Read Loma TE ƔƐƐ VAITIƐ 4 Bible Online

TE ƔƐƐ VAITIƐ 4 - Loma bible

TE ƔƐƐ VAITIƐ 4

¹Tei te ɣɛni ƃɔɛzu numaitiɛ wɔ, laa‐ʋaalegitiɛ ƃɔga Gala‐feli wɔta walai maa‐ƃɛɛ veaitiɛ te wũ‐tuo nui é vɛɛ sa Sadusiitiɛ va te lɛɛni ga tiɛ ɣili‐ɣili.

²Wãlagɛi ɣɛ tiɛ ƃɔvɛlaale te ɣɛni numaitiɛ yala bosu tiɛ kɔnɔ nu wu‐ziɣi ʋaa wo saa ya ga woo maa zeezea Ziizɛ wu‐ziɣi ʋai ma saa ya.

³Te te zoni te te vili kpidi vɛlɛ wu ga te yɛ na gela bo, ƃɔvɛlaale é ɣɛni ʋɔlɔ sa ga kpɔkɔ.

⁴Kɛ̀ taitiɛ te woi mɛnini te bɔɔlɔ‐zu te siɣini ga gaama. Na ɣa ɣɛɛ na te mazinaitiɛ tɔ zoo te ziiti wulu dooluo zu.

⁵Tei sa gela boni, te maazu veaitiɛ ƃɔga nuwutiitiɛ é vɛɛ sa wuigitiɛ va te ɣaa lɛi ɣɛ ba Yɛlusulɛɛ.

⁶Eena, nui é ɣɛni ga laa‐ʋaale gwalai, Keeafa, Jɔ̃, Alezãda é vɛɛ sa laa‐ʋaale gwalai na kaalai ɣaazɔ va ta ɣa te ɣɛni na.

⁷Tei te vaani ga tiɛ kpɔgi zaama, te te ɣaa‐zaɣa kɛɛni te ɣɛ te ma, “Gaa‐ƃaa zɛƃɛ zu ve, ƃaa daa‐zeigi zɛƃɛ zu ɣa wo nii ɣɛɛni na?”

⁸Na ɣɛɛzu Pite nii zii laa ʋegɛi ɣɛ Gala baa ŋinɛgi vɛ é ɣɛ te ma, “?Wai wo ga numaitiɛ maazu veaitiɛ é vɛɛ nuwutiitiɛ va,

⁹wa gé ɣaa‐zaɣa kɛɛzu za é vile faa vagɔi nii va kɛ́i ga mɛlɛ‐ŋɛlɛ nui? —pele zɛƃɛi zunui nii valoa la?

¹⁰Ka dɔɔ kɛ mu a nii wɛ̃ɛ wo ɣaazɔ é vɛɛ Yezɔitiɛ ɣaazɔ va, ga Nazɔi nui Ziizɛ Kolai na daa‐zeigi zu ɣa zunui nii valoa na é loni wo laa wu. Ziizɛi nii ɣa wo kpakoni pɛɛ‐pulu wulu likpii ma é ga nui Gala ge bu ziɣini saa ya.

¹¹Nii ɣa é ga kwɔtii wo ɣɛlɛɛ ba, wai wo ga pɛlɛ‐lo beaitiɛ, tɔ wɔ ka é ɣɛɛ sa ga kwɔtii maʋaa wɔɔlɔɔ baa pɛ ba.

¹²Tɔwɔ balolai lɛ zɔlɔ woga nu taƃɔnɔ saala zu, ƃɔvɛlaale daa‐zei taƃɔnɔ nɛpɛ gɛ lɛ dɛ zɔlɔ woni nu ƃusea zaama gee wɔlɔgi wu nii pagɛi a de valo saala zu ƃɔɔ ti.”

¹³Tei te wɛlɛni Pite na duo lalai va ta Jɔ̃ te ná vɛtɛ wɔnɔ ga tɛ lɛ ŋɛni kɔlɔ wɛ̃ni, tɔwɔ te lo‐su lɛ ŋɛni ma leelaa, ki‐gaa‐zie vilini tiɛ. Te gaa ɣa sa ga te ɣɛni Ziizɛ va.

¹⁴Kɛ̀ tei tɔwɔ te ɣɛ wɛlɛzu zunui va baloai é loni te woba, faa ta nɛpɛ gɛ lɛ ŋɛni te la tɔ maʋai maa wulo la.

¹⁵Kɛ̀ tei sa te boni te ma ga te wulo faa‐wo‐bo kpɔgi zu, numaitiɛ te wũ‐pile boni

¹⁶tiɛ ɣɛ tea, “Aƃɛ ɣa sa a da kɛ ga zinai niitiɛ? Ƃɔvɛlaale faa maa‐wɔlɔ‐wɔlɔ kɛɛ ʋai te zaala zu nii é ga seele, gaa wodovɛ Yɛlusu‐lɛɛ vea ƃɔgɔpɛ gaazu. Da wɔ dɛ lɛ zooga dɔ maʋai zakpe.

¹⁷Kɛ̀ nii yá kɛ fai nii mawoo lɛ zia numaitiɛ zaama ɔ́ leve vɛ va tɔ ga a de ƃaa zaɣa te ma ga te mɛ lɛ sa ƃɔɛ nu ta nɛpɛ pɔ daa‐zeigi nii zu.”

¹⁸Na ʋaa ma te te lilini te bo tiɛ ga te mɛ lɛ sa faa ta wo ɔɔ kala‐bo ta nɛpɛ bo Ziizɛ na daa‐zeigi zu.

