Read Loma JƆ̃ 5 Bible Online

JƆ̃ 5 - Loma bible

JƆ̃ 5

¹Tei sa nii wuloni ba, Dusiitiɛ ta wuu‐ɣaa ʋai ɣɛni Yɛlusulɛɛ. Ziizɛ liini na.

²Yɛlusulɛɛ lai maziɣigi laa vele‐zuvɛ ta ɣɛni na ná laa ga baala kpo zeɣei la. Kpĩi ta ɣa kpo zeɣei na wobavɛ. Kpĩigi na ná daa‐zeigi ɣa ga Bɛzata Hiiƃulu woi zu. Kwɔta looluo litegɛi ɣɛ ma.

³Nu lama‐lamaga te ɣɛni wuuni kwɔta looluoi natiɛ wu te ga seeƃɛ vea te ga tɔbɔ‐zu‐ba vea è ɣɛ velei gaazu‐wuu vea te la, mɛlɛ‐ŋɛlɛ bea, ta zee‐za‐ma vea ɔɔ kɔwɔ‐za‐ma vea. [Te ɣɛni ná tiɛ kpĩigi lubusu maa kpowũ,

⁴ƃɔvɛlaale Gala na keela woo‐wo nu ɣila ɔ́ vile kpĩigi wu siɛ ta zu é túbu. Nui nɛpɛ ɔ́ vile bú ga maa wũ, seeƃɛi nɛpɛ ɔ́ ɣɛ bá ɔ́ valo.]

⁵Zunu ɣila ge ɣeni na é kɛ zeeƃɛzu ga kwena zee saagɔ kai lɔsava.

⁶Tei Ziizɛ pɛtɛni laani na é kwɛ̃ ga é lebini seeƃɛ zu é ɣɛni ma, “È wõini è valo?”

⁷Seeƃɛ nui gaa woteni zéea é ɣɛ ma, “Kèea, kpĩigi ɣa lubu na, nu lɛ bɛ̀ ɔ́ sèi bu. Gà ɣɛ na liizu ga gè vile kpĩigi wu, nu ta ƃɔnɔ ka vile bu tùo.”

⁸Ziizɛ ɣɛ ma, “Wu ziɣi è yà zaƃai ziɣi è ziɛ.”

⁹Zunui valoni sa ga maa ʋilea é ná saƃai ziɣi é ziɛ. Foloi na ɣɛni ga doowo folo.

¹⁰Na ʋaa ma zunui é baloi woni, Dusiitiɛ te ɣɛni ma, “Doowo folo ɣa. Ɛ́ lɛ tɔ su ga yà zaƃai ɣɛ è ya yìɛ lii la.”

¹¹Kɛ̀ é gaa woteni te ya é ɣɛ te ma, “Zunui é bàloa é ɣɛni mà, ‘Yà zaƃai ziɣi è ziɛ.’ ”

¹²Te gaa zaɣa kɛɛni te ɣɛ ma, “Zunu ƃɛ ɣa é ɣɛ yìa, ‘Yà zaƃai ziɣi è ziɛ’?”

¹³Tɔwɔ zunui te baloi woni da ɛ́ lɛ ŋɛni balo nui wɛ̃ni, ƃɔvɛlaale Ziizɛ zu wuloni te va kpɔgi ɣɛɛ ʋai ma na.

¹⁴Ná ta kɛɛni Ziizɛ pɛtɛ Gala‐feli wɔta walai wu é ɣɛ ma, “Wɛlɛ! È valoa. Mɛ lɛ sa faa yowũ ta nɛpɛ kɛ kɔnɔ, kɛɛ ʋaa ma faa yowũi bɔɔlɔ kele ge mɛ lɛ va ɣɛɛzu ga yìɛ.”

¹⁵Zunui liini sa é bo Dusiitiɛ ma ga Ziizɛ ɣa é baloa.

¹⁶Nii mazaƃui ɣa Dusiitiɛ te Ziizɛ ƃɔɔlani la, ƃɔvɛlaale é nii ɣavelei ɣɛɛni ga doowo foloi.

¹⁷Kɛ̀ Ziizɛ gaa woteni te ya é ɣɛ tea, “Kèea Gala ka dɛ tii ɣɛɛzu. Nà ƃalaa gà tii ɣɛɛzu.”

