Read Loma TE ƔƐƐ VAITIƐ 3 Bible Online

TE ƔƐƐ VAITIƐ 3 - Loma bible

TE ƔƐƐ VAITIƐ 3

¹Pite ƃɔga Jɔ̃ te ɣɛni lɛɛzu Gala‐feli wɔta walai wu Gala‐feli ziɛgi zu, na ɣa ga kpɔkɔ ʋolo ɣaa ƃaa‐ƃaa.

²Na ɣɛɛzu numaa te ɣɛni liizu ga zunu ta te kaani mɛlɛ‐ŋɛlɛgɛi nii tɔ da Gala‐feli wɔta walai maziɣigi laavɛ ga ɣee nɛpɛ. Tɔ ná lili ga siɣi‐daa‐vele‐zu vapa. Tɔ zunui nii la vɛ kɛɛ ʋaa ma é numaitiɛ ʋeli tɔ ɣɛ lɛɛzu Gala‐feli wɔta walai wu.

³Tei zunui nii wɛlɛni Pite va ta Jɔ̃ te ɣɛ sa te lɔ Gala‐feli wɔta walai wu, é te ʋelini.

⁴Pite ta Jɔ̃ te ɣaazu wote ma, Pite ɣɛ ma, “Wɛlɛ gé va.”

⁵Zunui ɣaazu zei te wu é sa kí su ga tɔ vaazu ŋɛni zɔlɔ wosu te ya.

⁶Kɛ̀ Pite ɣɛ ma, “Kani gɛ lɛ zèea ta zɛni, kɛ̀ nii é zèea gà fe è ya. Nazɔi Yiizɛ na daa‐zeigi zu, ziɛ.”

⁷É zɛba do é kpalo zée zagi va é bu ziɣi. Na ɣɛɛzu ƃɔɔ nɔ sapalagi vɛɛ kɔwɔ wɔ daavɛ va te zu ƃaa ga maa ʋilea.

⁸É lɛɛni kpɔ̃ɔ é lo é ziɛ, ta tiɛni te lɛ Gala‐feli wɔta walai wu. É ɣɛni sa ziɛzu yíɛ lɛ kpɔ̃ɔ‐kpɔ̃ɔ yíɛ Gala daa maa lɛ.

⁹Nui ƃɔgɔpɛ ge wɛlɛni ba yíɛ ziɛ yíɛ Gala daa maa lɛ.

¹⁰Te kwɛ̃ɛni ga nui ɔ́ wɔlɔ zei Gala‐feli wɔta walai maziɣigi laavɛ daa ga siɣi‐daa‐vele‐zu vapa. Fai nii é ɣɛɛni ga zunui nii é vilini tiɛ ga ki‐gaa‐ziɛ wala é wulo wɔnɔ ga tiɛ ga kpakpaa.

¹¹Tei zunui nii ɣatagɛi ɣɛ Pite va ta Jɔ̃, nui ƃɔgɔpɛ te ƃɔni su te ƃize te li te wɔ vɛ beelii zu daa ga Salamɔ̃ veelii. Fai nii wuloai ɣɛ ga tiɛ ga kpakpaa.

¹²Tei Pite wɛlɛni nii va, é ƃɔɛni numaitiɛ wɔ yíɛ ɣɛ tea, “Yezɔi veaitiɛ, aƃɛi é fai nii wuloa ga wiɛ ɔɔ aƃɛi é kɛɛ wo wɛlɛzu gé va taamuu yà ka è ɣɛ gé ƃɔɔ ɣaa‐ƃaa zaala zu ɔɔ gé ƃɔɔ luo vele vagɔ zaala zu ɣa gé kɛɛ la zunui nii yìɛ ziɛ?

¹³Galagi nii é ga Eeƃɔlɔhɛ̃ɛ na Galagi é ga Aize na Galagi é ga Yeekɔ na Galagi é ga de ɣeeani ta Ɣalagi, é saala laani ná tii‐ɣɛɛ nui Ziizɛ ma nii wo teveni Paila wɔ wo máʋaa zakpe gáazu, tei é kpɛtɛni ga é ƃe ba.