¹⁹Kɛ̀ Pite ƃɔga Jɔ̃ te te woi ɣaa woteni te ɣɛ te ma, “Ani tɔ ga gaama Gala gaazu ga wa ɣa pagɛi nu wui lo wo woo ma Gala taale, wa ƃɔɔ nɔ ɣa wa na ɣaa leve.

²⁰Ƃɔvɛlaale nii gé pɛtɛga ta nii gé mɛniga, kɛtei nɔ gé bo.”

²¹Tei sa wɔnɔ te ƃaa zaɣani tiɛ, te ƃeni te va te li. Tɛ lɛ pele zɔlɔ woni ga te te laa nɔwɔ wo da numaitiɛ zaƃu ma. Ƃɔvɛlaale nui ɣaazɔ Gala daa maa lɛɛni fai nii ma é ɣɛɛni.

²²Ƃɔvɛlaale zunui nii baloi woni la é dɛ ga seele, kaa wenagi levegɛi sa ɣɛ kwena zee naagɔ va.

²³Tei sa te ƃeni tiɛ, te liini te vaitiɛ wɔ vɛ te fai nii la te vɛ laa‐ʋaale gwalaitiɛ ƃɔga nuwutiitiɛ te boni te ma.

²⁴Tei te nii mɛnini te ƃɔni te woi lɛ gee zu Gala pɔ vɛ te ɣɛ tea, “Gá nu keea nu, yài è gee ƃɛtɛni ta zui é vɛɛ yuwu va ta te zu ŋɛni ɣaazɔ,

²⁵yài é wuloni yà lii‐ɣɛɛ nui gé ɣeea Deeve la yíɛ bo ga è woi è vaa ŋinɛgi zaala zu yíɛ ɣɛ tea, ‘Zɛƃɛi é kɛɛni zii ƃalaaga tiɛ woei leve, na ɣa ɣɛɛ na numaa tiɛ ɣi gaa ziɛ faa yãka ma?

²⁶Zui zu masagitiɛ te kɔɔ ƃɛtɛni, numaitiɛ maazu veaitiɛ ɣaa lɛi ba ga te wɔ è wɔ, yài è ga gé maliɣii, ta nui è yee ƃakoga ba ga masagi.’

²⁷Ƃɔvɛlaale te ɣaa lɛɛni ba tai nii zu ga ƃɔɔƃɔɔ su ga te wɔ Ziizɛi nii wɔ kuloai su ga tee ga yà lii‐ɣɛɛ nu, nii è yee ƃakoga ba ga masagi. Natiɛ ta ga Yɛloo ƃɔga Pãtia Paila é vɛɛ sa zii ƃalaagitiɛ va ta Yezɔi veaitiɛ.

²⁸Te ɣaa lɛɛni ba ga nii nɛpɛgi è yee viliga su è deʋe ga é leve ma ga ná yee luo vele, te kɛ.

²⁹Na ʋaa ma, gé maliɣii, yà yee zakpa na ga è nu valo, faani tiɛ ɣɛ ga seele, faa maa‐wɔlɔ‐wɔlɔga tiɛ ɣɛ Ziizɛi nii na daa‐zeigi zu kuloai su ga tee ga yà lii‐ɣɛɛ nui, wɛlɛ ƃalaa pɛ velei va te ƃaa zaɣasu la gíɛ è ʋa bu gái gé ga yà lii‐ɣɛɛ veaitiɛ gé è woi wo duo ʋaa ta nɛpɛ ge mɛ lɛ ɣɛ ba.”

³¹Tei sa te Gala felini, vɛ te ɣaa lɛi ɣɛ ba na ná ƃelini. Na ɣa ɣɛɛ na Gala baa ŋinɛgi te pɛ te yii laa ʋeni te Gala goi wo sa ga duo lala vele.

³²Nu ƃɔgi niitiɛ te Ziizɛ ʋaa ziɣini ga gaama, te woo lai ɣɛ ma te ɣigi ɣile. Nu ta lɛ ŋɛni tea ŋɛnii nɛpɛgi é sɔlɔ woga tɔ ga pó, kɛ̀ ŋɛnii ɣaazɔ ɣɛni te ya su ɣilekpu.

³³Na ɣa ɣɛɛ na Ziizɛ na keelaitiɛ te seele woo ʋeeni ga gaa‐ƃaa wala de maliɣii Ziizɛ wu‐ziɣi ʋai ma saa ya. Baa ƃakpa laani sa te ɣaazɔ ma.

³⁴Nu ta nɛpɛ gɛ lɛ ŋɛni na ɔ́ ƃala te zaama, ƃɔvɛlaale niitiɛ nɛpɛ tɔ ɣɛ ga zuu ɔɔ pɛlɛ keea vea tɔ te zɔ̃wɔ wulo. Nii tɔ sɔ̃wɔ wulo tɔ va ga mazɔ̃wɔi

³⁵te pu Ziizɛ na keelaitiɛ ɣakala. Na ɣa ɣɛɛ na tɔ gaa wɛɛ te ɣile‐giledai vɛ ga velei nɔ maƃala ɔ́ ɣɛ la te ma.

³⁶Nii mavele ma Zoosɛ nii Ziizɛ na keelaitiɛ te daa‐zei kpɔnɔ seini ba ga Banaba (nii zu‐wulo‐zu ɣa ga nu yii‐lɔɔ zunu lui), nii é ɣɛ ga Liiʋai ta é wɔnɔ ga taa‐zei Saipɔlɔ yui ʋaa ma,

³⁷é zuu ta zɔ̃wɔ wuloni nii é ɣɛ ga pó é va ga manaʋoloi é pu Ziizɛ na keelaitiɛ ɣakala.