizii nii ma ɔ́ nɔ ɣɛ ga wo feli Yɛlusulɛɛ.

²²Nii wo felizu wɛ lɛ kwɛ̃ni. Gá dɛi nii gé felizu gé kwɛ̃ni. Ƃɔvɛlaale balolai wulovɛ gé wɔ vɛ, gái gé ga Dusiitiɛ.

²³Kɛ̀ siɛgi ɣa vaazu — to mu fɔlɔ paavɛ sa ga ƃɔɔƃɔɔ su — ga Gala‐feli vea ƃɔɔƃɔɔga tiɛ de ɣeea Gala feli ta ɣi‐gaa‐ziɛi zu tiɛ kɛ gaamai zu. Ƃɔvɛlaale na ɣavele veaitiɛ ɣa de ɣeea Gala ge te ɣaa ziɛzu ga tiɛ feli.

²⁴Gala ka ga ki‐gaa‐ziɛ‐ʋee ɣaa‐ƃaa. Taitiɛ ta yɛ felizu, kɛni ta feli ta ɣi‐gaa‐ziɛi zu tiɛ kɛ gaamai zu.”

²⁵Ŋaza nui ɣɛni ma, “Gè kwɛ̃ni ga nui Gala zee ƃakogɛi ba ga masa tɔ vaazu. Na ɣa ga nui ta tili ga Kolai. Yá vaa na, towaa fai ɣaazɔ lɛ ga gíɛ.”

²⁶Ziizɛ ɣɛ ma, “Nài gè ƃɔɛzu è wɔ, nà vee de.”

²⁷Na ɣɛɛni nɔ kpẽi, ná kala dopoitiɛ tiɛ va. Ta ŋaza nui te yɛpɛ ʋai vilini te ma ga ki‐gaa‐ziɛ. Kɛ̀ ta nɛpɛ gɛ lɛ ɣɛni ma, “Zɛƃɛ ɣa è wõini?” ɔɔ “Zɛƃɛi é kɛɛ wa ŋaza nui wiɛ yɛpɛ?”

²⁸Na ʋaa ma ŋaza nui ná ziɛ liɣii yɛni na é lɛ taa zu é ɣɛ numaitiɛ ma,

²⁹“A va wo wɛlɛ zunui va é fai ƃɔgɔpɛ boga mà gè kɛɛ wɔlɔ.?Nii ɣa kilaa é ga Kolai?”

³⁰Te wuloni tai va te va Ziizɛ wɔ vɛ.

³¹Tei nii ɣɛɛni, ná kala dopoitiɛ te maa nɛɛnɛni tiɛ ɣɛ ma, “Kala‐mɔi, laa mii na.”

³²Kɛ̀ é ɣɛni te ma, “Mii ŋɛni ka zèea ga gè mi nii wɛ lɛ faa wɛ̃ni ɔ́ vile ba.”

³³Na ma kala dopoitiɛ te ɣɛni ɣɛɛzu ɣii ma, “?Nu ta nɛpɛ ge vaa kilaa pɔ́ ga daa‐mii ŋɛni?”

³⁴Ziizɛ ɣɛ te ma, “Nà mii nɛnigi ɣa ga nui é tèvega gè zíi‐mai ɣɛ gè ná tii laa wulo.

³⁵Kɛ̀bɛ wa ɣɛ tea, ‘Yalo naagɔ ɣa dɛ é yɛga na wulu mɔlɔ‐leve ziɛgi yìɛ ziiti,’ kɛlɛɛ? Gè bo wiɛ, a wũ bu ziɣi lɛɛ wo wɛlɛ velei va mɔlɔi ƃoieya la sa kpalagi zu teve ʋaa ma.

³⁶Nui yá teve towaa wulo su nu ma yíɛ su ŋɛnii ɣaa lɛ ba zɛʋui nii zɔlɔ‐wo faa ma kwɛ̃ɛ gɛ lɛ ba. Nui yá bili ta teve nui ta ƃɔ te kuu‐zu‐nɛɛ wulo.

³⁷Woi nii ta bo, vɛ ƃo pa ka pilegɛi na su. Na ɣa ga ‘Nui ta ɣa bili, ta ƃɔnɔ pɔ ge teve.’

