Read Loma TE ƔƐƐ VAITIƐ 21 Bible Online

TE ƔƐƐ VAITIƐ 21 - Loma bible

TE ƔƐƐ VAITIƐ 21

¹Tei gé ɣaa wɛɛni gá tiɛni gé zei yuwu ɣa, gé pele zakpani gé va Koo lai zu. Na wulu ʋoloi gé li Loodi lai zu, gé wulo kɔnɔ minɛ gé va Paatala lai zu.

²Tei gé wɛlɛni kẽe gwala ta va yíɛ yuwu leve ga é li Fɛniisia yui zu, gé liini gé vili su gé li.

³Tei sa gé wɛlɛni Saipɔlɔ yui va, gé zɛni ga wɔwɔ yee‐su vele gé li Siilia yui zu gé vile Tailɔ, ƃɔvɛlaale ná ɣa maa nɛi ɣɛ te sɔɔlaitiɛ wulo na kẽegi zu.

⁴Tei sa gé kala dopoitiɛ maʋaa wɔwɔ‐wo kuloni su, gé kɛɛni na ga folo lɔfela. Te boni Pɔɔ ma Gala baa ŋinɛgi zaala zu ga é mɛ lɛ li Yɛlusulɛɛ.

⁵Tei sa gá wui wɛ̃ɛni na, gé wuloni na va gé vɛɛ gá ziɛi va. Te ɣaazɔ te vɛɛ ŋazaa va ta te lea te yɛni gé ƃelasu pele zu é yɛsu gé wulo tai va. Tei sa gé vileni ŋibia yuwu mayãazegi zu, gé Gala felini gé ʋeli ɣiini ma.

⁶Gé vili sa kẽe gwalai zu, ta wɔ te li wulu ta vɛlɛitiɛ wu.

⁷Tei sa gé woloni gá ziɛi ma gé tɔɔ zeini Taalɔ, gé vaani Talameea lai zu. Gé laali sa gé vaitiɛ ma gé folo ɣila kɛ na gá tiɛni.

⁸Na wulu ʋoloi gé ziɣini na gé va Sɛsɔluiya. Gé lɛ Gala goo‐wo nui Fele na pɛlɛi wu, Fele nii é ɣɛni ga Gala pɛlɛ wu veaitiɛ laa‐zɔ‐bo bea lɔfelaitiɛ te gila. Gé yɛni sa pɔ́ vɛ.

⁹Ŋaza lea naagɔ te ɣɛni zéea ga tabologa, niitiɛ tɔ Gala daa woo wo.

¹⁰Tei gé ɣɛni lebi kolo wosu na, Gala daa woo‐wo nui daa ga Agɛbɛ é ziɣini Yudiiya é va.

¹¹Tei é vaani gé wɔ vɛ, é Pɔɔ na saama‐ɣiligi ziɣini é ƃɔɔ wɔwɔ zu ɣili la ta zée é ɣɛ tea, “Gala baa ŋinɛgi ɣa bosu ŋɛ ni yíɛ ɣɛ tea, ‘Vele ɣa na Dusiitiɛ te Yɛlusulɛɛ ta zunui na ɣili la pó ge ga zaama‐ɣiligi nii te zee la zii ƃalaagitiɛ ya.’ ”

¹²Tei gé nii mɛnini, ge vɛɛ ná veaitiɛ va gé pee ʋeeni Pɔɔ vɛ ga é mɛ lɛ li Yɛlusulɛɛ.

¹³Pɔɔ gaa wote é ɣɛ tea, “Zɛƃɛ ɣa wo kɛɛzu ŋɛ ni ga wiɛ kpee loo ná maa yìɛ wõi gàazu ga kavele teegɔ? Ƃɔvɛlaale kàvele ƃɛtɛvɛ. Kàvelei lɛ nɔ ƃɛtɛni pìli fai ma kpidi vɛlɛ wu, kɛ̀ kàvele ƃɛtɛvɛ ga gè za ƃalaa Yɛlusulɛɛ de maliɣii Ziizɛ na daa‐zeigi ʋaa ma.”

¹⁴Tei tɔwɔ nu laa lɛ ŋɛni lɔɔzu ba, gé ƃɔlɔni gé ɣɛ tea, “Ƃe ba de maliɣii yii‐mai ɣɛ.”

