Read Loma TE ƔƐƐ VAITIƐ 25 Bible Online

TE ƔƐƐ VAITIƐ 25 - Loma bible

TE ƔƐƐ VAITIƐ 25

¹Tei Fɛsɛtɔ vaani zui nii zu pagɛi é ɣɛ maazu, é wuloni Sɛsɔluiya é li Yɛlusulɛɛ tei folo saagɔ leveni.

²Na ɣa ɣɛɛ na laa‐ʋaale gwalaitiɛ vɛɛ Dusi nu ƃaazagitiɛ va te túo ʋaa woni pa Pɔɔ wɔ vele ga yowũa. Te pee ʋeeni bɛ́

³tiɛ maa nɛɛnɛ ga é kɛ tiɛ ga faa‐nɛɛ ga é Pɔɔ leve Yɛlusulɛɛ tiɛ deʋe ga te gba da tuo te paa pelei ma.

⁴Fɛsɛtɔ gaa woteni ga te ɣaazu ɣa Pɔɔ va Sɛsɔluiya, na ɣa ɣɛɛ na tɔ ɣagi é kpɛtɛni ga su lɛ woozaa é li na.

⁵É ɣɛni tea, “Na ma ƃe ba taitiɛ te lo‐su ba wo zaama gá tiɛni gé li. Na ɣa ɣɛɛ na ani faa ta nɛpɛ ka na é vile zunui nii va ɛ́ lɛ pele ma, ƃe ba te bo ga dáa.”

⁶Tei é kɛɛni te zaama ga folo lɔsava ɔɔ folo puugɔ, é liini Sɛsɔluiya. Na wulu ʋoloi é liini é zei kuutii zu é bo ga te va Pɔɔ.

⁷Tei é vaani, Dusii niitiɛ te ziɣini Yɛlusulɛɛ te loni te maa lite tiɛ faa lamaa wo ga dáa niitiɛ tɛ lɛ ŋɛni ga soloya ʋaa. Tɔwɔ tɛ lɛ ƃega zoo tɔ mazeele wulo.

⁸Pɔɔ boni goo‐zu‐wulo woi zu é ɣɛ tea, “Gɛ̀ lɛ Dusiitiɛ ta lɔgi ŋala‐ŋalani ga ta wolo ƃalaa, ɔ́ nɔ ɣɛ ga gè faa ŋala‐ŋala Gala‐feli wɔta walai wu, ɔɔ gè faa ŋala‐ŋala Siiza ya.”

⁹Kɛ̀ tei Fɛsɛtɔ ɣɛni wõizu é Dusiitiɛ yii la é ɣɛni Pɔɔ ma, “?È wõini è li Yɛlusulɛɛ gè wɛlɛ na fai niitiɛ zu va te daa bɛ̀ ga è laa?”

¹⁰Kɛ̀ Pɔɔ ɣɛni tea; “Gà loni Siiza na kuutii laa wu vɛ pagɛi nà faa‐wogi zu vɛtɛ na. Nii lɛ pele ma gɛ̀ dɛ kɛɛni ga Dusiitiɛ, è ɣɛ velei è kwɛ̃ni la ga pagɔ.

¹¹Ani gà ga fai nii‐ɣɛɛ nu ɛ́ lɛ pele ma, tɔwɔ gè faa yowũ ta ɣɛɛ nii kulo‐ɣɛɛ wogɛi bu bɛ̀ ga gè za su, gɛ̀ lɛ pele ɣaa ziɛzu ga gè vela saa va. Kɛ̀ ani niitiɛ te boga ga dàa ta nɛpɛ gɛ lɛ ga kɛ̀ɛ‐zɔ, nu ta nɛpɛ gɛ lɛ fèea te ya. Ƃe ba Siiza nà faa‐wogi wo.”

¹²Tei sa Fɛsɛtɔ ƃɔga faa‐wo kpɔgi te wũ pileni, é Pɔɔ woo ɣaa woteni é ɣɛ ma, “È ɣɛ Siiza ɣa yá yà ʋaa‐wogi wo, Siiza ɣa yà li pɔ́.”

¹³Tei sa kuu fele ge wuloni su, masagi Agilipa ƃɔga ŋaza nui Bɔniisi te vaani Sɛsɔluiya ga te Fɛsɛtɔ luo.

¹⁴Tei sa te folo lamaa ɣɛɛni na, Fɛsɛtɔ é Pɔɔ na faa‐wogi laani masagi laa wu yíɛ ɣɛ ma, “Zunu ta yɛga vɛ Fiilesi vɛ ga pilisine.