¹⁸Nii ɣa é kɛɛni Dusiitiɛ tiɛ pele ɣaa ziɛ ga kpaanaga ga te Ziizɛ vaa. Toku ge zei ga ɛ́ lɛ nɔ yee wuloni doowo folo lɔgi ʋaa zu ɔ́ wɛ̃ɛ na va. Kɛ̀ é Gala tilini ga ɣeea yíɛ Gala kɛ ga wooli na mavelei ma.

¹⁹Ziizɛ ɣɛni te ma, “Gè bo wiɛ ga gaama, nài gè ga Gala dui gɛ̀ lɛ zooga gɔ̀ faa ta nɛpɛ kɛ ƃɔɔ yee ma, kɛni nɔ nii gà wɛlɛ kèea Gala ba yíɛ kɛ. Ƃɔvɛlaale nii nɛpɛ kèea Gala ka kɛ, nài gè ga dúi gà daamɔdai ɣɛ.

²⁰Toku ge zei ga kèea Gala wõivɛ gàazu, nài gè ga dúi, yíɛ fai ƃɔgɔpɛ dɛ gàazu é kɛɛzu tɔ ƃɔɔ. Towaa tii ƃaazaga lɛ gàazu é leve niitiɛ va, kɛɛ ʋaa ma é vili wo ma ga ki‐gaa‐ziɛ.

²¹È ɣɛ velei kèea ɣa saa vea wu ziɣi la saa ya é ŋetea ʋe te ya, vele nɔ na ƃalaa pɛ gà ŋetea ʋee la niitiɛ vɛ é ga zii‐ma ga gè fe te ya.

²²Kèea Gala gɛ lɛ nu nɛpɛ na faa‐wo gaa levea. Kɛ̀ é faa‐wo gaa‐leve ɣaa‐ƃai ʋeea zèea, nài gè ga dúi.

²³È nii ɣɛɛvɛ ga nui ƃɔgɔpɛ ge wũfe mà è ɣɛ velei nɔ ta wũfe da kèea ma. Nui lɛ wũfeni mà lɛ wũfega kèea nii ma é tèvega.

²⁴Gè bo wiɛ ga gaama, nui yá gòi mɛni é la ga nui é tèvega zɛʋui nii kwɛ̃ɛ gɛ lɛ ba towaa ɣɛ manui ya. Faa lɛ yɛga manui ma. Kɛ̀ manui levega ɣa na saa va é zɛʋui zɔlɔ wo.

²⁵Gè bo wiɛ ga gaama, siɛgi ɣa vaazu — tɔ mu fɔlɔ paavɛ sa — ga saa veaitiɛ te Gala dui woi mɛni. Taitiɛ ta mɛni zɛʋu ɣa ɣɛ te ya.

²⁶Toku ge zei ga è ɣɛ velei nɔ kèea Gala ge la ga zɛʋui maʋaa lo‐kala‐su, vele nɔ na é ʋaa la bu ga zeʋui maɣaa‐ƃaa ɣɛ zèea, nài gè ga dúi.

²⁷È gaa‐ƃaa ʋeea zèea ga gè faa‐wo gaa leve, ƃɔvɛlaale gà ga nu ƃuse luu.

²⁸Nii mɛ lɛ vili wiɛ ga ki‐gaa‐ziɛ, ƃɔvɛlaale siɛgi ɣa vaazu ga nui ƃɔgɔpɛgi é kaba zu te Gala dui woi mɛni.

²⁹Ta mɛni na, taitiɛ te faa vagɔ ɣɛɛ ta wu ziɣi ga te zɛʋui nii zɔlɔ wo kwɛ̃ɛ gɛ lɛ ba. Taitiɛ te faa yowũ ɣɛɛ natiɛ ta wu ziɣi ga faa yɛ te ma.

