Read Loma TE ƔƐƐ VAITIƐ 24 Bible Online

TE ƔƐƐ VAITIƐ 24 - Loma bible

TE ƔƐƐ VAITIƐ 24

¹Tei sa folo looluo leveni, laa‐ʋaale gwalai Ananaiya vaani ta nuwutiitiɛ taniga é vɛɛ nui nii va ɔ́ ƃɔɛ te ʋaa ma nii daa ɣɛni ga Tɛtolɔ. Te Pɔɔ ɣɛɛ‐zɔ daani gɔmɛti nu walai vɛ.

²Tei sa te Pɔɔ lilini, Tɛtolɔ vɛɛni ga kɛɛ‐zɔ boga gɔmɛti nu walai ma yíɛ ɣɛ tea, “Tei è zaala zu ɣa gé yii‐ma ɣɛɛzu la zii‐laa zu, tei yài è ga nu walai Fiilesi yà ʋaa‐leʋeai zaala zu ɣa faitiɛ te maa‐ʋeli fai ga faa vagɔ maʋaa maala levea la zii nii ʋaa ma,

³gé yee zeivɛ nii wu ga mama feea yìɛ ga gé yii ɣaazɔ pelei ɣaazɔ zu é vɛɛ ŋadɛi ɣaazɔ va.

⁴Kɛ̀ nii yá kɛ gɛ́ lɛ è maa nɛkɛga sa kɔnɔ gà pee ʋeezu yìɛ ga yà ɣaazu‐maa‐wõi zu è wui to gé woo ma ga su ƃua.

⁵Ƃɔvɛlaale gé wɛlɛɛ na va ga zunui nii ɣa ga ŋada‐ŋala‐ŋala nu é ga kpɔɛ‐loo nu Dusiitiɛ ɣaazɔ zaama te zui wɔlɔ‐kɔlɔ ma ɣaali. Na ɣa ɣɛɛ na tɔ ga nu ƃulugi nii wũ‐tuo nu ta tili ga Nazalĩitiɛ.

⁶É pele ɣaa ziɛni ƃalaa ga é Gala‐feli wɔta walai maa woola, kɛ̀ gé soni. [Gé ɣɛni vaazu wɛlɛzu maʋai zu va è ɣɛ velei gá lɔgi la.

⁷Kɛ̀ sɔdasi maazu nu walai Lesiɛ é vaani é kúlo gé ya ga ŋapi ƃakpa

⁸é deʋe ga kɛɛ‐zɔ‐bo beaitiɛ te va è ɣaazu.] Ani yà gaa‐zaɣa kɛɛ na yà ƃɔɔ sɛ‐sɛ, yà zoo è faa wɛ̃ɛ zéea é vile nii ɣaazɔ va gè bosu ga dáa.”

⁹Dusiitiɛ tɛ vɛɛni ƃalaa Tɛtolɔ va tiɛ kɛɛ‐zɔgi wo tiɛ goi wulu ƃaa ga vele ɣa na fai nii ɣaazɔ ɣɛɛ la.

¹⁰Tei gɔmɛti nu walai wũ kɛɛni Pɔɔ ma kpɔkɔ ga é ƃɔɛ, Pɔɔ gaa woteni yíɛ ɣɛ tea, “Tei tɔwɔ gè kwɛ̃ni ga è ɣɛɛvɛ ga faa‐wo‐bo nu zii nii maazu kwena tamaa yee wu, gà nà goo‐zu‐wulo‐kɛi wosu ga kuu‐zu‐nɛɛ vele.

¹¹Yà zoo è wɛlɛ na va ga dìai ma Yɛlusulɛɛ Gala felizu ɛ́ lɛ leveni folo puugɔ kai felegɔ va.

¹²Tɛ lɛ wɛlɛni bà gɔ̀ ɣɛ daaza lɔɔzu nu ta nɛpɛ da ɔ́ nɔ ɣɛ ga gè kpɔ zii wu ziɣi Gala‐feli wɔta walai wu ɔɔ Gala‐feli wɔtai zɔitiɛ wu ɔɔ tai zu.

¹³Tɛ lɛ ƃalaa zooga tɔ seele wulo fai niitiɛ ma te vaa la è wɔ ga dàa.

