Read Loma TE ƔƐƐ VAITIƐ 19 Bible Online

TE ƔƐƐ VAITIƐ 19 - Loma bible

TE ƔƐƐ VAITIƐ 19

¹Tei Apɔɔla ɣɛni Kɔlĩ, Pɔɔ leveni zui wũ maazu vele é va Ɛfɛsɔ. Ná ɣa é wɛlɛni na kala dopoi taniga va.

²É ɣɛ te ma, “?Wo Gala baa ŋinɛgi yee maa zɔlɔ woni, tei wo Ziizɛ ʋaa ziɣini ga gaama?” Te ɣɛ ma, “Ƃa, gɛ́ dɛ wɔlɔ‐wɔlɔ mɛnini ga Gala baa ŋinɛ ka ma.”

³Pɔɔ ɣɛ tea, “Pelei zɛƃɛ zu vele mu ka te bataize ɣɛɛni na ga wiɛ?” Te ɣɛ tea, “Jɔ̃ na bataize‐ɣɛɛ velei.”

⁴Pɔɔ ɣɛ tea, “Jɔ̃ bataize ɣɛɛni ga bataizei nii pilegɛi pulu‐ɣaa‐ʋe fai va faa yowũ va yíɛ bo numaitiɛ ma ga te nui nii maʋaa ziɣi ga gaama é ɣɛni ziɣizu ga pulu vele é va, na ɣa ga Ziizɛ.”

⁵Tei te nii mɛnini, te bataize ɣɛɛni ga tiɛ de maliɣii Ziizɛ na daa‐zeigi zu.

⁶Na ɣa ɣɛɛ na tei Pɔɔ yee vɛɛni te wũmɔ, Gala baa ŋinɛgi vaani te wɔ tiɛ sa ƃɔɛ woo laali‐taaliga zu tiɛ Gala daa woo wo.

⁷Te ɣaazɔ tɔ wuu na kii ma tɔ zoo te ɣɛ puu kai fele.

⁸Pɔɔ ɔ́ lɛ sa Gala‐feli wɔtai wu yíɛ ƃɔɛ ga duo lala vele ɣalo saagɔ yee wu. Ɔ́ lo numaitiɛ la yíɛ wɔnɔ te yii lɔ ga Gala na masadai.

⁹Kɛ̀ tei te taniga te wui zu ƃɔlɔgɛi ɣɛ tɛ lɛ siɣini ga gaama tiɛ faa yowũ wo é vile pele niinɛi va Gala‐feli wɔtai wu veaitiɛ ɣaazu, é ziɣini te wulu. Tei sa é kala dopoitiɛ ziɣini, ta tiɛni tɔ faa wo ga gela‐bo pele ɣile‐gile é vile Ziizɛ ʋai va Tailana na kɔlɔ vɛlɛi wu.

¹⁰Te ɣilini nii ɣɛɛ va kwena felegɔ yee wu. Na ma Eezia vea ɣaazɔ te de maliɣii woi mɛni, Dusia vɛɛ Geliikia va pɛ.

¹¹Gala ge kɛɛni Pɔɔ pote maa‐wɔlɔ‐wɔlɔga ɣɛ.

¹²Daa ƃalegitiɛ ɔ́ laa ƃale da ɔɔ pɛɛ‐tuoitiɛ ɔ́ pɛɛ luo, tɔ li ga tiɛ seeƃɛ veaitiɛ wɔ ta zeeƃɛitiɛ tiɛ ziɣi te va, na ɣa ɣɛɛ na gɔʋɛ yowũitiɛ tiɛ ziɣi kɛɛ vea wulu.

¹³Na ɣa ɣɛɛ na Dusia te ɣɛni na ga siɛ‐ziɛ bea te ga gɔʋɛ yowũ‐ƃɛɛ vea numaa wulu. Numai niitiɛ te ƃɔɔ ziɣini ga ƃɔɛ vea gɔʋɛ yowũa wɔ de maliɣii Ziizɛ na daa‐zeigi zu. Te ɣile‐giledai tɔ ɣɛ tea, “Gà bosu yìɛ Ziizɛi nii na daa‐zeigi zu Pɔɔ faa wosu yíɛ vile ba . . . ”

¹⁴Dusi laa‐ʋaale gwalai daa ɣɛni ga Siivɛ, dea zina lɔfelaitiɛ ɣa te ɣɛni nii ɣɛɛzu.

