Read Loma TE ƔƐƐ VAITIƐ 22 Bible Online

TE ƔƐƐ VAITIƐ 22 - Loma bible

TE ƔƐƐ VAITIƐ 22

¹“Nà numaa wa kèeani, a goo‐zu‐wulo‐kɛi nii mɛni gè vaazu bosu wo ɣaazu nɔ ŋɛ ni.”

²Tei te goo mɛnini yíɛ ƃɔɛ te wɔ Hiiƃulu woi zu, te na ɣɛɛni ƃɔɔ ƃu. É ɣɛ te ma,

³“Gà ga Dusi nu. Te kàani Tasɔ, Seliisia yui zu. Kɛ̀ kùlovɛ su tai nii zu Gameelia wu. Kɔlɔ wɛ̃ɛgɛi bɛ̀ de ɣeeani ta lɔgi mavele ƃɔɔƃɔɔgi zu, ƃɔ̀ɔlɔi Gala faa zu è ɣɛ velei wo ɣaazɔ wo la zai ŋɛ ni.

⁴Gè pele niinɛi nii zu vea ƃɔɔlani ga gìɛ te vaa ƃalaa. Gɔ̀ te ɣili gìɛ te vili kpidi vɛlɛ wu, na ɣa ga zinaa vɛɛ ŋazaa va,

⁵è ɣɛ velei laa‐ʋaale gwalai vɛɛ nuwutiitiɛ ta ʋaa‐wo kpɔgi va ta mazeele woo ʋee la bɛ̀. To mu fɔlɔ ta ɣa gè kɔlɔ wuloni te ya ga gè lii la de vaa Lusiitiɛ wɔ. Tɔwɔ gè ɣɛni liizu Dimasikɔ ga gè niitiɛ zo te ɣɛni na ƃalaa pɛ, kɛɛ ʋaa ma te yɛ gili‐zu gè va ga tiɛ Yɛlusulɛɛ ga te tɔ kpɛ tiɛ.

⁶“Tei sa gè ɣɛni nà siɛi ma, gè lɔtɔni Dimasikɔ va folo gaa‐lɔ‐ga laa yɔɔzu. Na ɣɛɛni nɔ kpẽi ŋada wodoa wala ta wulo gee‐zuvɛ é màa wodo.

⁷Gè looni zuwãavɛ gè woi mɛni yíɛ ɣɛ mà, ‘Sɔɔ, Sɔɔ, zɛƃɛi é kɛɛ è kpɔ̀ɔlasu?’

⁸Gè gaa wote gè ɣɛ ma, ‘Ƃɛ ɣa ga yìɛ, màliɣii?’ É ɣɛ mà, ‘Nài è kpɔ̀ɔlasu nà ɣa gè ga Nazɔi Yiizɛ.’

⁹Tɔwɔ niitiɛ te ɣɛni bà te wɛlɛni ŋada wodoai va, kɛ̀ tɛ lɛ nui nii woi mɛnini é ɣɛni ƃɔɛzu pɔ̀.

¹⁰Gè ɣɛni tea, ‘Màliɣii, zɛƃɛ ɣa gà kɛ?’ De maliɣii ɣɛ mà, ‘Wu ziɣi è lɛ Dimasikɔ. Ná ɣa nii ɣaazɔ ɣa wo na yìɛ é è maʋaa ma ga è kɛ.’

¹¹Tei tɔwɔ gɛ̀ lɛ ƃega zoo gɔ̀ wɛlɛ toku ge zei ŋada wodoai maʋoloi va, taitiɛ te ɣɛni bà te yee looni zèea gé lɛ Dimasikɔ.

¹²“Zunu ta wɔ ge ɣɛni na daa ga Ananaiya, nii sɔƃɛlɛ ɣɛ Gala na tɔgi ʋaa zu. Dusiitiɛ ɣaazɔ te ɣɛni zeini na tiɛ tɔwɔ vagɔi wo.

¹³Zunui nii vaani pɔ̀ vɛ, é loni kòbavɛ yíɛ ɣɛ mà, ‘Kàa yɔ̃wɔ Sɔɔ, è ɣaazuvɛ ziɣi ma.’ Nà maziɛgi zu nɔ ɣa gàazuvɛ ziɣini la ma gè wɛlɛ bá.

¹⁴É ɣɛni tea, ‘De ɣeeani ta Ɣalagi yee ƃadoga yìɛ ga è zii‐mai wɛ̃ɛ ga è wɛlɛ tele‐bo tuo‐wo nui va è woo mɛni é wulo dá.

¹⁵Ƃɔvɛlaale yà vaazu seele woo ʋeezu máʋaa ma nui ɣaazɔ ɣaazu é vile nii va è pɛtɛga è mɛni.

