Read Loma TE ƔƐƐ VAITIƐ 11 Bible Online

TE ƔƐƐ VAITIƐ 11 - Loma bible

TE ƔƐƐ VAITIƐ 11

¹Tɔwɔ Ziizɛ na keelaitiɛ vɛɛ te vai niitiɛ va te ɣɛni Yudiiya yui zu te mɛnini ga zii ƃalaaga te Gala goi maa zɔlɔ woni ƃalaa.

²Na ma tei Pite liini Yɛlusulɛɛ, Dusii niitiɛ te boni ga kɛni ta nu zei kpoto ma te kɛ́ɛ ʋai maa wuloni

³tiɛ ɣɛ ma, “Aƃɛi é kɛɛni yìɛ li sei‐kpoto‐ma lala vea wɔ wa tiɛni wiɛ laa mi?”

⁴Kɛ̀ Pite vɛɛni ga kavele lɛɛ ga tiɛ yíɛ siɣi da

⁵yíɛ ɣɛ tea, “Gè ɣɛni Japa lai zu gìɛ Gala feli. Maʋaa wuloai ɣɛ è ɣɛ gɔ̀ ɣɛ zesu ná wu gàazu ŋɛni ta wulo gee‐zuvɛ yíɛ yii è ɣɛ seɣe wele kpakpa sogɛi gui laa zei‐zu naagɔi va. Na ɣɛɛzu é yii sa pɔ̀ vɛ.

⁶Tei sa gè wɛlɛni ba ƃɔɔ sɛ‐sɛ, gè kpeɣa zua vɛtɛni ta file zua é vɛɛ kpokpo sua va ta wɛ̃niitiɛ te gee‐zuvɛ.

⁷Gè woo ta mɛni yíɛ ɣɛ mà, ‘Wu ziɣi, Pite. Paa è mi.’

⁸Kɛ̀ gè ɣɛni tea, ‘Nà lɛ zolowoga, màliɣii, ƃɔvɛlaale ŋɛnii nɛpɛgi ƃaa lɛ ma ɔɔ nii maa lɛ ziɣini ta lɛ dɛ wɔlɔ‐wɔlɔ lɔɔni dàavɛ.’

⁹Kɛ̀ woi wuloni gee‐zuvɛ é gaa wote na wului yíɛ ɣɛ tea, ‘Nii Gala ge maa ziɣia mɛ lɛ wɔlɔ‐wɔlɔ tili ga ŋɛnii ƃaa lɛ ma.’

¹⁰Nii ɣɛɛni ná zei‐zu ɣɛ sava. Na ɣa ɣɛɛ na ŋɛnii nii ɣaazɔ lɛɛni wulu gee‐zuvɛ.

¹¹Nà maziɛgi zu nɔ ɣa zunu saagɔ vaani na pɛlɛi nii la gè ɣɛni bu. Te te leveni pɔ̀ vɛ te wulo Sɛsɔluiya.

¹²Gala baa ŋinɛgi bo sa mà ga gé li gá tiɛni gè mɛ lɛ ɣi gaa ziɛ. De vaa lɔzitai niitiɛ te ɣɛni bà ƃalaa pɛ gá tiɛni gé lɔ zunui na pɛlɛi wu.

¹³É bo sa gé ma ga velei é wɛlɛɛ la Gala ta ɣeelai va loni ná pɛlɛi wu nà yìɛ ɣɛ ma, ‘Nu leve Japa te va ga Saimɔi nii daa ga Pite.

¹⁴Towaa keela woi nii wo yìɛ yá kɛ è valo wa yà vɛlɛi wu vea ɣaazɔ.’

¹⁵Tei sa gè ƃɔɛ lɔɔ zeini, Gala baa ŋinɛgi vaani te wɔ è ɣɛ velei nɔ é ɣɛɛni la ga diɛ tɔɔ‐zei‐zuvɛ.

¹⁶Kì ge loo sa de maliɣii woi zu, na ɣa ga velei é boni la yíɛ ɣɛ tea, ‘Jɔ̃ bataize ɣɛɛni ga ziɛ, kɛ̀ bataize ɣa ɣɛ ga wiɛ Gala baa ŋinɛgi zaala zu.’