¹⁵Tɔwɔ tei gè ɣɛni Yɛlusulɛɛ, Dusiitiɛ ta laa‐ʋaale gwalaitiɛ vɛɛ ta nu‐wutiitiɛ va te tùo ʋaa woni é vile ba tiɛ gàa‐zaɣa kɛ ga gè bo ga towa faa‐wogi yɛga ma.

¹⁶Gè te woi ɣaa woteni ga ɛ́ lɛ ga Loomɛitiɛ ɣɛɛ ʋaa ga nui kɛɛ‐zɔ bogɛi te fe kɛɛ‐zɔ‐bo beaitiɛ ya ani dɛ tɛ lɛ wuloni ɣii ɣaazu, na ɣa ɣɛɛ na pele ɣɛ na ga manui woo zu wulo fai nii zu te boga ga dáa.

¹⁷Na ma tei te ƃɔni su te va vɛ, gɛ̀ lɛ tooni pulu. Na wulu ʋoloi gè lɛɛni kuutii zu gè zei gè bo ga te va ga zunui na.

¹⁸Tei kɛɛ‐zɔ‐bo beaitiɛ te wu ziɣini te lo, tɛ lɛ faa ta nɛpɛ boni ná faa‐wogi zu ɔ́ yowũ è ɣɛ velei é ɣɛni la nà dɔ ɣigi zu.

¹⁹Kɛ̀ faa ta ɣa na te zakpegɛi maazu ta tiɛni é vile te ƃɔɔ Ɣala fai va, é vile wɔnɔ nu ta va daa ga Ziizɛ nii é zaa kɛ̀ nii Pɔɔ boni ga tɔ ŋetea.

²⁰Tei tɔwɔ kì daa viligɛi ga velei gà fai niitiɛ zu vɛtɛ da, gè Pɔɔ ɣaa‐zaɣa kɛɛni ga ani é wõini é li Yɛlusulɛɛ gè ná fai niitiɛ zu vɛtɛ na te boga ga dáa.

²¹Kɛ̀ tei Pɔɔ é ná faa‐wogi ʋeea Siiza ya ga é yɛ gaazu‐kɛ‐ba velei zu é yɛsu nà gaa leve, gè deʋeni ga te yee ka ba é yɛsu gè teve Siiza wɔ vɛ.”

²²Agilipa ɣɛni Fɛsɛtɔ ma, “Gè wõini gè zunui woo mɛni nà ƃɔɔ.” Nà ɣɛ ma, “Yà goo mɛni ŋina.”

²³Na ma tei gela boni, Agilipa ƃɔga Bɔniisi te vaani te maa ɣiliai ga kpakpaa te lɛ faa‐wo‐bo kwɔtai wu, sɔdasi maazu vea ƃaaza‐ƃaazagitiɛ te te va ta taa vea ƃaaza‐ƃaazagitiɛ. Na ɣɛɛzu te va ga Pɔɔ è ɣɛ velei Fɛsɛtɔ deʋeni la.

²⁴Fɛsɛtɔ ɣɛ tea, “Masagi Agilipa è vɛɛ wo ɣaazɔ va a de vɛ da wani, wa wɛlɛzu zunui nii va Dusiitiɛ ɣaazɔ te gàa‐zaɣa kɛɛ é vile maʋaa va Yɛlusulɛɛ lai zu vɛɛ vɛ va, tiɛ loba ga ɛ́ lɛ ga nui maa nɛɛ é yɛ ŋetea ga ta wolo ƃalaa.

²⁵Kɛ̀ gè wɛlɛni na va ga ɛ́ dɛ faa ta ɣɛɛni ɔ́ tii kulo wo ga é za su. Na ɣa ɣɛɛ na è ɣɛ velei tɔ ɣagi é boni la ga Siiza ná faa‐wogi wo, gè kpɛtɛni ga gè teve.

²⁶Kɛ̀ faa ta lɛ zèea leelaa ga gè ponɛ nà nu keea nu wɔ é vile ba. Na ma gè vaa la wo ɣaazu, masagi Agilipa ná dɔ vele ƃɔɔƃɔɔ ma, ga a da gaa‐zaɣa kɛɛ na sɛ‐sɛ, faa ta ɣɛ zèea ga gè ponɛ.

²⁷Ƃɔvɛ‐laale kulovɛ gàazu ga ɛ́ lɛ ɣɛ pele ma ga è pilisine leve ɛ̀ lɛ fai niitiɛ lɛɛ te boga ga kɛɛ‐zɔ.”