¹⁶Na ma minɛɛ è ná maa kpo‐wũsu? Wu ziɣi è bataizei maa zɔlɔ wo yà ʋaa yowũitiɛ te wuo yìɛ, yìɛ ná daa‐zeigi lili.’

¹⁷“Tei gè liini wulu Yɛlusulɛɛ gìɛ Gala feli Gala‐feli wɔta walai wu, máʋaa wuloni sa è ɣɛ gɔ̀ ɣɛ zesu

¹⁸gè wɛlɛ màliɣii va yíɛ ɣɛ mà, ‘Kɛ́ ɣaʋu è wulo Yɛlusulɛɛ va ga maa ʋilea, ƃɔvɛlaale tɛ lɛ vaazu yee zeizu yà zeele woi wu pilegɛi bà.’

¹⁹Gè ɣɛ ma, ‘Màliɣii, ta ƃɔɔ te kwɛ̃ni ga niitiɛ te è maʋaa ziɣini ga gaama kɛ̀ɛvɛ te wulozu Gala‐feli wɔtai ɣaazɔ wu gìɛ te wu kpidi vɛlɛ wu gìɛ te lowa.

²⁰Tei wɔnɔ yà zeelei Setiifɛ̃ ɣɛni ŋamai wuuzu, gè ɣɛni ƃalaa loni ná woba zèe zeiyai saa ʋai wu gìɛ yee ka paa veaitiɛ ta zeɣei va.’

²¹É ɣɛ sa mà, ‘Wulo vɛ va, ƃɔvɛlaale gà è levesu woozala zii ƃalaagitiɛ wɔ.’ ”

²²Te yɛni wui tosu gói ma é yɛsu é nii wo, te woo lɛ sa gee zu tiɛ ɣɛ tea, “A nui na mazii vaa é wulo zui ɣa! Ƃɔvɛlaale maa lɛ nɛɛni ɔ́ yɛ ŋetea.”

²³Tei te ɣɛni lobasu tiɛ ta zeɣeitiɛ wulo ma tiɛ pili tiɛ fifiligi lɛ gee zu,

²⁴sɔdasi maazu nu walai sɔdasiitiɛ leʋeni ga te lɛɛ la sɔdasi vɛlɛi zu, é deʋe wɔnɔ ga te yɛ kɔ̃ɔ‐kɔ̃ɔsu ga dowa vele é yɛsu é wuu‐zu ʋaa wo, kɛɛ ʋaa ma é kwɛ̃ɛ nii velei ma ga nii te ɣɛni maloba bosu ga yowũa ga pɔ́ vele.

²⁵Kɛ̀ tei te gilini dowa ʋaa ma, Pɔɔ boni sɔdasi wũ‐gila wũ‐tuo nui ma é ɣɛni loni ná woba é ɣɛ ma, “?Tɔ tɔ su wo ʋaa ma ga wo nui nii lowa é ga Loomɛ laa‐zei, ani wɛ lɛ kɛ́ɛ‐zɔ dɛɛni?”

²⁶Tei sɔdasi wũ‐gila wũ‐tuo nui é nii mɛnini, é liini sɔdasi maazu nu walai wɔ vɛ é ɣɛ ma, “Zɛƃɛ ɣa è ɣɛ è kɛ? Ƃɔvɛlaale zunui nii ɣa ga Loomɛ laa‐zei.”

²⁷Sɔdasi maazu nu walai vaa vele ɣa na é ɣɛ, é ɣɛ Pɔɔ ma, “Bo mà. Yà ga Loomɛ laa‐zei?” Nà ɣɛ ma, “Ooi.”

²⁸Sɔdasi maazu nu walai gaa wote é ɣɛ ma, “Gè taa‐zeidai nii maa ɣeeani ga naʋolo lamaa.” Pɔɔ ɣɛni ma, “Kɛ̀ nà dɛi, te kàani ga taa‐zei.”

²⁹Na ma niitiɛ te ɣɛni vaazu kɔ̃ɔ‐kɔ̃ɔsu ga dowa vele te ʋazani ba ga maa ʋilea. Na ɣa ɣɛɛ na sɔdasi maazu nu walai ƃalaa ɣɛni luozu, ƃɔvɛlaale é looni ga na laa ga Pɔɔ ɣɛni ga Loomɛ laa‐zei, tɔwɔ é nà ɣili sa ɣɛ.

³⁰Kɛ̀ na wulu zubui sɔdasi maazu nu walai ɣɛni wõi ɣɛɛzu ga é zaƃu ƃɔɔƃɔɔgi wɛ̃ɛ Dusiitiɛ te ɣɛni faa yowũ wosu la ga dáa. É Pɔɔ ʋũi é deʋe ga laa‐ʋaale gwalaitiɛ vɛɛ faa‐wo‐bo kpɔgi ɣaazɔ va te wũi. É va sa ga Pɔɔ é sei te laa wu.