¹⁷?Ani mu Gala ge faa‐nɛi nii mazii ɣɛɛni te vɛ è ɣɛ velei é kɛɛ la de vɛ tei de de maliɣii Ziizɛ Kolai ʋaa ziɣini ga gaama, tò‐su ɣɛni ga minɛ ga gɔ̀ zoo gè lo Gala da?”

¹⁸Tei te nii mɛnini te ɣaa yiini. Na ɣa ɣɛɛ na te Gala daa maa lɛɛni tiɛ ɣɛ tea, “Ka dɔ kɛ mu Gala ge ʋaa bu ƃalaa pɛ ga zii ƃalaagitiɛ te wulu ɣaa ʋe te zɛʋu zɔlɔ wo.”

¹⁹Tɔwɔ niitiɛ te yɛzɛgɛi ɣɛ toku ge zei kpɔɔlagi na va maʋaa wu ziɣi Setiifɛ̃ maazu, te ziɛ‐ziɛni te li woozala, è ɣɛ velei Feniisia yui zu la ta Saipɔlɔ é vɛɛ Ãteya lai va. Tɛ lɛ ŋɛni woi wosu nu ta ƃɔnɔ nɛpɛ ma kɛni nɔ Dusiitiɛ.

²⁰Kɛ̀ zinaa taniga te ɣɛni te zaama te ga Saipɔlɔ ƃɔga Saalĩi vea. Tei niitiɛ te vaani Ãteya, te ƃɔɛni Geliikiitiɛ wɔ ƃalaa pɛ tiɛ woo vagɔi wo é vile de maliɣii Ziizɛ va.

²¹De maliɣii yee ɣɛni nii zu te ɣɛni kɛɛzu. Na ɣa ɣɛɛ na nu lama‐lama tiigoi niitiɛ te siɣini ga gaama, te ɣaazu woteni de maliɣii ma.

²²Nii mawoi looni Gala pɛlɛi wu veaitiɛ wui zu Yɛlusulɛɛ. Te Banaba leve Ãteya.

²³Tei é vaani é wɛlɛ Gala na gaazu‐maa‐wõi‐ɣaa ƃɔ‐bai va, kuu zu nɛi ɣɛ. É te ɣaazɔ lɛnɛ ga te ɣili laa va ga de maliɣii ga kpaanaga.

²⁴Ƃɔvɛlaale é ɣɛni ga tuo‐vele‐va zunu zii laa ʋegɛi Gala baa ŋinɛgi vɛ, daa ʋegɛi ga zee‐la‐ma. Na ɣa ɣɛɛ na nu ƃulu gwala ɣaa lɛɛni ba de maliɣii ma.

²⁵Na ma Banaba liini Tasɔ lai zu Sɔɔ ɣaa ziɛzu. Tei é pɛtɛni, é vaani la Ãteya.

²⁶Te ɣɛni ɣii ma ta Gala pɛlɛi wu veaitiɛ kwena gila zee wu ƃɔɔ daa ʋegɛi. Te nu ƃulu gwala ɣala bo. Na ɣa ɣɛɛ na Ãteya ɣa te kala dopoitiɛ laa zeini na ga maa wũ ga Kolai maa vea.

²⁷Na maziɛ su Gala daa woo‐wo bea te ziɣini Yɛlusulɛɛ te va Ãteya.

²⁸Te gilagi nii daa ɣɛni ga Agɛbɛ é loni é bo ga ná yee luo vele Gala baa ŋinɛgi zaala zu ga pulu ƃakpa ɣɛni vaazu loozu zui wɔlɔ‐kɔlɔ ma ɣaali. Nii wɔ ge leveni ma Kɔlɔdia na yɛmini su.

²⁹Kala dopoitiɛ te deʋe sa ga te ŋɛni leve te vaitiɛ wɔ vɛ te ɣɛni zeini Yudiiya. Nu ɣile‐giledai ɔ́ ŋɛnii nii leve nɔ ga velei maziɛ‐bu ɔ́ ɣɛɛ la bɛ́.

³⁰Tɔwɔ te kɛɛni ŋɛ na. Te puuni Banaba ya ta Sɔɔ te te leve ga te lii la to‐tuoitiɛ wɔ.