¹⁵Kɛ̀ gɔʋɛi ta te woi ɣaa woteni yíɛ ɣɛ te ma, “Gè Ziizɛ wɛ̃ni gè Pɔɔ wɛ̃ɛ, kɛ̀ ƃɛ ɣa ga wiɛ?”

¹⁶Na ɣa ɣɛɛ na zunui nii gɔʋɛi ɣɛni pulu é lakini é vɛɛ te ma zée leve te va ga ná gaa‐ƃai é kɛ te wulo pɛlɛi wu ga maa yãka te vela te maa ƃolo‐kpologɛi.

¹⁷Ɛfɛsɔ veaitiɛ ɣaazɔ te nii wɛ̃ɛni, Dusia vɛɛ Geliikia va pɛ. Duo vili sa te pɛ te ɣigi zu. Na ɣa ɣɛɛ na te de maliɣii Ziizɛ na daa‐zeigi maa lɛɛni.

¹⁸Taitiɛ te Ziizɛ maʋaa ziɣini sa ga gaama te lamaa ƃalaa te vaani sa tiɛ laa wu ziɣi fai niitiɛ ma te ɣɛni wɔlɔ kɛɛzu tiɛ bo kɛnɛ ma.

¹⁹Niitiɛ te pote‐kɛɛ ʋaa maa wolini taniga te vaani ga ta wɔlɔitiɛ te gala nui pɛ gaazu ma. Te te mazɔ̃wɔi lodoni te wɛlɛ na va ga é ziitini wulu zee looluo zu kani kpulu‐kpulugi zu.

²⁰Na ma de maliɣii woi maa wɔɔlɔni kee ɣaa ƃaa ga kɛlɛ‐ɣɛlɛ mavele.

²¹Tei sa nii wuloni ba, Pɔɔ deʋeni ɣigi zu Gala baa ŋinɛgi zaala zu ga é leve Masadoonia ta Akeea ga é li Yɛlusulɛɛ, yíɛ ɣɛ tea, “Gà lii na minɛ, kɛni gà wɛlɛ Loomɛ lai va ƃalaa pɛ.”

²²Tei sa é ná kpɔ‐ba veaitiɛ felegɔ leveni Masadoonia, na ɣa ga Temete ƃɔga Elasitɔ, tɔ ɣagi é la wolo lebini Eezia.

²³Na maziɛda yɔɔzu numaitiɛ yii lɛ wu ziɣini ga soloya é vile pele niinɛi nii va.

²⁴Ƃɔvɛlaale zunui na daa ɣɛni ga Dimitilia é ga kani‐gãi nui nii é kani kãla‐ŋalaga ƃɛtɛni maa‐niini galagi Atemi mawo‐kɔ̃ɔgitiɛ ʋaa ma, ɛ́ lɛ soloya ŋɛni laa ziitini ŋɛɛ lii‐ɣɛɛ veaitiɛ ma.

²⁵É niitiɛ ɣaa lɛɛni ba é vɛɛ zɔitiɛ va ta ŋɛɛ lii zii ɣilagi ɣɛ é ɣɛ te ma, “Nà numaa, wo kwɛ̃ni ga tii nii ɣa a de da ƃɛtɛi maa zɔlɔ wosu su.

²⁶Wa wɛlɛzu na va wiɛ mɛni ga nu liigoi nii Pɔɔ nii laa lɔɔ ba é pote ɛ́ lɛ ga soloya. Tɔ bosu te ma ga galagi niitiɛ te ƃɛtɛi ga nu yee tɛ lɛ ga Gala. Ɛ́ lɛ nɔ ga Ɛfɛsɔ ɣa nii ɣɛɛzu na, kɛ̀ é yɛga nɔ ga ta wolo é ɣɛ Eezia yui wɔlɔ‐kɔlɔ ma ɣaali.

²⁷Na ɣa ɣɛɛ na faa ta ɣa fai nii zu yowũai. Ɛ́ lɛ nɔ ga ƃaa‐ziɣi ʋai da lii nii ma, kɛ̀ ɣee ta maa‐niini gala ŋaza nu walai Atemi ʋeli wɔta walai ʋaa ɣa ɣɛ ga ƃɔɔvɛ ƃalaa pɛ. Ɣee ta ʋɔlɔ Atemi nii Eezia vea ɣaazɔ te felizu é vɛɛ zui va, ta kulo ná kpakpalai zu ƃalaa pɛ.”

²⁸Tei te nii mɛnini, te woei leveni tiɛ loba tiɛ ɣɛ tea, “Ɛfɛsɔ veaitiɛ ta ɣalagi Atemi lo‐su wɔɔlɔvɛ!”

