Read Loma TE ƔƐƐ VAITIƐ 7 Bible Online

TE ƔƐƐ VAITIƐ 7 - Loma bible

TE ƔƐƐ VAITIƐ 7

¹Laa‐ʋaale gwalai ɣɛ tea, “?Kavelei ɣa?”

²Setiifɛ̃ ɣɛ tea, “Nà numaa wa kèeani, a wui to. Saala‐ma Ɣalagi wuloni de ɣeea Eeƃɔlɔhɛ̃ɛ ɣaazu kɛ́i ma Mɛsopoteemia ɔ́ teɣa ɣɛ zeizu Heelɔ̃,

³é ɣɛ ma, ‘Wulo yà yui va è wulo yà ɣaalaitiɛ zaama è li zui nii zu gà dɛ ga yìɛ.’

⁴Kulo vele ɣa na é ɣɛ ta yui va é li é zei Heelɔ̃. Tei sa kéea zaani, Gala ge kuloni na é vaa la zui nii zu za wo zeini gá.

⁵Na ƃalaa ɣɛɛvɛ Gala gɛ lɛ zui na ta nɛpɛ feeni zéea ga pó. Ɛ́ lɛ nu wɔwɔ lo‐su gila kpalaa ʋeeni zéea. Kɛ̀ é ki toni ga é zui na ʋe zéea ga pó é vɛɛ mazuwuitiɛ va ta ziɣi ga pulu vele, velei ƃalaa duu lɛ ŋɛni la zéea.

⁶Vele ɣa Gala ge boni la. É boni ga Eeƃɔlɔhɛ̃ɛ mazu‐wuitiɛ ta ɣɛ ga wɛ̃ɛ zuu ta zu nii é ga nu ƃalaaga wo. Nui niitiɛ ta te ɣɛ ga dua te te zo pele yowũ kwena wũ naagɔ yee wu.

⁷Gala ge ɣɛ wɔnɔ tea, ‘Kɛ̀ tɔwɔ gà kɛ zii nii wulo na wo folo ɣa, niitiɛ Eeƃɔlɔhɛ̃ɛ nu zuwui ɣa mɔɔlɛ tiɛ. Na ɣa wulo na ba ta wulo zui na zu te va tiɛ fèli vɛ.’

⁸É zɛba do sa é sei‐kpoto‐ma ʋai maleʋei la Eeƃɔlɔhɛ̃ɛ ya. Aize ɣaa vele ɣa na é ɣɛ Eeƃɔlɔhɛ̃ɛ vɛ, é sei kpoto ma ga foloi dɔsava kelei. Aize wɔ ge Yeekɔ ɣa. Na ɣa ɣɛɛ na Yeekɔ é de ɣeeani sei‐zu puugɔ kai felegɔi ɣa.

⁹“De ɣeeani te zilini ga Zoosɛ te sɔ̃wɔ wulo Iije yui zu. Kɛ̀ Gala ge ɣɛni koba.

¹⁰É kuloni faa ƃoei ɣaazɔ zu é zeini ma é kɛ maʋai nɛɛ Iije masagi Feeloo vɛ é kɛ ga kele‐ɣele nu gáazu. Masagi nii ɣa ɔ́ kɛɛni ga Iije yui maazu‐ʋaa‐wo nu ta ná pɛlɛi wu ʋaa ɣaazɔ.

¹¹Tɔwɔ pulu looni Iije yui wɔlɔ‐kɔlɔ ma ɣaali ta Keena yui, faa ƃoei wala yíɛ zei te ma. De ɣeeani tɛ lɛ ƃega daa‐mii ŋɛni vɛtɛ.

¹²Kɛ̀ tei Yeekɔ mɛnini ga mɔlɔ ɣa Iije, é de ɣeeani teveni na. Nii ɣa é ɣɛni ga ná ziɛ maa wũ te vɛ.

¹³Siɛi fele kelei zu Zoosɛ ƃɔɔ lɛɛni ga deɣe vɛɛ diɛni ba. Na ɣa ɣɛɛ na taitiɛ ta Zooseni te ɣeea ma te maʋai ɣɛ sa ga Feeloo wɛ̃ɛ faa.

¹⁴Zoosɛ keela leve sa é keea Yeekɔ lili pɔ vɛ é vɛɛ nà ná kaalai ɣaazɔ va. Te pɛ te ɣɛni ga nu yee lɔfela kai looluo.