³⁸Gè wo levega ga wo vɛ leve wɛ lɛ mɔɔlɛni na. Zɔitiɛ taniga te mɔɔlɛni. Kɛ̀ wo wuloa ta lii zu nu ma.”

³⁹Sameelia vea lamaa te wuloni tai na zu te Ziizɛ maʋaa ziɣi ga gaama ŋaza nui na seele woi zu é feeni yíɛ ɣɛ tea, “Fai ɣaazɔ gè kɛɛ wɔlɔ é te woga mà.”

⁴⁰Na ʋaa ma tei Sameelia veaitiɛ te vaani Ziizɛ wɔ vɛ te boni ma ga ta tiɛni te yɛ na. È kɛɛni na ga folo felegɔ.

⁴¹Nu lamaa te vɛɛni te va te Ziizɛ maʋaa ziɣi ga gaama Ziizɛ woi mazaƃu ma.

⁴²Te ɣenii ŋaza nui ma, “È woi lei sa gɔ́ ɣɛ siɣizu la ga gaama. Ƃɔvɛlaale gé mɛniga gá ƃɔɔ gé kwɛ̃ɛ ga ƃɔɔƃɔɔ su ga zui‐wulo‐faa‐zu nui ɣa.”

⁴³Tei folo felegɔi leveni, Ziizɛ ziɣini Sameelia é li Geealali.

⁴⁴Ƃɔvɛlaale tɔ ƃɔɔ é mazeele woo ʋeeni ga wũfe‐ma lɛ Gala daa woo‐wo nu ma ná zui zu.

⁴⁵Na ʋaa ma tei é vaani Geealali, Geealali veaitiɛ te yee zeini bu, ƃɔvɛlaale te wɛlɛni fai ƃɔgɔpɛ ba é kɛɛni kuu‐ɣaa‐zuvɛ Yɛlusulɛɛ. Toku ge zei ga ta ƃalaa te liini kui ma.

⁴⁶Na ma é vaani kɔnɔ Keena lai zu Geealali yui zu vɛ é ziɛi woteni na ga dɔɔ. Gɔmɛti nu ta ɣɛni Kapɔɔnia duu zunui yìɛ zeeƃɛ.

⁴⁷Tei é mɛnini ga Ziizɛ ziɣia Yudiiya yui zu é va Geealali yui zu, é liini é pee ʋe bɛ́ ga é va é dui valo, ƃɔvɛlaale é ɣɛni sa saa yeɣe la.

⁴⁸Na ma Ziizɛ ɣɛni ma, “Kɛni wa wɛlɛ faaniga va te ɣɛ ga seelea ta faa maa wɔlɔ‐wɔlɔga. Na laale wɛ lɛ màʋaa ziɣia ga gaama.”

⁴⁹Gɔmɛti nui ɣɛ ma, “Kèea, va bɛ̀, dùi mɛ lɛ va zaazu.”

⁵⁰Ziizɛ ɣɛni ma, “Li, è lui ɣa valozu.” Nii Ziizɛ boni, zunui siɣini ga gaama é ná dii wo.

⁵¹Tei é ɣɛni pelei ma yíɛ li, ta ná tii‐ɣɛɛ veaitiɛ te wũini, natiɛ te bo ma ga dui ɣa sa valozu.

⁵²Na ma é te ɣaa zaɣa kɛɛni siɛgi ʋaa ma é baloi‐woga lɔɔ zeini la. Te ɣɛ ma, “Kɔɔlɛ ʋilei ziɣini ba ŋina tei foloi kɔ galeni ga ta wolo.”

⁵³Lopoi keea kwɛ̃ɛni ga siɛgi na ɣa Ziizɛ ɣɛni la ma, “È lui ɣa valozu.” Tɔ ɣagi é Ziizɛ maʋaa ziɣini sa ga gaama ta pɔ́ pɛlɛ wu vea ɣaazɔ.

⁵⁴Nii ɣɛni ga fai fele kelei Ziizɛ kɛɛni ga é dɛ ga seele siɣiai ma Yudiiya yui zu é va Geealali.