³⁰Ziizɛ ɣɛni tea, “Gɛ̀ lɛ zooga gɔ̀ faa ta nɛpɛ kɛ ga kpɔɔ ɣaa‐ƃaa. Velei gà mɛni da, vele nɔ na gà gaa leve la. Tɔwɔ nà faa‐wo‐gaa‐leveai ɣa ga gaama, ƃɔvɛlaale gɛ̀ lɛ pele ɣaa ziɛzu ga gè yii‐mai yɛ. Kɛ̀ gà kɛɛzu ga gè nui nii yii‐mai ɣɛ é tèvega.

³¹Ani gà seele woo ʋee na ƃɔɔ ʋaa ma, nà seele woi lɛ ɣɛɛ ga gaama.

³²Nu ta ƃɔnɔ ka na é seele woo ʋeezu màʋaa ma. Nà wɔ gè kwɛ̃ni ga seele woi yá fe bɛ̀ tɔ ga gaama.

³³Wo keela woo‐wo beaitiɛ leveni Bataize‐ɣɛɛ Jɔ̃ wɔ é gaamai mazeele woo ʋe.

³⁴Seele woi é ʋeezu bɛ̀ ɛ́ lɛ ga nu ƃuse ɣa é feezu. Kɛ̀ gà nii wosu ga wo wulo faa yowũ zu.

³⁵Jɔ̃ ɣɛni ga labo mazogi yìɛ ʋolo. Wa wɔ wo yii lai ga wo kuu‐zu‐nɛɛ wulo ga ta wolo maʋoloi ma.

³⁶Kɛ̀ seelei é zèea tevegɛ Jɔ̃ va. Toku ge zei ga tiitiɛ kèea Gala ge feea zèea ga gè te ɣɛ gè daa wulo te ga tii niitiɛ ƃɔɔƃɔɔgi gè te ɣɛɛzu, ta ɣa te seele woo ʋeezu bɛ̀ ga kèea Gala ka é tèvega.

³⁷Tɔwɔ kèea Gala nii é tèvega é seele woo ʋeea bɛ̀ tɔ ƃɔɔ. Wɛ lɛ dɛ wɔlɔ‐wɔlɔ gói mɛnini. Wɛ lɛ dɛ wɔlɔ‐wɔlɔ wɛlɛni kpɛtɛ velei va.

³⁸Gói lɛ wo ɣi su, ƃɔvɛlaale nài gè ga nui é tevega, wɛ lɛ dɛ màʋaa ziɣini ga gaama.

³⁹Wa Gala kɔlɔi zu ɣaa ziɛzu, ƃɔvɛlaale tɔ wo wuu zu ga ná ɣa wa zɛʋui nii zɔlɔ wo na kwɛ̃ɛ gɛ lɛ ba. Tɔwɔ Gala kɔlɔi zu woitiɛ ɣa te seele woo ʋeezu fàa ma.

⁴⁰Na pɛ ge ɣɛɛvɛ, wɛ lɛ kɛɛni wɔ va pɔ̀ ga zɛʋu ɣɛ wo ya.

⁴¹“Gɛ̀ lɛ yee zeizu saala‐malai wu yá wulo nu ƃuse ya.

⁴²Tɔwɔ gè kwɛ̃ni ga Gala na wõilai lɛ wo yii zu.

⁴³Pàavɛ ŋeteai zu kèea na daa‐zeigi zu, tɔwɔ wɛ lɛ yee zeizu bù. Ani nu ta ƃɔnɔ ka vaa na kpɔɔ laa‐zei su, wa yee zei bú.

⁴⁴Wa zoo ɣɛ le wo Gala maʋaa ziɣi ga gaama, wai wo saala laazu ɣiini ma wɛ lɛ wõini ga saala‐malai yá wulo Gala tɔ ɣilekpu kpẽi nɔ ya?

⁴⁵A mɛ lɛ ka ga gà wo zɔ gaa ziɛzu gè da kèea Gala bɛ. Mooze na kɔlɔi laa woi ɣa yá wo zɔ bo. Na ɣa ga Moozei nii wo ɣi togɛi zéea wɔlɔi va.

⁴⁶È ɣɛ wo laani ga Mooze, wɔ la gàazu. Ƃɔvɛlaale é faa wonɛni Gala kɔlɔi zu é vile bà.

⁴⁷Kɛ̀ ani wɛ lɛ laani ga fai é ponɛni, wa leve ɣɛ le wo la gàazu?”