¹⁵Yeekɔ zɛba sa é li Iije. É za tɔ ƃɔɔ ta de ɣeeani.

¹⁶Te vaani wulu ga tiɛ Sɛkɛ̃ lai zu te te la kwɔti ɣabai nii zu Eeƃɔlɔhɛ̃ɛ geeani ga kani Heemɔ dea zinaitiɛ ma Sɛkɛ̃.

¹⁷“Kɛ̀ tei sa ki‐togi nii Gala ge boni ga Eeƃɔlɔhɛ̃ɛ maziɛgi ɣɛni lɔtɔsu, nu zuwui nii ɣɛni lamasu maa yìɛ wɔɔlɔ Iije yui zu.

¹⁸É yɛsu Iije masagi taƃɔnɔ ge wu ziɣi nii lɛ ŋɛni ga Zoosɛ wɛ̃ɛga.

¹⁹É de mazii zoni ga daa‐leve‐ba vele é de ɣeeani kɛlɛ gbɛdɛ ga te ta luuyɛ̃gitiɛ loo ya ŋetea, kɛɛ ʋaa ma te mɛ lɛ yɛ na tɔ wulo su.

²⁰Siɛgi nii zu ɣa te Mooze ɣaani la. Pagɛi ɣɛ Gala gaazu. Na ɣa ɣɛɛ na te kɛɛni kulozu su kéea na pɛlɛi wu ga ɣalo saagɔ.

²¹Tei te tooni ya ŋetea, Feeloo duu ŋaza nui siɣini é kulo su ga kpɔɔ zunu luu.

²²Te Mooze ɣala boni Iije veaitiɛ ta ɣele‐ɣele tuoi ɣaazɔ zu. Na ɣa ɣɛɛ na daa ɔ́ ʋa ga kpaanaga yíɛ ɣɛɛ ʋaa ɣɛ ga kpaanaga.

²³“Tei é kɛɛni ga kwena zee naagɔ, é vilini kigi zu ga é laali baitiɛ ma, na ɣa ga Yezɔitiɛ.

²⁴Tei é wɛlɛni te gila ba te ƃaa wogɛi ma, é ƃɔni nui nii va te daza‐yaa woni é ná dɔ wui kulo ga velei é Iije nui nii ʋalani la é za.

²⁵Mooze ɣɛni kaazu ga baitiɛ te gaa ɣaani ga Gala ka ɣɛɛzu ga zaƃu é te wulo faa zu, kɛ̀ tɛ lɛ ŋɛni gaa ɣaani.

²⁶Na wulu ʋoloi é wũ kuloni taniga ma tiɛ kɔ. Ɔ́ zoo é te yɔɔzu ƃɛtɛ. É ɣɛni ɣɛɛzu te ma, ‘Nà numaa, wa ga kaalaa ɣila. Tɔ ɣɛ le wo ƃaa wosu ɣii ma?’

²⁷Kɛ̀ zunui nii é ɣɛni ƃaa wosu bɔi ma é Mooze likpeni yíɛ ɣɛ ma, ‘Ƃɛ ɣa é è ɣɛɛ ga gé maazu‐ʋaa‐wo nu ta gá ʋaa‐ɣaa‐leve nu?

²⁸È wõini è pàa è ɣɛ velei è Iije nui vaani la ŋina?’

²⁹Woi nii kɛɛni Mooze vela é ɣɛ ga wɛ̃ɛ ga ƃala vele Midiɛ̃ yui zu. Ná ɣa é zinaa lea felegɔ maa zɔlɔ wo na.

³⁰“Tei sa kwena zee naagɔ leveni, Gala ta ɣeela wuloni gaazu ŋabu‐zogi zu é ɣɛni tife wũ ta va. Nii ɣɛɛni Sainai ɣizii maƃooʋei zu.

³¹Tei Mooze wɛlɛni na va, ná maɣi‐gaa‐ziɛ vilini ma. É ɣɛni nɔ lɔtɔsu ná va ga é wɛlɛ, de maliɣii Gala woi lɛ yíɛ ɣɛ tea,

³²‘Nà ɣa gè ga è ɣeeani ta Ɣalagi, na ɣa ga Eeƃɔlɔhɛ̃ɛ, Aize ta Yeekɔni ta Ɣalagi.’ Mooze ƃelini, na ɣa ɣɛɛ na mɛni‐masa kɛ̃i ɣɛ é wɛlɛ na va.