¹⁴Kɛ̀ gà nii wosu yìɛ ga gaama ga gà gé ɣeeani ta Ɣalagi ʋelizu pele niinɛi nii zu te su veaitiɛ lilisu ga nu ƃulugi nii kuloai te va ga tee, gìɛ fai ɣaazɔ ziɣi ga gaama é Gala na tɔgi zu ɔɔ nii ponɛi Gala daa woo‐wo beaitiɛ ta wɔlɔi zu.

¹⁵Tɔwɔ kì togɛ Gala ba, ki‐togi nii niitiɛ ta ƃɔɔ te yee zeiya bu. Na ɣa ga bu‐ziɣi ʋai saa ya tɔ vaazu ɣɛɛzu na taitiɛ ʋaa ma te luo vele ɣaa lɔgɛi ta niitiɛ te luo vele ɣaa lɛ lɔni.

¹⁶Na ma gà wɔɔzu ga ɣee nɛpɛ ga kìgi zu va Gala faa ma ta nu ƃusea.

¹⁷Tei gɛ̀ lɛ ŋɛni vɛ é yɛga su kwena taniga te levega sa, pàavɛ saba ŋɛnii masasu feeai nà zuu veaitiɛ ʋaa ma, na ɣa ɣɛɛ na gè zalaɣa wulo.

¹⁸Tei gè ɣɛni nii ɣɛɛzu, te pɛ̀tɛni maa‐wuo yekegi ma Gala‐feli wɔta walai wu. Kpɔ ta nɛpɛ gɛ lɛ ŋɛni kòba ɔ́ nɔ ɣɛ ga zaɣa‐zaɣa goo. Kɛ̀ Dusiitiɛ taniga te wulovɛ Eezia—

¹⁹Maa nɛɛvɛ te ɣɛ vɛ è ɣaazu te kɛ̀ɛ‐zɔgi wo, ani faa ta nɛpɛ ka te wuu zu ga kɛ̀ɛ‐zɔ.

²⁰Na laale ƃe ba numai niitiɛ ta ƃɔɔ te kɛ̀ɛ ʋai nii wo te pɛtɛni bà lɛ pele ma, tei gè ɣɛni loni faa‐wo‐bo kpɔgi laa wu.

²¹Kɛni ani faa ɣilagi nii gè boni ga doba tei gè ɣɛni loni te zaama. Na ɣa ga ‘Saa vea wu‐ziɣi ʋai saa ya, na ɣa maʋaa‐wo pilegɛi bà wo laa wu za.’ ”

²²Kɛ̀ tei to mu pele niinɛi nii maʋaa wɛ̃ɛgɛi ɣɛ Fiilesi vɛ ƃɔɔ ga gaa wodoa, é faa‐wogi maa zoni te ya yíɛ ɣɛ tea, “Ani sɔdasi maazu nu walai Lesiɛ ɣa vaa na, gà wa ʋaa‐wogi ɣaa leve.”

²³É sɔdasi wũ‐gila wũ‐tuo nui leʋe sa ga te ɣaazu kɛ Pɔɔ va, kɛ̀ te mɛ lɛ gwala ƃala. Na ɣa ɣɛɛ na te mɛ lɛ baitiɛ ƃe teve baa ʋaa‐ɣɛɛ ʋaa va.

²⁴Tei sa folo taniga te leveni, Fiilesi ƃɔga ŋazai Duusela te vaani. Duusela nii ɣɛni ga Dusi nu. Fiilesi woo leve sa Pɔɔ luo ga é goo mɛni yíɛ ƃɔɛ é vile zee‐la‐mai va yá ɣɛ nu ya é vile Ziizɛ Kolai va.

²⁵Tei sa é ɣɛni ƃɔɛzu é vile tele‐bo ba é vɛɛ nu ƃɔɔ zu‐zo faa va faa ma ta faa‐wo‐gaa‐leve ʋai é vaazu vaazu, Fiilesi luoni é ɣɛ ma, “Wulo vɛ va è li za. Ani gà kavele ɣaa na gà è lili.”

²⁶Kí ge ɣɛni na ƃalaa pɛ ga Pɔɔ ɔ́ naʋolo ʋe zéea. Na ma é ɣɛni keela levesu túo ti‐ti ta tɔ tiɛ yɛpɛ.

²⁷Kɛ̀ tei kwena felegɔ leveni, Pɔɔsia Fɛsɛtɔ é Fiilesi wo‐ga ziɣini. Tei Fiilesi ɣɛni wõi ɣɛɛzu é Dusiitiɛ yii la, é Pɔɔ yɛni kpidi vɛlɛi wu.