¹⁵Tei sa foloi niitiɛ te wuloni ba, gé ƃɔɔ ɣavele ƃɛtɛni gé li Yɛlusulɛɛ.

¹⁶Kala dopoi taniga te wuloni Sɛsɔluiya te vɛɛ gé va gá tiɛni gé li. Te liini ga gíɛ Saipɔlɔ nui Neesɔ̃ na pɛlɛi wu ga te gé laa‐zu vɛɛ na. Neesɔ̃ ɣɛni ga kala dopo wɔlɔ‐zaɣagi ta.

¹⁷Tei gé vaani Yɛlusulɛɛ, gé vaitiɛ te yee zeini gé wu ga kuu‐zu‐nɛɛ.

¹⁸Na wulu ʋoloi gá Pɔɔni gé liini Jĩi wɔ vɛ pɛlɛi wu. To‐tuoitiɛ ɣaazɔ te ɣɛni na.

¹⁹Tei sa é laalini te ma, faitiɛ Gala ge ɣɛni ga zaƃu é kɛ zii ƃalaagitiɛ zaama ná tii zaala zu, é lɔɔni te ma ga gile‐gile é su wulo.

²⁰Tei te mɛnini, te Gala daa maa lɛɛni te ɣɛ tea, “?È wɛlɛɛ kàa yɔ̃wɔ, nu wulu tiigoi nii va é Dusiitiɛ zaama te Ziizɛ ʋaa ziɣia ga gaama? Te wɔɔlɔvɛ Gala na tɔgi ʋaa zu.

²¹Na ɣa ɣɛɛ na te faa woga te ma é vile yìɛ ga yà Dusiitiɛ ɣaazɔ ɣala bosu, niitiɛ te zii ƃalaagitiɛ zaama, ga te yee wulo Mooze ʋaa zu, yìɛ bo te ma ga te mɛ lɛ te leaitiɛ zei kpoto ma ɔɔ te mɛ lɛ ziɛ ga Dusiitiɛ ɣɛɛ ʋai.

²²Aƃɛi sa maa nɛi é ɣɛ? Ƃɔɔƃɔɔ su ta mɛni ga è vaa.

²³Na ʋaa ma nii ɣɛ gé bosu yìɛ. Zinaa naagɔ ta gé ya niitiɛ te woto levea.

²⁴Zinai niitiɛ ziɣi è ƃɔɔ maa wuo wa tiɛ è niitiɛ ʋe maa nɛɛ te fe, kɛɛ ʋaa ma te ta wũgitiɛ wo. Nii mavele ma nui ɣaazɔ ɣa kwɛ̃ɛ ga nii te boga ga è laa tɔ ga faa yãka, kɛ̀ to mu è ɣagi yà ziɛ ga tɔgi.

²⁵Kɛ̀ zii ƃalaagi niitiɛ te Ziizɛ ʋaa ziɣia ga gaama ta dɛi, gé kɔlɔ levega te wɔ gé deʋe ga maa nɛɛvɛ te ƃɔɔ ƃe teve niitiɛ mii ʋaa va ta maa‐niini galaga wɔɔ la, te ƃɔɔ ƃe teve ŋama‐mii ʋaa va, te ƃɔɔ ƃe teve suoi nii mii ʋaa va ta paa ga soga foole zu, é vɛɛ wɛ̃ɛ‐ziɛ‐boga va.”

²⁶Zinaitiɛ ziɣi vele ɣa na é ɣɛ Pɔɔ vɛ, na wulu ʋoloi ta tiɛni te ƃɔɔ maa wuo te li Gala‐feli wɔta walai wu ga te kui nii lɛ te ƃɔɔ maa‐wuo ʋai ɔ́ wɛ̃ɛ da ta zalaɣa ŋɛnii nii ɔ́ ʋe te ɣile‐giledai ʋaa ma.

²⁷Tei sa ná yɛni ga ta wolo folo lɔfelai wolo, Dusiitiɛ te ziɣini Eezia, niitiɛ te Pɔɔ vɛtɛni Gala‐feli wɔta walai wu, te kpɔgi yii wu ziɣini te yee vɛɛ Pɔɔ ma

²⁸tiɛ loba tiɛ ɣɛ tea, “Yezɔi veaitiɛ, a ƃɔ gíɛ! Zunui nii ɣa é nu ƃusei ɣala bosu ŋadɛi ɣaazɔ numaitiɛ wɔ vele ga yowũa ta Gala na tɔgi é vɛɛ ŋadavɛ vɛ va. Na ɣa wulo na su, é vaa kɔnɔ ga Geliikiitiɛ Gala‐feli wɔta walai wu é ŋada maa‐wuai nii maa woola.”