³³De maliɣii ɣɛ ma, ‘Kɔlɔitiɛ wulo wɔwaa, ƃɔvɛlaale vɛ è loni na, ná ɣa ga zui maa wuai.

³⁴Gaama zu, gè wɛlɛɛ nà numaitiɛ zo pele yowũ velei va Iije gè te ƃala goi mɛniga. Gè vilega ga gè te wulo faa zu. Na ma, va. Gà è leve Iije.’

³⁵Moozei nii te ɣɛlɛni ba tiɛ ɣɛ ma, ‘ƃɛ ɣa é è ɣɛɛ ga gé maazu‐ʋaa‐wo nu ta gá ʋaa‐ɣaa‐leve nu?’ towa Gala ge teveni ga te maazu‐ʋaa‐wo nu ta te wulo‐faa‐zu nu. Gala ge nii ɣɛɛni ga velei é ɣɛɛni la ga zaƃu ná keelai wulo Mooze ɣaazu tife wũgi zu.

³⁶Mooze pele wuloni ga tiɛ te wulo Iije va, tei sa é faa maa‐wɔlɔ‐wɔlɔga ɣɛɛni é faaniga lɛ ga seele Iije yui zu, é ta ɣɛ yuwu maƃoeigi ɣa, é ɣɛ wɔnɔ kɛɛzu kpooʋei zu kwena zee naagɔ yee wu.

³⁷Moozei nii ɣa é ɣɛni Yezɔitiɛ ma, ‘Gala ka daa woo‐wo nu wu ziɣi wo zaama è ɣɛ velei é bù ziɣini la.’

³⁸Towaa é ɣɛni Yezɔitiɛ te maƃɔgi zaama kpooʋei zu ta Gala ta ɣeelai nii é ƃɔɛni pɔ́ gizi gwalai Sainai ma. Ta de ɣeeani te ɣɛni kpooʋei zu. Woitiɛ te ziitini ma ga é bo de ma, niitiɛ tɛ lɛ ziɣini daa‐zu.

³⁹De ɣeeani tɛ lɛ kɛɛni tɔ goo mɛni, kɛ̀ te tikpeni ga yee wulu vele. Na ɣa ɣɛɛ na Iije yui zu wõi vili te yii zu

⁴⁰tiɛ ɣɛ Eelɔ̃ ma, ‘Galaga ƃɛtɛ gé vɛ te ɣɛ gé luo. Moozei nii na dɛi é loga gé luo é wulo ga gíɛ Iije yui va, gɛ́ lɛ kwɛ̃ni nii é ɣɛɛ la.’

⁴¹Na ɣa ɣɛɛ na te nikɛ yuwu maa niini kpɛtɛni siɛgi na zu. Te zalaɣa wulo sa maa‐niini galagi nii ma. Na ɣa ɣɛɛ na te te ƃɛtɛ ŋɛnii mawuu‐zu‐nɛɛ wuloni.

⁴²Kɛ̀ Gala ge wulu ɣaa ʋeni te va é ƃe te va ga te gee‐zuvɛ ʋolo ŋɛniitiɛ ʋeli‐yeke kɛ, è ɣɛ velei ponɛi la Gala daa woo‐wo beaitiɛ ta wɔlɔi zu yíɛ ɣɛ tea, ‘?Yezɔi vɛlɛi, wo sua vaani wo fe zèea wo zalaɣa ŋɛnia ʋe zèea kwena yee naagɔ yee wu kpooʋei zu?

⁴³Na ɣa ɣɛɛ na wo Moola na kwɔtai ziɣi, galagi daa ga Lɛfɛ̃ wo nà ná sɔmɔ dekai ziɣi. Niitiɛ ta ga maa niinigitiɛ wo te ƃɛtɛɛ ga wo te ʋeli. Na ʋaa ma gà wo wulo vɛ va gè li ga wiɛ Babelɔ̃ wulu vele.’

⁴⁴“Seelei mawɔtai ɣɛni de ɣeeani zeea kpooʋei zu, è ɣɛ velei Galagi nii é ƃɔɛni Mooze wɔ é deʋeni la ga Mooze nii mazii lo é pɛtɛga.