²⁹Na ma tai laa ʋegɛi ɣɛ ga yopo‐yapa faa. Te ƃɔni su te ƃolo te li vɛ numaitiɛ tɔ ɣaa kpɔ na, Geea ƃɔga Aluisitakɔ te te ya tiɛ te ƃokpo. Natiɛ ta ga Masadoonia veai niitiɛ te ɣɛni ga Pɔɔ ziɛ yɔ̃wɔitiɛ.

³⁰Pɔɔ ɣɛni wõizu é li kpɔgi zaama, kɛ̀ kala dopoitiɛ tɛ lɛ ƃega ba ɔ́ li.

³¹Eezia yui maazu‐ʋaa‐wo beaitiɛ taniga ƃalaa pɛ, niitiɛ te ɣɛni ga wõi‐ɣɛ‐ma vea, te keela leveni te pee ʋe bɛ́ ga é mɛ lɛ ƃɔɔ vili faa ƃoei zu ga é li vɛ numaitiɛ ta ɣaa kpɔ na.

³²Tɔwɔ te taniga te ɣɛni lobasu tiɛ faa ta ƃɔnɔ bo, zɔitiɛ wɔ tiɛ ta ƃɔnɔ bo, ƃɔvɛlaale kpɔgi ɣɛni pɔ̃ɔ. Na ɣa ɣɛɛ na te bɔɔlɔ‐zu tɛ lɛ ŋɛni kwɛ̃ni nii te maɣaa‐lɛi woni ba.

³³Kɛ̀ kpɔgi taniga te fai ɣavele zu wuloni Alezãda ma nii Dusiitiɛ te vaani la te pile kpɔgi laa wu. Alezãda yee ɣɛɛni te ma ƃɛ‐ƃɛ yíɛ wõi ɣɛ ga é goo‐zu‐wulo‐kɛɛ wo numaitiɛ ya.

³⁴Kɛ̀ tei te kwɛ̃ɛni ga é ɣɛni ga Dusi ta, te ɣaazɔ te woi ɣɛni su ɣilekpu tiɛ loba. Te yɛni nii ɣa ɔ́ zoo é ziiti ɣalava felegɔ zu tiɛ ɣɛ tea, “Ɛfesɔ veaitiɛ ta ɣalagi Atemi lo‐su wɔɔlɔvɛ!”

³⁵Tei taa masagi kpɔgi ɣaa ƃɛɛni, é ɣɛni tea, “Ɛfɛsɔ veaitiɛ, nu zɛƃɛi é zui zu ɛ́ lɛ kwɛ̃ni ga Ɛfɛsɔ veaitiɛ ɣa te ɣaazu maa‐niini gala gwalai Atemi ʋeli wɔta walai va ta Atemi mawo‐kɔ̃ɔgi kuloai gee wɔlɔgi zu é loo?

³⁶Tei tɔwɔ sakpe gɛ lɛ fai niitiɛ zu, maa nɛɛvɛ wo ɣaa yii wo mɛ lɛ gaa‐vala‐ba ʋaa ɣɛ.

³⁷Ƃɔvɛlaale wo vaa ga numai niitiɛ vɛ niitiɛ tɛ le wũmɔ wosu a da ɣala‐feli wɔta walai ma ɔ́ nɔ ɣɛ ga te ɣɛ ga a da maa‐niini gala ŋaza nui laa ŋala‐ŋala bea.

³⁸Na ma ani nu ta nɛpɛ kɛɛ‐zɔ ka Dimitilia wuu zu é vɛɛ ŋɛɛ lii‐ɣɛɛ veaitiɛ va te ba, kuuti laa laoga. Na ɣa ɣɛɛ na gɔmɛti nu walaitiɛ ta na. Ƃe ba te va te ɣii ɣɛɛ‐zɔgitiɛ wo.

³⁹Kɛ̀ ani wa faa ta nɛpɛ gaa ziɛ na é leve nii va, maʋaa‐wogi ɣa wo kpɔgi nii zu yá ɣaa lɛ ba kuu ma.

⁴⁰Ƃɔvɛlaale faa ƃoei ɣa zɛlɛni de wũ maazu de ɣɛɛ‐zɔ‐bo fai ma é vile za yopo‐yapa fai va, tei tɔwɔ faa ta lɛ dɛ ɣɛɛni ga nii da zoo de dɛ ga zaƃu yopo‐yapa tuoi nii ʋaa ma.”

⁴¹Tei sa é nii woni, é kpɔgi ʋazani.