¹⁴Wɔ mu nui kuloai su ga tee Gala faa ma é ga tele‐bo tuo‐wo nu, wo maʋaa zakpeni wo nu‐vaa nu mamaa‐nɛɛnɛ bo ga te fe wo ya.

¹⁵Na ɣa ɣɛɛ na wo zɛʋu maʋaa‐lɔɔ‐zei nui vaa, tɔwɔ Gala ge bu ziɣi saa ya. Gá ga nii mazeelea.

¹⁶Ziizɛ na daa‐zeigi, na ɣa ga zee‐la‐mai yá ɣɛ nu ya é vile ná daa‐zeigi va, towaa é kɛɛ zunui nii zu ƃaa nii wo pɛtɛga wo kwɛ̃ɛ. Zee‐la‐mai yá ɣɛ nu ya Ziizɛ zaala zu towaa é zunui nii lɔtɔ zu wodoa ƃɔɔ kãlai wo pɛ wo ɣaazu ma.

¹⁷Na ɣa ɣɛɛ na, nà numaa, gè kwɛ̃ni ga wo tuoi nii woni liti su, è ɣɛ velei wo maazu veaitiɛ te kɛɛni la ƃalaa pɛ.

¹⁸Kɛ̀ nii Gala ge boni ga ná yee luo vele é wulo Gala daa woo‐wo beaitiɛ ɣaazɔ la ga kɛni ná nui é ga Kolai ɔ́ laa‐nɔwɔ wo, vele ɣa na Gala tɔ ƃɔɔ teveni la ma.

¹⁹Na ʋaa ma a wulu ɣaa ʋe wa ʋaa yowũitiɛ va wo lite wɔnɔ wulu, kɛɛ ʋaa ma wa ʋaa yowũitiɛ te ƃale wiɛ tɛ‐tɛ, kɛɛ ʋaa ma fidaa‐wulo ziɛgi ziiti nii yá va de maliɣii na kɛ‐kobai zaala zu.

²⁰Na ɣa ɣɛɛ na Gala ka Kolai leve nii é kuloa wo ʋaa ma, na ɣa ga Ziizɛ,

²¹nui maa nɛi máa zɔlɔ wo Gala ta ƃɔɔ ti ga é yɛ na é yɛsu siɛgi ziiti fai ƃɔgɔpɛ gaa‐zei ʋaa ma. Gala ge nii woni wɔlɔ é wulo numaitiɛ la te wuloai ɣɛ su ga tee ga daa woo‐wo bea.

²²Mooze ɣɛni tea, ‘De maliɣii Gala ka nu wu ziɣi wo zaama é ɣɛ ga Gala daa woo‐wo nu wo ʋaa ma è ɣɛ velei é bù ziɣini la. Wa wui lo góo ma faa mazii ta nɛpɛ su yá bo wiɛ.

²³Nii yá ɣɛ tɔ ga nui nɛpɛgi ɛ́ lɛ ɣɛ wui loni Gala daa woo‐wo nui na woo ma, su ɣa ŋala‐ŋala é wulo numaitiɛ va.’

²⁴Na ɣa ɣɛɛ na Gala daa woo‐wo beai niitiɛ nɛpɛgi te ƃɔɛ wɔlɔ numaitiɛ wɔ é ziɣi sa Samia na siɛgi zu ma é loo niitiɛ ta dɔ ziɛ su ma te wu ziɣini ga Samia wulu vele, te ɣaazɔ te fai nii woga ga woo maa‐zeezea é vile siɛgi nii va.

²⁵Wa ɣa wo ga Gala daa woo‐wo beaitiɛ te mazuwui wo ga deʋei zu‐lɔnɔ‐zɔlɔ‐wo bea nii Gala ge daani wo ɣeeani zeea yíɛ ɣɛ Eeƃɔlɔhɛ̃ɛ ma, ‘È mazuwui zaala zu ɣa tuuyiɛ ɣa loo la zui zu ɣaalaa ɣaazɔ ma.’

²⁶Tei sa Gala ge ná tii‐ɣɛɛ nui wu ziɣini, é teveni wo wɔ vɛ ga maa wũ pa kɛɛ ʋaa ma é tuuyiɛ loo wiɛ ga velei yá wo ɣile‐giledai wulu ɣaa ʋe da ná kuu‐zu‐ƃɔlɔ luoi va.”