⁴⁵De ɣeeani pɔ te vaa la vɛ ta Jasuani, tei te zii niitiɛ valani ta yuitiɛ ma, niitiɛ Gala ge te ƃɛɛni te luo. Vele ɣa na é ɣɛni la é yɛsu é ziiti Deeve na yɛminigi ma.

⁴⁶Deevei nii maʋai nɛɛni Gala bɛ é maa nɛɛnɛni, na ɣa ga Yeekɔ na Galagi, ga nà ʋa bu é kɛɛ‐zu ɣaa ziɛ ga é ɣɛ na.

⁴⁷Kɛ̀ Salamɔ̃ ɣa é pɛlɛ loni Gala faa ma.

⁴⁸Na ƃalaa ɣɛɛvɛ ŋɛni pɛ maazu Ɣalagi ɣɛɛ‐zu lɛ ga pɛlɛi niitiɛ wu te ƃɛtɛi ga nu ƃuse yee. È ɣɛ velei Gala daa woo‐wo nui boga la é ɣɛ tea,

⁴⁹‘De maliɣii Gala ka ɣɛɛzu tea, gee‐zuvɛ ɣa ga sèi ƃɔkpɔgi, zui zu ga kɔ̀wɔ vile‐su. Pɛlɛ Zɛƃɛ ɣa wa to bɛ̀, ɔɔ minɛ ɣa ná ɣa ɣɛ ga dòowo‐su?

⁵⁰?Nà lei zèe ɔ́ nii ɣaazɔ ƃɛtɛ?’

⁵¹Setiifɛ̃ ɣɛ te ma, “Wai ŋɛ ni wo ga gui‐zu‐ƃɔlɔ bea, wɛ lɛ Gala fai va wo yii zu vele wo wui laa wulugɛi gaamai luo, na ɣa ɣɛɛ na wiɛ kpaa wulo ɣee nɛpɛ Gala baa ŋinɛgi ya. Velei nɔ wo ɣeeani te kɛɛni la, vele nɔ na wo kɛɛzu la.

⁵²?Gala daa woo‐wo nui zɛƃɛ ɣa wo ɣeeani tɛ lɛ kpɔɔlani? Te niitiɛ vaani te tele‐bo tuo‐wo nui vaa ʋai yɛni ná luo te bo ga seeze, nui zai zu wo woia dɔɔ ma wo paa,

⁵³wai tɔgi wuloni Gala ta ɣeelaitiɛ la é ziili wiɛ, wa wɔ wɛ lɛ ziɛni la.”

⁵⁴Tei te fai niitiɛ mɛnini, é wãlani tiɛ ga tamaa te veli Setiifɛ̃ ya kpala ga zii‐ɣaa‐wãla.

⁵⁵Kɛ̀ tei tɔwɔ zii laa ʋegɛi ɣɛ Gala baa ŋinɛgi vɛ é ɣaazu zeini gee wɔlɔgi wu taamuu é wɛlɛ Gala na bɔɔlɔlai va, na ɣa ɣɛɛ na é Ziizɛ vɛtɛ loni ga Gala zee za‐su vele.

⁵⁶É ɣɛ tea, “Wɛlɛ, gè wɛlɛɛ gee wɔlɔgi va daa laogɛi, gè wɛlɛɛ wɔnɔ nu ƃuse lui va é loni ga Gala zee za‐su vele.”

⁵⁷Kɛ̀ te lobani te yee vɛɛ wui la te ƃɔ su te lɛɛ la ɣili‐ɣili.

⁵⁸Te zɛba do te wulo la tai va ga te paa ga kwɔti. Seeleitiɛ te ta zeɣeitiɛ wuuni zolopoi wɔwɔ wu daa ɣɛni ga Sɔɔ.

⁵⁹Tei te ɣɛni Setiifɛ̃ zɔɔzu ga kwɔti, é Gala felini yíɛ ɣɛ tea, “Màliɣii Ziizɛ, yee zei zɛ̀ʋui wu.”

⁶⁰É vileni ŋibia é loba yíɛ ɣɛ tea, “Màliɣii, mɛ lɛ te zo faa yowũi nii zu.” Tei é nii woni, é zaani.