²⁹Te nii woni, ƃɔvɛlaale te wɛlɛni Ɛfɛsɔ nui Tɔlɔfimɔ va Pɔɔ va tai zu nà maʋoloi ɔ́ vɛɛ ziitizu. É ɣɛni te wuu zu ga Pɔɔ vaa ga nà Gala‐feli wɔta walai wu.

³⁰Tai ɣaazɔ yii wu‐ziɣi vele ɣa na é ɣɛ, numaitiɛ te ƃɔ su te ƃize. Te Pɔɔ zo te kpokpo te kulo Gala‐feli wɔta walai wu te siɣigi laavɛtie wulu ga maa ʋilea.

³¹Tei te ɣɛni pele ɣaa ziɛzu ga te paa, woo ziitini sɔdasi ƃulugi maazu nu walai ma ga yopo‐yapa faa ɣa Yɛlusulɛɛ lai wɔlɔ‐kɔlɔ ma ɣaali.

³²É sɔdasia ziɣini ga maa ʋilea é vɛɛ sɔdasi wũ‐gile‐gile wũ‐tuo vea va te ƃize te li te wɔ vɛ. Tei te wɛlɛni sɔdasi ƃulu maazu nu walai va ta sɔdasiitiɛ te ƃeni Pɔɔ lowa ʋai va.

³³É va é so é sɔdasiitiɛ leʋe ga te gili ga yɔ̃wɔ felegɔ. É gaa‐zaɣa‐kɛɛ woni ga nui Pɔɔ ɣɛni le ta fai nii é kɛɛni.

³⁴Nui taniga te ɣɛni kpɔgi zu te lobani te faa ta wo, zɔitiɛ wɔ te ta ƃɔnɔ bo. Tei tɔwɔ ɛ́ lɛ ŋɛni zoosu ɔ́ gaama wɛ̃ɛ fai nii zu toku ge zei zaɣa‐zaɣagi va, é deʋeni ga te lii la sɔdasi vɛlɛi wu.

³⁵Kɛ̀ tei Pɔɔ ziitini telegi nii ma ɔ́ lɛ sɔdasi vɛlɛi zu, sɔdasiitiɛ ɣa te kpekpeni te lɛɛ la ga ƃɔɔƃɔɔ su toku ge zei ŋapi‐wɔɔ ʋai va é ɣɛni nu ƃɔgi ɣaazu.

³⁶Ƃɔvɛlaale nu ƃɔgi vileni te wulu tiɛ loba tiɛ ɣɛ tea, “A paa!”

³⁷Tei sa te ɣɛni vaazu lɛɛzu ga Pɔɔ sɔdasi vɛlɛi zu, é ɣɛni sɔdasi maazu nu walai ma, “?Gè faa ta wo yìɛ?” Nà ɣɛ ma, “?Yà Geliiki woo wo?

³⁸?Yà lei ɔ̀ ɣɛ ga Iije nui to mu nii su lɛ dɛ woozani é numaitiɛ yii wu ziɣini tiɛ wɔ gɔmɛtii wɔ? ?Na ɣa ɣɛɛ na é lo nu‐vaa vea wulu naagɔitiɛ luo é li ga tiɛ kpooʋei zu?”

³⁹Pɔɔ gaa wote é ɣɛ ma, “Gà ga Dusi nu, kùloai Tasɔ, Seliisia yui zu. Gà ga taa‐zei tai nii zu ɛ́ lɛ ga soloya laa. È veevɛ, ƃe bà gè ƃɔɛ numaitiɛ wɔ.”

⁴⁰Tei sɔdasi maazu nu walai ʋaani bu zéea, Pɔɔ ɣɛni loni tele zeɣei zu é yee ɣɛ numaitiɛ ma ƃɛ‐ƃɛ. Tei te na ɣɛɛni ƃu ga tamaa, é ƃɔɛni te wɔ Hiiƃulu woi zu yíɛ ɣɛ tea,